Sasinikwe Iperile Exabiso Likhulu
NGOKUBALISWA NGURICHARD GUNTHER
KwakungoSeptemba 1959. Sasikwinqanawa yaseItaly iJulio Caesar siwela uLwandlekazi lweAtlantiki sisuka eNew York sisiya eCádiz, eSpeyin. IWatch Tower Society yayindabele kwelo lizwe laseIberia nomfazi wam, uRita, kunye noPaul noEvelyn Hundertmark, esinye isibini esingabavangeli basemazweni. Sasiza kujamelana neentlobo ngeentlobo zocelomngeni. Kodwa yintoni eyasenza sangenela umsebenzi wobuvangeli basemazweni?
MNA noRita sabhaptizwa njengamaNgqina kaYehova ngowe-1950 eNew Jersey, eUnited States. Kungekudala emva koko, senza isigqibo esasiza kusenza sifumane iperile exabiso likhulu ekuhambeni kwexesha. Sasikwibandla elalinabazalwana noodade abaneleyo ukusebenza ummandla wethu. Ngoko saziva sinyanzelekile ukuba sizinikele ukuya kukhonza apho kwakukho imfuneko enkulu yabashumayeli. Safaka isicelo senkonzo yobuvangeli basemazweni, kwindibano yezizwe ngezizwe yamaNgqina kaYehova eyayikwisiXeko saseNew York ngehlobo lowe-1958.
Kungekudala emva koko, samenyelwa kwiSikolo seBhayibhile seWatchtower saseGiliyadi, yaye kungaphelanga nonyaka senjenjeya ukusinga eSpeyin njengabavangeli basemazweni. Ngenxa yamalungiselelo amaninzi nokonganyelwa yimincili, asizange sikuqonde oko sasikunikiwe ngelo xesha. UYesu wayethethe ngeperile exabiso likhulu. (Mateyu 13:45, 46) Nangona umzekeliso wakhe wawungathethi ngobuvangeli basemazweni, ilungelo lethu lokukhonza njengabavangeli basemazweni kuthi lalifana naloo perile. Xa sikhangela emva, ngoku sisiqonda ngokuzele ngakumbi esi sipho sixabisekileyo senkonzo entlanganweni kaYehova.
Amava Angalibalekiyo
Ngelo xesha izifundo zaseGiliyadi zabavangeli basemazweni zaziqhutyelwa kwindawo entle esemaphandleni kummandla weeFinger Lakes kwiLizwana laseNew York. Sachitha iinyanga ezintandathu ezisemagqabini apho sizibhokoxa kufundisiso lweBhayibhile nakunxulumano lokwenene namanye amaKristu, sahlukene nemicimbi neenkathazo zeli hlabathi. Abanye esasifunda nabo babesuka kwiindawo ezininzi zehlabathi, eziquka iBolivia, iBritani, iGrisi, iNew Zealand neOstreliya. Noko ke kungekudala, yayilusuku lothweso-zidanga. NgoAgasti 1959, sathi ndlela-ntle siinyembezana njengoko sasihamba ngeenqanawa sisiya kwizabelo zethu ezahlukahlukeneyo zobuvangeli basemazweni. Kwinyanga emva koko safika eSpeyin.
Indlela Entsha Yokuphila
Safika kwizibuko elisemazantsi laseAlgeciras, kufutshane neLiwa elikhulu laseGibraltar. Ngobo busuku sobane, mna noRita nabakwaHundertmark, sakhwela uloliwe oya eMadrid. Saya kwiHotele iMercador, ukuze silinde de siqhagamshelane namalungu eofisi yesebe loMbutho elalisebenza ngokufihlakeleyo. ISpeyin yayiphantsi kolawulo lobuzwilakhe loMphathi-mkhosi uFrancisco Franco. Oku kwakuthetha ukuba ekuphela konqulo olwamkelekileyo ngokwasemthethweni kwelo lizwe yayiyiCawa yamaRoma Katolika. Kwakungekho mthethweni ukuqhubeka nolunye unqulo ngokuphandle, yaye umsebenzi wamaNgqina kaYehova wokushumayela kwindlu ngendlu wawuvaliwe. Kwaneentlanganiso zonqulo zazingavumelekanga, okwakuthetha ukuba amaNgqina kaYehova, ayemalunga ne-1 200 kumabandla angama-30 eSpeyin ngelo xesha, ayengenakuhlanganisana kwiiHolo zoBukumkani njengakwamanye amazwe. Kwakufuneka sihlanganisane ngokufihlakeleyo emakhayeni abantu.
Ukufunda ISpanish Nokuqalisa Umsebenzi
Ucelomngeni lwethu lokuqala yayikukufunda ulwimi lwalapho. Kwinyanga yokuqala sasichitha iiyure ezili-11 ngosuku sifunda iSpanish—iiyure ezi-4 ntsasa nganye sifundiswa ngokuthe ngqo, emva koko iiyure ezisi-7 sizifundela. Kwinyanga yesibini sasisenza into efanayo kusasa, kodwa emva kwemini sasizinikela ngokuzeleyo ekushumayeleni kwindlu ngendlu. Khawufan’ ucinge? Singekalwazi nolo lwimi yaye sinentshayelelo esiyicengcelezileyo nekwiqweqwe elincinane kuphela, mna noRita saya kumsebenzi wendlu ngendlu sisobabini kuphela!
Ndikhumbula ndinkqonkqoza kwenye indlu eVallecas, icandelo elihlala abasebenzi eMadrid. Ndiphethe iqweqwe lam, ukulungiselela into engekehli, ndathi ngeSpanish: “Bhota. Senza umsebenzi wamaKristu. IBhayibhile ithi (sasiye sifunde isibhalo esithile). Singathanda ukuba uzifumanele le ncwadana.” Eli nenekazi lasuka lasijonga, laza layithabatha loo ncwadana. Xa saphinda salibuyela, lasicela ukuba singene, yaye njengoko sasithetha, lasuka lasijonga. Saqalisa isifundo seBhayibhile nalo sisenza konke okusemandleni ethu, yaye ebudeni bezifundo zethu, laliphulaphula lize lisijonge nje kuphela. Emva kwexesha elithile lada lasixelela ukuba alizange likuqonde oko sasikuthetha kutyelelo lwethu lokuqala kodwa leva igama elithi Dios (Thixo) kwanokuba oku kwakwanela ukulenza lazi ukuba sasithetha ngento elungileyo. Ekuhambeni kwexesha, lazondla ngemfundo eninzi yeBhayibhile laza labhaptizwa, lisiba ngomnye wamaNgqina kaYehova.
Kwakungeyondlwan’ iyanetha kwaphela kum ukufunda iSpanish. Ngoxa ndandihamba esixekweni, ndandidla ngokucengceleza indlela yokusebenzisa ukuguquguquka kwezenzi. Oko ndandikucengcelezile kule veki ndandikulibala kwelandelayo! Kwakutyhafisa gqitha. Izihlandlo ezininzi ndandiphantse ndinikezele. Ekubeni ndandithetha iSpanish esihlwempuzekileyo, abazalwana baseSpeyin kwafuneka bandinyamezele kakhulu njengoko ndandithabatha ukhokelo. Kwenye indibano yesithili, omnye umzalwana wandinika isaziso esibhalwe ngesandla ukuba ndisifunde eqongeni. Ngenxa yokungakwazi ukukufunda kakuhle oko wayekubhalile, ndathi: “Ngomso nize neemuletas (iintonga zokuhamba) zenu kweli bala lemidlalo.” Ndandimele ndithi, “Ngomso nize neemaletas (imithwalo) zenu kweli bala lemidlalo.” Kakade ke, eso sihlwele sandihleka, yaye ngokuzenzekelayo ndadana.
Iimvavanyo Zokuqala EMadrid
Loo minyaka yokuqala eMadrid yayinzima kakhulu ngokweemvakalelo kum noRita. Sasilikhumbula kakhulu ikhaya lethu nabahlobo bethu. Sihlandlo ngasinye sifumana incwadi evela eUnited States, sasidla ngokufikelwa kukukhumbula ikhaya. Loo maxesha okukhumbul’ ekhaya ayenzima kakhulu, kodwa adlula. Ngapha koko, sasilincamile ikhaya, intsapho, abahlobo ukuze endaweni yoko sifumane iperile exabiso likhulu. Kwakufuneka siziqhelanise neemeko.
EMadrid, safikela kwibobosi lomzi onamagumbi aqeshisayo. Sasinegumbi lethu yaye sifumana izidlo ezithathu ngemini. Yayiligumbi elincinane nelimnyama, yaye oomatrasi babenziwe ngeendiza. Irente yenyanga yayiwugqiba wonke umxhesho wethu wenyanga ongephi. Ngokuqhelekileyo sasisityela apho isidlo sasemini, yaye inenekazi umnikazi-mzi wayedla ngokusishiya eontini isidlo sethu sangokuhlwa ukuze sihlale sifudumele kwanokuze sibe nento yokutya ebusuku. Noko ke, ngenxa yokuba sasinyuka sisihla ebudeni bemini nangokuhlwa, sasiye silambe kakhulu. Xa umxhesho wethu wawuphelile, sasiye sisebenzise imalana esasinayo ukuze sithenge eyona chocolate ixabiso liphantsi. Noko ke, kungadlulanga xesha lide le meko yaguquka, emva kotyelelo lomveleli wecandelo woMbutho. Wayibona imeko yethu waza wathi sasinokufuna isakhiwo esinamagumbi aqeshisayo esasinokusisebenzisa njengekhaya labavangeli basemazweni. Ewe, oku kwakuza kuba kuhle ngakumbi kunokuhlamba simi ngeenyawo kwisitya sokuhlambela kwigumbi lokuphekela. Ngoku sasiza kuba neshawa, isikhenkcisi sokugcina ukutya kwethu nesitovu sombane esasiza kupheka ngaso. Saluxabisa kakhulu ulwazelelelo olunjalo.
Amava Angummangaliso EMadrid
Umsebenzi wokushumayela kwindlu ngendlu wawusenziwa ngobulumko. Isiphithiphithi esikho mihla le eMadrid sasisinceda, sisenza singabonakali lula. Sasizama ukunxiba nokwenza izinto njengabanye ukuze singabonakali lula ukuba singabantu belinye ilizwe. Indlela esasishumayela ngayo kwindlu ngendlu yayikukungena kwisakhiwo esinamagumbi aqeshisayo, sinkqonkqoze, sithethe nomntu lowo, size sisishiye eso sakhiwo, eso sitrato, naloo mmandla. Sasisoloko siyilindele into yokuba umninimzi angabiza amapolisa, yaye ngoko kwakungebobulumko ukuhlala elumelwaneni. Eneneni, nakuba babeyisebenzisa ngobulumko le ndlela yokushumayela, uPaul noEvelyn Hundertmark babanjwa baza bagxothwa kwelo lizwe ngowe-1960. Baya kwiPortugal eselumelwaneni, bakhonza apho iminyaka eliqela, uPaul enyamekela iofisi yesebe esebenza ngokufihlakeleyo. Namhlanje ngumveleli wesixeko eSan Diego, eCalifornia.
Noko ke, kwenzeka okuthile okwenza salingana. Kwiinyanga nje ezimbalwa kamva, abavangeli basemazweni abathandathu abababelwe ePortugal bagxothwa kwelo lizwe! Oku kwaba nesiphumo esivuyisayo kuba uEric noHazel Beveridge, ababekwiklasi yethu eGiliyadi, ngoku banikwa ulwalathiso lokuba bayishiye iPortugal beze eSpeyin. Ngoko ngoFebruwari 1962, sasilapho kwiHotele iMercador kwakhona—ngesi sihlandlo sizokwamkela uEric noHazel njengoko babefika.
Kwakusebudeni bezi ntsuku zokuqala eMadrid endathi mna noRita sazibonela uhanahaniso lonqulo. Sasifundisisa iBhayibhile nesinye isibini, uBernardo noMaria, esasihlala etyotyombeni elalenziwe ngazo zonke izinto zokwakha awayezichola uBernardo. Sasifunda nabo ebusuku, yaye emva kwesifundo, babesipha isonka, iwayini nentwana yesonka samasi okanye nantoni na ababenayo. Ndaphawula ukuba eso sonka samasi sasifana nesaseMerika. Ngobunye ubusuku emva kwesifundo, bakhupha inkonkxa eyayineso sonka samasi. Yayibhalwe ngamagama amakhulu, ngesiNgesi, “Sisuka kubantu baseMerika siya kubantu baseSpeyin—masingathengiswa.” Yayisifumana njani eso sonka samasi le ntsapho ihlwempuzekileyo? ICawa yamaKatolika yayisetyenziswa ngurhulumente ukuba isabele amahlwempu. Kodwa umfundisi wayesithengisa!
Ubulungiseleli Obunesiqhamo Nabasemkhosini
Kungadlulanga xesha lide kwenzeka into emangalisayo ekugqibeleni eyayiza kuba yintsikelelo etyebileyo kuthi nakwabanye abaninzi. Safumana isaziso kwiofisi yesebe sicelwa ukuba sityelele umfana ogama linguWalter Kiedaisch, owayehlala kwiziko loMkhosi Womoya laseUnited States eliseTorrejón, elalikumgama weekhilomitha ezimbalwa ukusuka eMadrid. Samtyelela nenkosikazi yakhe, saqalisa isifundo seBhayibhile kunye nabo nesinye isibini esikwakuloo Mkhosi Womoya.
Ebudeni belo xesha, ndandiqhuba malunga nezifundo zeBhayibhile ezintlanu nabantu ababesebenza kuloo Mkhosi Womoya waseUnited States, kakade ke, ndandiziqhuba ngesiNgesi zonke. Abasixhenxe kubo babhaptizwa kamva, yaye emva kokubuyela eUnited States, abane kuloo madoda baba ngabadala bamabandla.
Ngeli xesha kwakunzima ukungenisa iincwadi, amaphephancwadi neeBhayibhile kwelo lizwe ngenxa yokuvalwa komsebenzi wethu. Noko ke, olunye uncwadi lwalungeniswa ngabakhenkethi nangabantu baseMerika esasibazi. Isebe landabela ukuba ndinyamekele indawo efihlakeleyo esasigcina kuyo iincwadi zethu. Yayikwigumbi ekugcinwa kulo izinto elalingasemva kwivenkile yeencwadi eVallecas. Inkosikazi yomnini-venkile yayingomnye wamaNgqina kaYehova. Nangona wayengeloNgqina, lo mnini-venkile wayewuhlonela umsebenzi wethu, yaye nangona wayezibeka esichengeni yena neshishini lakhe, wandivumela ukuba ndisebenzise le ndawo ingasemva ukuze ndipakishe uncwadi endandiza kuluthumela kuzo zonke izixeko ezikwelo lizwe. Ekubeni eli gumbi lalifanele lihlale likhangeleka ngendlela ekwakulindeleke ukuba libe yiyo—libe ligumbi elingacocekanga, elithe saa iibhokisi yonke indawo—kwafuneka ndenze itafilana yokusebenzela nethala leencwadi endandinokulenza lilungele ukusetyenziswa ngokukhawuleza lize lichithwe ngemizuzwana. Ekupheleni kwemini, ndandilinda de kungabikho mntu evenkileni ndize ndiphume ngokukhawuleza neepasile zam.
Kwakulilungelo elikhulu ukuba nesabelo ekwabeni ukudla kokomoya, okunjengephephancwadi IMboniselo noVukani! nolunye uncwadi, kumabandla akwelo lizwe. Lawo yayingamaxesha achulumancisayo.
URita waba novuyo lokuqhuba izifundo zeBhayibhile zamakhaya ezili-16, ekwathi malunga nesiqingatha sazo saba ngamaNgqina kaYehova abhaptiziweyo. UDolores wayengumfazana owayehlal’ ebhedini ebudeni beentsuku zobusika ezibandayo ngenxa yesifo sentliziyo. Entwasahlobo wayekwazi ukuphakama aze ngandlel’ ithile akwazi ukwenza imisetyenzana. Ukholo lukaDolores lwalomelele, ngoko xa kwafika ixesha lendibano yethu yesithili eyayiseToulouse, eFransi, wayekulangazelela gqitha ukuhamba. Ugqirha wamlumkisa esithi kwakungayi kuba bubulumko ukwenjenjalo ngenxa yemeko yentliziyo yakhe. Enxibe ilokhwe yasekhaya nee-slippers yaye engenamthwalo, waya kwisikhululo sikaloliwe epheleka umyeni wakhe, unina nabanye. Enyembezana, akazange akwazi ukukunyamezela ukubabukela behamba ngaphandle kwakhe, ngoko wakhwela kuloliwe, waza naye waya eFransi! URita wayengazi ukuba kwakwenzeke oku. Kodwa apho endibanweni, hayi indlela awothuka ngayo xa wabona uDolores, etsho ngolukhulu uncumo!
Isifundo SeBhayibhile Esingaqhelekanga
Asinakuliqukumbela eli bali lesabelo sethu eMadrid singakhange simkhankanye uDon Benigno Franco, “el profesor.” Elinye iNgqina lasekuhlaleni lahamba nam ukuze sityelele elinye inene elikhulileyo elalihlala nenkosikazi yalo kwisakhiwo esinamagumbi aqeshisayo esingekho mgangathweni. Ndaqalisa isifundo seBhayibhile nalo. Emva kokufundisisa nalo ithuba elingangonyaka onesiqingatha, lacela ukubhaptizwa ukuze libe ngomnye wamaNgqina kaYehova.
Eli nene likhulileyo, uDon Benigno Franco, lalingumza kaFrancisco Franco, umlawuli onguzwilakhe waseSpeyin ngelo xesha. Kubonakala ukuba uDon Benigno wayesoloko engumntu othanda inkululeko. Ebudeni beMfazwe yamaKhaya yaseSpeyin, wayevelana neRiphabliki yaye enxamnye nomza wakhe—injengele eyaphumelelayo kuloo mfazwe yaza yamisela ulawulo lobuzwilakhe lwamaKatolika. Ukususela ngowe-1939, uDon Benigno walihluthwa ilungelo lokuphangela, yaye wanyanzeleka ukuba aphile ubomi obuhlwempuzeke gqitha. Kwenzeka ngolo hlobo ke ukuba umza woMphathi-mkhosi uFrancisco Franco, umlawuli onguzwilakhe waseSpeyin, abe ngomnye wamaNgqina kaYehova.
Isimemo Esingalindelekanga
Ngowe-1965 iofisi yesebe yaseSpeyin yasimema ukuba siqalise umsebenzi wokujikeleza kwisiphaluka saseBarcelona. Oku kwakuthetha ukushiya bonke abazalwana abanothando baseMadrid esasisele sibaqhele kakhulu. Ngoku sasingazi kuqalisa ukuba namava amatsha nje kuphela kodwa, kwakuza kuqalisa novavanyo lwam olutsha. Kwakungamava oyikekayo kuba ndandisoloko ndibuthandabuza ubuchule bam. Ndazi kakuhle ukuba nguYehova owandenza ndaphumelela kule nxalenye yenkonzo.
Ukutyelela ibandla elahlukileyo veki nganye kwakuthetha ukuhlala emakhayeni abazalwana. Kwakufuneka sibe ngoonothwali-mpahlana, yaye zazingafane ziphele iiveki ezimbini, singadlulelanga kwelinye ikhaya. Oku kunzima ngokukodwa kumntu olibhinqa. Kodwa kungadlulanga xesha lide uJosé noRoser Escudé, ababehlala eBarcelona, basimema ukuba sihlale nabo iintsuku eziliqela sihlandlo ngasinye. Oko kwakubonisa ukuba babenothando, kuba kwakuthetha ukuba sasiza kuba nendawo esisigxina yokugcina izinto zethu nendawo esisigxina yokufikela ngeengokuhlwa zangeCawa.
Mna noRita sachitha iminyaka emine eyalandelayo kumsebenzi wesiphaluka kwiphondo laseCatalonia, elikuNxweme lweMeditera. Zonke iintlanganiso zethu zeBhayibhile zaziqhutywa ngokufihlakeleyo emakhayeni abantu, nomsebenzi wethu wokushumayela kwindlu ngendlu sasiwenza ngobulumko ukuze singaphawulwa. Maxa wambi kwakubakho ibandla liphela kwi-“pikiniki” yangeCawa emahlathini, ngokukodwa xa sinendibano yesiphaluka.
Siya kuhlala sibaxabisa abazalwana bokomoya abaninzi ababezinikele ababeka imisebenzi nenkululeko yabo esichengeni, bezibhokoxa ukuze bagcine amabandla emanyene yaye ekhuthele. Inkoliso yabo yakhokela ekudluliseleni umsebenzi kwiidolophu ezingaphandle kweso sixeko. Oku kwayila isiseko solwando olukhulu eSpeyin emva kokuba umsebenzi wethu uvuliwe saza safumana inkululeko yonqulo ngowe-1970.
Ukunyanzeleka Ukuba Sisishiye Isabelo Sethu Kwelinye Ilizwe
Ebudeni beminyaka elishumi esayichithela eSpeyin, ukunandipha kwethu le ntsikelelo ikhethekileyo yokukhonza uYehova kwakuphazanyiswa yimeko yabazali bethu. Izihlandlo eziliqela, kwakuphantse kunyanzeleke ukuba sisishiye isabelo sethu size sigoduke ukuze sinyamekele umama notata. Noko ke, ngenxa yabazalwana noodade abanothando abakumabandla akufuphi nabazali bam, sasikwazi ukuqhubeka sikhonza eSpeyin. Ewe, ilungelo lokukhonza yonke loo minyaka kumsebenzi wobuvangeli basemazweni ngokuyinxenye lalixhaswa ngabanye ababencedisana nathi ekubekeni izilangazelelo zoBukumkani bukaThixo kwindawo yokuqala.
Ekugqibeleni, ngoDisemba 1968, sagoduka ukuze sinyamekele umama. Kwangaloo nyanga ubawo wafa, yaye ngoku umama wayesele yedwa. Ekubeni ngomlinganiselo othile sasisakhululekile ukuba singakwinkonzo yexesha elizeleyo, safumana isabelo sokukhonza kumsebenzi wesiphaluka, kodwa ngoku eUnited States. Kwiminyaka engama-20 eyalandelayo, sasikhonza kwiziphaluka zabathetha iSpanish. Nangona sasilahlekelwe yiperile yethu exabiso likhulu yobuvangeli basemazweni, sasinikwe enye.
Ukushumayela Phakathi Kweziyobisi Nogonyamelo
Ngoku sasikhonza kunye nabazalwana noodade abaninzi ababehlala kwindawo ezizaliswe bubundlobongela kweso sixeko. Kaloku, kwakwiveki yokuqala sikumsebenzi wesiphaluka eBrooklyn, eNew York, uRita waxhwilelwa isipaji.
Ngesinye isihlandlo mna noRita sasikunye nelinye iqela sisenza umsebenzi wokushumayela kwindlu ngendlu kwelinye icandelo lesiXeko saseNew York. Sakujikela kwenye ikona, sabona abantu benze umgca phambi komngxuma oseludongeni lwesakhiwo esingasahlali mntu. Sathi xa sihlabela mgama sinyuka kweso sitrato, sabona omnye umfana emi ecaleni kwendlela esijongile. Kwakukho nomnye kwenye ikona ekude ejonge iinqwelo-mafutha zamapolisa. Sasingene saphelela kwindawo ekwakuthengiswa kuyo iziyobisi! Umlindi wokuqala wothuka, kodwa wathi emva kokubona iphephancwadi IMboniselo wakhululeka. Ngapha koko, kwakunokwenzeka ukuba ndilipolisa! Emva koko wakhwaza ngeSpanish, “¡Los Atalayas! ¡Los Atalayas!” (NgamaWatchtower! amaWatchtower!) Babesazi ukuba singoobani, besibona ngamaphephancwadi ethu, yaye kwakungekho ngxaki. Njengoko ndandidlula kufutshane naye, ndathi, “¿Buenos dias, como está?” (Bhota, kunjani?) Waphendula ngokundicela ukuba ndimthandazele!
Isigqibo Esinzima
Ngowe-1990 kwacaca ukuba kwakuza kufuneka ndibe kunye nomama yonke imihla. Sasenze konke okusemandleni ethu ukuhlala kumsebenzi wokujikeleza, kodwa ukusebenzisa ubulumko kwasenza saqonda ukuba sasingenako ukuziphumeza zombini ezi mbopheleleko. Sasifuna ukuqiniseka ngenene ukuba uMama wayenyanyekelwa ngothando. Kodwa kwakhona kwafuneka sincame iperile exabiso likhulu, into esasiyixabisa kakhulu. Onke amatye anqabileyo okoqobo asehlabathini nako konke anokumenzela kona umntu kuncinane gqitha xa kuthelekiswa namatye anqabileyo okukhonza njengomvangeli wasemazweni okanye njengomveleli ohamba-hambayo entlanganweni kaYehova.
Ngoku mna noRita sikwiminyaka yethu yama-60. Sanelisekile ngokupheleleyo yaye siyakunandipha ukukhonza nebandla lasekuhlaleni labantu abathetha iSpanish. Xa sikhangela emva kwiminyaka esiyichithele enkonzweni kaYehova, siyambulela ngokusinika iiperile ezixabiso likhulu.
[Umfanekiso okwiphepha 23]
Ndikunye noRita noPaul noEvelyn Hundertmark (ekunene) ngaphandle kwebala laseMadrid lomlo weenkunzi zeenkomo
[Umfanekiso okwiphepha 24]
Ukukhonza ibandla kwi-“pikiniki” emahlathini