Zenzeleni Izihlobo Ngobutyebi Bokungalungisi’

“Zenzeleni izihlobo ngabo ubutyebi bokungalungisi, . . . Othembekileyo kokuncinane, uthembekile nakokukhulu.”—LUKA 16:9, 10.

1. UMoses noonyana bakaSirayeli bamdumisa njani uYehova emva kokukhululwa kwabo eYiputa?

BAHLANGULWA ngokungummangaliso—anjani wona amava ukomelez’ ukholo! NguYehova, uSomandla, kuphela onokuzukiswa ngemfuduko yamaSirayeli ukusuka eYiputa. Akumangalisi ke ngoko ukuba uMoses namaSirayeli bacula bathi: “Uqhayiya lam, ungoma yam nguYehova; waba lusindiso kum. UloThixo wam endimzukisayo, uThixo kabawo endimphakamisayo.”—Eksodus 15:1, 2; Duteronomi 29:2.

2. Abantu bakaYehova baphuma nantoni eYiputa?

² Hayi indlela inkululeko amaSirayeli awayesandul’ ukuyifumana eyayahluke ngayo kwimeko yawo eYiputa! Ngoku ayenokunqula uYehova ngaphandle kokuphazanyiswa. Ibe akazange aphume ephaca eYiputa. UMoses uyabalisa: “Oonyana bakaSirayeli . . . bacela kumaYiputa iimpahla zesilivere, neempahla zegolide, neengubo. UYehova wabababala abantu phambi kwamaYiputa, abenza ukuba bacele. Bawaphanga ke amaYiputa.” (Eksodus 12:35, 36) Kodwa babusebenzisa njani obu butyebi baseYiputa? Ngaba babangela ukuba ‘uYehova aphakanyiswe’? Sifunda ntoni kumzekelo wabo?—Thelekisa eyoku-1 kwabaseKorinte 10:11.

“Umnikelo KaYehova”

3. Ukusebenzisa kwamaSirayeli igolide kunqulo lobuxoki kwabangela ukuba uYehova asabele njani?

³ Ebudeni beentsuku ezingama-40 uMoses awayekwiNtaba yeSinayi ngazo ukuze afumane imiyalelo kaThixo eya kumaSirayeli, abantu ababelinde ezantsi baqalisa ukuxokozela. Beqhawula amajikazi abo egolide, bayalela uAron ukuba abenzele umfanekiso ukuze bawunqule. UAron wabakhela nesibingelelo, yaye kwakusasa ngosuku olulandelayo, banyusa amadini apho. Ngaba le ndlela bayisebenzisa ngayo igolide yabo yabenza bakholiseka emehlweni oMhlanguli wabo? Nakanye! UYehova wathi kuMoses: “Kaloku ndiyeke, uvuthe umsindo wam kubo, ndibadle.” Kuphela kukucengwa nguMoses okwabangela uYehova aluxolele olo hlanga, nangona iinkokeli zaloo mvukelo zafa sisibetho esivela kuThixo.—Eksodus 32:1-6, 10-14, 30-35.

4. Wawuyintoni “umnikelo kaYehova,” ibe wawunikelwa ngoobani?

⁴ Kamva, amaSirayeli afumana ithuba lokusebenzisa ubutyebi bawo ngendlela eyamkholisayo uYehova. Aqokelela “umrhumo [“umnikelo,” NW] kaYehova.”a Igolide, isilivere, ubhedu, imisonto emsi, nelinen emibalabala, izintsu zeenkunzi zezimvu, izikhumba zamahlengezi nemingampunzi yayiphakathi kweminikelo yokwakha nokuhombisa umnquba. Le ngxelo yalathisela ingqalelo yethu kwisimo sengqondo sabo babenikela. “Bonke abantliziyo zibaqhubayo mabazise umrhumo [“umnikelo,” NW] kaYehova.” (Eksodus 35:5-9) AmaSirayeli asabela ngokumangalisayo. Ngenxa yoko umnquba wawusisakhiwo “esihle nesibalasele ngobuqaqawuli,” ngokutsho komnye umphengululi.

Iminikelo Yetempile

5, 6. Ngokuphathelele itempile, uDavide wabusebenzisa njani ubutyebi bakhe, ibe abanye basabela njani?

⁵ Nangona uKumkani uSolomon wakwaSirayeli wayalela ukwakhiwa kwendlu esisigxina yokunqula uYehova, nguDavide, uyise, owayesenza amalungiselelo amaninzi oko. UDavide waqokelela igolide, isilivere, ubhedu, isinyithi, imithi namatye anqabileyo amaninzi. UDavide wabaxelela oku abantu bakhe: “Ekubeni ilikholo kum indlu kaThixo wam, ndinenqobo yegolide nesilivere, endiyimisele indlu kaThixo wam, engaphandle kwayo yonke endiyilungisele indlu engcwele; amawaka amathathu eetalente zegolide . . . amawaka asixhenxe eetalente zesilivere ehluziweyo yokwaleka iindonga zezindlu.” UDavide wakhuthaza nabanye ukuba banikele ngesisa. Indlela abasabela ngayo yayingaphaya kokuqonda: igolide, isilivere, ubhedu, isinyithi namatye anqabileyo angakumbi. Abantu “banikela ngokuqhutywa yintliziyo ephelelisileyo kuYehova.”—1 Kronike 22:5; 29:1-9.

⁶ Ngale minikelo yokuzithandela, amaSirayeli abonisa uxabiso olunzulu ngonqulo lukaYehova. Ngokuthobeka uDavide wathandaza: “Ndingubani na mna, bangoobani na abantu bam, ukuba side sibe namandla okunika ngokuqhutywa yintliziyo njengoku?” Kwakutheni? “Ngokuba zivela kuwe zonke izinto; sikunika okuvele esandleni sakho. . . . Mna ke, ekuthini tye kwentliziyo yam, ndizinike ngokuqhutywa yintliziyo zonke ezi zinto.”—1 Kronike 29:14, 17.

7. Sisiphi isifundo esingumzekelo esisifundayo kumhla ka-Amosi?

⁷ Sekunjalo, izizwe zakwaSirayeli zasilela ukugcina unqulo lukaYehova luyeyona nto iphambili ezingqondweni nasezintliziyweni zazo. Ngenkulungwane yesithoba Ngaphambi kweXesha Eliqhelekileyo, uSirayeli owahluleleneyo waba netyala lokungazikhathaleli izinto zokomoya. Ngokuphathelele ubukumkani basentla bakwaSirayeli obabunezizwe ezilishumi, uYehova wathetha oku ngoAmosi: “Yeha ke abatyeshileyo eZiyon, nabakholose ngentaba yakwaSamari.” Wabachaza njengamadoda ‘alele ezingqengqelweni zeempondo zeendlovu, anabe emandlalweni yawo, adle amatakane emhlambini, namathole asesitalini; yaye asela iwayini ngezitya.’ Kodwa indyebo yabo yayingayi kubakhusela. UThixo walumkisa: “Baya kuthinjwa bemke ngoku, kwasentloko kubathinjwa, iphele ingxobotshane yabanabileyo.” Ngowama-740 B.C.E., amaSirayeli abandezeleka ezandleni zeAsiriya. (Amosi 6:1, 4, 6, 7) Yaye ekuhambeni kwexesha ubukumkani basezantsi bakwaYuda nabo babanjiswa kukuthanda izinto eziphathekayo.—Yeremiya 5:26-29.

Ukubusebenzisa Ngokufanelekileyo Ubuncwane Ngamaxesha ObuKristu

8. Nguwuphi umzekelo omhle owamiselwa nguYosefu noMariya ngokusetyenziswa kobuncwane?

⁸ Ngokwahlukileyo, imeko yobuhlwempu yabakhonzi bakaThixo kumaxesha amva ayizange ibathintele ekuboniseni inzondelelo ngonqulo lokwenyaniso. Ngokomzekelo cinga ngoMariya noYosefu. Bethobela umthetho kaKesare Awugusto, bathabatha uhambo oluya kwidolophu yentsapho yakowabo, iBhetelehem. (Luka 2:4, 5) Wazalelwa apho uYesu. kwiintsuku ezingama-40 kamva, uYosefu noMariya batyelela etempileni kufutshane neYerusalem ukuze banikele idini elalifuneka lokuhlanjululwa. Ukubonisa ubuhlwempu babo, uMariya wanikela iintaka ezimbini ezincinane. Yena noYosefu abazange bazingxengxezele ngobuhlwempu. Kunoko, ngokuthobeka basebenzisa obo buncwane bungephi babenabo.—Levitikus 12:8; Luka 2:22-24.

9-11. (a) Amazwi kaYesu kuMateyu 22:21 anikela luphi ukhokelo ngendlela esiyisebenzisa ngayo imali? (b) Kutheni umnikelo ongephi womhlolokazi ungazange ube lilize?

⁹ Kamva, abaFarisi nabalandeli beqela likaHerode bazama ukubambisa uYesu, besithi: “Sixelele ngoko, uthini na wena? Kuvumelekile na ukumnika irhafu uKesare, akuvumelekile, sini na?” Impendulo kaYesu yabonisa indlela awayelumke ngayo. Ebhekisela kwiqhosha lemali abamnika lona, uYesu wabuza: “Ngokabani na lo mfanekiso nombhalo?” Baphendula: “NgokaKesare.” Ngobulumko waqukumbela: “Nikelani kaloku izinto zikaKesare kuKesare, neento zikaThixo kuThixo.” (Mateyu 22:17-21) UYesu wayesazi ukuba igunya elalikhuphe elo qhosha lemali lalilindele ukuba kuhlawulwe irhafu. Kodwa apho wanceda abalandeli neentshaba zakhe ngokufanayo baqonda ukuba umKristu wokwenyaniso uzabalazela ukunikela “neento zikaThixo kuThixo.” Oku kuquka ukuzisebenzisa ngokufanelekileyo izinto eziphathekayo zikabani.

¹⁰ Oku kuboniswa yinto uYesu awayibona etempileni. Wayesandul’ ukugxeka ababhali ababawayo “abadla izindlu zabahlolokazi.” ULuka unikela le ngxelo: “Akubheka, wazibona izityebi, ziphosa iminikelo yazo emkhumbini wokulondoloza imali. [UYesu] wabona ke mhlolokazi uthile ulihlwempu, ephosa apho iimalanana ezimbini. Wathi, Inyaniso ndithi kuni, Lo mhlolokazi usweleyo uphose ngaphezu kwabo bonke; kuba bonke aba baphose eminikelweni kaThixo, bethabatha kwintabalala yabo; ukanti lo, ekusweleni kwakhe, uphose yonke impilo abenayo.” (Luka 20:46, 47; 21:1-4) Abantu abathile bakhankanya ukuba itempile yayihonjiswe ngamatye anqabileyo. UYesu waphendula: “Ezi zinto nizibona nje, kuya kufika imihla ekungayi kusala litye phezu kwelitye, elingayi kuchithwa.” (Luka 21:5, 6) Ngaba umnikelo waloo mhlolokazi waba lilize? Ngokuqinisekileyo kwakungenjalo. Wayexhase ilungiselelo elalimiselwe nguYehova ngelo xesha.

¹¹ UYesu waxelela abalandeli bakhe bokwenyaniso oku: “Akukho mkhonzi unako ukukhonza nkosi mbini; kuba eya kuyithiya le, athande leya; athi mhlawumbi abambelele kule, ayidele leya; aninako ukukhonza uThixo nobutyebi.” (Luka 16:13) Ngaloo ndlela, sinokulubonisa njani ulungelelwano olufanelekileyo ekusebenziseni ubuncwane bethu bemali?

Amagosa Athembekileyo

12-14. (a) AmaKristu ngamagosa obuphi ubuncwane? (b) Kungaziphi iindlela ezibalaseleyo abantu bakaYehova abangamagosa athembekileyo ngazo namhlanje? (c) Ivela phi imali yokuxhasa umsebenzi kaThixo namhlanje?

¹² Xa sisahlulela ubomi bethu kuYehova, eneneni sithi konke esinako, bonke ubuncwane bethu, bobakhe. Ngoko, sifanele sikusebenzise njani esinako? Exubusha ngenkonzo yamaKristu ebandleni, uMzalwana uC. T. Russell, umongameli wokuqala weWatch Tower Society, wabhala: “Ngamnye ufanele azigqale njengomiselwe yiNkosi njengegosa elifanele linikele ngexesha lalo, libe nempembelelo, linikele ngemali yalo, njl. njl., yaye ngamnye umele afune ukusebenzisa ezi zipho kakuhle kangangoko anako, ekuzukiseni iNkosi.”—The New Creation, iphepha 345.

¹³ “Kufuneka kuwo amagosa, ukuba ulowo kuwo afumaneke ethembekile,” itsho njalo eyoku-1 kwabaseKorinte 4:2. Njengentlangano yomhlaba wonke, amaNgqina kaYehova azabalazela ukuphila ngokuvisisana naloo ngcaciso, esebenzisa ixesha lawo elininzi kangangoko kunokwenzeka kubulungiseleli bobuKristu, ngenyameko ehlakulelela ubuchule bawo bokufundisa. Ngaphezu koko, amaqela abasebenzi bokuzithandela ngaphantsi kolwalathiso lweeKomiti Zokwakha Zenqila ngokuzithandela anikela ngexesha, amandla, nobugcisa bawo ukuze akhe iiholo zokuhlanganisana ezintle ezisetyenziselwa unqulo. Konke oku, kuyamkholisa uYehova.

¹⁴ Ivela phi imali yokuxhasa eli phulo likhulu lokufundisa nomsebenzi wokwakha? Kubantu abaqhutywa ziintliziyo, njengokuba kwakunjalo ngemihla yokwakhiwa komnquba. Njengabantu ngabanye, ngaba sinesabelo? Ngaba indlela esibusebenzisa ngayo ubuncwane bethu ibonisa ukuba inkonzo kaYehova ibaluleke kakhulu kuthi? Kwimicimbi yemali, masibe ngamagosa athembekileyo.

Umzekelo Wesisa

15, 16. (a) AmaKristu omhla kaPawulos asibonisa njani isisa? (b) Sifanele siyijonge njani le ngxubusho yethu?

¹⁵ Umpostile uPawulos wabhala ngomoya wesisa wabazalwana baseMakedoni nabelaseAkaya. (Roma 15:26) Nangona nabo babehlelelekile, ngokukhawuleza banikela ukuze kuncedwe abazalwana babo. UPawulos wakhuthaza amaKristu aseKorinte ukuba nawo ngokufanayo anikele ngesisa, anikele ngentsalela yobuncwane bawo ukuze ancede ekusileleni kwabanye. Akukho namnye wayenokummangalela uPawulos ngokufanelekileyo ngokucudisa. Wabhala: “Lowo uhlwayela ngokuvimba wovuna kwangokuvimba; nalowo uhlwayela ngesisa wovuna kwangesisa. Elowo makanike njengoko agqibe ngako entliziyweni; makungabi kokuphuma kabuhlungu, nangokunyanzelwa; kuba uThixo uthanda umphi ochwayitileyo.”—2 Korinte 8:1-3, 14; 9:5-7, 13.

¹⁶ Iminikelo yesisa yabazalwana bethu nabantu abanomdla kumsebenzi woBukumkani emhlabeni wonke namhlanje inikela ubungqina bendlela abalixabisa ngayo eli lungelo. Kodwa, njengokuba uPawulos wabakhumbuzayo abaseKorinte, senza kakuhle ukuyigqala njengesikhumbuzo le ngxubusho.

17. Yiyiphi indlela elungeleleneyo yokunikela uPawulos awayikhuthazayo, yaye ngaba le inokusetyenziswa namhlanje?

¹⁷ UPawulos wabongoza abazalwana ukuba babe nendlela elungeleleneyo yokunikela. Wathi: “Ngolokuqala usuku, iiveki ngeeveki, elowo kuni makabeke ekhaya, eqweba, into asukuba esikelelwe ngayo.” (1 Korinte 16:1, 2) Oko kunokuba ngumzekelo wokunikela kuthi nakubantwana bethu, enokuba senjenjalo ngebandla okanye ngokuthe ngqo kweyona ofisi yesebe yeWatch Tower Society ikufuphi. Isibini esingabavangeli basemazweni esabelwa ukushumayela kwidolophu ekwiMpuma Afrika samema abantu abanomdla ukuba basithelele kwisifundo seBhayibhile. Emva kwale ntlanganiso yokuqala, ngobulumko abavangeli basemazweni bafaka iimalana kwibhokisi eyayiphawulwe ngokuthi “Iminikelo yomsebenzi woBukumkani.” Nabanye ababekho benza ngokufanayo. Kamva, emva kokuba aba basebatsha belungelelaniswe njengebandla lamaKristu, umveleli wesiphaluka wabatyelela waza wathetha ngendlela ababenikela rhoqo ngayo.—INdumiso 50:10, 14, 23.

18. Sinokubanceda njani abazalwana bethu abasezingxakini?

¹⁸ Kwakhona sinelungelo lokusebenzisa ubuncwane bethu ekuncedeni amaxhoba eentlekele zokwemvelo nabo bahlala kwimimandla ekuliwayo kuyo. Hayi indlela okusivuyise ngayo ukufunda ngoncedo oluthunyelwe eMpuma Yurophu njengoko loo nxalenye yehlabathi ithwaxwa ziingxaki zezoqoqosho nezobupolitika! Iminikelo yempahla nemali ibonisa isisa sabazalwana bethu nomanyano namaKristu ahlelelekileyo.b—2 Korinte 8:13, 14.

19. Ziziphi izinto esinokuzenza ukuze sincede abo bakwinkonzo yexesha elizeleyo?

¹⁹ Siwuxabisa ngokwenene umsebenzi wabazalwana bethu abakwinkonzo yexesha elizeleyo njengoovulindlela, abaveleli abahambahambayo, abavangeli basemazweni, nabasebenzi bokuzithandela baseBheteli, akunjalo na? Ngokuvunyelwa ziimeko zethu, sisenokukwazi ukunikela uncedo lwezinto eziphathekayo kubo ngokuthe ngqo. Ngokomzekelo, xa umveleli wesiphaluka etyelela ibandla lenu, usenokukwazi ukumlungiselela indawo yokuhlala, izidlo, okanye uncedise kwiindleko zakhe zokuhamba. Sonke isisa esinjalo uyasibona uBawo wethu wasezulwini, ofuna abakhonzi bakhe banyanyekelwe. (INdumiso 37:25) Kwiminyaka ethile ngaphambili omnye umzalwana owakwazi ukulungiselela iintwanantwana ezisiwa ethunjini wamema umveleli ohambahambayo nomfazi wakhe ekhayeni lakhe. Xa esi sibini sasihamba sisiya kwinkonzo yasentsimini yangokuhlwa, lo mzalwana wanika iindwendwe zakhe imvulophu. Ngaphakathi kwakukho imali eliphepha (elingana nerandi enye) kunye nephetshana elibhalwe oku: “Ningathenga ikomityi yeti okanye igaloni yepetrol.” Olunjani lona uxabiso olwaboniswa ngale ndlela ithobekileyo!

20. Liliphi ilungelo nembopheleleko esingafuni kuzityeshela?

²⁰ Ngokomoya, abantu bakaYehova basikelelekile! Sinandipha izidlo zokomoya kwiindibano zethu ezincinane nezinkulu, apho sifumana iimpapasho ezintsha, imfundiso entle, neziluleko ezisebenzisekayo. Ngeentliziyo ezizele luxabiso ngeentsikelelo zethu zokomoya, asililibali ilungelo nembopheleleko yethu yokunikela imali ukuze isetyenziselwe ukuhambisela phambili izilangazelelo zoBukumkani bukaThixo emhlabeni wonke.

‘Zenzeleni Izihlobo Ngobutyebi Bokungalungisi’

21, 22. Yintoni eza kwenzeka kungekudala ‘kubutyebi bokungalungisi,’ nto leyo ebonisa ukuba sifanele senze ntoni kanye ngoku?

²¹ Eneneni, kungatshona ilanga sibala iindlela esinokubonisa ngazo ukuba unqulo lukaYehova luza kuqala ebomini bethu, enye esingekhe siyijonge njengengabalulekanga ibandakanya ukuthobela kwethu icebiso likaYesu: “Zenzeleni izihlobo ngabo ubutyebi bokungalungisi, ukuze xa nithe naphelelwa, namkelwe eminqubeni engunaphakade.”—Luka 16:9.

²² Phawula ukuba uYesu wathetha ngokuphelelwa kobutyebi bokungalungisi. Ewe, kuza imini apho imali yale nkqubo ingayi kuba naxabiso. UHezekile waprofeta wathi: “Isilivere yabo baya kuyiphosa ezitratweni, negolide yabo ibe yinto engcolileyo kubo. Isilivere yabo negolide yabo ayiyi kuba nako ukubahlangula ngemini yokuphuphuma komsindo kaYehova.” (Hezekile 7:19) De oku kwenzeke, simele sisebenzise ubulumko nokuqonda kwindlela esizisebenzisa ngayo izinto zethu eziphathekayo. Ngaloo ndlela asiyi kukhangela emva sizisole ngokungasithobeli kwethu isiluleko sikaYesu: “Ukuba ngoko anibanga nakuthembeka ebutyebini bokungalungisi, ngubani na owonithemba kobo buyinyaniso? . . . Aninako ukukhonza uThixo nobutyebi.”—Luka 16:11-13.

23. Yintoni esifanele siyisebenzise ngobulumko, yaye uya kuba yintoni umvuzo wethu?

²³ Ngoko ke, sonke ngokuthembeka masithobele ezi zikhumbuzo zokubeka unqulo lukaYehova kuqala kubomi bethu size sibusebenzise ngobulumko bonke ubuncwane bethu. Ngaloo ndlela sinokulondoloza ubuhlobo bethu noYehova noYesu, abathembisa ukuba xa imali iphelelwa baya kusamkela “eminqubeni engunaphakade,” ngethemba lokuphila ngonaphakade kuBukumkani basemazulwini okanye kumhlaba oyiparadisi.—Luka 16:9.

[Imibhalo esemazantsi]

Uyakhumbula Na?

◻ AmaSirayeli asabela njani kwisimemo sikaYehova sokunikela xa kwakusakhiwa umnquba?

◻ Kutheni umnikelo womhlolokazi ungazange ube lilize?

◻ Yiyiphi imbopheleleko amaKristu anayo ngendlela abusebenzisa ngayo ubuncwane bawo?

◻ Singakuphepha njani ukuzisola ngendlela esiyisebenzisa ngayo imali?

[Umfanekiso okwiphepha 15]

Umnikelo womhlolokazi, nangona wawumncinane, wawungelolize

[Umfanekiso okwiphepha 16, 17]

Iminikelo yethu ixhasa umsebenzi womhlaba wonke woBukumkani