“Abenzi Belizwi” Abavuyayo
“[Lamkeleni] ninobulali ilizwi elimiselweyo kuni, elinako ukuyisindisa imiphefumlo yenu. Yibani ke ngabenzi belizwi, ningabi ngabaphulaphuli kodwa.”—YAKOBI 1:21, 22.
1. Ufanele ugqalwe njani umxholo wethu wonyaka we-1996?
“YIBANI KE NGABENZI BELIZWI.” Eli binzana lilula lithwele isigidimi esinamandla. Lithatyathwe eBhayibhileni ‘kwiNcwadi kaYakobi,’ yaye liza kuxhonywa kwiiHolo zoBukumkani njengomxholo wonyaka wamaNgqina kaYehova we-1996.
2, 3. Kutheni kwakufanelekile ukuba uYakobi abhale incwadi ebizwa ngaye?
2 UYakobi, umzalwana weNkosi uYesu ngonina, wayebalasele kwibandla lamaKristu lokuqala. Ngesinye isihlandlo emva kokuvuka kukaYesu, iNkosi yethu yabonakala kuYakobi yaye emva koko kubo bonke abapostile. (1 Korinte 15:7) Kamva, xa umpostile uPetros wakhululwa entolongweni ngokungummangaliso, walixelela oku iqela lamaKristu elalihlanganisene apho: “Babikeleni ooYakobi nabazalwana ezi zinto.” (IZenzo 12:17) Kubonakala ukuba, nangona uYakobi wayengengompostile, wayengusihlalo kwintlanganiso yequmrhu elilawulayo eyayiseYerusalem xa abapostile nabadala bagqiba kwelokuba kwakungeyomfuneko ukuba oluswe amaguquka aziiNtlanga. UYakobi wenza amagqabaza okuqukumbela, yaye isigqibo esangqinelwa ngumoya oyingcwele sathunyelwa kuwo onke amabandla.—IZenzo 15:1-29.
3 Kuyabonakala ukuba, indlela awayeqiqa ngayo uYakobi neyayibonakalisa ukukhula yayihlonelwa. Noko ke, ngokuthobeka wavuma ukuba naye ‘wayengumkhonzi nje kaThixo neNkosi uYesu Kristu.’ (Yakobi 1:1) Incwadi yakhe ephefumlelweyo iqulethe iziluleko ezininzi eziphilileyo nokhuthazo kumaKristu anamhlanje. Yagqitywa malunga neminyaka emine ngaphambi kokuba iYerusalem ihlaselwe okokuqala ngamaRoma awayekhokelwa nguNjengele Cestius Gallus, emva kokuba iindaba ezilungileyo zishunyayelwe ngokucokisekileyo “kwindalo yonke ephantsi kwezulu.” (Kolose 1:23) Yayingamaxesha anomngcipheko lawo, yaye abakhonzi bakaYehova babeqonda kakuhle ukuba kungekudala umgwebo Wakhe wawuza kuphunyezwa kwisizwe sakwaYuda.
4. Yintoni ebonisa ukuba amaKristu okuqala ayelithembe kakhulu iLizwi likaThixo?
4 Loo maKristu ayesele enazo zonke iZibhalo zesiHebhere nenkoliso yeZibhalo zesiGrike. Ababhali beBhayibhile abangamaKristu bamele ukuba babelithembe kakhulu iLizwi likaThixo, njengoko kuboniswa kukucaphula kwabo ngokufuthi kwimibhalo yantlandlolo. Ngokufanayo namhlanje, simele silifundisise ngenkuthalo iLizwi likaThixo size silisebenzise ebomini bethu. Ukuze sinyamezele, kufuneka somelele ngokomoya yaye sibe nenkalipho efumaneka kwiZibhalo Ezingcwele.—INdumiso 119:97; 1 Timoti 4:13.
5. Kutheni kufuneka sifumane ukhokelo olukhethekileyo namhlanje, yaye siya kulufumana phi?
5 Namhlanje uluntu lusemgubasini ‘wembandezelo enkulu, ekungazanga kubekho injalo kwasekuqalekeni kwehlabathi, kwada kwaba kalokunje, ekungasayi kubuye kubekho injalo.’ (Mateyu 24:21) Ukusinda kwethu kuxhomekeke kukhokelo lobuthixo. Sinokulufumana njani? Ngokuzamkela ngeentliziyo ezipheleleyo iimfundiso zeLizwi eliphefumlelwe ngomoya kaThixo. Oku kuya kukhokelela ekubeni sibe “ngabenzi belizwi,” njengabakhonzi bakaYehova abathembekileyo bamandulo. Simele sikukhuthalele ukufunda nokufundisisa iLizwi likaThixo size silisebenzise ukuze kudunyiswe uYehova.—2 Timoti 2:15; 3:16, 17.
Ukunyamezela Ngovuyo
6. Kutheni kufanele kusivuyise ukujamelana nezilingo?
6 Kwintshayelelo yencwadi yakhe, uYakobi ukhankanya uvuyo, isiqhamo sesibini somoya kaThixo. Ubhala oku: “Kubaleleni ekuthini kuluvuyo olukhulu, bazalwana bam, xa nithe nagaxeleka ezilingweni ngezilingo, nisazi nje ukuba ucikido lokholo lwenu lusebenza umonde. Umonde ke mawube nomsebenzi ozalisekileyo, ukuze nibe ngabazalisekileyo, abagqibeleleyo, ningaswele nto.” (Yakobi 1:2-4; Galati 5:22, 23) Kunokutshiwo njani ukuba “kuluvuyo olukhulu” ukujamelana nezilingo ezininzi? Kaloku, kwiNtshumayelo yakhe yaseNtabeni noYesu wathi: “Ninoyolo nina, xa bathe abantu baningcikiva, banitshutshisa, bathetha zonke izinto ezikhohlakeleyo ngani bexoka, ngenxa yam. Vuyani nigcobe kunene; ngokuba umvuzo wenu mkhulu emazulwini.” (Mateyu 5:11, 12) Luyavuyisa ulwaneliseko lokubona ukuba uYehova uyayisikelela imigudu yethu njengoko sityhalela phambili kusukelo lobomi obungunaphakade.—Yohane 17:3; 2 Timoti 4:7, 8; Hebhere 11:8-10, 26, 35.
7. (a) Sinokuncedwa njani sinyamezele? (b) Sinokuvuzwa njani, njengoYobhi?
7 “Ngenxa yovuyo olwalubekwe phambi kwakhe,” uYesu wanyamezela. (Hebhere 12:1, 2) Ngokuqwalasela umzekelo kaYesu wenkalipho, nathi sinokunyamezela! Njengoko uYakobi esitsho ngasekupheleni kwencwadi yakhe, uYehova ubavuza ngokutyebileyo abagcini bengqibelelo. UYakobi uthi: “Yabonani, sithi, banoyolo abo banyamezelayo. Unyamazelo lukaYobhi naluva, nesigqibo seNkosi nasibona, ngokuba iNkosi inemfesane enkulu, inenceba.” (Yakobi 5:11) Khumbula indlela awavuzwa ngayo uYobhi ngokugcina ingqibelelo xa wabuyiselwa empilweni waza wanandipha ubomi obupheleleyo nobumnandi kunye nabo wayebathanda. Ukunyamezela ngokugcina ingqibelelo kunokukwenza ufumane uvuyo olufanayo kwiParadisi ethenjisiweyo yehlabathi elitsha likaThixo, oluya kuba yincopho yovuyo esilufumanayo ngokukhonza uYehova ngoku.
Ukufuna Ubulumko
8. Sinokubufumana njani ubulumko bokwenyaniso nobusebenzayo, yaye umthandazo uphumeza yiphi indima koku?
8 Ukukhuthalela kwethu ukufundisisa iLizwi likaThixo, nokulisebenzisa ebomini bethu, kuya kusenza sibe nobulumko bobuthixo, nto leyo eya kusenza sikwazi ukunyamezela izilingo zale nkqubo kaSathana ifayo neyonakeleyo. Sinokuqiniseka njani ukuba siya kubufumana obo bulumko? UYakobi uyasixelela: “Ukuba ke ubani kuni uswele ubulumko, makacele kuThixo, onika bonke engenakumbi, engangcikivi; wobunikwa. Ke makacele ekholwa, engathandabuzi; kuba lowo uthandabuzayo ufana nokulatyuza kolwandle, luqhutywa ngumoya, luntsileka.” (Yakobi 1:5, 6) Sifanele sithandaze ngokunyanisekileyo, sinentembelo epheleleyo yokuba uYehova uya kuziva izibongozo zethu aze aziphendule ngexesha nangendlela yakhe efanelekileyo.
9. UYakobi ubuchaza njani ubulumko bobuthixo nokusebenza kwabo?
9 Ubulumko bobuthixo sisipho esivela kuYehova. Echaza izipho ezinjalo, uYakobi uthi: “Sonke isipho esilungileyo, naso sonke isipho esigqibeleleyo, sesaphezulu; sihla sivela kuye uYise wezikhanyiso, ongenabuyambo nasithunzi sakujika.” Kamva kwincwadi yakhe, uYakobi uchaza imiphumo yokuzuza ubulumko bokwenyaniso xa esithi: “Ngubani na olumkileyo, owaziyo kakuhle phakathi kwenu? Makayibonise imisebenzi yakhe ngehambo entle enobulali bobulumko. . . . Ubulumko baphezulu ukuqala bunyulu, buze bube boboxolo; [“busengqiqweni,” NW], buthozame kakuhle, buzele yinceba neziqhamo ezilungileyo; abunankani, naluhanahaniso.”—Yakobi 1:17; 3:13-17.
10. Lwahluke njani unqulo lobuxoki kunqulo lwenyaniso?
10 Kubukhosi behlabathi bonqulo lobuxoki, enoba kukwiNgqobhoko okanye kwamanye amazwe, ngokuqhelekileyo abanquli baye bacule amaculo athile, baphulaphule imithandazo ecengcelezwayo baze mhlawumbi baphulaphule intshumayelo. Abakhuthazwa ukuba bavakalise isigidimi sethemba, kuba inkoliso yeenkonzo azinathemba liqaqambileyo ngekamva. Ithemba elizukileyo loBukumkani bukaThixo obungoMesiya alize likhankanywe okanye liqondwa phosakeleyo ngokupheleleyo. Eprofeta ngabo banxulumene neNgqobhoko, uYehova uthi: “Benze ububi obubini abantu bam: bandishiyile mna, thende lamanzi aphilileyo; bazimbele amaqula, amaqula aqhekekileyo, angagcini manzi.” (Yeremiya 2:13) Abanawo amanzi enyaniso. Abanabo ubulumko basezulwini.
11, 12. (a) Bufanele busishukumisele enini ubulumko bobuthixo? (b) Busilumkisa ngantoni ubulumko bobuthixo?
11 Hayi indlela ekwahluke ngayo phakathi kwamaNgqina kaYehova namhlanje! Ngamandla awanikwe nguThixo, azalisa umhlaba ngeendaba ezilungileyo zoBukumkani Bakhe obuzayo. Ubulumko abuthethayo busekelwe kwiLizwi likaThixo ngokupheleleyo. (Thelekisa IMizekeliso 1:20; Isaya 40:29-31.) Ngenene, alusebenzisa ngokoqobo ulwazi nokuqonda okuchanileyo ekuvakaliseni iinjongo ezizukileyo zoThixo noMdali wethu. Kufanele kube ngumnqweno wethu ukuba bonke abasebandleni ‘bazaliswe kukukwazi kakuhle ukuthanda kukaThixo, babe nokulumka nokuqonda konke okukokomoya.’ (Kolose 1:9) Ngesi siseko, abancinane nabakhulu baya kusoloko benomoya wokuba “ngabenzi belizwi.”
12 “Ubulumko baphezulu” busilumkisa ngezono ezinokuphumela ekubeni singamkeleki kuThixo. UYakobi uthi: “Ngoko ke, bazalwana bam baziintanda, makathi umntu wonke enze msinya ukuva, enze kade ukuthetha, enze kade ukuqumba; kuba ingqubo yendoda ayisebenzi bulungisa bukaThixo.” Ewe, sifanele senze msinya, sikulangazelele, ukuphulaphula nokusebenzisa isiluleko sobuthixo. Noko ke, sifanele sikulumkele ukulisebenzisa kakubi elo ‘lungu lincinane,’ ulwimi. Ngokuqhayisa, ngokuhleba okungebobulumko, okanye ngokuba ngoontamo lukhuni, ngokufuziselayo ulwimi lunokutshisa ‘ihlathi elikhulu.’ Ngoko ke sifanele sihlakulele ukulunga nokuzeyisa nabo bonke esinxulumana nabo.—Yakobi 1:19, 20; 3:5.
13. Kutheni kubalulekile ukuba silamkele ‘ilizwi elimiliselwe kuthi’?
13 UYakobi ubhala oku: “Kungoko endithi, yithini, nibubekile nxamnye bonke ubunyhukunyhuku nokuphuphuma ulunya, namkele ninobulali ilizwi elimiselweyo kuni, elinako ukuyisindisa imiphefumlo yenu.” (Yakobi 1:21) Eli hlabathi libawayo, neendlela zalo zokuzingca ezibangelwa zizinto eziphathekayo nemilinganiselo yalo yokuziphatha ephantsi, sele liza kudlula. “Ke yena owenza ukuthanda kukaThixo uhleli ngonaphakade.” (1 Yohane 2:15-17) Ngoko, hayi indlela ekubaluleke ngayo ukuba silamkele ‘ilizwi elimiliselwe kuthi’! Ubulumko obufumaneka kwiLizwi likaThixo bahluke ngokupheleleyo kububi beli hlabathi lifayo. Asibufuni konke konke obo bubi. (1 Petros 2:1, 2) Kufuneka similisele uthando nenyaniso nokholo olomeleleyo ezintliziyweni zethu, ukuze sizimisele ukuba singaze sizishiye iindlela zobulungisa zikaYehova. Kodwa ngaba ukuphulaphula iLizwi likaThixo kwanele?
Ukuba “Ngabenzi Belizwi”
14. Sinokuba ngabo njani “abaphulaphuli” ‘nabenzi’ beLizwi?
14 KuYakobi 1:22, sifunda oku: “Yibani ke ngabenzi belizwi, ningabi ngabaphulaphuli kodwa, [“nizikhohlisa,” NW].” “Yibani ke ngabenzi belizwi”! Lo mxholo ubalaseliswa ngokwenene kwincwadi kaYakobi. Simele siphulaphule, size senze “njengoko”! (Genesis 6:22) Namhlanje abantu abaninzi bathi kwanele ukuphulaphula intshumayelo okanye ukuba nesabelo kunqulo lwenkwalambisa ngamathuba athile, kodwa baphelela apho. Basenokucinga ukuba lo gama nje bephila ‘ubomi obulungileyo’ ngokwemilinganiselo yabo, kwanele oko. Sekunjalo uYesu Kristu wathi: “Ukuba kukho othanda ukundilandela, makazincame ngokwakhe, awuthwale [umthi wakhe wentuthumbo, NW], andilandele.” (Mateyu 16:24) Ukuzincama nokunyamezela kufuneka ngenene kumaKristu okwenyaniso alandela umzekelo kaYesu wokwenza ukuthanda kukaThixo. Kuwo, ukuthanda kukaThixo namhlanje kunjengokuba kwakunjalo ngenkulungwane yokuqala xa uYesu ovusiweyo wayalela oku: “Hambani ngoko niye kuzenza abafundi zonke iintlanga.” (Mateyu 28:19) Uqhuba njani wena kule nkalo?
15. (a) Nguwuphi umzekeliso uYakobi awenzayo, obonisa indlela esinokuvuya ngayo ‘njengabenzi belizwi’? (b) Kutheni unqulo lwenkwalambisa lunganelanga?
15 Ukuba sihlala silihlolisisa iLizwi likaThixo, linokufana nesipili, lisibonise uhlobo lwabantu esingabo ngenene. UYakobi uthi: “Oqondela emthethweni ogqibeleleyo wayo inkululeko, ahlale ehleli kuwo, lowo, ethe nje akaba ngumphulaphuli olibalayo, esuke waba ngumenzi womsebenzi: yena uya kuba noyolo ekwenzeni kwakhe.” (Yakobi 1:23-25) Ewe, uya kuba ‘ngumenzi welizwi’ ovuyayo. Ngaphezu koko, kubalulekile ukuba ‘ngumenzi’ kuzo zonke iinkalo zobomi bethu njengamaKristu. Asifanele size sizikhohlise ngokucinga ukuba unqulo lwenkwalambisa lwanele. UYakobi usiluleka ukuba siphaphele nezinye iinkalo zonqulo lokwenyaniso ezisenokutyeshelwa nangamaKristu anenzondelelo. Ubhala oku: “Unqulo lona oluhlambukileyo, olungadyobhekileyo phambi koThixo uBawo, lulo olu: kukuvelela iinkedama nabahlolokazi embandezelweni yabo; kukuzigcina engenabala kulo ihlabathi.”—Yakobi 1:27.
16. UAbraham waba siso njani “isihlobo sikaThixo” yaye thina sinokuba zizihlobo Zakhe njani?
16 Akwanele nje ukuthi, ‘Ndiyakholelwa kuThixo,’ uze uphelele apho. Njengoko uYakobi 2:19 esitsho: “Uyakholwa ukuba uThixo mnye; uyatyapha; nazo iidemon ziyakholwa, zibe namanwele.” UYakobi ubethelela ukuba “ukholo, ukuba luthi lungabi namisebenzi, lufile ngokukokwalo,” yaye ubhekisela kuAbraham esithi: “Ukholo [lwakhe] lwalusebenzisana nemisebenzi yakhe, lwenziwa wagqibelela ukholo ngokwasemisebenzini.” (Yakobi 2:17, 20-22) Imisebenzi ka-Abraham yayiquka ukunceda izizalwana zakhe, ukubonakalisa umoya wokubuk’ iindwendwe, ukulungiselela ukwenza idini ngoIsake, ‘nokuluvakalisa ekuhleni’ (NW) ukholo lwakhe olungaxengaxengiyo kwidinga likaThixo ‘lomzi oneziseko,’ uBukumkani obungoMesiya bexesha elizayo. (Genesis 14:16; 18:1-5; 22:1-18; Hebhere 11:8-10, 13, 14; 13:2) Ngokufanelekileyo ngoko, uAbraham “wabizwa ngokuba sisihlobo sikaThixo.” (Yakobi 2:23) Nathi sinokugqalwa ‘njengezihlobo zikaThixo’ njengoko siluvakalisa ngenkuthalo ukholo nethemba lethu kuBukumkani bakhe bobulungisa obuzayo.
17. (a) Kwakutheni ukuze uRahabhi ‘avakaliswe elilungisa’ yaye wavuzwa njani? (b) Luluphi uluhlu olude oluseBhayibhileni lwabo ‘baba ngabenzi belizwi’? (c) Wavuzwa njani uYobhi, yaye kwakutheni?
17 Abo baba “ngabenzi belizwi” ‘bagwetyelwa ngokwasemisebenzini; kungabi ngokwaselukholweni lodwa.’ (Yakobi 2:24) URahabhi wayengomnye owongezelela imisebenzi kukholo awayenalo ‘kwilizwi’ awayelivile ngokuphathelele izenzo zikaYehova zamandla. Wazifihla iintlola ezingamaSirayeli waza wazinceda zisabe, emva koko wahlanganisa intsapho kayise ukuze ingatshabalali. Hayi indlela aya kuvuya ngayo, eluvukweni, xa efumanisa ukuba ukholo lwakhe, olwaluhamba nemisebenzi, lwakhokelela ekubeni abe ngukhokhokazi kaMesiya! (Yoshuwa 2:11; 6:25; Mateyu 1:5) AmaHebhere isahluko 11 anikela uluhlu olude lwabanye ‘ababa ngabenzi’ ekubonakaliseni ukholo lwabo, yaye baya kuvuzwa ngokutyebileyo. Kambe asimele simlibale uYobhi, owathi ephantsi kwezilingo eziqatha wathi: “Igama likaYehova malibongwe.” Njengoko sele siphawulile, ukholo nemisebenzi yakhe yaphumela kumvuzo ozukileyo. (Yobhi 1:21; 31:6; 42:10; Yakobi 5:11) Ngokufanayo, ukunyamezela kwethu namhlanje ‘njengabenzi belizwi’ kuya kwenza uYehova akholiswe sithi.
18, 19. Abazalwana ekukudala becinezelwe baye baba ngabo njani “abenzi belizwi,” yaye usikelelwe njani umsebenzi wabo?
18 Abazalwana bethu baseMpuma Yurophu baphakathi kwabo baye banyamezela kakhulu ukutyhubela iminyaka. Ekubeni imiqathango emininzi ishenxisiwe ngoku, ngokwenene aba bazalwana baye ‘bangabenzi belizwi’ kule meko-bume yabo entsha. Abavangeli basemazweni noovulindlela abakumazwe aselumelwaneni baye bafudukela apho ukuze bancedise ekufundiseni nasekulungelelaniseni umsebenzi. Isebe laseFinland namanye amasebe eWatch Tower Society akufutshane aye athumela amachule okwakha, yaye ngokuzithandela abazalwana abasehlabathini lonke baye banikela ngemali yokwakha iiofisi zamasebe neeHolo zoBukumkani ezintsha.—Thelekisa eyesi-2 kwabaseKorinte 8:14, 15.
19 Hayi indlela abaye basebenza ngenzondelelo ngayo entsimini abo bazalwana ekukudala becinezelwe! ‘Basebenza nzima yaye bayabulaleka’ ukuze ngokungathi kunjalo, baxhakamfule amathuba abengafumaneki ebudeni ‘bamaxesha anzima.’ (1 Timoti 4:10, TE; 2 Timoti 4:2, NW) Ngokomzekelo, kulo Aprili udlulileyo eAlbania, ilizwe ebelinengcinezelo eqatha gqitha, sonke isixa sephecana leKingdom News elinomxholo othi “Kutheni Ubomi Buzele Ziinkathazo?” sasasazwa ngeentsuku ezintathu kuphela. Oku kongeza ifuthe leSikhumbuzo sokufa kukaYesu, ekwakuze abantu abangama-3 491 kuso—abaninzi ngakumbi kunabavakalisi balapho abakhutheleyo abangama-538.
20. Amanani akutshanje abezayo kwiSikhumbuzo abonisa ntoni, yaye abaninzi banokuncedwa njani?
20 Namanye amazwe aye aphumeza indima ebalulekileyo kumanani abezayo kwiSikhumbuzo, aye anda kwiminyaka yakutshanje afikelela ngaphaya kwezi-10 000 000. Kwiindawo ezininzi abatsha, abanokholo olomeleleyo ngenxa yokubakho nokubonela iSikhumbuzo, ‘baba ngabenzi belizwi.’ Ngaba sinokukhuthaza izinxulumani ezitsha ezingakumbi ukuze zifanelekele elo lungelo?
21. Ngokuvisisana nomxholo wethu wonyaka, liliphi ikhondo esifanele sililandele, yaye sinaluphi usukelo?
21 Njengaloo maKristu anenzondelelo enkulungwane yokuqala, namanye amaninzi ukususela ngoko, masizimisele ukuzibhokoxa ‘ekuphuthumeni umvuzo’ wobomi obungunaphakade, enoba siya kuwufumana kuBukumkani basezulwini okanye kulawulo lwabo lwasemhlabeni. (Filipi 3:12-14) Sifanele sizame ngamandla ethu onke ukuze siwufumane loo mvuzo. Eli asiloxesha lokuba siphinde sibe ngabaphulaphuli kuphela, kodwa lixesha elibalulekileyo lokuba ‘somelele size sisebenze.’ (Hagayi 2:4; Hebhere 6:11, 12) Ekubeni ‘silamkele ilizwi elimiliselwe kuthi,’ ngamana ‘singaba ngabenzi belizwi abavuyayo’ ngoku nangonaphakade.
Ubuya Kuphendula Uthini?
◻ Sinokunyamezela njani sinovuyo?
◻ Buyintoni “ubulumko baphezulu,” yaye sinokubufumana njani?
◻ Kutheni simele ‘sibe ngabenzi belizwi, singabi ngabaphulaphuli kuphela’?
◻ Ziziphi iingxelo ezifanele zisishukumisele ekubeni “ngabenzi belizwi”?
[Umfanekiso okwiphepha 17]
Ngamana nathi singayamkela ngeentliziyo ezipheleleyo imfundiso yobuthixo
[Imifanekiso ekwiphepha 18]
Ngenxa yokugcina ingqibelelo uYobhi wavuzwa ngokubuyiselwa ebomini obugqibeleleyo nobumnandi kunye nabo wayebathanda