AmaNgqina KaYehova Ehlabathini Lonke—EPuerto Rico
PHAKATHI koLwandle lweCaribbean noLwandlekazi lweAtlantiki kukho isiqithi esichumileyo nesikweleenjiko iPuerto Rico. UChristopher Columbus wasithimba waza wasenza umhlaba waseSpeyin ngowe-1943 waza wasibiza ngokuthi yiSan Juan Bautista ekhumbula uYohane uMbhaptizi. Esona sixeko saso sikhulu kangangethuba elide besibizwa ngokuba yiPuerto Rico, okanye “Izibuko Elityebileyo.” Ekuhambeni kwexesha, eli gama lasebenza kwisiqithi siphela, ngoxa isixeko sathi sabizwa ngokuba yiSan Juan.
IPuerto Rico izingqine ilizibuko elityebileyo ngeendlela ezininzi. Kwiminyaka yangaphambili ngethuba lolawulo lwaseSpeyin igolide eninzi iye yathunyelwa kwamanye amazwe ngeenqanawa isuka apha. Esi siqithi ngoku sirhweba ngommoba, ikofu, isiqhamo ekuthiwa yiplantain neziqhamo zesitrasi, nangona amashishini emveliso naweminye imisebenzi ingawo axhasa uqoqosho namhlanje. Noko ke, iPuerto Rico izingqine ilizibuko elityebileyo ngendlela ebaluleke ngakumbi.
Iindaba ezilungileyo zoBukumkani bukaThixo zaqalisa ukushunyayelwa apha ngeminyaka yee-1930. Namhlanje, kukho abavakalisi beendaba ezilungileyo abangaphezu kwama-25 000 ePuerto Rico. Ngowe-1993 abasebenzi kweli sebe leWatch Tower Society banda ukususela kuma-23 ukusa kwabangaphezu kwe-100. Olu lwando lwaluyimfuneko ukuze isebe livelele ukuguqulelwa koncwadi lweBhayibhile ngeSpanish, lisenza ezo mpapasho zifumaneke kubantu abanokuba ngama-350 000 000 abathetha iSpanish ehlabathini lonke.
Intsimi Entsha
Iofisi yesebe ikwanikela le ngxelo: “Intsimi entsha iye yavuleka ePuerto Rico kuba besisenza iinzame zokudlulisela isigidimi soBukumkani kwabazizithulu. Omnye udade ubalisa la mava alandelayo: “Ndandisebenza phakathi kwezithulu ndaza ndatyelela inenekazi elalinabantwana ababini abancinane. Xa lafumanisa ukuba ndandiliNgqina, landichasa ngoko nangoko kuba umyeni walo, owayesisithulu naye, wayengawafuni amaNgqina kaYehova.
“‘Kwiinyanga ezithile kamva eli nenekazi linye latyelela umhlobo walo owayefundisisa iBhayibhile namaNgqina. Lathelela nalo laza lasinandipha kakhulu. Ndalityelela eli nenekazi kwakhona, ibe landixelela kwakhona ukuba umyeni walo wayengawafuni amaNgqina. Noko ke, lalifuna ukuyiqonda iBhayibhile ibe lalikruqukile yicawa yalo kuba kwakungekho nto iyifundisayo. Saqalisa ukufundisisa, sisebenzisa iphecana. Ngenye imini landixelela ukuba ndibuye ngoMgqibelo kuba umyeni walo wayeza kuba ekho. Ndabuza: “Kodwa akasifuni, anditsho?” Laphendula: “Ufuna ukwazi ukuba yintoni kanye le.”
“‘Ngosuku olulandelayo bobabini babenkqonkqoza endlwini yam! Ekubeni indoda yayinemibuzo emininzi, ndabamemela kwiintlanganiso zethu zabazizithulu. Yafika ngaphambi kokuba ndifike ibe ayizange iphoswe ntlanganiso ukususela ngoko. Iyashumayela kwabanye abantu abazizithulu, iyile nakwenye indibano, ibe ikhangele phambili ekubhaptizweni.’”
Isebe liyaqhubeka linikela le ngxelo: “Kwindibano yethu yesithili ebikulo nyaka, kuye kwanikelwa ucwangciso olupheleleyo ngentetho yezandla, kwakukho abantu abaninzi abazizithulu abebekunye neentsapho zabo. Isihlandlo esichukumisa gqitha safika ebudeni bentetho yokuqukumbela xa isithethi saye sakhankanya umsebenzi obusenziwa phakathi kwabazizithulu saza sathi bamalunga nama-70 ababekho. Kwavakala intswahla enkulu yokuqhwatywa kwezandla, kodwa, njengoko isithethi savakalisayo, abazizithulu babengenakuyiva. Ngoko sicela abazizithulu ukuba bajonge kubaphulaphuli, isithethi saphinda umbuzo othi: ‘Ngaba niyakuvuyela ukuba kunye nabazalwana benu abazizithulu?’ saza sacela abaphulaphuli ukuba baqhwabe izandla ngokuwangawangisa izandla zozibini. Yayingumbono omhle gqitha ukubona abazalwana noodade abali-11 000 bebonisa ukuba bayaqhwaba ngokuwangawangisa izandla zabo. Abazalwana noodade bethu abazizithulu babechwayite kakhulu yaye baziva beyinxalenye yobuzalwana obubalaseleyo. Kwabaninzi zehla iinyembezi zovuyo.”
Njengoko amaNgqina kaYehova enesabelo kumsebenzi wokuvuna ePuerto Rico, alithandabuzeki elokuba iya kuqhubeka ilizibuko elityebileyo. “Izimvu” zikaThixo azibiza ngokuthi ‘zizinto ezinqwenelekayo zeentlanga zonke,’ ziya kuqhubeka zisiza ukuze indlu kaYehova izaliswe luzuko.—Yohane 10:16; Hagayi 2:7.
[Ibhokisi ekwiphepha 9]
IINKCUKACHA ZELIZWE
Unyaka Wenkonzo We-1994
INANI ELIYINCOPHO LABANIKELA UBUNGQINA: 25 428
ISILINGANISELO: INgqina eli-1 kubemi abali-139
ABEBEKHO ESIKHUMBUZWENI: 60 252
UMLINGANISELO WABAVAKALISI ABANGOOVULINDLELA: 2 329
UMLINGANISELO WEZIFUNDO ZEBHAYIBHILE: 19 012
INANI LABABHAPTIZIWEYO: 919
INANI LAMABANDLA: 312
IOFISI YESEBE: EGUAYNABO