Masibe Nemihlali Kunye!
KUYE kusiba nzima ukufumana ulonwabo novuyo. Kubantu abaninzi kubonakala kunzima ukuthetha ngezinto ezintle nabanye. Ubomi bale mihla, ingakumbi kwiidolophu ezinkulu, benza abantu babe ngoonkom’ idla yodwa.
UNjingalwazi weZifundo Ezingokusebenza Kwengqondo uAlberto Oliverio uthi: “Kuqheleke kakhulu ukubona abantu abangamalolo” yaye “alithandabuzeki elokuba abantu abakwiindawo ezinezakhiwo ezininzi badla ngokuba ngamakheswa. Kwiimeko ezininzi, loo nto inokusenza singabahoyi abantu esisebenza nabo eofisini, abamelwane, okanye umabhalana osebenza kwivenkile eselumelwaneni.” Oko kuzikhetha kudla ngokuphumela kuxinezeleko.
Kodwa ke, umoya wabazalwana bethu abangamaKristu, wahlukile. Umpostile uPawulos wathi: “Hlalani ninemihlali.” (1 Tes. 5:16) Sinezizathu ezininzi zokuba novuyo nokuba nemihlali kunye. Sinqula Oyena Thixo Uphakamileyo, uYehova; siyasiqonda isigidimi seBhayibhile senyaniso; sinethemba losindiso nelobomi obungunaphakade; yaye sinokunceda nabanye bafumane iintsikelelo ezifanayo.—INdu. 106:4, 5; Yer. 15:16; Roma 12:12.
Ukuba nemihlali nokuvuyisana nabanye ziimpawu zamaKristu enene. Ngoko akumangalisi ukuba uPawulos abhalele amaFilipi esithi: “Ndichulumancile yaye ndivuyisana nani nonke. Ngokunjalo ke nani chulumancani nize nivuyisane nam.” (Fil. 2:17, 18) Kule ndinyana, ngamagama nje ambalwa, uPawulos sele ethethe kabini ngokuchulumanca nokuvuyisana nabanye.
Kakade ke, amaKristu amele aluphephe naluphi na utyekelo lokuzikhetha kwabanye. Akukho mntu uzinxwemayo onokukwazi ukuba nemihlali nabanye abazalwana. Ngoko sinokusilandela njani isibongozo sikaPawulos ‘sokuqhubeka sinemihlali eNkosini’ kunye nabazalwana bethu?—Fil. 3:1.
Yiba Nemihlali Kunye Nabazalwana Bakho
Xa uPawulos wabhala ileta yakhe eyayisiya kumaFilipi, kusenokwenzeka ukuba wayelibanjwa eRoma ngenxa yokushumayela kwakhe. (Fil. 1:7; 4:22) Sekunjalo, ukuvalelwa kwakhe akuzange kumenze abutyhafele ubulungiseleli. Ngokwahlukileyo, waba nemihlali kukukhonza uYehova kangangoko wayenako ‘nangokugalelwa njengomnikelo othululwayo.’ (Fil. 2:17) Isimo sengqondo sikaPawulos sibonisa ukuba uvuyo lomntu aluxhomekekanga kwimeko akuyo. Ngaphezu nje kokuvalelwa kwakhe, wathi: “Ndisaza kuqhubeka ndinemihlali.”—Fil. 1:18.
UPawulos wayemisele ibandla laseFilipi waza waziva ebathanda abazalwana bakhe balapho. Wayesazi ukuba xa evuya kunye nabo ngenxa yokukhonza uYehova, loo nto yayiya kubakhuthaza nabo. Ngenxa yoko, wathi: “Ke kaloku ndinqwenela ukuba nazi, bazalwana, okokuba izinto ezandihlelayo ziye zaphumela ekuhanjiselweni phambili kweendaba ezilungileyo kunangenye indlela, kangangokuba imixokelelwane yam iye yaziwa esidlangalaleni ngokunxulumene noKristu phakathi kwalo lonke iQela Labalindi Bakomkhulu nabo bonke abanye.” (Fil. 1:12, 13) Isibakala sokuba uPawulos wayesabelana nabazalwana bakhe ngamava akhuthazayo sibonisa ukuba wayechulumanca yaye evuyisana nabo. Kusenokwenzeka ukuba namaFilipi avuyisana noPawulos. Kodwa ke, ukwenza loo nto kwakufuna ukuba angadimazeki ngenxa yezinto ezazisehlela uPawulos. Kunoko, kwakufuneka baxelise umzekelo wakhe. (Fil. 1:14; 3:17) Ngaphezu koko, amaFilipi ayenokuqhubeka emthandazela uPawulos, emnceda yaye emxhasa nangayiphi na indlela awayenokukwazi ngayo.—Fil. 1:19; 4:14-16.
Ngaba nathi sibonisa umoya wokuvuya njengoPawulos? Ngaba siye sizame ukujonga iinkalo ezintle zeemeko zethu ebomini nezobulungiseleli bethu bamaKristu. Xa sikunye nabazalwana bethu, kuyinto entle ukuvuyisana ngomsebenzi wokunikela ubungqina. Akunyanzelekanga ukuba side sibe namava abalaseleyo ukuze senze le nto. Kusenokwenzeka ukuba siye senza umntu othile waba nomdla kwisigidimi soBukumkani sisebenzisa intshayelelo nendlela yokuqiqa echukumisayo. Mhlawumbi siye sancokola kamnandi nomninimzi ngendinyana ethile yeBhayibhile. Okanye kusenokwenzeka ukuba siye saqondwa ukuba singamaNgqina kaYehova entsimini, nto leyo eye yanikela ubungqina. Xa sisabelana nabanye ngaloo mava siya kukwazi ukuba nemihlali nabo.
Uninzi lwabantu bakaYehova luye lwancama izinto ezithile yaye lusaqhubeka lusenjenjalo ukuze umsebenzi wokushumayela uhambele phambili. Oovulindlela, abaveleli abahambahambayo, abazalwana baseBheteli, abathunywa bevangeli nabakhonzi bamazwe ngamazwe bayazibhokoxa kwinkonzo yexesha elizeleyo yaye baba nemihlali njengoko besenjenjalo. Ngaba siyachulumanca size sivuyisane nabo? Masibonise uxabiso ngala ‘madlelane ngenxa yobukumkani bukaThixo.’ (Kol. 4:11) Xa sikunye nabo kwiintlanganiso zebandla okanye kwiindibano ezinkulu zamaKristu, sinokubakhuthaza ngokunyanisekileyo. Kwakhona, sinokuxelisa umzekelo wabo wokukhuthala. Sinokuzenzela “ithuba” lokuphulaphula amava namazwi abo awakhayo ngokuthi sibamemele emakhayeni ethu, mhlawumbi sitye nabo isidlo.—Fil. 4:10.
Yiba Nemihlali Nabantu Abajongana Nezilingo
Ukunyamezela intshutshiso nokoyisa izilingo kwenza uPawulos wazimisela nangakumbi ukuhlala ethembekile kuYehova. (Kol. 1:24; Yak. 1:2, 3) Ukwazi ukuba nabazalwana baseFilipi babesenokwehlelwa zizilingo ezifanayo baze bakhuthazwe kukunyamezela kwakhe, kwamenza waba nesizathu sokuchulumanca nokuvuya kunye nabo. Ngenxa yoko, wathi: “Nina nanikwa ilungelo ngenxa kaKristu, kungekuphela nje lokuba nikholwe kuye, kodwa nelokuba nibandezeleke ngenxa yakhe. Kuba nani nikumzabalazo ofanayo nalowo niwubonileyo kum nanjengoko nisiva ukuba ndikuwo.”—Fil. 1:29, 30.
Ngokufanayo namhlanje, amaKristu ayatshutshiswa ngenxa yokuba enikela ubungqina. Ngamanye amaxesha le ntshutshiso inogonyamelo, kodwa amaxesha amaninzi iza ngeendlela ezingaqondakaliyo. Isenokuza ngezityholo zobuxoki ezivela kubawexuki, ukuchaswa ngamalungu entsapho, ukugculelwa ngabantu osebenza nabo okanye ofunda nabo. UYesu walumkisa wathi ezi zilingo azimele zisimangalise okanye zisidimaze. Kunoko, zizizizathu zokuba nemihlali. Wathi: “Ninoyolo nina xa abantu beningcikiva, benitshutshisa, bethetha ngani lonke uhlobo lwento engendawo bexoka, ngenxa yam. Yibani nemihlali nixhume ngovuyo, ngokuba umvuzo wenu mkhulu emazulwini.”—Mat. 5:11, 12.
Asimele soyike okanye sityhwatyhwe xa sisiva ukuba abazalwana bethu bajongana nenkcaso ekrakra kumazwe athile. Kunoko, sifanele sibe nemihlali ngenxa yonyamezelo lwabo. Sinokubathandazela, sicele uYehova omeleze ukholo nonyamezelo lwabo. (Fil. 1:3, 4) Ekubeni singenakubenzela nto ingako abo bazalwana, sinokunceda abo bakwibandla lethu abehlelwa zizilingo. Sinokubakhathalela size sibaxhase. Sinokuzenzela amathuba okuvuya nabo ngokuthi ngamanye amaxesha sibameme ebudeni bengokuhlwa yoNqulo Lwentsapho, sisebenze nabo entsimini, size sizihlaziye kunye nabo.
Sinezizathu ezininzi zokuba nemihlali kunye! Masiwuxhathise umoya weli hlabathi wokuzinxwema ebantwini size siqhubeke sivuya nabazalwana bethu. Xa sisenjenjalo, siya kufak’ isandla kungekuphela nje kuthando nakumanyano lwebandla kodwa siya kunandipha ubuhlobo nabazalwana bethu abangamaKristu ngokuzeleyo. (Fil. 2:1, 2) Ewe, “Hlalani ninemihlali eNkosini, kuba uPawulos usibongoza esithi: “Ndiyaphinda ndithi, Yibani nemihlali!”—Fil. 4:4.
[Inkcazelo Ngomfanekiso okwiphepha 6]
Globe: Courtesy of Replogle Globes