Aya Kulinda Kude Kube Nini Amahlwempu?
“Ukuba ilizwe elikhululekileyo alikwazi kubanceda abaninzi abangamahlwempu, alinakuyikhusela imbinana ezizityebi.”—John F. Kennedy.
“NDINQWENELA ukuba ikamva liqaqambe kubantu bonke—kungabikho buhlwempu, kungabikho mntu ungenakhaya, kube separadisi!” Yatsho inkwenkwe eneminyaka eli-12 ubudala yaseSão Paulo, eBrazil. Kodwa ngaba bunokupheliswa ubuhlwempu? Aya kulinda kude kube nini amahlwempu?
Bambi bazigqala bengamahlwempu kuba bengakwazi ukuthenga izinto abazifunayo. Kodwa, cinga ngemeko elusizi yabo bahlwempuzeke ngokwenene. Ngaba unokuyithelekelela indlela abatsala nzima nabangonwabanga ngayo abo bantu? Bambi kufuneka bakhuphisane namangabangaba namabuzi, njengoko bezingela ukutya kwiindawo zokulahla inkunkuma! Ubuhlwempu obunjalo buya kuluthwaxa kude kube nini uluntu? Isibongozo sikaFederico Mayor, umalathisi jikelele weUNESCO (United Nations Educational, Scientific, and Cultural Organization), sifanelekile: “Masahlukane nonyamezelo lwenkohliso olusivumela ukuba sinyamezele izinto ezinganyamezelekiyo—ubuhlwempu, indlala, ukubandezeleka kwezigidi zabantu.”
Ngaba iphupha lentlalo-ntle kwindalo yonke liya kuzaliseka? Analiphi ithemba amahlwempu?
Ngawaphi Amathuba Avulekele Amahlwempu?
Iinkokeli ezineenjongo ezintle zithembisa ngemisebenzi engakumbi, imivuzo encumisayo, iinkqubo zasekuhlaleni eziphuculiweyo nokwabiwa komhlaba ngokufanelekileyo. Zisenokuvumelana nowayesakuba ngumongameli waseUnited States uJohn F. Kennedy: “Ukuba ilizwe elikhululekileyo alikwazi kubanceda abaninzi abangamahlwempu, alinakuyikhusela imbinana ezizityebi.” Noko ke, iinjongo ezintle zizodwa azinakubuphelisa ubuhlwempu. Ngokomzekelo, ngaba ukunyuka kwezoqoqosho kunokuwanceda amahlwempu ngokubanzi? Kusenokungawancedi. Owayesakuba yinkokeli yaseIndiya uJawaharlal Nehru wathi: “Impembelelo yebutho lobukapitali, ukuba ayilunyukelwa, ityekela ekumenzeni atyebe ngakumbi osisityebi yaye ahlwempuzeke ngakumbi olihlwempu.” Noko ke, ngaphandle kokutsala nzima nokuswela, imvo yokungaxabiseki iwenza nzima ngakumbi umthwalo womntu olihlwempu. Ngaba iinkokeli ezingabantu zinokuwanceda amahlwempu oyise iimvakalelo zokungabi nakuzinceda nokuphelelwa lithemba?
Eneneni, abaninzi abahlwempuzeke ngokwenene baye bafunda ukuhlangabezana nobuhlwempu nokoyisa iimvakalelo zokungazihloneli xa bejamelene nobunzima obugqithisileyo, obunjengokuntinga kwamaxabiso nokungaqeshwa. Ngaphezu koko, ngokuqinisekileyo indlala, ukungabi namakhaya nobuhlwempu buya kupheliswa ngokupheleleyo. Ngaba oku kuyakumangalisa? Siyakumema ukuba ufunde inqaku elilandelayo: “Kungekudala, Akuyi Kubakho Mntu Ulihlwempu!”