“Musani Ukoyika, Mhlambi Mncinane”

“Musani ukoyika, mhlambi mncinane; ngokuba kukholekile kuYihlo ukuninika ubukumkani.”—LUKA 12:32.

1. Ayesekelwe kwintoni amazwi kaYesu athi: “Musani ukoyika, mhlambi mncinane”?

“QHUBEKANI nifuna ubukumkani [bukaThixo].” (Luka 12:31, NW) Xa uYesu wayethetha la mazwi kubafundi bakhe, wavakalisa umgaqo obulawula indlela ebecinga ngayo amaKristu ukususela ngomhla wakhe ukuza kuthi ga kulo wethu. UBukumkani bukaThixo bumele bube kwindawo yokuqala kubomi bethu. (Mateyu 6:33) Noko ke, kwingxelo kaLuka uYesu wahlabela mgama wathetha amazwi abonakalisa uthando naqinisekisayo kwiqela elikhethekileyo lamaKristu. Wathi: “Musani ukoyika, mhlambi mncinane; ngokuba kukholekile kuYihlo ukuninika ubukumkani.” (Luka 12:32) NjengoMalusi Olungileyo, uYesu wayesazi ukuba abafundi bakhe abathandayo babeza kujamelana namaxesha anzima. Kodwa kwakungekho sizathu sokuba boyike ukuba babeqhubeka befuna uBukumkani bukaThixo. Ngenxa yoko, isibongozo sikaYesu sasingengomyalelo ongqwabalala. Kunoko, sasisisithembiso esibonakalisa uthando esababangela baba nentembelo nenkalipho.

2. Ubunjwa ngoobani umhlambi omncinane, ibe kutheni benelungelo elikhethekileyo?

² UYesu wayethetha nabafundi bakhe, yaye wababiza ngokuthi “mhlambi mncinane.” Kwakhona wayethetha nabo uYehova aya ‘kubanika ubukumkani.’ Xa ethelekiswa nezihlwele ezikhulu ezaziya kwamkela uYesu kamva, amalungu eli qela ayembalwa ngokwenene. Kwakhona wayebagqala njengabaxabisekileyo kuba babenyulelwe ikamva elibalaseleyo, ukuba basetyenziswe kwinkonzo yasebukhosini. UYise, uMalusi Omkhulu, uYehova, wabiza umhlambi omncinane ukuze awunike ilifa lasezulwini eBukumkanini bukaKristu obungoMesiya.

Umhlambi Omncinane

3. Nguwuphi umbono ozukileyo womhlambi omncinane owabonwa nguYohane?

³ Ngoko, ngoobani ababumba lo mhlambi mncinane unelungelo elibalasele ngolu hlobo? Ngabalandeli bakaYesu Kristu abathanjiswa ngomoya oyingcwele. (IZenzo 2:1-4) Ebabona beziimvumi zasezulwini eziphethe iihadi, umpostile uYohane wabhala: “Ndabona, nantso iMvana imi phezu kwentaba yeZiyon, kumi nayo ikhulu elinamanci mane anesine lamawaka, benalo igama loYise libhaliwe emabunzini abo. Aba ngabo bangadyobhekanga ngabafazi, kuba benyulu. Aba ngabo bayilandelayo iMvana apho isukuba isiya khona. Aba bathengwa bephuma ebantwini, baziintlahlela kuye uThixo nakuyo iMvana. Emlonyeni wabo akufunyanwanga nkohliso, kuba bengenakubekwa bala.”—ISityhilelo 14:1, 4, 5.

4. Umhlambi omncinane unasiphi isikhundla emhlabeni namhlanje?

⁴ Ukususela ngePentekoste yowama-33 C.E., aba bathanjiswa, bazelwe ngomoya bebengabameli bakaKristu emhlabeni. (2 Korinte 5:20) Namhlanje, yintsalela yabo kuphela eseleyo, ekhonza kunye njengodidi lomkhonzi othembekileyo noqondayo. (Mateyu 24:45; ISityhilelo 12:17) Ngokukodwa ukususela ngonyaka we-1935, baye bathelelwa ‘zezinye izimvu,’ ezingamaKristu anethemba lasemhlabeni, ngoku ezifikelela kwizigidi. Ezi zincedisa ekushumayeleni iindaba ezilungileyo emhlabeni wonke.—Yohane 10:16.

5. Sisiphi isimo sengqondo sabaseleyo bomhlambi omncinane, ibe kutheni bengafanele boyike?

⁵ Sinjani isimo sengqondo samalungu alo mhlambi mncinane asesemhlabeni? Ekubeni esazi ukuba aza kufumana “ubukumkani obungenakuzanyazanyiswa,” anikela inkonzo yawo engcwele enokoyika uThixo nentlonelo. (Hebhere 12:28) Ngokuthobeka ayaqonda ukuba anelungelo elingenakuthelekiswa nanto elikhokelela kuvuyo olungathethekiyo. Afumene ‘iperile enye exabiso likhulu’ awabhekisela kuyo uYesu xa wayethetha ngoBukumkani. (Mateyu 13:46) Njengoko imbandezelo enkulu isondela, abathanjiswa bakaThixo abanaloyiko. Phezu kwako nje oko kuza kwehlela ihlabathi loluntu ebudeni ‘bemini yeNkosi leyo inkulu ibalulekileyo,’ abanaloyiko lunkwantyisayo ngekamva. (IZenzo 2:19-21) Bebeza koyikela ntoni?

Ukuncipha Kwamanani

6, 7. (a) Kutheni inani labo bomhlambi omncinane abasesemhlabeni lilincinane kakhulu? (b) Mntu ngamnye ufanele alijonge njani ithemba analo?

⁶ Kwiminyaka yakutshanje inani lomhlambi omncinane osesemhlabeni liye laba lincinane kakhulu. Oku kubonakele kwingxelo yeSikhumbuzo sowe-1994. Kumabandla abantu bakaYehova anokuba ngama-75 000 ehlabathini lonke, kuphela ngabantu abangama-8 617 ababonise ukuba bazibanga bengamalungu entsalela ngokuthabatha kwimifuziselo. (Mateyu 26:26-30) Ngokwahlukileyo koko, bebonke abebekho babezizi-12 288 917. AmaKristu athanjisiweyo ayazi ukuba amele akulindele oku. UYehova umisele inani elisikelwe umda, i-144 000, ukuba libe ngumhlambi omncinane, ibe ebelihlanganisa ukususela ngePentekoste yowama-33 C.E. Ngokusengqiqweni ke, ukuhlanganiswa komhlambi omncinane kwakuya kuphela xa elo nani lalisele liza kuphelela, yaye ubungqina bubonisa ukuba ukuhlanganiswa kwaba basikelelwe ngokukhethekileyo kwaphela ngowe-1935. Noko ke, ezinye izimvu kweli xesha lesiphelo kwaprofetwa ukuba zaziya kwanda zibe ‘sisihlwele esikhulu, ebekungekho namnye unako ukusibala, siphuma kuzo zonke iintlanga, nezizwe, nabantu, neelwimi.’ Ukususela ngowe-1935 uYehova ebehlanganisa esi sihlwele sikhulu, esinethemba lokuphila ngonaphakade kumhlaba oyiparadisi.—ISityhilelo 7:9; 14:15, 16; INdumiso 37:29.

⁷ Inkoliso yabo bangamalungu omhlambi omncinane asesemhlabeni ngoku ikwiminyaka yayo yama-70, 80, nama-90. Imbinana sele idlulile kwiminyaka eli-100. Bonke aba, bungakhathaliseki ubudala babo, bayazi ukuba ngokuvuselwa ezulwini, ekugqibeleni baya kumanyaniswa noYesu Kristu baze balawule naye eBukumkanini bakhe obuzukileyo. Abo besihlwele esikhulu baya kuba ngabalawulwa basemhlabeni bakaKristu uKumkani. Ngamnye makavuye ngenxa yoko uYehova akugcinele abo bamthandayo. Asizikhetheli ithemba esifuna ukuba nalo. NguYehova ogqibayo. Omabini la maqela anokuvuya ngenxa yethemba lekamva elonwabisayo, enokuba leloBukumkani basezulwini okanye kumhlaba oyiparadisi ngaphantsi kobo Bukumkani.—Yohane 6:44, 65; Efese 1:17, 18.

8. Sele kuhambele phambili kangakanani ukutywinwa kwe-144 000, ibe kuya kwenzeka ntoni xa kugqityiwe?

⁸ Umhlambi omncinane wabali-144 000 ubumba ‘uSirayeli kaThixo,’ oye wathabathel’ indawo uSirayeli wokwenyama kwiinjongo zikaThixo. (Galati 6:16) Ngoko ke, intsalela ibunjwa ngabaseleyo bolo hlanga lokomoya abasesemhlabeni. Abo baseleyo bayatywinwa ukuze ekugqibeleni bafumane inkoliseko kaYehova. Embonweni, umpostile uYohane wabona kusenzeka oku, waza wanikela le ngxelo: “Ndabona esinye isithunywa sezulu, sinyuka sivela empumalanga, sinetywina likaThixo ophilileyo. Sadanduluka ngezwi elikhulu kuzo izithunywa zezulu zozine, ezanikwa igunya lokuwonakalisa umhlaba nolwandle, sisithi, Musani ukuwona umhlaba, nolwandle, nemithi, side sibatywine abakhonzi boThixo wethu emabunzini abo. Ndaliva inani labo babetywiniwe: kwatywinwa ikhulu elinamanci mane anesine lamawaka, kuzo zonke izizwe zoonyana bakaSirayeli [wokomoya].” (ISityhilelo 7:2-4) Ekubeni lo msebenzi wokutywinwa koSirayeli wokomoya ubonakala uhambele phambili gqitha, oko kubonisa ukuba kungekudala kuza kwenzeka iziganeko ezichulumancisayo. Phakathi kwezinye izinto, “imbandezelo enkulu,” xa imimoya emine yentshabalalo ikhululwa emhlabeni, imele ukuba isondele gqitha.—ISityhilelo 7:14.

9. Umhlambi omncinane usijonga njani isihlwele esikhulu esandayo?

⁹ Abo besihlwele esikhulu sele behlanganisiwe bazizigidi. Hayi indlela oku okuzivuyisa ngayo iintliziyo zentsalela! Nangona abo bomhlambi omncinane abasesemhlabeni beqhubeka bencipha, baqeqeshe baza balungiselela amadoda afanelekayo esihlwele esikhulu ukuba athwale iimbopheleleko kwintlangano kaThixo eyandayo yasemhlabeni. (Isaya 61:5) Njengokuba uYesu wabonisayo, kuya kubakho abaya kusinda kwimbandezelo enkulu.—Mateyu 24:22.

“Musani Ukoyika”

10. (a) Luluphi uhlaselo oluza kufikela abantu bakaThixo, yaye luya kukhokelela kwintoni? (b) Yiyiphi imibuzo ebuzwa kuye ngamnye wethu?

¹⁰ USathana needemon zakhe bathotyelwe kummandla wasemhlabeni. Yena namahlakani akhe baqhutyelwa ekubeni bahlasele ngenkohlakalo abantu bakaYehova. Olu hlaselo, olwaxelwa kwangaphambili eBhayibhileni, luchazwa njengohlaselo lukaGogi wakwaMagogi. Ibe ngoobani ngokukhethekileyo uMtyholi abahlaselayo? Ngaba asingomalungu okugqibela omhlambi omncinane, uSirayeli kaThixo wokomoya, ahleli ngoxolo “esazulwini somhlaba”? (Hezekile 38:1-12) Ewe kunjalo, kodwa intsalela yodidi oluthanjisiweyo noluthembekileyo, namaqabane ayo anyanisekileyo, ezinye izimvu, baya kubona indlela uhlaselo lukaSathana oluya kukhokelela ngayo ekubeni uYehova uThixo asabele ngendlela ephawulekayo. Uya kungenelela ekhusela abantu bakhe, ibe oku kuya kubangela ukuqalisa ‘kwemini enkulu eyoyikekayo kaYehova.’ (Yoweli 2:31) Namhlanje, umkhonzi othembekileyo noqondayo uphumeza inkonzo ebalulekileyo, yokusindisa ubomi, isilumkiso ngokungenelela kukaYehova okusondelayo. (Malaki 4:5; 1 Timoti 4:16) Ngaba uyixhasa ngenkuthalo loo nkonzo, ushumayela iindaba ezilungileyo zoBukumkani bukaYehova? Ngaba ngenkalipho uya kuqhubeka usenjenjalo njengomvakalisi woBukumkani ongenaloyiko?

11. Kutheni isimo sengqondo senkalipho sibalulekile namhlanje?

¹¹ Ngenxa yemeko ihlabathi elikuyo ngoku, hayi indlela ekusexesheni ngayo ukuba umhlambi omncinane uthobele amazwi uYesu awawabhekisa kuwo: “Musani ukoyika, mhlambi mncinane”! Isimo sengqondo senkalipho esinjalo sibalulekile ngenxa yako konke oko kwenzekayo ngoku ngokuvisisana nenjongo kaYehova. Ngokobuqu, mntu ngamnye kumhlambi omncinane uyayiqonda imfuneko yokunyamezela kude kube sekupheleni. (Luka 21:19) Njengokuba uYesu Kristu, iNkosi yomhlambi omncinane, wanyamezela waza wazingqina ethembekile kwada kwasekupheleni kobomi bakhe basemhlabeni, ngoko ngamnye kwintsalela umele anyamezele aze azingqine ethembekile.—Hebhere 12:1, 2.

12. UPawulos, njengoYesu, wawabongoza njani amaKristu athanjisiweyo ukuba angoyiki?

¹² Bonke abathanjiswa bamele babe nesimo sengqondo esifana neso sompostile uPawulos. Phawula indlela amazwi akhe njengomvakalisi wovuko wasekuhleni othanjisiweyo avisisana ngayo nesibongozo sikaYesu sokungoyiki. UPawulos wabhala: “Mkhumbule uYesu Kristu, engovukileyo kwabafileyo, engowembewu kaDavide, ngokweendaba zam ezilungileyo; endiva ububi ngenxa yazo, kude kuse ezintanjeni, njengomenzi wobubi; ke lona ilizwi likaThixo alibotshiwe. Ngenxa yoko izinto zonke ndiyazinyamezela ngenxa yabo abanyulwa, ukuze nabo bamkele usindiso olukuKristu Yesu, ndawonye nozuko olungunaphakade. Lithembekile ilizwi eli: Kuba xa safa naye, sodla ubomi kwandawonye naye; ukuba siyanyamezela, solawula kwandawonye naye; ukuba siyamkhanyela, naye wosikhanyela; ukuba asithembekile, yena uhlala ethembekile; akanako ukuzikhanyeza.”—2 Timoti 2:8-13.

13. Yiyiphi intembelo enzulu amalungu omhlambi omncinane anayo, ibe le ntembelo iwaqhubela ekubeni enze ntoni?

¹³ Njengompostile uPawulos, amalungu asaseleyo omhlambi omncinane othanjisiweyo akulungele ukunyamezela ukubandezeleka njengoko eshumayela isigidimi esinamandla esiseLizwini likaThixo. Amathemba awo aqinisekile njengoko eqhubeka ebambelela kumadinga kaThixo okusindiswa nokunikwa kwawo “isithsaba sobomi” ukuba angqineka ethembekile kude kube sekufeni. (ISityhilelo 2:10) Ngokuvuswa nangokwenziwa kumila kumbi ngephanyazo, aya kumanyaniswa noKristu, ukuze alawule naye njengookumkani. Olunjani lona uloyiso ngenxa yekhondo lawo lokugcina ingqibelelo njengabo baloyisayo ihlabathi!—1 Yohane 5:3, 4.

Ithemba Elikhethekileyo

14, 15. Ithemba lovuko lomhlambi omncinane likhetheke njani?

¹⁴ Ithemba lovuko onalo umhlambi omncinane likhethekile. Ngaziphi iindlela? Phakathi kwezinye izinto, lumele lubekho ngaphambi kovuko oluqhelekileyo “lwamalungisa kwanolwabangemalungisa.” (IZenzo 24:15) Eneneni, uvuko lwabathanjiswa lubaluleke ngendlela ekhethekileyo, njengoko sibona ngokucacileyo kula mazwi akweyoku-1 kwabaseKorinte 15:20, 23: “UKristu yena kunje uvukile kwabafileyo, waba yintlahlela yabalele ukufa. Elowo ke kolwakhe uluhlu; intlahlela inguKristu, kamva abakaKristu ekufikeni kwakhe.” Ngokuba nonyamezelo nokholo olufana nolo lwabonakaliswa nguYesu, umhlambi omncinane uyakwazi oko ulindelwe kuko xa ugqiba ikhondo lawo lasemhlabeni, ngokukodwa ukususela ngexesha iNkosi eyinyaniso eyeza ngalo etempileni yayo ngowe-1918.—Malaki 3:1.

¹⁵ UPawulos usinika isizathu esingakumbi sokulujonga olu vuko njengolukhethekileyo. Njengoko kubhalwe kweyoku-1 kwabaseKorinte 15:51-53, wabhala: “Yabonani, ndinixelela imfihlelo: Okunene asiyi kulala ukufa sonke; kodwa siya kwenziwa ngakumbi sonke, ngesiquphe, ngephanyazo, ngexilongo lokugqibela. . . . Kuba kumele oku konakalayo ukwambatha ukungonakali, noku kufayo ukwambatha ukungafi.” La mazwi asebenza kwabo bomhlambi omncinane abafa ebudeni bobukho bukaKristu. Kungakhange kufuneke balale ixesha elithile ekufeni, bambathiswa ukungafi, “ngesiquphe, ngephanyazo.”

16, 17. Ngokuphathelele ithemba lawo lovuko, amaKristu athanjisiweyo asikelelwe ngokukhethekileyo njani namhlanje?

¹⁶ Ngokuvisisana nale ndlela eziqondwa ngayo izinto, sinokuyiqonda intsingiselo yamazwi ompostile uYohane akwiSityhilelo 14:12, 13. Wabhala: “Nalu unyamezelo lwabangcwele; naba abayigcinayo imithetho kaThixo nokukholwa kuYesu. Ndeva izwi liphuma emazulwini, lisithi kum, Bhala, uthi, Banoyolo abafi, abo bafela eNkosini, kuthabathela apha; ewe, utsho uMoya, ukuba baphumle ekubulalekeni kwabo; imisebenzi yabo ke ilandelana nabo.”

¹⁷ Onjani wona ukukhetheka umvuzo obekelwe intsalela yomhlambi omncinane! Iya kuvuka ngokukhawuleza, kanye emva kokuba ilele ekufeni. Enjani yona ukuphawuleka inguqulelo eya kwenzeka kuyo njengoko iqalisa isabelo sayo kummandla womoya! Ekubeni ukungcwaliswa ngolo hlobo komhlambi omncinane nokuzaliseka kweziprofeto zeBhayibhile ezibalulekileyo sele kuza kugqitywa, amalungu okugqibela aseleyo omhlambi omncinane ngokwenene afanele ‘angoyiki.’ Yaye ukungoyiki kwawo kukhuthaza nabo besihlwele esikhulu, abafanele bahlakulele isimo sengqondo esifanayo sokungoyiki njengoko belindele ukukhululwa ebudeni belona xesha lineenkathazo elikhe lakho emhlabeni.

18, 19. (a) Kutheni ixesha esiphila kulo lingxamisekile? (b) Kutheni abathanjiswa nezinye izimvu bengafanele boyike?

¹⁸ Ukubalisa ngemisebenzi yomhlambi omncinane kuwenza wona kunye nesihlwele esikhulu uhlale umoyika uThixo oyinyaniso. Ixesha lomgwebo wakhe alifikanga ligalelekile, ibe ixesha elivumayo eliseleyo lixabisekile. Eneneni, lifutshane kakhulu ixesha eliseleyo lokuba abanye bathabathe inyathelo. Noko ke, thina asinaloyiko lokuba injongo kaThixo iya kusilela. Nokuba sekumnyam’ entla iya kuphumelela!

¹⁹ Kanye ngoku, aye aviwa amazwi amakhulu asemazulwini esithi: “Izikumkani zehlabathi zithe zaba zezeNkosi yethu nezikaKristu wayo. Wayeya kuba nguKumkani kuse emaphakadeni asemaphakadeni.” (ISityhilelo 11:15) Ngokuqinisekileyo, uMalusi Omkhulu, uYehova, ukhokelela zonke izimvu zakhe “ezindleleni zobulungisa ngenxa yegama lakhe.” (INdumiso 23:3) Ngokungenakusilela umhlambi omncinane ukhokelelwa kumvuzo wawo wasezulwini. Yaye ezinye izimvu ziya kusindiswa zikhuselekile ukutyhubela imbandezelo enkulu ukuze zinandiphe ubomi obungunaphakade kummandla wasemhlabeni woBukumkani bukaThixo obuzukileyo phantsi kolawulo lukaKristu Yesu. Ngenxa yoko, ngoxa amazwi kaYesu ayebhekiswe kumhlambi omncinane, ngokuqinisekileyo bonke abakhonzi bakaThixo abasemhlabeni banezizathu zokuwaphulaphula la mazwi akhe: “Musani ukoyika.”

Ngaba Ungacacisa?

◻ Kutheni sifanele silindele ukuba amalungu aseleyo omhlambi omncinane anciphe?

◻ Injani imeko yentsalela ethanjisiweyo namhlanje?

◻ Kutheni amaKristu engafanele oyike, phezu kwako nje ukusondela kohlaselo lukaGogi wakwaMagogi?

◻ Kutheni ithemba lovuko lwe-144 000 likhethekile, ingakumbi namhlanje?