Ukuphela Ngokusisigxina Kogonyamelo—Njani?

UKUZE zithintele ukwanda kogonyamelo, uninzi lwezixeko zaseUnited States zavela necebo elitsha—ukubanika imali okanye izinto ezixabisekileyo abo babuyisela imipu, ngaphandle kokubuza imibuzo. Ube yintoni umphumo? Ngokomzekelo, isixeko saseSt. Louis sachitha iidola ezingama-341 000 (R1 238 000) saza safumana imipu engama-8 500. Kwinkqubo efanayo kwisiXeko saseNew York kwafunyanwa izixhobo ezingaphezu kwewaka.

Ibe nawuphi umphumo yonke le nto kulwaphulo-mthetho? Okudanisayo kukuba umphumo ube mncinane kakhulu. Ukubulala ngemipu kuye kwafikelela eyona ncopho yakha yaphakama eSt. Louis kunyaka olandela lowo. KwisiXeko saseNew York, kusekho imipu eqikelelwa kwizigidi ezibini esebantwini. EUnited States, kukho imipu emalunga nama-200 ezigidi esebantwini, phantse indoda nganye, umfazi nomntwana ngamnye unowakhe. Kwamanye amazwe, ugonyamelo lwemipu lwanda ngendlela eyothusayo. IThe Economist ithi eBritani “phakathi kowe-1983 nowe-1993, inani lezenzo zolwaphulo-mthetho ezibhalwe ngamapolisa ekwakubandakanyeke kuzo imipu laphantsa laphindaphindeka, ukusa kwi-14 000.” Nangona ngokwentelekiso umlinganiselo wokubulawa kwabantu uphantsi, kukho izixhobo ezingekho mthethweni ezimalunga nesigidi kwelo lizwe.

Ngokuqinisekileyo, nakuphi na ukuncitshiswa kwaloo manani oyikekayo kuyancomeka. Noko ke, amanyathelo afana nala achazwe ngasentla ngokuqinisekileyo awafikeleli kwabona nobangela bogonyamelo. Bayintoni abo nobangela? Kuye kwacatshulwa oothunywashe abaninzi, kodwa bambalwa kubo abasisiseko. Ukungazinzi kweentsapho nokungabikho kwengqeqesho kuye kwabangela ukuba ulutsha oluninzi lungene kumaqela eenjubaqa ukuze nje lube ngamalungu awo. Umnqweno wokufumana imali eninzi ubangela abaninzi babhenele kugonyamelo. Ukungabikho kokusesikweni kwenza abanye balungise izinto ngogonyamelo. Ukuthanda izwe, uhlanga, okanye isikhundla esithile ebomini kwenza abantu bakubethe ngoyaba ukuthwaxeka kwabanye. Aba ngoothunywashe abanzulu ekungekho zicombululo zilula kubo.

Yintoni Enokwenziwa?

Amapolisa awongezelelekileyo, izigwebo zentolongo eziqatha, ukulawula ukuthengiswa kwemipu, isigwebo sentambo—zonke ezi ndlela ziye zanconyelwa yaye zazanywa njengeendlela zokulwa ulwaphulo-mthetho nogonyamelo. Ziye zaphumelela ngemilinganiselo eyahlukeneyo, kodwa okubuhlungu kukuba ugonyamelo lusekho. Kutheni kunjalo nje? Kungenxa yokuba la manyathelo anyanga iimpawu zalo kuphela.

Kwelinye icala, iingcali ezininzi zivakalelwa kukuba isikhokelo sokuphelisa ugonyamelo yimfundo. Ngoxa eli cebo lisengqiqweni, simele siphawule ukuba ugonyamelo alupheleliselwanga kwiintlanga ezinamathuba emfundo asikelwe umda kuphela. Eneneni, kubonakala ngathi awona mazwe anogonyamelo ikwangalawo anomgangatho ophakamileyo wemfundo. Licace mhlophe elokuba asiyomfundo nje kuphela efunekayo kodwa kufuneka uhlobo olululo lwemfundo. Lolunjani olo hlobo? Ngaba ukho umntu okwaziyo ukufundisa abantu ukuba bathande uxolo yaye babe ngabantu abangamalungisa?

“Mna Yehova, Thixo wakho, ndingokufundisa okungakuncedayo, ndikunyathelise ngendlela oya kuhamba ngayo. Akwaba imithetho yam ubuyibazele indlebe! Beluya kuba njengomlambo uxolo lwakho, nobulungisa bakho bube njengamaza olwandle.” (Isaya 48:17, 18, akekeliswe sithi.) UYehova uThixo ubafundisa njani abantu ukuba bathande uxolo yaye babe ngamalungisa? Ngokuyintloko usebenzisa iLizwi lakhe, iBhayibhile.

Amandla ELizwi LikaThixo

Ngokuqinisekileyo iBhayibhile asiyongqokelela nje yeentsomi namazwi obulumko akudala aphelelwe lixesha nangasasebenziyo. Iqulethe imigaqo neengcamango ezivela kuMdali woluntu, othi, ngoxa ekwisikhundla sakhe esiphakamileyo, abazi ubuthathaka babantu kunaye nabani na ongomnye. UYehova uThixo uthi: “Njengokuba izulu liwuphakamele umhlaba, ngokunjalo iindlela zam ziziphakamele iindlela zenu, neengcinga zam ziziphakamele iingcinga zenu.”—Isaya 55:9.

Ngenxa yoku umpostile uPawulos uyangqina ukuba “ilizwi likaThixo liphilile, lisebenza, libukhali ngaphezu kwamakrele onke antlangothi mbini; lihlaba liphumele, lide lahlule umphefumlo kwanomoya, amalungu kwanomongo; linokugweba iingcingane nezicamango zentliziyo.” (Hebhere 4:12) Ewe, iLizwi likaThixo linamandla okufikelela lize lichukumise intliziyo yomntu yaye liguqule indlela acinga nenza ngayo. Ngaba oku asikuko okufunekayo namhlanje ukuze kuguqulwe iindlela zabantu zogonyamelo?

AmaNgqina kaYehova, ngoku abalelwa kwizigidi ezihlanu kumazwe angaphezu kwama-230, abubungqina obubonakalayo bokuba iLizwi likaThixo, ngokwenene, linamandla okuguqula ubomi bube bobulunge ngakumbi. Phakathi kwawo kukho abantu abavela kuzo zonke iintlanga, iilwimi nezizwe. Kwakhona bavela kuzo zonke iinkalo zobomi neemvelaphi. Ngaphambili abanye babo babephila ubomi bogonyamelo nobuzaliswe ziingxaki. Kodwa kunokuba bavumele abo thunywashe ukuba babangele inzondo, ubutshaba, ucalucalulo nentiyo phakathi kwabo, baye bafunda ukuyoyisa le miqobo baza baba ngabantu abathanda uxolo nabamanyeneyo ehlabathini lonke. Yintoni ebangele oku?

Iphulo Eliphelisa Ugonyamelo

AmaNgqina kaYehova amkele imbopheleleko yokunceda abanye bafumane ulwazi oluchanileyo lwenjongo kaThixo njengoko lutyhilwe eLizwini lakhe, iBhayibhile. Mbombo zone zomhlaba, afuna abo bafuna ukufunda iindlela zikaYehova baze bafundiswe nguye. Imigudu yawo ithwala iziqhamo. Umphumo weli phulo lokufundisa kukuzaliseka kwesiprofeto esimangalisayo.

Kwiminyaka enokuba ngama-2 700 eyadlulayo, umprofeti uIsaya waphefumlelwa ukuba abhale oku: “Ekupheleni kwemihla . . . kuya kuhamba izizwe ezininzi, zithi, Yizani, sinyuke siye entabeni kaYehova, endlwini kaThixo kaYakobi; asiyalele iindlela zakhe, sihambe ngomendo wakhe.”—Isaya 2:2, 3.

Ukufundiswa nguYehova nokuhamba ngomendo wakhe kunokwenza iinguqulelo ezimangalisayo ebomini babantu. Enye yezi nguqulelo yaxelwa kwangaphambili kwakwesi siprofeto sinye: “Ziwakhande amakrele azo abe ngamakhuba, nezikhali zazo zibe zizitshetshe zeediliya; uhlanga lungaphakamiseli uhlanga ikrele, nezizwe zingaphindi zifunde ukulwa.” (Isaya 2:4) Abantu abaninzi baye basifunda esi sibhalo. Eneneni, le ndinyana ikrolwe kudonga lweSakhiwo seZizwe Ezimanyeneyo kwisiXeko saseNew York. Isikhumbuza oko iZizwe Ezimanyeneyo zifuna ukukwenza kodwa ezisilelayo ukukuphumeza. Akukho namnye umbutho wezobupolitika oyilwe ngabantu oya kuphelisa imfazwe nogonyamelo. Yinto enokwenziwa nguYehova uThixo kuphela. Uza kuyiphumeza njani?

Kuyaqondakala ukuba abayi kusabela bonke abantu kwisimemo sokuba “sinyuke siye entabeni kaYehova” aze “asiyalele iindlela zakhe” size “sihambe ngomendo wakhe”; bengayi kuvuma bonke ‘ukukhanda amakrele abo abe ngamakhuba, nezikhali zabo zibe zizitshetshe zeediliya.’ UYehova uza kubenza ntoni abanjalo? Akayi kuhlala ebavulele ithuba okanye alinde ukuba baguquke. Ukuze aphelise ugonyamelo, uYehova uya kutshabalalisa abo baqhubeka neendlela zogonyamelo.

Isifundo Esibalulekileyo

Oko uThixo wakwenzayo ngomhla kaNowa kusisilumkiso kuthi namhlanje. Ingxelo yeBhayibhile ibonisa uhlobo lwabantu ababephila ngelo xesha: “Ihlabathi lalonakele ebusweni bukaThixo; ihlabathi lalizele lugonyamelo.” Ngenxa yoko, uThixo wamxelela oku uNowa: “Isiphelo senyama yonke sifikile phambi kwam; ngokuba ihlabathi lizele lugonyamelo oluphuma kubo; yabona ke, ndiya kubonakalisa, bona ndawonye nehlabathi.”—Genesis 6:11, 13.

Sifanele siphawule ingongoma enye ebalulekileyo. Xa wayezisa uNogumbe kweso sizukulwana, uThixo wamlondoloza uNowa nentsapho yakhe. Ngoba? IBhayibhile iyaphendula: “UNowa waye eyindoda elilungisa, egqibeleleyo, ezizukulwaneni zakhe. UNowa wahamba noThixo.” (Genesis 6:9; 7:1) Ngoxa yayingenguye wonke umntu owayephila ngelo xesha owayenogonyamelo, nguNowa nentsapho yakhe kuphela ‘owahamba noThixo.’ Ngenxa yoko basinda xa elo hlabathi linogonyamelo latshatyalaliswayo.

Njengoko kwakhona sibona ihlabathi ‘lizala lugonyamelo,’ sinokuqiniseka ukuba uThixo uyalibona. Kanye njengokuba wenzayo ngomhla kaNowa, kungekudala uya kuthabatha inyathelo aze aphelise ugonyamelo—ngokusisigxina. Kodwa kwakhona uya kubakhusela abo bafunda ‘ukuhamba noThixo’ ngoku, abo basabelayo kwiphulo lakhe elikhulu lokufundisa ngoxolo.

Esebenzisa umdumisi, uYehova uyaqinisekisa esithi: “Kusaya kuba mzuzwana, angabikho ongendawo; uthi wakuyikhangela indawo yakhe, angabikho. Ke bona abalulamileyo baya kulidla ilifa ilizwe, baziyolise ngobuninzi boxolo.”—INdumiso 37:10, 11.

AmaNgqina kaYehova aya kukuvuyela ukufundisisa kunye nawe iBhayibhile ukuze uthelele abo bathi: “Yizani, sinyuke siye entabeni kaYehova, endlwini kaThixo kaYakobi; asiyalele iindlela zakhe, sihambe ngomendo wakhe.” (Isaya 2:3) Ngokwenjenjalo, unokuba phakathi kwabo baya kukubona ukupheliswa kwabo bonke ubungendawo nogonyamelo. ‘Unokuziyolisa ngobuninzi boxolo.’

[Inkcazelo Ngomfanekiso okwiphepha 5]

Reuters/Bettmann