Xelisa UYesu Uze Ukhathalele Amahlwempu
UBUHLWEMPU nengcinezelo phantse zabakho kwasekuqaleni kwabantu. Nakuba uMthetho owanikwa amaSirayeli nguThixo wawuwakhusela amahlwempu uwapha nesiqabu, loo Mthetho wawusoloko ungasiwa so. (Amosi 2:6) Umprofeti uHezekile wayigxeka gqitha indlela awayephathwa ngayo amahlwempu. Wathi: “Abantu belizwe bona baye baqhubeka necebo lokuqhatha yaye baye bazixhwithela ekuphangeni, badlakazelisa oxhwalekileyo nolihlwempu, nomphambukeli bamqhatha ngokungekho sikweni.”—Hezekile 22:29.
Ubuhlwempu babugqugqisile naxa uYesu wayelapha emhlabeni. Iinkokeli zonqulo zazingenaxesha lawo kwaphela amahlwempu nabasweleyo. Ezo nkokeli kuthiwa ‘zazingabathandi bemali’ “abaqwenga izindlu zabahlolokazi,” into ephambili kuzo izizithethe zazo kunokunyamekela abakhulileyo nabasweleyo. (Luka 16:14; 20:47; Mateyu 15:5, 6) Okubangel’ umdla kukuba kumzekelo kaYesu womSamariya olungileyo, umbingeleli nomLevi bathi bakubona loo ndoda yenzakeleyo bacezela phayaa kunokuba bayincede.—Luka 10:30-37.
UYesu Wayewakhathalela Amahlwempu
Ingxelo yeVangeli ibonisa ukuba uYesu wayebuqonda kakuhle ubunzima ajamelana nabo amahlwempu ibe wayezikhathalele gqitha iintswelo zawo. Nakuba uYesu wayephila ezulwini, waziqongqotha, waba ngumntu waza ‘waba lihlwempu ngenxa yethu.’ (2 Korinte 8:9) Akubona izihlwele, uYesu “wazisizela, ngenxa yokuba zazihlinzekile, zilahliwe njengezimvu ezingenamalusi.” (Mateyu 9:36) Ingxelo yomhlolokazi owayeswele ibonisa ukuba uYesu wachukunyiswa, kungekhona bubukhulu bezipho zezityebi, ezazizinikela ‘ngokuphuma kwintsalela yazo,’ kodwa wachukunyiswa ngumnikelo omncinane womhlolokazi olihlwempu. Oko kwamchukumisa kuba ‘ekusweleni kwakhe waphosa konke awayenokuphila ngako.’—Luka 21:4.
UYesu akazange anele nje ukuba novelwano ngamahlwempu, kodwa wabonisa umdla kwiintswelo zawo. Kwingxowa-mali yakhe nabapostile bakhe babewanceda amaSirayeli asweleyo. (Mateyu 26:6-9; Yohane 12:5-8; 13:29) UYesu wakhuthaza abo babefuna ukuba ngabalandeli bakhe ukuba bayiqonde imfuneko yokunceda abasweleyo. Komnye umlawuli oselelula nosisityebi wathi: “Thengisa zonke izinto onazo, wabele amahlwempu, yaye uya kuba nobuncwane emazulwini; uze ube ngumlandeli wam.” Into yokuba lo mfana wayengakulungelanga ukuncama izinto zakhe yabonisa ukuba wayebuthanda gqitha ubutyebi bakhe ngaphezu koThixo nabantu. Ngoko, wayengenazo iimpawu ezifunekayo kumntu oza kuba ngumfundi kaYesu.—Luka 18:22, 23.
Abalandeli BakaKristu Bayawakhathalela Amahlwempu
Emva kokufa kukaYesu, abapostile nabanye abalandeli bakaKristu baqhubeka bewakhathalela amahlwempu aphakathi kwabo. Malunga nowama-49 C.E., umpostile uPawulos wangqubanisa iintloko noYakobi, uPetros noYohane bexubusha ngothumo awayelunikwe yiNkosi uYesu Kristu lokushumayela iindaba ezilungileyo. Bagqiba ekubeni uPawulos noBharnabhas baye kushumayela ngokukhethekileyo “kwabeentlanga.” Noko ke, uYakobi namaqabane akhe bacela uPawulos noBharnabhas ukuba ‘bakhumbule amahlwempu.’ Yiloo nto kanye uPawulos awayezabalazela “ukuyenza ngenyameko.”—Galati 2:7-10.
Xa kwakulawula uKlawudiyo, kwabakho indlala engathethekiyo kwiindawo eziliqela ezaziphantsi koLawulo lweRoma. Ngenxa yoko, abo babengamaKristu kwa-Antiyokwe “bazimisela, ngamnye kubo kangangoko wayenako, ukuthumela ulungiselelo lwamancedo kubazalwana ababehlala kwelakwaYuda; yaye oku bakwenza, bethumela kumadoda amakhulu ngesandla sikaBharnabhas noSawule.”—IZenzo 11:28-30.
Nanamhlanje amaKristu okwenyaniso ayaqonda ukuba abalandeli bakaYesu bamele bawaxhalabele amahlwempu nabo basweleyo, ngakumbi lawo angabazalwana bawo. (Galati 6:10) Azixhalabela ngokwenene iintswelo zabo bangathath’ intweni. Ngokomzekelo, ngowe-1998 kwabakho imbalela enkulu kumntla-mpuma weBrazil. Loo mbalela yatshayela isilimo serayisi, iimbotyi nombona kwaza kwakho indlala ebomvu—indlala eyagqityelwa kwiminyaka eli-15. Kwezinye iindawo, kwakunqabe nala kanonkala. AmaNgqina kaYehova kwezinye iindawo zelo zange aphozise maseko, ngethutyana aseka iikomiti zoncedo aqokelela iitoni zokutya aza ahlawulela neendleko zokukuthumela kwezo ndawo.
Amanye amaNgqina awayefak’ isandla kwelo phulo abhala athi: “Sivuyiswa gqitha kukuba siye sakwazi ukunceda abazalwana bethu, ngakumbi ekubeni siqinisekile ukuba oko kuvuyisa intliziyo kaYehova. Asiwalibali amazwi akuYakobi 2:15, 16.” Ezo ndinyana zithi: “Ukuba umzalwana okanye udade uyadlakazela, eswele ukutya okulingene imini, aze omnye kuni athi kubo: ‘Hambani ngoxolo, nifudumale, nihluthe,’ kodwa ningabaniki izinto abazisweleyo, kunceda ngantoni oko?”
Kwelinye lamabandla amaNgqina kaYehova kwisixeko saseSão Paulo, kukho iNgqina elithobekileyo nelinenzondelelo kodwa liyimpula kaLujaca. Lithi: “Nakuba ndingumpha ochutyiweyo, isigidimi seBhayibhile siye senza ubomi bam banenjongo. Andazi ukuba ngekunjani ukuba ndandingancedwanga ngabazalwana bam.” Ngaxa lithile, eli bhinqa lomKristu likhutheleyo kwafuneka liye kutyandwa labe lingenayo nemdaka yokuhlawula isibhedlele. Abazalwana bebandla lalo badibanisa iipeni zabo bahlawula ezo ndleko. Ukunceda abazalwana bethu abasweleyo yinto eyenziwa ngamaKristu okwenyaniso ehlabathini lonke.
Nakuba kuvuyisa gqitha ukuva izenzo ezinjalo, kuyacaca kona ukuba le migudu mihle ayinakuze ibutshayele ubuhlwempu. Ngoxa beye baphumelela kwiinkalo ezithile, nabona rhulumente baziwayo namaziko amakhulu ezizwe ngezizwe aye awa phantsi ekulweni le ntsinda-badala. Ngoko, umbuzo ngulo, Sisiphi esona sicombululo sobuhlwempu nezinye iingxaki ezithwaxa uluntu?
Iimfundiso ZeBhayibhile Zichaza Esona Sicombululo
Ingxelo yeVangeli ithi uYesu Kristu wayesoloko ewanceda amahlwempu okanye abo bafuna uncedo. (Mateyu 14:14-21) Kodwa kukho msebenzi uthile awaye wagxininisa kuwo. Ngesinye isihlandlo, emva kokuchitha ixesha enceda abasweleyo, uYesu wathi kubafundi bakhe: “Masiye kwenye indawo, kwiidolophu ezikufuphi, ukuze ndishumayele kwanalapho.” Kwakutheni ukuze uYesu ayeke umsebenzi wakhe wokunceda abagulayo nabasweleyo aye kushumayela? Echaza isizathu soko wathi: “Kuba ndiphumele oko [ukushumayela].” (Marko 1:38, 39; Luka 4:43) Nakuba ukunceda abantu kwakubalulekile kuYesu, olona thumo lwakhe yayikukushumayela ngoBukumkani bukaThixo.—Marko 1:14.
Ekubeni iBhayibhile ibongoza amaKristu ukuba ‘alandele emanyathelweni [kaYesu],’ namhlanje amaKristu akwazi kakuhle oko amele akwenze ukuze abeke izinto ezibalulekileyo kwindawo yazo xa enceda abanye. (1 Petros 2:21) NjengoYesu, ayabanceda abantu abasweleyo. Kodwa ke, nakuwo owona msebenzi uphambili kukufundisa abantu isigidimi seBhayibhile seendaba ezilungileyo zoBukumkani bukaThixo. (Mateyu 5:14-16; 24:14; 28:19, 20) Kodwa, kutheni ukushumayela isigidimi seLizwi likaThixo kumele kube yeyona nto iphambili kunezinye iindlela zokunceda abantu?
Amava abonisa ukuba ehlabathini lonke, abantu bathi bakuliqonda baze balisebenzise icebiso leBhayibhile, baye bakwazi ukuhlangabezana neengxaki zamihla le, nkqu nobuhlwempu. Ngapha koko, isigidimi seBhayibhile soBukumkani bukaThixo esishunyayelwa ngamaNgqina kaYehova namhlanje sinika abantu ithemba ngekamva—ithemba elibenza babuxabise ubomi, naphantsi kwezona meko zinzima. (1 Timoti 4:8) Liliphi elo themba?
ILizwi likaThixo lisiqinisekisa oku ngekamva: “Silindele amazulu amatsha nomhlaba omtsha, ngokwesithembiso [sikaThixo], apho kumi ubulungisa.” (2 Petros 3:13) Maxa wambi xa iBhayibhile ithetha ‘ngomhlaba,’ ibhekisela kubemi bomhlaba. (Genesis 11:1) Ngoko, ‘umhlaba omtsha’ wamalungisa othenjisiweyo ngabantu akholiswayo ngabo uThixo. ILizwi likaThixo lithembisa nokuba xa kulawula uKristu, abo akholiswayo ngabo uThixo baya kufumana isipho sobomi obungunaphakade baze baphile ubomi obanelisayo kumhlaba oyiparadesi. (Marko 10:30) Elo kamva limangalisayo liya kufunyanwa ngabo bonke abantu, kuquka amahlwempu. Kuloo “mhlaba mtsha,” amahlwempu akayi kubakho ngonaphakade.
[Ibhokisi/Umfanekiso okwiphepha 7]
UYESU ‘UYA KUMHLANGULA NJANI LOWO ULIHLWEMPU’?—INdumiso 72:12
OKUSESIKWENI: “Makabagwebe abaxhwalekileyo ebantwini, makabasindise oonyana babo bangamahlwempu, makamtyumze lowo uqhathayo.” (INdumiso 72:4) Xa kulawula uKristu emhlabeni, bonke abantu baya kwenzelwa okusesikweni. Abayi kubakho abantu abonakeleyo, oyena nobangela wokuba athi ngoxa amazwe enako ukuma kakuhle kodwa aqhubeke ehlwempuzekile.
UXOLO: “Ngomhla wakhe uya kuhluma olilungisa, nobuninzi boxolo ide ingabi sabakho inyanga.” (INdumiso 72:7) Ubuhlwempu obuninzi ehlabathini bubangelwa lukruthakruthwano lwabantu neemfazwe. UKristu uya kuzisa uxolo ngokupheleleyo kulo mhlaba, batsho baphele ke abona nobangela bobuhlwempu.
UVELWANO: “Uya kuba nosizi ngesisweli nangehlwempu, nemiphefumlo yabangamahlwempu uya kuyisindisa. Uya kuwukhulula umphefumlo wabo kwingcinezelo nakugonyamelo negazi labo liya kuxabiseka emehlweni akhe.” (INdumiso 72:12-14) Olihlwempu nocinezelekileyo baya kuba phakathi kwabo bonwabileyo, bemanyene kulawulo lukaKumkani uYesu Kristu.
IMPUMELELO: “Kuya kubakho ukudla okuziinkozo okuninzi emhlabeni.” (INdumiso 72:16) Xa kulawula uKristu, abantu baya kuzifumana izinto ezininzi abazisweleyo. Abayi kuswela kutya baze bathwaxwe yindlala njengokuba kunjalo namhlanje.
[Umfanekiso okwiphepha 4, 5]
UYesu wayezikhathalela iintswelo zabo basweleyo
[Umfanekiso okwiphepha 6]
Isigidimi seBhayibhile senza abantu babenethemba lokwenene