Ibali Lobomi
Ubomi Bemimangaliso Enkonzweni KaYehova
NGOKUBALISWA NGUERIC NOHAZEL BEVERIDGE
“Ndikugweba iinyanga ezintandathu entolongweni.” Ndinalo mazwi enkenteza ezindlebeni zam, ndasiwa kwiNtolongo iStrangeways eManchester, eNgilani. KwakungoDisemba ngowe-1950, yaye ndandineminyaka eli-19 ubudala. Ndandisandul’ ukujamelana nenye yeemvavanyo eziqatha kubomi bam bobutsha—ndandingazange ndivume ukubizwa kwinkonzo yasemkhosini.—2 Korinte 10:3-5.
NDANDINGUMLUNGISELELI onguvulindlela wexesha elizeleyo wamaNgqina kaYehova, nto leyo eyayimele ithethe ukuba andibandakanywa kwinkonzo yasemkhosini, kodwa umthetho waseBritani wawungasamkeli njengabalungiseleli. Ngoko ndazifumana sele ndinkolonkoloza ndedwa esiseleni. Yaye ndacinga ngotata. Ngandlel’ ithile, ndandisentolongweni ngenxa yakhe.
Makhe ndikubalisele, uTata, umphathi wamabanjwa, wayeyindoda yaseYorkshire eyayibambelela ngokuqinileyo kwizigqibo nemilinganiselo yayo. Ngenxa yamava akhe asemkhosini nenkonzo yasentolongweni, wayewathiy’ egazini amaKatolika. Waqala ukudibana namaNgqina emva phayaa ekuqaleni kweminyaka yee-1930 wathetha nawo emi emnyango ngeliwagxothayo—waza wabuya ephethe ezinye zeencwadi zawo! Kamva warhumela iphephancwadi iConsolation (ngoku elinguVukani!). AmaNgqina ayedla ngokumtyelela nyaka ngamnye ukuze amkhuthaze ukuba avuselele umrhumo wakhe. Xa ndandineminyaka enokuba li-15 ubudala, amaNgqina axubusha okuthile noTata, ndaza ndangenelela ndithethelela amaNgqina. Ndaqala ngoko ukufundisisa iBhayibhile.
Xa ndandineminyaka eli-17 ubudala, ndafuzisela uzahlulelo lwam kuYehova ngokubhaptizwa ngoMatshi 1949. Kamva ngaloo nyaka ndadibana noJohn noMichael Charuk, ababesandul’ ukuphumelela kwisikolo sabavangeli basemazweni saseGiliyadi besiya eNigeria. Ndachukumiseka gqitha ngumoya wabo wobuvangeli basemazweni. Mhlawumbi besazi okanye bengazi, batyala loo moya entliziyweni yam.
Ngoxa ndandifundisisa iBhayibhile, ndaphelelwa ngumdla wokufuna ukuya eyunivesithi. Kungaphelanga nonyaka emva kokuba ndilishiyile ikhaya ndaya kusebenza kwiofisi yeCustoms and Excise eseLondon, ndavakalelwa kukuba ndandingenakukufeza ukuzahlulela kwam kuThixo ngokuqhubeka ndisebenza kwinkonzo karhulumente. Ndakuba ndiwuyekile umsebenzi wam, igqala elithile endandisebenza nalo lavuyisana nam ngokushiya loo “msebenzi udandathekisayo.”
Ngaphambi koku ndajamelana nolunye uvavanyo—indlela yokuxelela utata ukuba ndifuna ukuyeka umsebenzi wam osisigxina ndibe ngumlungiseleli wexesha elizeleyo. Ngenye ingokuhlwa ngoxa ndandisekhefini ekhaya, ndaziphalaza ezo ndaba zothusayo. Ndandilindele ukuba uTata adubuleke ngumsindo. Ndamangaliswa kukumva esithi: “Oxhel’ eyakhe akabuzwa. Kodwa ke uze ukhumbule ukuba indlovu ayisindwa ngumboko wayo.” Ndabhala oku kwidayari yam ngoJanuwari 1, 1950: “Ndimxelele uTata ngobuvulindlela. Ndiye ndamangaliswa kakhulu yindlela esengqiqweni neluncedo asabele ngayo. Andikhange ndikwazi ukuzibamba iinyembezi bububele bakhe.” Ndarhoxa kumsebenzi karhulumente ndaza ndamkela isabelo sokuba nguvulindlela othe ngxi.
Isabelo Esasiquka “Indlu Encinane”
Kwalandela olunye uvavanyo lokuzinikela kwam kuThixo. Ndanikwa isabelo sobuvulindlela eLancashire, apho ndandiza kuhlala noLloyd Griffiths ‘kwindlu encinane,’ omnye umKristu owayevela eWales. Ndizele ngamabhongo ngaloo ndlu incinane, ndafika kwidolophu emdaka yaseBacup, isithi gxi imvula. Hayi indlela endadana ngayo xa kwathi kanti loo ndlu incinane ligumbi elingaphantsi komhlaba! Ebusuku sasihlala neempuku namaphela. Kwakukancinane nje ukuba ndingajiki ndibuyele ekhaya. Kunoko, kumthandazo endawenza ngaphakathi ndacela amandla okujamelana nolu vavanyo. Ngesiquphe, ndaba noxolo ndaza ndaqalisa ukubona izinto ngendlela elungeleleneyo. Esi yayisisabelo endisinikwe yintlangano kaYehova. Ndandiza kuthembela kuYehova ukuze andincede. Hayi indlela endivuya ngayo ngenxa yokuba ndahlala kuso, kuba ukunikezela kwakuza kubuguqula ngonaphakade ubomi bam!—Isaya 26:3, 4.
Ndashumayela eRossendale Valley ngelo xesha eyayiqhwalela kwezoqoqosho malunga neenyanga ezisithoba ngaphambi kokuba ndiphoswe entolongweni ngenxa yokwala ukuya kwinkonzo yasemkhosini. Emva kweeveki ezimbini ndikwiNtolongo iStrangeways, ndafuduselwa kwiNtolongo iLewes kunxweme olusemazantsi eNgilani. Ekugqibeleni savalelwa apho saba ngamaNgqina amahlanu, yaye sakwazi ukuqhuba iSikhumbuzo sokufa kukaKristu apho esiseleni.
UTata waza kundibona kanye. Oko kumele ukuba kwasivavanya isidima sakhe—umphathi wamabanjwa owaziwayo eze kubona unyana wakhe ovalelwe entolongweni! Ndiya kusoloko ndinombulelo ngeso senzo. Ekugqibeleni ndakhululwa ngoAprili wowe-1951.
Emva kokukhululwa kwam eLewes, ndathabatha uloliwe oya eCardiff, eWales, apho utata wayekhonza khona njengentloko yabaphathi bamabanjwa. Ndandingomdala kubantwana abane—amakhwenkwe amathathu nentombi. Kwafuneka ndifune umsebenzi ukuze ndikwazi ukuziphilisa ndize ndiqhubeke nobuvulindlela. Ndaya kusebenza kwivenkile yeempahla, kodwa oyena ndoqo ebomini bam yayibubulungiseli bobuKristu. Malunga neli xesha umama wasishiya. Le yaba yintlungu engathethekiyo kuTata nakuthi bantwana, abaneminyaka esi-8 ukusa kweli-19 ubudala. Okubuhlungu kukuba, abazali bethu bawuqhawula umtshato wabo.
Lowo Ufumana Umfazi Olungileyo . . .
Kwakukho oovulindlela abaliqela ebandleni. Phakathi kwabo kwakukho udade owayesiza yonke imihla esuka eRhondda Valley eyayinomgodi wamalahle ukuza kusebenza nokushumayela. Igama lakhe yayinguHazel Green—uvulindlela obalaseleyo. UHazel wayazi inyaniso iminyaka emininzi kunam—abazali bakhe babesiya kwiintlanganiso zaBafundi beBhayibhile (ngoku abaziwa njengamaNgqina kaYehova) emva phayaa ngeminyaka yee-1920. Kodwa makabalise ngokwakhe ibali lakhe.
“Andizange ndizikhathaze kangako ngeBhayibhile de kwangowe-1944 xa ndafunda incwadana ethi Religion Reaps the Whirlwind. Umama wandeyisela ukuba ndiye kwindibano yesiphaluka eCardiff. Ndingenalo nofifi ngeBhayibhile, ndazifumana sele ndimi kuluhlu lweevenkile ndigangxe emqaleni ibhodi ebhengeza intetho yesidlangalala. Ndasinda ngeso sihlandlo phezu kwako nje ukutyityimbiselwa umnwe ngabefundisi nabanye abantu. Ndabhaptizwa ngowe-1946 ndaza ndaqalisa ubuvulindlela ngoDisemba waloo nyaka. Ngowe-1951 kwafika uvulindlela oselula, osandul’ ukuphuma entolongweni eCardiff. YayinguEric ke lowo.
“Sahamba saya kushumayela sobabini. Sasivana gqitha. Sasineenjongo ezifanayo ebomi—ukuhambisela phambili izilangazelelo zoBukumkani bukaThixo. Ngoko satshata ngoDisemba 1952. Nangona sobabini sasingoovulindlela bexesha elizeleyo yaye singenamali ingako, asizange singabi nazo izinto ezingundoqo. Maxa wambi sasifumana isipho kwiNgqina elithe laodola ijam okanye isepha eninzi kwizinto zalo—kanye xa ezo zinto sizifuna! Sasizixabisa kakhulu izipho ezilolo hlobo. Kodwa sasilindelwe yimimangaliso engakumbi.”
Ummangaliso Owaguqula Ubomi Bethu
NgoNovemba 1954, mna noHazel safumana ummangaliso esasingawulindelanga—isicelo esivela kwiofisi yesebe lamaNgqina kaYehova eLondon sokuba ndibe ngumveleli ohambahambayo, ndityelela ibandla elahlukileyo veki nganye. Sasiqinisekile ukuba yimpazamo, ngoko asizange sixelele namnye ebandleni. Noko ke, ndayizalisa loo fomu ndaza ndayithumela emva, saza ngomonde salinda impendulo. Emva kweentsuku ezimbalwa, yafika impendulo: “Yiza eLondon uze kuqeqeshwa”!
Kwiofisi yaseLondon, ndandingakholelwa ukuba mna, ndineminyaka engama-23 ubudala, ndandikunye nabazalwana abakhethekileyo ababebonakala ngathi ziingxilimbela zokomoya kum—uPryce Hughes, uEmlyn Wynes, uErnie Beavor, uErnie Guiver, uBob Gough, uGlynn Parr, uStan noMartin Woodburn kunye nabanye abaninzi, inkoliso yabo esele ifile ngoku. Babeka isiseko esiluqilima senzondelelo nengqibelelo eBritani emva phayaa ngeminyaka yee-1940 neyee-1950.
Umsebenzi Wesiphaluka ENgilani—Awuzange Ukruqule
Isiqalo sethu somsebenzi wokuhambahamba saqala kubusika obabunekhephu elininzi ngowe-1954/55. Sabelwa ukuba siye e-East Anglia, ummandla osezantsi eNgilani othwaxwa yimimoya ebandayo yeNorth Sea. Kwakukho amaNgqina angama-31 000 kuphela eBritani ngelo xesha. Eso siphaluka sokuqala saba sisifundo esinzima kakhulu kuthi; yaye kwakungasoloko kulula nangabazalwana esasibatyelela. Njengoko ndandingenamava yaye ndithetha ngokuphandle njengabo bonke abantu baseYorkshire, maxa wambi ndandibanyathela ezinzwaneni abazalwana. Ekuhambeni kweminyaka, kuye kwafuneka ndifunde ukuba ububele bubaluleke ngakumbi kunokwenza izinto ngomgaqo yaye nokuba abantu babaluleke ngakumbi kunenkqubo. Nangoku ndiyazama, kodwa andisoloko ndiphumelela, ukulandela umzekelo kaYesu wokuhlaziya abanye.—Mateyu 11:28-30.
Emva kweenyanga ezili-18 sise-East Anglia, sabelwa ukuba sikhonze kwisiphaluka esikumntla-mpuma weNgilani, iNewcastle kumantla eTyne neNorthumberland. Ndandibathanda abantu abanobubele baloo ngingqi yelo lizwe. Oyena mntu waba luncedo kakhulu kum yaba ngumveleli wesithili owayetyelela, uDon Ward, owayevela eSeattle, eWashington, eUnited States. Wayengomnye wabo baphumelela kwiklasi yama-20 yaseGiliyadi. Njengesithethi, ndandidla ngokushwantshwatha, ndikhawulezise ukuthetha. Wandifundisa ukuba ndehlise isantya, ndiphumle, ndize ndifundise.
Omnye Ummangaliso Owaguqula Ubomi Bethu
Ngowe-1958 safumana ileta eyaguqula ubomi bethu. Samenywa ukuba siye kwiSikolo saseGiliyadi eSouth Lansing, eNew York, eUnited States. Sathengisa imoto yethu encinane iAustin Seven yowe-1935 saza sathenga amatikiti enqanawa okuya eNew York. Kuqala saya kwindibano yezizwe ngezizwe yamaNgqina kaYehova kwisiXeko saseNew York. Ukusuk’ apho saya ePeterborough, eOntario, saba ngoovulindlela apho kangangeenyanga ezintandathu ngaphambi kokuba siye kumazantsi kwiSikolo saseGiliyadi.
Abaqeqeshi besikolo babequka uAlbert Schroeder, ngoku olilungu leQumrhu Elilawulayo, kunye noMaxwell Friend noJack Redford, abasele befile ngoku. Unxulumano phakathi kwabafundi abangama-82 abavela kumazwe ali-14 lwalukhuthaza kakhulu. Saqala sanolwazi oluncinane ngezithethe zabanye. Ukuncokola nabafundi abavela kwamanye amazwe abangasazi kakuhle isiNgesi kwasenza sanofifi ngeengxaki esasiza kujamelana nazo xa sifunda olunye ulwimi. Emva kweenyanga ezintlanu salugqiba uqeqesho lwethu saza sabelwa kumazwe angama-27. Kwandula kwafika usuku lokuvuyisana nabo baphumeleleyo, yaye kungentsuku zatywala sasikwisiXeko iNew York, silinde inqanawa yethu, iQueen Elizabeth, ukuba isibuyisele eYurophu.
Isabelo Sethu Sokuqala Emazweni
Sanikwa siphi isabelo? IPortugal! Safika eLisbon ngoNovemba 1959. Ngoku kwafika uvavanyo lokuziqhelanisa nolwimi nesithethe esitsha. Ngowe-1959 kwakukho amaNgqina akhutheleyo angama-643 ePortugal, kubemi abamalunga nezigidi ezisi-9. Kodwa umsebenzi wethu wokushumayela wawungamkelekanga ngokusemthethweni. Nangona sasinazo iiHolo zoBukumkani, ngaphandle kwakungekho miqondiso ibonisa ukuba zizo.
Emva kokufundiswa isiPhuthukezi ngumvangeli wasemazweni uElsa Piccone, mna noHazel satyelela amabandla namaqela angqonge iLisbon, iFaro, iEvora neBeja. Zaza izinto zaqalisa ukutshintsha ngowe-1961. Ndandifunda iBhayibhile nomfana obizwa ngokuba nguJoão Gonçalves Mateus. Wagqiba kwelokuba abe ngumKristu ongathabath’ icala xa kusiziwa kumbandela wenkonzo yasemkhosini. Kungekudala emva koko, ndabizelwa kwisikhululo samapolisa ukuze ndincinwe. Omnye ummangaliso! Emva kweentsuku ezimbalwa, saxelelwa ukuba sineentsuku ezingama-30 ukuba siphume siphele kwelo lizwe! Kwenzeka into efanayo nakwabanye oovulindlela basemazweni uEric noChristina Britten noDomenick noElsa Piccone.
Ndafaka isibheno, yaye savunyelwa ukuba sidibane nentloko yabecuphi. Yasixelela ngeliphandle isizathu sokuba sicelwe ukuba siphume siphele kwelo lizwe yaza yakhankanya negama—likaJoão Gonçalves Mateus—endandifunda naye iBhayibhile! Yathi iPortugal, ngokungafaniyo neBritani, yayingenakuvumela abantu bakhethe ukungayi emkhosini ngenxa yesazela. Ngoko sanyanzeleka ukuba silishiye elasePortugal, yaye andizange ndiphinde ndimbone uJoão. Hayi indlela endavuya ngayo xa, emva kweminyaka engama-26 ndambona yena nomfazi wakhe neentombi zakhe ezintathu kunikezelo lwekhaya laseBheteli ePortugal! Ubulungiseleli bethu ePortugal abuzange bube lilize!—1 Korinte 3:6-9.
Yayisisiphi isabelo sethu esilandelayo? Ummangaliso! Sabelwa eSpeyin eselumelwaneni. Sithe gwantyi iinyembezi, sakhwela uloliwe eLisbon sisinge eMadrid ngoFebruwari 1962.
Ukuziqhelanisa Nesinye Isithethe
ESpeyin kwafuneka siqhelane nendlela yokushumayela nokuqhuba iintlanganiso ngokufihlakeleyo. Xa sishumayela, ngokuqhelekileyo sasingangeni kumakhaya amabini ameleneyo. Emva kokunikela ubungqina kwikhaya elithile, sasihamba siye kwesinye isitrato, kwesinye isakhiwo. Oku kwenza ukuba kube nzima ngamapolisa—okanye abefundisi—ukuba basibambe. Khumbula ukuba, sasihlala phakathi kwabantu abaxhasa, nabalawulwa ngamaKatolika, yaye umsebenzi wethu wokushumayela wawuvaliwe. Njengeenzalelwane zamanye amazwe, samkela amagama eSpanish ukuze singaqondwa. Ndaba nguPlabo, yaye uHazel waba nguJuana.
Emva kweenyanga ezimbalwa eMadrid, sabelwa kumsebenzi wesiphaluka eBarcelona. Sasityelela amabandla ahlukahlukeneyo esixekweni, maxa wambi sihlala iiveki ezimbini okanye ezintathu kwibandla ngalinye. Utyelelo lwaluthabatha ixesha elide kangako kuba kwakufuneka sityelele iqela lesifundo sencwadi ngalinye ngokungathi libandla, yaye oku kwakudla ngokuthetha amaqela amabini ngeveki.
Ucelomngeni Olungalindelekanga
Ngowe-1963 samenywa ukuba siqalise umsebenzi wesithili eSpeyin. Ukuze sikhonze amaNgqina azimiseleyo amalunga nama-3 000, kwakufuneka sigubungele lonke elaseSpeyin, sityelela iziphaluka ezisithoba ezazikho ngelo xesha. Saba neendibano zethu eziqhutyelwa emfihlekweni esizikhumbula kakhulu kumahlathi akufutshane neSeville, kwifama ekufutshane neGijon, kwimilambo ekufutshane neMadrid, iBarcelona kunye neLogroño.
Ukuze ndihlabe ndikhangele, xa ndishumayela kwindlu ngendlu ndandidla ngokujonga indlela ezime ngayo izitrato ezikufuphi ukuze ndiyazi indlela yokubaleka xa izinto zingahambi kakuhle. Ngaxa lithile ngoxa ndandishumayela eMadrid, mna nelinye iNgqina sasikumgangatho ophezulu xa ngesiquphe seva ingxolo nesikhalo ngezantsi. Xa safika ezantsi, kwakukho iqela lamantombazana aselula, amalungu eqela lamaKatolika elibizwa ngokuba yiHijas de María (IiNtombi zikaMariya). Zazilumkisa abamelwane ngathi. Asizange sikwazi ukuqiqa nazo, yaye ndandisazi ukuba kwakufuneka siphel’ emehlweni okanye amapolisa ayeza kusibamba. Ngoko saqhwesha—ngokukhawuleza!
Leyo yayiyiminyaka echulumancisayo yokuba seSpeyin. Sasizama ukukhuthaza abazalwana noodade abazimiseleyo apho, kuquka noovulindlela abakhethekileyo. Babezibeka emngciphekweni wokuvalelwa entolongweni yaye ngokufuthi bencama izinto eziphathekayo ukuze bashumayele iindaba ezilungileyo zoBukumkani bukaThixo nokuze baseke baze bakhe amabandla.
Ebudeni belo xesha safumana neendaba ezimbi. UHazel uyacacisa: “Ngowe-1964 umama, iNgqina elithembekileyo, wafa. Yaba linxeba elinzulu ukuphulukana naye ndingakhange ndimbone nokumbona. Le yenye yezinto ezinzima abavangeli basemazweni abaninzi ekufuneka bajamelane nayo.”
Inkululeko Ekugqibeleni
Emva kweminyaka yentshutshiso, ngoJulayi 1970 umsebenzi wethu wamkelwa ngokusemthethweni ngurhulumente kaFranco. Mna noHazel savuya kakhulu xa kwavulwa iiHolo zoBukumkani, eyokuqala eMadrid neyesibini eLesseps, eBarcelona. Zazisoloko zinemiqondiso emikhulu, maxa wambi ekhanyisiweyo. Sasifuna abantu bazi ukuba samkeleke ngokusemthethweni yaye sasingayi ndawo! Ngeli xesha, ngowe-1972, kwakukho malunga namaNgqina angama-17 000 eSpeyin.
Malunga neli xesha, ndafumana iindaba ezikhuthazayo ezivela eNgilani. Utata wasityelela eSpeyin ngowe-1969. Wachukumiseka gqitha yindlela amaNgqina aseSpeyin amphatha ngayo kangangokuba xa wabuyela eNgilani, waqalisa ukufunda iBhayibhile. Ngowe-1971, ndaxelelwa ukuba uTata ubhaptiziwe! Yayisisihlandlo esichukumisayo xa satyelela ekhaya yaye yena, njengomzalwana wam ongumKristu, wathandazela ukutya. Ndandiyilinde kangangeminyaka engama-20 loo mini. Umntakwethu uBob nomfazi wakhe, uIris, baba ngamaNgqina ngowe-1958. Unyana wabo, uPhillip, ngoku ukhonza njengomveleli wesiphaluka eSpeyin kunye nomfazi wakhe, uJean. Kusivuyisa gqitha ukubabona bekhonza kwelo lizwe lihle kangako.
Ummangaliso Wethu Wakutshanje
NgoFebruwari 1980, ilungu leQumrhu Elilawulayo latyelela eSpeyin njengomveleli wecandelo. Yaba ngummangaliso kum ukuba lifune ukuhamba nam kubulungiseleli. Ndandingenalo nofifi lokuba liyandihlola! Emva koko ngoSeptemba, samenywa ukuba siye kwikomkhulu lehlabathi eBrooklyn, eNew York! Saba ziinkuku ezisikw’ umlomo. Sasamkela isimemo, nangona ukushiya abazalwana bethu baseSpeyin kwakuzenza buhlungu iintliziyo zethu. Ngelo xesha kwakukho amaNgqina angama-48 000!
Xa salishiyayo elo, omnye umzalwana wandipha iwotshi yepokotho. Wayebhale imibhalo emibini kuyo—“Lucas 16:10; Lucas 17:10.” Wathi ezi yayizizibhalo endandingafane ndizilibale. ULuka 16:10 ugxininisa ukuba simele sithembeke kwizinto ezincinane, yaye uLuka 17:10 uthi “singamakhoboka angancedi nganto” ngoko asinasizathu sakuqhayisa. Ndandisoloko ndiqonda ukuba nantoni na esiyenzayo enkonzweni kaYehova ngumsebenzi wethu njengamaKristu azinikeleyo.
Ummangaliso Wempilo
Ngowe-1990, ndaqalisa ukukhathazwa yintliziyo. Ekugqibeleni, kwafuneka kufakwe isixhobo esithile sokuvula umthambo ovalekileyo. Ebudeni beli thuba linzima lokuba buthathaka emzimbeni, uHazel uye wandixhasa ngeendlela ezininzi, maxa wambi ephatha iibhegi neesutikheyisi endandingakwazi ukuziphatha ngenxa yobuthathaka. Kwandula ke ngoMeyi 2000, ndafakelwa isixhobo esincedisa ukubetha kwentliziyo. Onjani umahluko owenziwe sesi sixhobo!
Kule minyaka ingama-50 idluleyo, mna noHazel siye sabona ukuba isandla sikaYehova asisifutshane nokuba iinjongo zakhe zizaliseka ngexesha lakhe elifanelekileyo, kungekhona elethu. (Isaya 59:1; Habhakuki 2:3) Siye saba nemimangaliso emininzi echulumancisayo neminye embalwa ebuhlungu ebomini bethu, kodwa kuyo yonke uYehova uye wasixhasa. Apha kwikomkhulu lehlabathi labantu bakaYehova, siyavuya kuba sikwazi ukunxibelelana namalungu eQumrhu Elilawulayo yonke imihla. Maxa wambi ndiye ndizibuze, ‘Ngaba ngokwenene silapha?’ Bububele obungasifanelanga. (2 Korinte 12:9) Siyathemba ukuba uYehova uza kuqhubeka esikhusela kumaqhinga kaSathana aze asigcine ukuze sinandiphe umhla wokulawula kwakhe umhlaba ngokulunga.—Efese 6:11-18; ISityhilelo 21:1-4.
[Umfanekiso okwiphepha 26]
INtolongo iStrangeways, eManchester, apho ndaqalisa khona isigwebo sam sasentolongweni
[Umfanekiso okwiphepha 27]
Sikunye ne-Austin Seven yethu kumsebenzi wesiphaluka eNgilani
[Umfanekiso okwiphepha 28]
Indibano efihlakeleyo eCercedilla, eMadrid, eSpeyin, ngowe-1962
[Umfanekiso okwiphepha 29]
Kwitafile esinikela kuyo ubungqina eBrooklyn