Ngaba Uyaxolela?

UBILL nentombazana yakhe eneminyaka eli-16 ubudala, uLisa, babenobunzima ekuhlalisaneni kunye. Ngokufuthi ukungavisisani kwabo kwizinto ezincinane kwakuye kukhule kube kukukhonkothana. Ekugqibeleni, olu ngquzulwano lwakhula lwafikelela ekubeni uLisa agxothwe ekhaya.a

Emva kwexesha, uLisa waqonda ukuba yayinguye onetyala waza wafuna ukuxolelwa nguyise. Kodwa kunokuzilibala iimpazamo zikaLisa zexesha elidluleyo, uyise olugcwabevu ngumsindo wazikhaba ngaw’ omane iinzame zakhe zokwenza uxolo. Khawufan’ ucinge! Wayengakulungelanga ukubonakalisa inceba kwintombi yakhe!

Kwiinkulungwane ezadlulayo indoda engenatyala yagwetyelwa ukufa ngetyala engazange ilenze. Amangqina anikela ubungqina bobuxoki, yaye amagosa obupolitika afulathela, ewavala amehlo awo kokusesikweni. Loo ndoda imsulwa yayinguYesu Kristu. Kungekudala ngaphambi kokufa kwakhe, emthandazweni wacela kuThixo esithi: “Bawo, baxolele; kuba abayazi into abayenzayo.”—Luka 23:34.

UYesu waxolela ngokukhululekileyo, ngokusuka entliziyweni, yaye abalandeli bakhe babongozwa ukuba bamxelise kule nkalo. (Efese 4:32) Noko ke, ngokufanayo noBill, abaninzi ngokungenanceba abakulungelanga ukuxolela. Uqhuba njani wena kule nkalo? Ngaba ukulungele ukubaxolela abanye xa bekona? Yaye kuthekani ngezono ezinzulu? Ngaba nazo ezi zifanele zixolelwe?

Ukuxolela Kulucelomngeni

Ukuxolela akusoloko kulula. Yaye kula maxesha anomngcipheko, indlela abantu abaqhubana ngayo iya isiba yingxaki ngakumbi kunanini na ngaphambili. Ngokukodwa ubomi bentsapho ngokufuthi buya buzaliswa luxinezeleko naziingcinezelo. Umpostile uPawulos ongumKristu waxela kwakude kudala ukuba iimeko ezinjalo zaziya kwesamela “ngemihla yokugqibela.” Wathi: “Abantu baya kuba ngabazithandayo, abathandi bemali, abaqhankqalazi, abakratshi, . . . abangenakuthanda kulunga, abancethezi, izityhuthutyhuthu, abathiwe lwale likratshi.”—2 Timoti 3:1-4.

Ngoko, ngokungaphephekiyo sonke sijamelene namandla angaphandle avavanya amandla ethu okuxolela abanye. Okungakumbi kukuba, sikwalwa nxamnye namandla angaphakathi. UPawulos wakhalaza esithi: “Kuba okulungileyo endikuthandayo, andikwenzi; khona okubi, endingakuthandiyo, oko ndiyakwenza. Ukuba ke endingakuthandiyo mna, ndenza khona oko, ayisendim okusebenzayo oko, seyisisono esi simiyo ngaphakathi kwam.” (Roma 7:19, 20) Ngenxa yoku, uninzi lwethu alukwazi ukuxolela ngendlela ebelunqwenela ngayo. Ngapha koko, ukungafezeki esikuzuz’ ilifa nesono kunempembelelo enamandla kuthi sonke, maxa wambi kusiphanga ukubonakalisa imfesane kubantu esikunye nabo.

Xa wakhuthazwa ukuba axolele omnye ngempazamo encinane, omnye umfazi wathi: “Akukho bani uwufaneleyo umgudu wokuxolela.” Xa ekhangelwa amagqabaza anjalo asenokubonakala engenabuhlobo, engqwabalala, ekwangagxekayo. Noko ke, xa siwaphonononga, sibona ukuba atyhila unxunguphalo olukubantu abaninzi xa bejamelene nehlabathi abalibona njengelizingcayo, elingakhathaliyo, nelinobutshaba. Enye indoda yathi: “Abantu bayakuxhaphaza xa ubaxolela. Kufana nokukhwelwa entloko.”

Ngoko, akumangalisi ukuba ukuhlakulela isimo sengqondo sokuxolela kunzima kule mihla yokugqibela. Sekunjalo, iBhayibhile isikhuthaza ukuba sixolele sinobubele. (Thelekisa eyesi-2 kwabaseKorinte 2:7.) Kutheni sifanele sixolele?

[Umbhalo osemazantsi]