Kutheni Ufanele Uxolele?

UMPHENGULULI ongumYuda nokwangumbhali uJoseph Jacobs wakha wakuchaza ukuxolela ‘njengesona sifundo sokuziphatha esikumgangatho ophakamileyo nesona sinzima kunazo zonke.’ Ngenene, abaninzi bakufumanisa kunzima kakhulu ukuwathetha amazwi athi “ndikuxolele.”

Kubonakala ngathi ukuxolela, kuphantse kufane nemali. Kunokusetyenziswa ngokukhululekileyo nangokunenceba kwabanye okanye kunokugogotywa kugcinelwe isiqu sikabani. Indlela yokwenza yokuqala yeyobuthixo. Sifanele sihlakulele umkhwa wokupha ngesisa xa kufikelela ekuxoleleni. Ngasiphi isizathu? Kuba uThixo uyakukhuthaza oku yaye kuba umoya wokungaxoleli, nowenzondo usenokuzenza izinto zibe mbi ngakumbi.

Kuqhelekile ukuweva amazwi athi: “Andicaphuki; ndiyaziphindezelela!” Okulusizi kukuba, la mazwi angumgaqo osisikhokelo kubomi babantu abaninzi namhlanje. Ngokomzekelo, omnye umfazi, wayengafuni ukuthetha nendodakazi yakhe kangangeminyaka engaphezu kwesixhenxe kuba, njengoko lo mfazi esitsho, “wandenzela ukungcola okungakholelekiyo yaye andizange ndikwazi ukumxolela.” Kodwa ukungathethisani nothile, xa kusetyenziswe njengesixhobo sokufuna ukuxolelwa ngulowo wonileyo okanye njengesixhobo sokohlwaya, akufane kuwanelise umnqweno wokuziphindezelela. Kunoko, kusenokuyandisa impikiswano, kuvumela ukuyileka kwenzondo engathethekiyo. Ukuba le ntlungu ayipheliswa, umnqweno ongamandla wokuziphindezelela unokonakalisa ulwalamano kwanempilo kabani.

Ubungozi Bomoya Wokungaxoleli

Xa umntu engafuni ukuxolela, ingxwabangxwaba ebangelwa koko ibangela uxinezeleko. Ngokulandelayo, uxinezeleko lunokukhokelela kwizigulo ezingaginyisi mathe. UGqr. William S. Sadler wabhala: “Akukho bani unokuwuqonda njengogqirha umlinganiselo ophakame ngokumangalisayo wokunxityelelaniswa kwezifo nokubandezeleka koluntu kukukhathazeka, uloyiko, ingxwabangxwaba, . . . iingcinga ezingakhiyo nempilo engacocekanga.” Noko ke, eneneni, ungakanani umonakalo obangelwa kukuphazamiseka ngokweemvakalelo? Enye impapasho yezamayeza iyaphendula: “Amanani . . . abonisa ukuba abaguli ababini kwabathathu ababeye kugqirha babeneempawu ezibangelwe okanye ezenziwe mandundu luxinezeleko lwengqondo.”

Ewe, inzondo, ukucaphuka, nentiyo akunangozi kwaphela. Ezi mvakalelo zibukhali zifana nomhlwa odla umzimba wenqwelo-mafutha ngokuthe ngcembe. Umphandle wenqwelo-mafutha usenokubonakala umhle, kodwa kube kusenzeka inkqubo eyonakalisayo ngaphantsi kwepeyinti.

Okude kwabaluleka ngakumbi kukuba, ukungavumi kwethu ukuxolela xa kukho isizathu sokubonakalisa inceba kukwanokusenzakalisa ngokomoya. Emehlweni kaYehova uThixo, sisenokuba njengomkhonzi kumzekeliso kaYesu. Lo mkhonzi walixolelwa ityala lakhe elikhulu yinkosi yakhe. Sekunjalo, xa omnye akhonza kunye naye wambongoza ukuba amxolele ityala elincinane ngokwentelekiso, waba ngqwabalala yaye akaxolela. UYesu walenza lacaca elokuba ukuba ngokufanayo asikulungelanga ukuxolela, uYehova akasayi kuvuma ukusixolela izono zethu. (Mateyu 18:21-35) Ngoko ke, ukuba asixoleli, sisenokuphulukana nokuba nesazela esicocekileyo phambi koThixo kwanethemba lethu ngekamva! (Thelekisa eyesi-2 kuTimoti 1:3.) Ngoko, yintoni esinokuyenza?

Funda Ukuxolela

Ukuxolela ngokwenyaniso kusuka entliziyweni. Kubandakanya ukuxolela impazamo yomoni yaye uyiphelise nayiphi iminqweno yokuziphindezelela. Ngaloo ndlela, okona kusesikweni kunye nempindezelo esenokufuneka ishiyelwa ezandleni zikaYehova.—Roma 12:19.

Noko ke, kufanele kuphawulwe ukuba ekubeni “intliziyo inenkohliso ngaphezu kweento zonke, isisifo esibi,” ayisoloko ityekela ekuxoleleni kwanaxa ifanele yenjenjalo. (Yeremiya 17:9) NoYesu wathi: “Kuba kuyo intliziyo kuphuma izicamango ezingendawo, ookubulala, ookukrexeza, oomibulo, oobusela, ookungqina ubuxoki, ookunyelisa.”—Mateyu 15:19.

Okuvuyisayo kukuba, iintliziyo zethu zinokuqeqeshelwa ukwenza oko kulungileyo. Noko ke, uqeqesho esilufunayo kufuneka luvele kumthombo ongasentla. Asinakulwenza sisodwa. (Yeremiya 10:23) Umdumisi ophefumlelwe nguThixo wakuqonda oku waza wathandazela ukhokelo lukaThixo. Wambongoza uYehova emthandazweni esithi: “Ndifundise imimiselo yakho. Ndiqondise iindlela zeziyalezo zakho.”—INdumiso 119:26, 27.

Ngokutsho kwenye indumiso, uKumkani uDavide woSirayeli wamandulo ‘wayiqonda indlela’ kaYehova. Waba namava ayo obuqu waza wafunda kuyo. Ngenxa yoko, wakwazi ukuthi: “Unemfesane enobabalo uYehova, uzeka kade umsindo, mkhulu ngenceba. Kunjengokusikwa yimfesane koyise kubantwana, ukusikwa yimfesane kukaYehova kwabamoyikayo.”—INdumiso 103:8, 13.

Kufuneka sifunde njengoko uDavide wenzayo. Masiwufundisise ngomthandazo umzekelo kaThixo ogqibeleleyo wokuxolela, kwanalowo woNyana wakhe. Ngaloo ndlela, sinokufunda ukuxolela ngokusuka entliziyweni.

Ukanti, bambi basekwanokubuza: Kuthekani ngesono esinzulu? Ngaba zonke izono zifanele zixolelwe?

Ukuba Ngolungeleleneyo

Xa umntu aye woniwa ngokunzulu, intlungu inokuba nzulu kakhulu. Oku kuyinyaniso ngokukodwa ukuba ubani ulixhoba elimsulwa lesono esinzulu. Bambi basenokude bazibuze, ‘Ndinokumxolela njani ubani oye ngenkohlakalo wandingcatsha waza wandenzakalisa?’ Kwimeko yesono esinzulu esinokubangela ukususwa kubudlelane, kusenokufuneka ukuba lowo woniweyo asebenzise isiluleko sikaMateyu 18:15-17.

Phofu ke, okungakumbi kusenokuxhomekeka kulowo wonileyo. Ukususela kwixesha lokwenza okubi ngaba kuye kwakho naluphi uphawu lwenguquko yokwenyaniso? Ngaba umoni uye waguquka, mhlawumbi wade walinga nokwenza iinguqulelo zokwenene? Emehlweni kaYehova inguquko enjalo isisikhokelo esisa ekuxolelweni kwanakwimeko yezono ezoyikeka ngokwenene. Ngokomzekelo, uYehova wamxolela uManase, omnye wabona kumkani bangendawo kwimbali kaSirayeli. Ngasiphi isizinzi? UThixo wenjenjalo kuba uManase wade wazithoba ekugqibeleni waze waguquka kwiindlela zakhe ezingcolileyo.—2 Kronike 33:12, 13.

EBhayibhileni inguquko yokwenyaniso iquka inguquko enyanisekileyo yesimo sengqondo, ukuzisola okusuka entliziyweni ngazo naziphi izono ezenziweyo. Apho kufanelekileyo nekunokwenzeka khona, inguquko iphelekwa ngumgudu wokwenza imbuyekezo kulowo woniweyo. (Luka 19:7-10; 2 Korinte 7:11) Apho kungekho nguquko injalo, uYehova akaxoleli.a Ngaphezu koko, uThixo akalindelanga ukuba amaKristu axolele abo babekade bekhanyiselwe ngokomoya kodwa ngoku abathi ngokuzithandela benze okubi ngokungenanguquko. (Hebhere 10:26-31) Kwiimeko ezimbi kakhulu, ukuxolela kusekwanokungafaneleki.—INdumiso 139:21, 22; Hezekile 18:30-32.

Enoba ukuxolelwa kunokwenzeka okanye akunako, lowo woniwe ngokunzulu kusenokufuneka acinge ngomnye umbuzo: Ngaba ndinyanzelekile ukuba ndihlale ndiphazamisekile ngokweemvakalelo, ndizive ndenzakele yaye ndinomsindo ogqithisileyo, de lo mbandela uconjululwe ngokupheleleyo? Khawucinge ngalo mzekelo. UKumkani uDavide wayebuhlungu kakhulu xa umphathi-mkhosi wakhe, uYowabhi, wabulala uAbhinere noAmasa, “amadoda amabini angamalungisa, alungileyo kunaye [uYowabhi].” (1 Kumkani 2:32) UDavide wawubonakalisa umsindo wakhe ngomlomo yaye ngokungathandabuzekiyo kuYehova ngomthandazo. Noko ke, ekuhambeni kwexesha, kumele ukuba umsindo omkhulu uDavide awayenawo wadamba. Akazange alawulwe ngumsindo ukusa ekupheleni kweentsuku zakhe. UDavide wade waqhubeka esebenza noYowabhi, kodwa akazange asuke amxolele lo mbulali ungaguqukiyo. UDavide waqinisekisa ukuba kwakwenziwe okusesikweni ekugqibeleni.—2 Samuweli 3:28-39; 1 Kumkani 2:5, 6.

Kusenokuthabatha ixesha nomgudu othile ngaphambi kokuba umsindo obakho ekuqaleni kwabo benzakaliswe zizono zabanye uphele. Inkqubo yokuchacha inokuba lula ngakumbi xa lowo wonileyo esivuma isiphoso sakhe aze aguquke. Noko ke, lowo woniweyo umsulwa ufanele athuthuzelwe aze axoliswe lulwazi lwakhe ngokusesikweni nabubulumko bukaYehova nakwibandla lamaKristu, kungakhathaliseki ukuba linjani ikhondo lomenzi wobubi.

Kwakhona, qonda ukuba xa uxolela umoni, oku akuthethi ukuba usibetha ngoyaba isono. KumKristu, ukuxolela kuthetha ukuwushiyela ngentembelo loo mbandela ezandleni zikaYehova. UngumGwebi olilungisa wayo yonke indalo, yaye uya kwenza okusesikweni ngexesha elifanelekileyo. Oko kuya kuquka ukugweba ‘abenzi bombulo nabakrexezi’ abangathembekanga.—Hebhere 13:4.

Iingenelo Zokuxolela

Umdumisi uDavide wavuma ingoma esithi: “Ngokuba ulungile wena, Nkosi yam, uxolela; umkhulu ngenceba kubo bonke abakunqulayo.” (INdumiso 86:5) Ngaba njengoYehova, ‘uyaxolela’? Kukho iingenelo ezininzi.

Okokuqala, ukubaxolela abanye kukhuthaza ulwalamano oluhle. IBhayibhile ibongoza amaKristu: “Ke nina yibani nobubele omnye komnye, nibe nemfesane kakhulu, nixolelane, njengokuba naye uThixo wanixolelayo ekuKristu.”—Efese 4:32.

Okwesibini, ukuxolela kubangela kubekho uxolo. Olu asiloxolo nje nabanye abantu kodwa lukwaluxolo lwangaphakathi.—Roma 14:19; Kolose 3:13-15.

Okwesithathu, ukubaxolela abanye kuyasinceda sikhumbule ukuba nathi siyakufuna ukuxolelwa. Ewe, “bonile bonke, basilela eluzukweni lukaThixo.”—Roma 3:23.

Okokugqibela, ukubaxolela abanye kuvula indlela yokuba nezethu izono zixolelwe nguThixo. UYesu wathi: “Xa nithi nibaxolele abantu iziphoso zabo, uYihlo osemazulwini wonixolela nani.”—Mateyu 6:14.

Khawucinge ngezinto ezininzi ezimele ukuba zazizalise ingqondo kaYesu ngemva kwemini yomhla wokufa kwakhe. Wayexhalabele abafundi bakhe, umsebenzi wokushumayela, yaye ngokukodwa ingqibelelo yakhe kuYehova. Sekunjalo, kwanaxa wayebandezeleke ngokunzulu kumthi wentuthumbo, yintoni awathetha ngayo? Phakathi kwamazwi akhe okugqibela yayingathi, “Bawo, baxolele.” (Luka 23:34) Sinokuwuxelisa umzekelo ogqibeleleyo kaYesu ngokuxolelana ngokusuka entliziyweni.

[Umbhalo osemazantsi]

[Imifanekiso ekwiphepha 5]

Ngaba uyifumene ingongoma yomzekeliso kaYesu womkhonzi ongaxoleliyo?

[Imifanekiso ekwiphepha 7]

Ukubaxolela abanye kukhuthaza ulwalamano oluhle kuze kuzise uvuyo