Abavakalisi BoBukumkani Bayabalisa
“Mchaseni Ke UMtyholi, Wonibaleka”
KWINKULUNGWANE yokuqala, iqela elalinenzondelelo ‘labenza izenzo zobugqi’ e-Efese lasabela kwisigidimi samaKristu ngokuthi lizitshise phambi kwabo bonke iincwadi zalo zobugqi. (IZenzo 19:19) Lilonke ixabiso lezi ncwadi laba ngamaqhosha esilivere angama-50 000. Ukuba ingxelo yeBhayibhile ibhekisela kwidenariyo, ingqekembe yesilivere yamaRoma, ubuncinane ibiya kuba ziirandi ezili-127 600!
Namhlanje kukho abaninzi ababekhe baneencwadi zobugqi kodwa babonisa uzimiselo olufana nolwamaEfese amandulo. Khawuqwalasele la mava alandelayo aseKhanada.
Malunga neminyaka emihlanu edluleyo, omnye wamaNgqina kaYehova wayeshumayela kwindlu ngendlu xa kwathi kwenye indlu umfazi othile ogama linguNora wamtsala ngokoqobo wamngenisa endlwini yakhe. Kwiminyaka emininzi ekwiphulo lokufuna ukhokelo lokomoya, uNora wayeqokelele amakhulu eencwadi zonqulo nezokusebenzelana nemimoya, kodwa wayefuna ukwazi oko kuthethwa yiBhayibhile ngethemba labafileyo. Eli Ngqina lamnika iphecana elithi Liyintoni Ithemba Ngabafileyo Obathandayo? Imibuzo kaNora yaphenduleka, yaye wamkela umrhumo wamaphephancwadi IMboniselo noVukani!
Kamva wafuduka waza walahlekana namaNgqina kaYehova. Noko ke, waqhubeka efumana amaphephancwadi ngeposi kwikhelingi yakhe entsha. Kwakhona waodola ezinye iimpapasho ezisekelwe eBhayibhileni ezikhankanywe kuloo maphephancwadi. Emva kwethuba elithile, omnye wamaNgqina kaYehova wafika endlwini yakhe. Echukunyiswe sisibakala sokuba elo Ngqina lalityhila eBhayibhileni xa liphendula imibuzo yakhe, uNora walamkela waza walicela ukuba liphinde libuye ukuze baxubushe ngokubhekele phaya.
Noko ke, eli Ngqina lakufumanisa kunzima ukuphinda liqhagamshelane noNora. Laquqa libuyelela ngamaxesha ahlukeneyo emini nangamaxesha ahlukeneyo eveki kodwa lingamfumani. Noko ke, ekuhambeni kwexesha ukuzingisa kwalo kwavuzwa, yaye lavuna lukhulu. Kwaqaliswa isifundo seBhayibhile esithe rhoqo, ngokufuthi esasiqhutywa kathathu ngeveki ngenxa yokunyanzelisa kukaNora. Izinto awayezifunda zamshukumisela ukuba athethe nabahlobo kunye namalungu entsapho yakhe, nto leyo eyaphumela ekubeni abathathu kwaba bacele ukuqhutyelwa isifundo seBhayibhile ngamaNgqina kaYehova.
Kwisifundo sakhe uNora waqonda ukuba kukho iinkonzo zobuxoki nabaprofeti bobuxoki abaninzi kodwa inye kuphela indlela ekhokelela ebomini. Kangangeminyaka emininzi ebefuna iimpendulo kwimibuzo yakhe kwiinkonzo zobuxoki, kodwa emva kokufunda oko iBhayibhile ikuthethayo ngeedemon, wenza ngendlela enza ngayo amaEfese amandulo akhankanywe kwiZenzo 19:19. Walicoca ithala lakhe leencwadi, waza kwisithuba seentsuku eziliqela, watshabalalisa iincwadi ezingaphezu kweziliwaka zobugqi nezeemfundiso zobuxoki zonqulo. Phakathi kweempapasho awazitshabalalisayo, kwakukho iseti yeencwadi ezine ezazixabisa ama-R2 100!
Kubonakala ukuba zingakholiswa sisenzo sikaNora, iidemon zamntlokothisa kangangeeveki ezinokuba mbini. Noko ke, le mimoya ingendawo ayizange ikwazi ukumyekisa ukuqhubeka nesifundo sakhe seBhayibhile nokunxulumana kwakhe nentlangano kaYehova yanamhlanje.
Amava anjalo ayizekelisa kakuhle inyaniso yamazwi eBhayibhile athi: “Mthobeleni ngoko uThixo. Mchaseni ke uMtyholi, wonibaleka.”—Yakobi 4:7.