Imibuzo Evela Kubafundi
Eyoku-1 kaYohane 4:18 isixelela oku: “Akukho loyiko eluthandweni; lusuka uthando olugqibeleleyo luluphose phandle uloyiko.” Kodwa uPetros wabhala: “Thandani isizalwana. UThixo moyikeni.” (1 Petros 2:17) Sinokuzingqinelanisa njani ezi ndinyana zimbini?
UPetros noYohane babengabapostile ababefunde ngokusuka ngqo kuYesu Kristu. Ngaloo ndlela sinokuqiniseka ukuba oko bakubhalayo kuyangqinelana. Kwezi ndinyana zicatshulwe ngasentla, isicombululo sikukuba aba bapostile babini babethetha ngeendidi ezahlukeneyo zoloyiko.
Kuqala makhe siqwalasele isiluleko sikaPetros. Njengoko umongo ubonisa, uPetros wayenikela icebiso eliphefumlelweyo kumaKristu awayekhonza kunye nawo ngesimo sawo sengqondo kwabo basemagunyeni. Ngamany’ amazwi, wayethetha ngembono efanelekileyo yokuthobela kwiimeko ezithile. Ngaloo ndlela, wacebisa amaKristu ukuba athobele amadoda akwizikhundla zolawulo koorhulumente babantu, anjengookumkani okanye iirhuluneli. (1 Petros 2:13, 14) Ehlabela mgama, uPetros wabhala: “Bekani abantu bonke. Thandani isizalwana. UThixo moyikeni. UKumkani mbekeni.”—1 Petros 2:17.
Xa siqwalasela umongo, kucace gca ukuba xa uPetros wayesithi amaKristu afanele ‘amoyike uThixo,’ wayethetha ukuba sifanele sibe nentlonelo enzulu ngoThixo, soyike ukungakholisi elona gunya liphakamileyo.—Thelekisa amaHebhere 11:7.
Kuthekani ngamazwi ompostile uYohane? Ngaphambilana kweyoku-1 kaYohane isahluko 4, lo mpostile wahlangabezana nemfuneko yokuvavanya “oomoya” abanjengabo bavela kubaprofeti bobuxoki. Ngokuqinisekileyo abo moya abaveli kuYehova uThixo; bavela okanye babonakalisa ihlabathi elingendawo.
Ngokwahlukileyo koko, amaKristu athanjisiweyo ‘angabakaThixo.’ (1 Yohane 4:1-6) Ngenxa yoko, uYohane wabongoza: “Zintanda, masithandane; ngokuba uthando lwaphuma kuThixo.” UThixo walubonakalisa kuqala uthando—“wamthuma uNyana wakhe ukuba abe sisicamagushelo sezono zethu.” (1 Yohane 4:7-10) Sifanele sisabele njani koku?
Kucacile ukuba sifanele sihlale simanyene noThixo wethu onothando. Asifanele soyike singafanele singcangcazele ukuthetha naye ngomthandazo. Ngaphambilana uYohane wayenikele esi siluleko: “Ukuba intliziyo yethu ayisigwebi, sinokungafihlisi kuye uThixo; nesithi sikucele siyakwamkela kuye, ngokuba imithetho yakhe siyigcina.” (1 Yohane 3:21, 22) Ewe, isazela esilungileyo sisinika inkululeko yokuthetha noThixo ngaphandle koloyiko olwenzakalisayo okanye olusithintelayo. Ngenxa yothando, siziva sikhululekile ukuba sithethe okanye sisondele kuYehova ngomthandazo. Ngaloo ndlela, “akukho loyiko eluthandweni.”
Ngoko makhe sidibanise ezi ngcamango zimbini. Ngalo lonke ixesha umKristu umele abe noloyiko lokuhlonela uYehova, olubangelwa yintlonelo enzulu ngesikhundla, ngamandla, nangokusesikweni kwakhe. Kodwa kwakhona siyamthanda uThixo njengoBawo wethu yaye siziva sisondele yaye sikukhululekele ukuthetha naye. Kunokuba sithintelwe kuko nakuphi na ukumoyika, sikholose ngokuba sinokuthetha naye njengoko umntwana eziva ekhululekile ukuba athethe nomzali onothando.—Yakobi 4:8.