Inkosi Icinga Nzulu Ngekamva Layo
INKOSI yaseNtshona Afrika yayiyinkokeli eyayithandwa neyayihlonelwa kakhulu ngabantu bayo. Ngesikhumbuzo sama-78 somhla wayo wokuzalwa, abahlobo bayo, intsapho nabanye ababeyinqwenelela okuhle bahlanganisana ukuze bavuyisane nayo. Kwintetho yayo, le nkosi yakhetha umxholo ongaqhelekanga kwisihlandlo esinjalo. Yathetha ngeembono zayo ngobomi emva kokufa.
Yathi emva kokufa “kukho ihlabathi elitsha elingenayo inkohliso, umona nokubawa.” Yalichaza njengehlabathi “eliyimfihlelo,” elinabemi abangamalungisa kuphela, abaya kusebenzisana noThixo.
Iinkolelo ezinjalo ziqhelekile kubantu baseAfrika. Kunqulo lwesithethe lwaseAfrika, ukufa akusosiphelo sobomi kodwa yinguqulelo nje, ukudlulela kubomi kummandla welemimoya. Kuthiwa xa umntu esifa udlulela kwihlabathi elingabonakaliyo esuka kwelibonakalayo. Njengomoya, wandula ke loo mntu afike kummandla omiwe ngookhokho bakhe.
Abemi baseNtshona Afrika abaninzi bakholelwa kwelokuba ookhokho, okanye iminyanya, iyaqinisekisa ukuba iintsapho zayo ezisemhlabeni ziphila kakuhle. Incwadi ethi West African Traditional Religion ithi: “Akukho mahluko ungako phakathi kwempembelelo abanayo abantu abaselapha emhlabeni, nabo bakwihlabathi elingaphaya. Xa babelapha emhlabeni, [ookhokho] babeziintloko-ntsapho. Ngoku ekubeni singasababoni, baseziintloko kwihlabathi lemimoya. Umdla ababenawo kwintlalo-ntle yeentsapho zabo ngokubanzi awupheli.”
Ngenxa yoko, inkosi eyalupheleyo ekhankanywe ekuqaleni yayilindele ukuba ibe kunye nookhokho bayo ize isebenze nabo kwelemimoya. Yathi: “Ndikholelwa ngokwenene ukuba bukho ubomi emva kokufa kwanokuba ndinokuqhubeka ndiyinkosi—kwanasemva kokuba ndifile.”
Noko ke, ngenxa yoko kwathethwa yile nkosi kamva, iphephandaba iSunday Times lathi ‘yayibonakala ingeyisekanga ngokupheleleyo’ ngokuphathelele ubomi emva kokufa. Yaxelela isihlwele esasihlanganisene ukuba yayikhe yeva ngencwadi exubusha ngobomi emva kokufa. Le nkosi yayisoloko iyifuna le ncwadi kangangeminyaka emihlanu. Yayikulangazelela kakhulu ukuyifunda kangangokuba yathembisa ukuba yayiya kumnika imali elingana nama-R5 500 nabani na owayenokuyiphathela umbhalo wayo.
Le nkosi ngeyayingazange izikhathaze ngokungeyomfuneko ukuba yayihlolisise incwadi ekungenzima ukuyifumana. Leyo yincwadi efumaneka lula engayilwanga ngumntu kodwa eyilwe nguMdali wabantu bonke. (1 Tesalonika 2:13) Loo ncwadi yiBhayibhile. Ithini ngobomi emva kokufa?