Vuyani KuYehova!

“Vuyani eNkosini amaxesha onke; ndiyaphinda ndithi, Vuyani.”—FILIPI 4:4.

1. Kutheni sisenokuzibuza ukuba uPawulos wayethetha ukuthini xa wathi amaKristu kufuneka ahlale evuya?

KULE mihla siphila kuyo, zisenokubonakala zinqongophele izizathu zokuvuya. Abantu abenziwe ngothuli, kwanamaKristu okwenyaniso, bajamelana neemeko ezibangela usizi—ukungaqeshwa, impilo enkenenkene, ukufa kwabantu esibathandayo, iingxaki zobuntu, okanye ukuchaswa ngamalungu entsapho angakholwayo okanye ngabo babesakuba ngabahlobo. Ngoko simele sisiqonde njani isiluleko sikaPawulos esithi, “Vuyani . . . amaxesha onke”? Ngenxa yeemeko ezingentle nezilingayo esifanele sijamelane nazo sonke, ngaba oku kunokwenzeka? Ukuxubusha umongo wala mazwi kuya kusinceda sicacelwe ngulo mbandela.

Kutheni Simele Sivuye Yaye Sinokuvuya Njani?

2, 3. Lubaluleke ngantoni uvuyo, njengoko kuboniswe kwimeko kaYesu neyamaSirayeli amandulo?

² “Vuyani eNkosini amaxesha onke; ndiyaphinda ndithi, Vuyani.” Oku kusenokusikhumbuza amazwi awathethwa kumaSirayeli kwiinkulungwane ezimalunga nama-24 ezadlulayo: “Uvuyo lukaYehova ligwiba lenu,” okanye ngokutsho kwenguqulelo kaMoffatt: “Ukuvuya kulowo uNgunaphakade ngamandla enu.” (Nehemiya 8:10) Uvuyo lunikela amandla yaye lufana negwiba ubani anokuzimela kulo ukuze afumane intuthuzelo nenkuseleko. Uvuyo lwanceda nomntu ofezekileyo uYesu wanyamezela. “Ngenxa yovuyo olwalubekwe phambi kwakhe, wawunyamezela [umthi wentuthumbo, NW], elidelile ihlazo, waza wahlala phantsi ngasekunene kwetrone kaThixo.” (Hebhere 12:2) Ngokucacileyo, ukukwazi ukuvuya phezu kwabo nje ubunzima kubalulekile ukuze usinde.

³ Ngaphambi kokuba angene kwiLizwe Ledinga, amaSirayeli ayalelwa oku: “Uvuye nendlu yakho ezintweni zonke ezilungileyo akunikileyo uYehova uThixo wakho, wena, nomLevi, nomphambukeli ophakathi kwenu.” Imiphumo yokungamkhonzi ngovuyo uYehova yayiya kuba qatha. “Zoza ke phezu kwakho ezo ziqalekiso zonke, zikusukele, zikufumane ude utshabalale . . . ngenxa yokuba ungamkhonzanga uYehova uThixo wakho ngokuvuya, nangokuchwayitha kwentliziyo, ngenxa yobuninzi bezinto zonke.”—Duteronomi 26:11; 28:45-47.

4. Kutheni sisenokungavuyi?

⁴ Ngoko ke, kubalulekile ukuba intsalela ethanjisiweyo yanamhlanje namaqabane ayo “ezinye izimvu” ivuye! (Yohane 10:16) UPawulos, ngokuphinda isiluleko sakhe esithi, “ndiyaphinda ndithi,” wabethelela ukubaluleka kokuvuya ngenxa yazo zonke izinto ezilungileyo asenzele zona uYehova. Ngaba siyavuya? Okanye ngaba sixakeka gqitha zizinto zobomi zemihla ngemihla kangangokuba maxa wambi sizilibale izizathu ezininzi esinazo zokuvuya? Ngaba iingxaki ziba nkulu kakhulu ngokokude zibusithe uBukumkani neentsikelelo zabo kuthi? Ngaba sivumela ezinye izinto—ukungathobeli imithetho kaThixo, ukugatya imigaqo yobuthixo, okanye ukutyeshela imisebenzi yamaKristu—zisiphange uvuyo lwethu?

5. Kutheni umntu ongenalwazelelelo ekufumanisa kunzima ukuvuya?

⁵ “Ulwazelelelo lwenu malwazeke kubantu bonke. INkosi isondele.” (Filipi 4:5, NW) Umntu ongenalwazelelelo akalungelelananga. Usenokusilela ukunyamekela impilo yakhe ngokufanelekileyo, ngokungeyomfuneko esenza umzimba wakhe uxinezeleke okanye axhalabe ngokungeyomfuneko. Mhlawumbi akafundanga kusamkela isibakala sokuba usikelwe umda kwizinto ezithile aze aphile ngokuvisisana noko. Usenokuzibekela usukelo oluphakame kakhulu aze azame ukulufikelela nokuba sekumnyam’ entla. Okanye usenokusebenzisa ukusikelwa kwakhe umda njengesingxengxezo sokuthoba isantya okanye sokuyekelela umxakatho. Ekubeni engalungelelananga yaye engenalwazelelelo, ufumanisa ukuba kunzima ukuvuya.

6. (a) Yintoni afanele ayibone kuthi amaKristu esikhonza nawo, yaye oku kunokwenzeka kuphela xa kutheni? (b) Amazwi kaPawulos akweyesi-2 kwabaseKorinte 1:24 nakumaRoma 14:4 asinceda njani sibe nolwazelelelo?

⁶ Nokuba abachasi basijonga njengabantu abanempambano, amaKristu esikhonza nawo afanele asoloko elubona ulwazelelelo lwethu. Yaye aya kwenjenjalo ukuba silungelelene yaye asilindelanga ukuba thina okanye abanye benze izinto ngokungathi bafezekile. Ngaphezu koko, simele singaze sithwalise abanye imiqathango engaphezu koko kuyalelwa liLizwi likaThixo. Umpostile uPawulos wathi: “Anditsho ngakulugagamela ukholo lwenu; nditsho ngokuba singabasebenza nani uvuyo lwenu.” (2 Korinte 1:24) Njengalowo wayengumFarisi, uPawulos wayesazi kakuhle ukuba imithetho engqongqo ebekwe ngabo banegunya ayilubangeli uvuyo ngoxa amacebiso aluncedo anikelwa ngabo usebenza nabo elwandisa. Isibakala sokuba “iNkosi isondele” sifanele sikhumbuze umntu onolwazelelelo ukuba asifanele ‘sigwebe isicaka somnye. Ukuma kwaso, nokuba kukuwa kwaso, kusenkosini yaso.’—Roma 14:4.

7, 8. Kutheni amaKristu emele alindele ukuba neengxaki, kodwa kwenzeka njani ukuba aqhubeke evuya?

⁷ “Ningaxhaleli nto; mazithi iingcelo zenu ezintweni zonke, ngako ukuthandaza nokukhunga, ndawonye nokubulela, zaziswe kuye uThixo.” (Filipi 4:6) Namhlanje siphila ‘kumaxesha anomngcipheko ekunzima ukuhlangabezana nawo’ uPawulos awabhala ngawo. (2 Timoti 3:1-5, NW) Ngoko amaKristu amele alindele ukujamelana neengxaki. Amazwi kaPawulos athi ‘amaxesha onke vuyani’ akathethi ukuba akunakwenzeka ukuba umKristu onyanisekileyo ngamaxesha athile aphelelwe lithemba okanye adimazeke. Kwimeko kaPawulos, ethetha inyaniso wavuma: “Siyabandezelwa ngeenxa zonke, singaxineki; siyathingaza, singancami; sitshutshiswa, asiyekelwa; sikhahlelwa phantsi, asitshatyalaliswa.” (2 Korinte 4:8, 9) Noko ke, uvuyo lomKristu luyawanciphisa luze ekugqibeleni luwaphelise amathuba okuba nexhala nawokukhathazeka. Lunikela amandla afunekayo okuqhubeka utyhalela phambili, ungaze uzilibale izizathu ezininzi zokuvuya.

⁸ Xa kuvela iingxaki, nokuba zinjani na, umKristu ovuyayo ngokuthobeka ucela uncedo lukaYehova ngomthandazo. Akanikezeli ekukhathazekeni okugqithisileyo. Emva kokwenza konke anokukwenza ngokusengqiqweni ukuze acombulule loo ngxaki, umphumo uwushiyela ezandleni zikaYehova ngokuvisisana nesi simemo: “Umthwalo wakho wulahlele kuYehova; yena wokuzimasa.” Ngelo xesha, umKristu uyaqhubeka ebulela uYehova ngako konke ukulunga Kwakhe.—INdumiso 55:22; kwakhona bona uMateyu 6:25-34.

9. Ukwazi inyaniso kulubangela njani uxolo lwengqondo, yaye oku kunawuphi umphumo olungileyo kumKristu?

⁹ “Uxolo lukaThixo, olugqithisele kuko konke ukuqonda, luya kuzigcina iintliziyo zenu neengqiqo zenu kuKristu Yesu.” (Filipi 4:7) Ukwazi inyaniso yeBhayibhile kuyayikhulula ingqondo yomKristu ebuxokini yaye kuyamnceda avelise iindlela zokucinga ezifanelekileyo. (2 Timoti 1:13) Ngaloo ndlela uyancedwa aphephe ihambo embi okanye engeyoyabulumko enokonakalisa ulwalamano loxolo nabanye. Kunokuba anxunguphale ngenxa yokungekho sikweni nobungendawo, ukholosa ngoYehova ukuba acombulule iingxaki zoluntu ngoBukumkani. Uxolo lwengqondo olunjalo lulawula intliziyo yakhe, lugcina iintshukumisa zakhe zinyulu, yaye lwenza ukuba acinge ngendlela yobulungisa. Iintshukumisa ezinyulu nendlela elungileyo yokucinga, zibangela izizathu ezininzi zokuvuya, phezu kwazo nje iingxaki neengcinezelo ezibangelwa lihlabathi elineziphithiphithi.

10. Uvuyo lokwenyaniso lunokufunyanwa kuphela ngokuthetha okanye ngokucinga ngantoni?

¹⁰ “Elokugqiba, bazalwana, ndithi, iinto zonke eziyinene, iinto zonke ezindilekileyo, iinto zonke ezibubulungisa, iinto zonke ezinyulu, iinto zonke ezithandekayo, iinto zonke eziludumo lulungileyo, ukuba kukho sidima, ukuba kukho ndumiso, zithelekeleleni ezo zinto.” (Filipi 4:8) UmKristu akonwatyiswa kukuthetha okanye kukucinga ngezinto ezimbi. Oku ngokuzenzekelayo kuthetha ukuba akonwatyiswa ziindlela ezininzi zokuzonwabisa ezinikelwa lihlabathi. Akukho namnye onokuhlala enovuyo lobuKristu ukuba uzalisa ingqondo nentliziyo yakhe ngobuxoki, intetho yobuyatha nezinto ezingezozabulungisa, ezokuziphatha kakubi, ezingenasidima, ezithiyekileyo, nezilizothe. Ngokuphandle, akukho mntu unokufumana uvuyo lokwenyaniso ngokuzalisa ingqondo nentliziyo yakhe ngezinto ezingcolileyo. Kwihlabathi likaSathana elonakeleyo, hayi indlela ekukhuthaza ngayo ukwazi ukuba amaKristu anezinto ezininzi gqitha ezilungileyo anokucinga nanokuxubusha ngazo!

Izizathu Ezininzi Zokuvuya

11. (a) Yintoni esingafanele siyijonge njengengabalulekanga, yaye ngoba? (b) Ukubakho kwindibano yezizwe ngezizwe kwaba nawuphi umphumo kowayekho nomfazi wakhe?

¹¹ Xa sithetha ngezizathu zokuvuya, masingabulibali ubuzalwana bethu bezizwe ngezizwe. (1 Petros 2:17) Ngoxa amaqela ehlabathi ezizwe neentlanga ebonisa ukuthiyana ngokukrakra, abantu bakaThixo bamanyana ngakumbi eluthandweni. Umanyano lwabo lubonakala ngokukhethekileyo kwiindibano zezizwe ngezizwe. Ngendibano eyaqhutyelwa eKiev, eUkraine, ngowe-1993 olunye undwendwe lwaseUnited States lwabhala: “Iinyembezi zovuyo, amehlo abonisa uchulumanco, ukuwolana ngamaxesha onke ngokungathi kusentsatsheni, nokubulisana kwamaqela abantu ahleli kumacala ahlukahlukeneyo ebala lemidlalo awangawangisa iiambrela neetshefu ezimibalabala ngokucacileyo bekubonisa umanyano lobuthixo. Iintliziyo zethu ziphuphuma uxabiso ngoko uYehova akuphumeze ngokungummangaliso kubuzalwana behlabathi lonke. Oku kusichukumise ngokunzulu mna nomfazi wam yaye kongezelele intsingiselo entsha kukholo lwethu.”

12. UIsaya 60:22 uzaliseka njani phambi kwethu?

¹² Hayi indlela okomelez’ ukholo ngayo kumaKristu namhlanje ukubona iziprofeto zeBhayibhile zizaliseka phambi kwawo! Ngokomzekelo, khawuqwalasele amazwi akuIsaya 60:22: “Omncinanana uya kuba liwaka, noweyeleyo abe luhlanga olunamandla. Mna, Yehova, ndiya kukukhawulezisa oko ngexesha lako oko.” Ngexesha lokuzalwa koBukumkani ngowe-1914, babengama-5 100 kuphela—omncinanana—ababeshumayela ngenkuthalo. Kodwa kule minyaka mihlanu idluleyo, ubuzalwana behlabathi lonke bebusanda ngomlinganiselo wamaNgqina asandul’ ukubhaptizwa angama-5 628 veki nganye! Ngowe-1993, kwafikelelwa incopho yabalungiseleli abakhutheleyo abazizi-4 709 889. Khawufan’ ucinge! Oku kuthetha ukuba “omncinanana” wangowe-1914 ngokoqobo akusentsuku zatywala abe “liwaka”!

13. (a) Bekusenzeka ntoni ukususela ngowe-1914? (b) AmaNgqina kaYehova awuthobela njani umgaqo okumazwi kaPawulos akweyesi-2 kwabaseKorinte 9:7?

¹³ Ukususela ngowe-1914 uKumkani onguMesiya ubeseyisa phakathi kweentshaba zakhe. Ulawulo lwakhe luye lwaxhaswa ngabalandeli abangabantu abanomoya ovumayo abanikela ngexesha, amandla nangemali ukuze kuqhutywe umsebenzi wokushumayela ehlabathini lonke kunye nomsebenzi wokwakha kumazwe ngamazwe. (INdumiso 110:2, 3) AmaNgqina kaYehova ayavuyiswa kukufumaneka kweminikelo yemali ukuze kugqitywe le misebenzi, nangona kungafane kuthethwe ngemali kwiintlanganiso zawo.a (Thelekisa eyoku-1 yeziKronike 29:9.) AmaKristu okwenyaniso akuyomfuneko ukuba asoloko ekhunjuzwa ngokunikela; akugqala kulilungelo ukuxhasa uKumkani wawo ngomlinganiselo iimeko zawo eziwavumela ngawo, ngamnye “njengoko agqibe ngako entliziyweni; makungabi kokuphuma kabuhlungu, nangokunyanzelwa.”—2 Korinte 9:7.

14. Yiyiphi imeko ebibonakala phakathi kwabantu bakaThixo ukususela ngowe-1919, nto leyo ebanika siphi isizathu sokuvuya?

¹⁴ Ukubuyiselwa konqulo lokwenyaniso phakathi kwabantu bakaThixo okwaxelwa kwangaphambili kuphumele ekudalweni kweparadisi yokomoya. Ukususela ngowe-1919 ibisanda ngokuqhubekayo. (INdumiso 14:7; Isaya 52:9, 10) Ube yintoni umphumo? AmaKristu okwenyaniso ‘anemihlali nemivuyo.’ (Isaya 51:11) Isiqhamo esilungileyo esingumphumo woko sibubungqina boko kunokuphunyezwa ngumoya oyingcwele kaThixo ngabantu abangafezekanga. Lonke uzuko nembeko luya kuYehova, kodwa liliphi elinye ilungelo elibalaseleyo kunelo lokusebenza noThixo? (1 Korinte 3:9) UYehova unamandla aneleyo okwenza amatye, ukuba kuyimfuneko, avakalise isigidimi senyaniso. Sekunjalo, ukhethe ukungasebenzisi le ndlela, kodwa, ukhethe ukukhuthaza izidalwa ezivumayo ezenziwe ngothuli ukuba zenze ukuthanda kwakhe.—Luka 19:40.

15. (a) Ziziphi iziganeko ezenzekayo esizilandela ngomdla? (b) Sisiphi isiganeko esikhangele phambili kuso ngovuyo?

¹⁵ Bezaliswe yintlonelo enzulu, abakhonzi bakaYehova ngoku babukele iziganeko zehlabathi njengoko zinokuthanani neziprofeto zeBhayibhile ezisaseleyo. Iintlanga zizama ngamandla—kodwa aziphumeleli—ukufumana uxolo olunokuhlala luhleli. Iziganeko ezenzekayo zibangela ukuba zifune ukucela intlangano yeZizwe Ezimanyeneyo yenze okuthile kwimimandla eneziphithiphithi. (ISityhilelo 13:15-17) Ngaxeshanye, abantu bakaThixo sele bekhangele phambili benolindelo olukhulu kwesona siganeko sivuyisa gqitha kwezakha zenzeka, esisondela ngakumbi mhla ngamnye udlulayo. “Masivuye sigcobe, siyizukise; ngokuba ufikile umsitho weMvana, umfazi wayo uzilungisile.”—ISityhilelo 19:7.

Ukushumayela—Ngaba Kungumthwalo Okanye Kuyavuyisa?

16. Khawubonise indlela ukusilela ukusebenzisa oko akufundileyo okunokuluphelisa ngayo uvuyo lomKristu.

¹⁶ “Kwaezo zinto nazifundayo, nazamkela, naziva, nazibona kum, yenzani zona ezo; waye uThixo woxolo eya kuba nani.” (Filipi 4:9) Ngokusebenzisa oko akufundileyo, amaKristu anokulindela ukufumana intsikelelo kaThixo. Enye yezona zinto zibalulekileyo azifundileyo yimfuneko yokushumayela iindaba ezilungileyo kwabanye. Enyanisweni, ngubani obenokunandipha uxolo lwengqondo okanye avuye ukuba ebefihle inkcazelo kubantu abantliziyo zinyanisekileyo ubomi babo obuxhomekeke kuyo?—Hezekile 3:17-21; 1 Korinte 9:16; 1 Timoti 4:16.

17. Kutheni umsebenzi wethu wokushumayela ufanele ube ngumthombo wovuyo ngamaxesha onke?

¹⁷ Hayi indlela ekuvuyisa ngayo ukufumana abantu abanjengezimvu abakulungeleyo ukufunda ngoYehova! Enyanisweni, abo bakhonza ngentshukumisa elungileyo baya kusoloko beyifumanisa ingumthombo wovuyo inkonzo yoBukumkani. Oku kungenxa yokuba esona sizathu siphambili sokuba liNgqina likaYehova kukudumisa igama Lakhe nokuphakamisa isikhundla Sakhe njengoMlawuli onguMongami. (1 Kronike 16:31) Umntu oyiqondayo le nyaniso uya kuvuya naxa abantu ngokungenabulumko bezichasa iindaba ezilungileyo aziphetheyo. Uyazi ukuba ngaminazana ithile kuya kuyekwa ukushumayela kwabangakholwayo; ukudunyiswa kwegama likaYehova kuya kuqhubeka ngonaphakade.

18. Yintoni eshukumisela umKristu ukuba enze ukuthanda kukaYehova?

¹⁸ Unqulo lokwenyaniso lushukumisela abo bakulo ukuba benze izinto ezifunwa nguYehova, kungekhona ngenxa yokunyanzelwa, kodwa ngenxa yokuba bethanda. (INdumiso 40:8; Yohane 4:34) Abantu abaninzi bakufumanisa kunzima ukukwamkela oku. Elinye inenekazi lakha laxelela elinye iNgqina elalilityelele oku: “Uyabona, ndifanele ndinincome. Ndiqinisekile andinakuze ndiphume ndingena kwindlu ngendlu ndishumayele ngonqulo lwam njengokuba nisenza.” Lincumile eli Ngqina laphendula: “Ndiyayiqonda indlela ovakalelwa ngayo. Ngaphambi kokuba ndibe ngomnye wamaNgqina kaYehova, wawungenakuze undenze ndiye ebantwini ndithethe ngonqulo. Kodwa ngoku ndiyakuthanda oko.” Eli nenekazi lacinga umzuzwana landula laqukumbela ngelithi: “Licacile elokuba unqulo lwenu lunento oluyinikelayo olwam olungenayo. Mhlawumbi kufuneka ndikhe ndiphande.”

19. Kutheni ngoku ilixesha lokuvuya kunanini na ngaphambili?

¹⁹ Umxholo wonyaka we-1994, obhalwe ngokubonakalayo kwiiHolo zethu zoBukumkani, ngokuthe rhoqo usikhumbuza oku: “Kholosa ngoYehova ngentliziyo yakho yonke.” (IMizekeliso 3:5) Ngaba sikho esinye isizathu sokuvuya esibaluleke ngaphezu kweso sokukholosa ngoYehova, igwiba lethu esizimela kulo? INdumiso 64:10 iyachaza: “Liya kuvuya ilungisa ngoYehova, lizimele ngaye.” Eli asiloxesha lokuxengaxenga okanye lokunikezela. Nyanga nganye edlulayo isisondeza ekuzalisekeni koko abakhonzi bakaYehova bebelangazelela ukukubona ukususela kwimihla ka-Abheli. Ngoku lixesha lokuba sikholose ngoYehova ngentliziyo yethu yonke, sisazi ukuba asizange ngaphambili sibe nezizathu zokuvuya ezininzi kangaka!

[Umbhalo osemazantsi]

Ubunokuphendula Uthini?

◻ Kutheni, ngokutsho kukaNehemiya 8:10, sifanele sivuye?

◻ IDuteronomi 26:11 neyama-28:45-47 ikubonisa njani ukubaluleka kokuvuya?

◻ AmaFilipi 4:4-9 anokusinceda njani sisoloko sivuya?

◻ Sisiphi isizathu sokuvuya umxholo wonyaka we-1994 osinika sona?

[Umfanekiso okwiphepha 16]

AmaNgqina aseRashiya nawaseJamani ayakuvuyela ukuba yinxalenye yobuzalwana bezizwe ngezizwe

[Umfanekiso okwiphepha 17]

Ukwabelana nabanye ngenyaniso kubangela uvuyo