“Abadumisi Abanovuyo” Indibano Yesithili YamaNgqina KaYehova
Ulindelwe ziintsuku ezintathu ezakhayo zemfundiso yeBhayibhile. Ekubeni kucwangciswe ukuba kubekho iindibano ezingaphezu kwama-35 emazantsi eAfrika kuphela, kunokwenzeka ibekho indibano eqhutyelwa kufutshane nalapho uhlala khona.
Ucwangciso lwakusasa kusuku lokuqala luya kubalaselisa amazwi okwamkela abezileyo kwanentetho engumxholo ethi, “Sibekelwe Ecaleni Njengabadumisi Abanovuyo Ehlabathini Lonke.” Emva kwemini ucwangciso luya kunikela ingqalelo kulutsha, abazali nakwimfundo. Abaselula bafanele bangaphoswa yintetho ethi: “Ngaba Ndikulungele Ukutshata?” Abazali bafanele bayiphulaphule ngenyameko ethi “Abazali Abayoliswa Ngabantwana Babo.” Ucwangciso lwasemva kwemini luya kuqukunjelwa ngentetho ethi “Imfundo—Yisebenzisele Ukudumisa UYehova.” Loo ngxubusho ifanele iluncede ulutsha ukuba luqhubeke ngokunempumelelo esikolweni.
Ucwangciso lwakusasa kusuku lwesibini luya kubalaselisa ubhaptizo, yaye kuya kuvulwa ithuba lokuba abo bafanelekayo babhaptizwe. Emva kwemini kuya kubakho ingxubusho engqalileyo engendlela uSathana ebeyisebenzisa ngayo inkanuko yesini ukubambisa abantu ukususela mandulo. Kwakhona kuya kubakho intetho enamandla ethi “Yilumkele Imigibe KaMtyholi.” Ucwangciso lolu suku luya kuqukunjelwa ngentetho ebalulekileyo ethi “Isizathu Sokuba Uluntu Lufune Ulwazi NgoThixo.”
Ngentsasa yosuku lokugqibela, ungcelele lweentetho olunomxholo othi “Abadumisi Abanovuyo Ebudeni Bokupheliswa Kwale Nkqubo” luya kunikela ingqalelo kwiziganeko eziya kugungqisa ihlabathi ezisemnyango. Luya kubethelela ungxamiseko lokubalekela kwindawo ekhuselekileyo ngaphambi kokuba “imbandezelo enkulu” awathetha ngayo uYesu Kristu iqalise, njengoko kubhaliwe kuMateyu 24:21.
Ucwangciso lwakusasa luya kuqukunjelwa ngomdlalo obalulekileyo othi “Ukubeka Abafanelekileyo Kwiminyaka Yabo Yobudala.” Kuya kwandula ke, emva kwemini, kunikelwe intetho yesidlangalala ethi, “Dumisani UKumkani Kanaphakade!” Iya kuba yimbalasane eyintloko yendibano.
Wenze ngoku amalungiselelo okubakho. Ukuze ufumane eyona ndawo ikufutshane nekhaya lakho, qhagamshelana neHolo yoBukumkani yamaNgqina kaYehova, okanye ubhalele abapapashi beli phephancwadi.