Ngaba Abafi Banako Ukusibona?

UMFAZI ugebenga umyeni wakhe. Kwiminyaka esixhenxe kamva uphathwa kakubi liphupha akholelwa ukuba liyimbonakaliso yengqumbo yomyeni wakhe. Ukungxengxeza “kumoya” wakhe, uthumela intombi yakhe ukuba iyokwenza umnikelo wotywala engcwabeni lakhe.

Le ntombazana ayazi emayikuthethe nomoya kayise, ekubeni umnikelo usuka kunina owambulalayo. Esithele, umnakwayo uyabukela. Uyasondela, yaye yena nodadewabo bathandaza kuyise becela abancede baphindezele ukubulawa kwakhe.

Oku kuthatyathwe kumboniso okumdlalo weqonga wesiGrike othi The Libation Bearers, owabhalwa ngaphezu kweminyaka engama-2 400 eyadlulayo. Kwiinxalenye ezithile zehlabathi, ngokukodwa eAfrika, amadini afanayo enziwa emangcwabeni asanikelwa nanamhlanje.

Ngokomzekelo, khawucinge ngamava kaIbe, ohlala eNigeria. Emva kokufelwa ngabantwana abathathu, uya egqirheni, elixelela uIbe ukuba ukufa kwabo akuhambi kodwa—uyise kaIbe owafayo uqumbile kuba umngcwabo wakhe ungenziwanga ngendlela efanelekileyo.

Esebenzisa icebiso legqirha, uIbe wenza idini ngebhokhwe aze njengomnikelo agalele igin newayini kwingcwaba likayise. Udanduluka kumoya kayise, engxengxeza, evakalisa uthando lwakhe, yaye ecela ukusikelelwa.

UIbe akalithandabuzi elokuba uyise uyambona yaye uyamva. Akayikholelwa into yokuba uyise akaphili kodwa ekufeni kwakhe “wadlulela” kwihlabathi elingabonakaliyo esuka kwelibonakalayo. UIbe ukholelwa kwelokuba uyise umkile kwihlabathi lenyama negazi waya kwihlabathi lemimoya, kwelookhokho.

UIbe uqiqa ngelithi: ‘Nangona uBawo engasekho kweli hlabathi, usandikhumbula yaye unomdla kwintlalo-ntle yam. Yaye ekubeni ngoku engumoya onamandla angakumbi, ukwimeko entle ngakumbi yokundinceda kunokuba wayenjalo njengomntu emhlabeni. Ngaphezu koko, unokunxibelelana noThixo ngokuthe ngqo egameni lam, ekubeni noThixo engumoya. Ubawo usenokuba uqumbile okwangoku, kodwa ukuba ndibonisa intlonelo efanelekileyo kuye, uya kundixolela aze andisikelele.’

EAfrika inkolo yokuba abafi bayababona abantu abasemhlabeni yaye bephembelela ubomi babo iqhelekile phakathi kwabo baqhelisela unqulo olungokwesithethe. Ikho nakwabo bathi bangamaKristu. Ngokomzekelo, emva kokuba umfazi etshatile ecaweni, akunto ingaqhelekanga ukuba agoduke aye kuyalwa. Apho kuthethwa nookhokho, yaye kuchithwa utywala njengomnikelo. Abantu abaninzi bakholelwa kwelokuba ukungakwenzi oku kubangela intlekele emtshatweni.

Kucingwa ukuba ookhokho, okanye imimoya yabo, iqinisekisa ukuphila nokuphumelela kweentsapho zabo emhlabeni. Ngokwale mbono, bayimikhosi emanyeneyo enamandla, ekwaziyo ukwenza kubekho isivuno esihle, iphucule intlalo-ntle, ize ikhusele abantu ezingozini. Bayangxengxeza ngenxa yabantu. Noko ke, ukuba abahoywa okanye bayacatshukiswa, babangela intlekele—ukugula, ubuhlwempu, kwanokufa. Ngokomphumo, ngokwenza amadini nezithethe, abantu bazama ukulondoloza ulwalamano oluhle nabafi.

Ngaba ukholelwa kwelokuba abafi banendima ebalulekileyo kubomi babaphilayo? Ngaba wakha wema phezu kwengcwaba lomntu omthandayo waza wazifumana uthetha amazwi ambalwa, mhlawumbi ngethemba lokuba unokukuva? Kaloku, enoba abafi bayasibona yaye bayasiva okanye akunjalo kuxhomekeke koko kwenzekayo ekufeni. Makhe sihlolisise oko iBhayibhile ikutshoyo ngalo mbandela ubalulekileyo.