Ubomi Obulunge Ngakumbi—Kungekudala!

YIBA nomfanekiso-ngqondweni womntu oqikelela imozulu onikela uqikelelo oluchanileyo amaxesha amaninzi. Ukuba kwiindaba zangokuhlwa uthi kuza kuna ngengomso, akucingi kabini ngaphambi kokuthabatha iambrela yakho xa usimka ekhayeni lakho ngentsasa elandelayo. Ulwazi onalo ngaye lukwenza umthembe. Wenza ngokwelizwi lakhe.

Ngoku ke, linokuthenjwa kangakanani idinga likaYehova lobomi obulunge ngakumbi kumhlaba oyiparadisi? Lubonisa ntoni ulwazi esinalo ngaye? Ukuzaliseka kweziprofeto zeBhayibhile kusenza simazi kakuhle uYehova. NguThixo ogqibeleleyo ongaphazamiyo nohlala echanile. (Yoshuwa 23:14; Isaya 55:11) Amadinga kaYehova uThixo anokuthenjwa kangangokuba maxa wambi uye athethe ngeziganeko eziya kwenzeka kwikamva ngokungathi sele zenzekile. Ngokomzekelo, emva kokufunda ngedinga lakhe lehlabathi elitsha elingenakufa nazijwili, sifunda oku: “Zenzekile [iintsikelelo ezithenjisiweyo]!” Ngamanye amazwi, “Kuqinisekile oko!”—ISityhilelo 21:5, 6, NW; bona nombhalo osemazantsi.

Ewe, ukuzaliseka kwamadinga kaYehova angaphambili kusenza siqiniseke ukuba idinga lakhe lokuba uluntu luya kufumana ubomi obulunge ngakumbi liya kuzaliseka. Kodwa buya kufika nini obu bomi bulunge ngakumbi?

Ubomi Obulunge Ngakumbi—Nini?

Kuza kubakho ubomi obulunge ngakumbi kungekudala! Sinokuqiniseka ngoko kuba iBhayibhile ithi kuya kwenzeka izinto ezimbi ezininzi emhlabeni ngaphambi nje kokuba iParadisi ize nobomi obulunge ngakumbi. Ezo zinto zimbi ziyenzeka ngoku.

Ngokomzekelo, uYesu Kristu waxela kwangaphambili ukuba kwakuya kubakho iimfazwe ezinkulu. Wathi: “Uhlanga luya kuvukelana nohlanga, nobukumkani buvukelane nobukumkani.” (Mateyu 24:7) Esi siprofeto sizalisekile. Phakathi konyaka we-1914 nowe-1945, kwabakho iimfazwe zehlabathi ezimbini, yaye ezi zalandelwa zezinye iimfazwe ezininzi eziye zalwa kuzo iintlanga. “Ngokwesilinganiso saminyaka le, inani labantu abafe ezimfazweni kwithuba [elisusela kwiMfazwe Yehlabathi II] liye laliphinda ngaphezu kwezihlandlo ezibini inani labafa kwinkulungwane ye-19 yaye liliphinda kasixhenxe inani labafa kwinkulungwane ye-18.”—World Military and Social Expenditures 1993.

Ukwanda kwezifo bobunye ubungqina bokusondela kobomi obulunge ngakumbi eParadisi. UYesu waxela kwangaphambili ukuba kwakuya kubakho ‘iindyikitya zokufa kwiindawo ngeendawo.’ (Luka 21:11) Ngaba esi siprofeto sizalisekile? Ewe. Emva kwemfazwe yehlabathi yokuqala, uMbathalala wabulala abantu abangaphezu kwezigidi ezingama-20. Ukususela ngoko, umhlaza, isifo sentliziyo, isifo seengcongconi, uGawulayo, nezinye izifo ziye zabulala izigidi zabantu. Kumazwe asakhasayo, izifo ezibangelwa ngamanzi angcolileyo (kuquka isifo sorhudo neseentshulube) zibulala izigidi zabantu minyaka le.

Kwakhona uYesu wathi: “Kuya kubakho iindlala.” (Mateyu 24:7) Njengoko kubonisiwe kwinqaku elandulelayo, abantu abangamahlwempu ehlabathini abanakutya kwaneleyo. Le yinxalenye yobungqina bokuba kungekudala kuza kubakho ubomi obulunge ngakumbi eParadisi.

UYesu wathi: “Kuya kubakho iinyikima zomhlaba ezinkulu.” (Luka 21:11) Noku kuye kwazaliseka kwixesha lethu. Ukususela ngowe-1914 iinyikima ezitshabalalisayo ziye zabulala amakhulu amawaka abantu.

IBhayibhile ihlabela mgama isithi ‘imihla yokugqibela’ yayiya kuphawulwa kukuguquka kwabantu. Babeya kuba “ngabazithandayo” ‘nabathandi bemali,’ yaye abantwana babengayi ‘kubeva abazali.’ Abantu abaninzi babeya kuba ‘ngabathandi beziyolo kunokuba bathande uThixo.’ (2 Timoti 3:1-5) Ngaba akuvumi ukuba abantu abaninzi banjalo?

Ngenxa yokuba inani labantu abenza izinto ezimbi lisanda, kukho ukwanda kokuchas’ umthetho. Noku kwaxelwa kwangaphambili. Ngokutsho kukaMateyu 24:12, uYesu wathetha ‘ngokwanda kokuchasa umthetho.’ Umele uvume ukuba ulwaphulo-mthetho luninzi ngakumbi ngoku kunakwiminyaka eyadlulayo. Naphi na abantu banoloyiko lokuba baya kuphangwa, baqhathwe okanye benzakaliswe ngandlel’ ithile.

Iimfazwe, izifo ezandileyo, ukunqongophala kokutya, iinyikima, ukwanda kolwaphulo-mthetho nokuguquka kwendlela abaqhubana ngayo abantu ibe mbi—zonke ezi zinto zikho namhlanje, kanye njengokuba iBhayibhile yaxela kwangaphambili. Usenokubuza, ‘Kodwa ngaba ezi zinto bezingenzeki ukutyhubela yonke imbali yabantu? Uyintoni umahluko ngomhla wethu?’

Kukho iingongoma ezibaluleke kakhulu zoko kwenzekayo namhlanje. IBhayibhile ayithi umqondiso omnye, onjengokunqongophala kokutya, wawuya kuba bubungqina bokuba siphila kwixesha lesiphelo yaye ubomi obulunge ngakumbi busemnyango. Iziprofeto zeBhayibhile ezingexesha lesiphelo zazimele zizaliseke kwisizukulwana esingahloneli Thixo.—Mateyu 24:34-39; Luka 17:26, 27.

Ngaphezu koko, kuyinto engaqhelekanga ngokwenene ukuba eminye yemiqondiso yesiprofeto sikaYesu—ngokukodwa engokunqongophala kokutya nokwanda kwezifo—izaliseke namhlanje. Ngoba? Ngenxa yokuba izinto eziphunyezwe yinzululwazi zinkulu kakhulu kunanini na ngaphambili. Ulwazi lwezonyango neendlela zokunyanga zihambele phambili yaye zisasazeke ngendlela engazange ibonwe. NguThixo kuphela owayenokuxela kwangaphambili eLizwini lakhe, iBhayibhile, ukuba kwixesha elinjalo, izifo nendlala zaziya kuthabatha unyawo, kunokubuya umva.

Ekubeni zonke iziprofeto zeBhayibhile ezingexesha lesiphelo, okanye ‘imihla yokugqibela,’ zizaliseka, sinokugqiba ngelithini? Ngelokuba ubomi obulunge ngakumbi busemnyango! Kodwa buya kufika njani?

Ubomi Obulunge Ngakumbi—Njani?

Ngaba ucinga ukuba abantu bangayizisa iParadisi? Kuyo yonke imbali ukuza kuthi ga kulo mhla, kuye kwakho iindidi ezininzi zoorhulumente babantu. Zimbi ziye zenza unako nako wokwanelisa iimfuno zabantu. Sekunjalo, iingxaki ezininzi zithabatha unyawo. Kumazwe afumileyo nahlwempuzekileyo, oorhulumente balwa nokusetyenziswa kakubi kweziyobisi, ukungabikho kweendawo zokuhlala eziphucukileyo, ubuhlwempu, ulwaphulo-mthetho, ukungabikho kwemisebenzi nemfazwe.

Kwanokuba oorhulumente bebenokuzicombulula ezinye zezi ngxaki, bebengenakuze babakhulule ngokupheleleyo abantu ekuguleni; yaye bebengenakuze bakuphelise ukwaluphala nokufa. Licacile elokuba, abantu abanakuze bayizise iParadisi kulo mhlaba.

IBhayibhile ngobulumko ithi: “Musani ukukholosa ngamanene, ngonyana womntu, yena ungenalo usindiso.” Ngoko, sifanele sikholose ngabani? IBhayibhile iyaphendula: “Hayi, uyolo lwalowo uluncedo lunguThixo kaYakobi, lwalowo ulinde kuYehova uThixo wakhe.” (INdumiso 146:3, 5) Ukuba silindela kuYehova uThixo, asisayi kuze siphoxeke.

Ngokuqinisekileyo Lowo unobulumko namandla okudala umhlaba, ilanga neenkwenkwezi unokuwenza ube yiparadisi lo mhlaba. Unokubenza banandiphe ubomi obulunge ngakumbi abantu. Nantoni anenjongo yokuyenza uYehova uThixo, unokuyenza yaye uya kuyiphumeza. ILizwi lakhe lithi: “Akukho nanye into eya kumnqabela yena uThixo.” (Luka 1:37) Kodwa uThixo uya kubuzisa njani ubomi obulunge ngakumbi?

UYehova uya kuluzisela ubomi obulunge ngakumbi uluntu ngoBukumkani bakhe. Yaye buyintoni uBukumkani bukaThixo? Bungurhulumente wokwenene onoMlawuli omiselwe nguThixo, uYesu Kristu. UBukumkani bukaThixo bumiselwe ezulwini, kodwa kungekudala buza kuzisa iintsikelelo ezimangalisayo nobomi obulunge ngakumbi kubemi bomhlaba oyiParadisi.—Isaya 9:6, 7.

Usenokuba sele uqhelene nomthandazo kaYesu ongumzekelo, ofumaneka eBhayibhileni kuMateyu 6:9-13. Inxalenye yaloo mthandazo ubhekiswa kuThixo ithi: “Mabufike ubukumkani bakho. Makwenziwe ukuthanda kwakho nasemhlabeni, njengokuba kusenziwa emazulwini.” Ngokuvisisana naloo mthandazo, uBukumkani bukaThixo buya ‘kufika’ ukuze buphumeze injongo kaYehova uThixo ngomhlaba. Yaye yinjongo yakhe ukuba umhlaba ube yiparadisi.

Umbuzo wokugqibela ophakamayo uthi: Umele wenze ntoni ukuze unandiphe ubomi obulunge ngakumbi kwiParadisi ezayo?

Ekufuneka Ukwenze

Ebonakalisa uthando lwakhe uYehova uThixo ubathembisa ngobomi obulunge ngakumbi eParadisi bonke abenza ukuthanda kwakhe. IBhayibhile isixelela oku: “Amalungisa aya kulidla ilifa ilizwe, ahlale kulo ngonaphakade.” (INdumiso 37:29) Kodwa yintoni emenza abe lilungisa umntu emehlweni kaThixo?

Ukuze simkholise uYehova simele sifunde okungakumbi ngoko afuna sikwenze. Ukuba sizondla ngolwazi olungoThixo size silusebenzise ebomini bethu, sinokuphila ngonaphakade. Ethandaza kuThixo, uYesu wathi: “Bubo ke obu ubomi obungunaphakade, ukuba mabakwazi, wena ukuphela koThixo oyinyaniso, naye uYesu Kristu omthumileyo.”—Yohane 17:3.

Incwadi esixelela ngoYehova uThixo noYesu Kristu liLizwi likaThixo, iBhayibhile. Isesinye sezona zipho zixabisekileyo awasipha zona uYehova. IBhayibhile ifana neleta evela kubawo onothando eya kubantwana bakhe. Isixelela ngedinga likaThixo lokuluzisela ubomi obulunge ngakumbi uluntu yaye isibonisa indlela esinokubuzuza ngayo. IBhayibhile isazisa ngoko uThixo wakwenzayo kwixesha elidlulileyo noko aza kukwenza kwixesha elizayo. Isinika namacebiso aluncedo ngendlela yokuzisingatha ngokunempumelelo iingxaki zethu ngoku. Ngenene, iLizwi likaThixo lisifundisa indlela yokufumana umlinganiselo othile wolonwabo kwanakweli hlabathi lizaliswe ziinkathazo.—2 Timoti 3:16, 17.

AmaNgqina kaYehova aya kukuvuyela ukwenza ilungiselelo lokukuqhubela isifundo seBhayibhile sesisa. Funda indlela ongaphila ubomi obonwabe ngakumbi ngayo ngoku, unethemba lobomi obulunge ngakumbi kungekudala.

[Umfanekiso okwiphepha 5]

Iziprofeto zeBhayibhile zibonisa ukuba ubomi obulunge ngakumbi busondele

[Umfanekiso okwiphepha 7]

UBukumkani bukaThixo buya kwenza uluntu luphile ubomi obulunge ngakumbi