Sinesizathu Sokumemelela Ngovuyo
“Baya kufumana imihlali nemivuyo, sisabe isingqala nosizi.”—ISAYA 35:10.
1. Ngoobani namhlanje abanesizathu sokuvuya?
USENOKUBA uyiphawule into yokuba bambalwa abantu abanovuyo lokwenene namhlanje. Ukanti, njengamaKristu okwenyaniso, amaNgqina kaYehova analo uvuyo. Yaye izigidi ezingakumbi ezingekabhaptizwa, abaselula nabadala, abanxulumana namaNgqina, banethemba lokufumana olo vuyo. Isibakala sokuba ufunda le nkcazelo kweli phephancwadi sibonisa ukuba sele ulufumene olu vuyo okanye usenokulufumana.
2. Uvuyo lomKristu lwahluke njani kwimeko eqhelekileyo yenkoliso yabantu?
2 Abantu abaninzi banemvo yokuba baswele okuthile ebomini. Kuthekani ngawe? Liyinyaniso elokuba, usenokuba akunazo zonke izinto eziphathekayo ezifunekayo, ngokuqinisekileyo akunazo zonke izinto ezinazo izityebi nabantu abaphambili banamhlanje. Yaye usengathanda ukuba sempilweni yaye ube namandla ngakumbi. Ukanti, sinokutsho ngemizimba ekhululekileyo ukuba xa kuthethwa ngovuyo, usisityebi yaye usempilweni ngaphezu kwamawaka ezigidi asemhlabeni. Ngaluphi uhlobo?
3. Ngawaphi amazwi anentsingiselo esifanele siwanikele ingqalelo, yaye ngoba?
3 Khumbula amazwi kaYesu athi: “Ezi zinto ndizithethile kuni, ukuze uvuyo lwam luhlale kuni, luthi novuyo lwenu luzaliseke.” (Yohane 15:11) ‘Ukuze uvuyo lwenu luzaliseke.’ Anjani wona ukuba mnandi amazwi! Ukuyihlolisisa ngokunzulu indlela aphila ngayo amaKristu kuya kutyhila izizathu ezininzi zokuzaliseka kovuyo lwethu. Kodwa ngoku, phawula amazwi anentsingiselo akuIsaya 35:10. La mazwi anentsingiselo kuba ayasichaphazela nathi namhlanje. Sifunda oku: “Abakhululwa bakaYehova babuye beze eZiyon bememelela; benovuyo olungunaphakade phezu kweentloko zabo; baya kufumana imihlali nemivuyo, sisabe isingqala nosizi.”
4. Luhlobo olunjani lovuyo olukhankanywe kuIsaya 35:10, yaye kutheni sifanele sikunikele ingqalelo oku?
4 “Benovuyo olungunaphakade.” Ibinzana elithi ‘ngonaphakade’ liyinguqulelo efanelekileyo yoko kwabhalwa nguIsaya ngesiHebhere. Kodwa, njengoko zingqina nezinye izibhalo, eyona nto ithetha ngayo le ndinyana ‘bubunaphakade.’ (INdumiso 45:6; 90:2; Isaya 40:28) Ngoko siya kuba novuyo olungapheliyo, kwiimeko eziya kusibangela—ewe, eziya kusenza sibe—novuyo ngonaphakade. Ngaba oko akuvakali kuchulumancisa? Noko ke, mhlawumbi le ndinyana ivakala ithetha ngento engenakwenzeka, ikwenza uthi: ‘Oko akundichaphazeli ngaphezu kokuba iingxaki namaxhala am emihla ngemihla esenza.’ Kodwa izibakala zibonisa okwahlukileyo. Idinga lesiprofeto elikuIsaya 35:10 linentsingiselo nakuwe namhlanje. Ukuze sifumane indlela elinentsingiselo ngayo, masihlolisise esi sahluko simnandi, uIsaya 35, sivisisanise inxalenye nganye nomongo. Qiniseka ukuba uza kukuvuyela oko siza kukufunda.
Abantu Ekwakufuneka Bevuyile
5. Ziziphi iimeko ezingokwesiprofeto esabhalwa phantsi kwazo isiprofeto esikuIsaya isahluko 35?
5 Ukuhlahl’ indlela, makhe sikhangele emva, kwindawo nexesha esabhalwa ngalo esi siprofeto sibangel’ umdla. Umprofeti ongumHebhere uIsaya wasibhala malunga nowama-732 B.C.E. Kumashumi eminyaka ngaphambi kokuba imikhosi yaseBhabhiloni itshabalalise iYerusalem. Njengoko uIsaya 34:1, 2 ebonisa, uThixo wayexele kwangaphambili ukuba wayeza kuziphindezelela kwiintlanga, ezinjengamaEdom, akhankanywe kuIsaya 34:6. Ubungqina bubonisa ukuba wasebenzisa amaBhabhiloni amandulo ukwenza oko. Ngokufanayo, uThixo wasebenzisa amaBhabhiloni ukuba aphanzise uYuda ngenxa yokuba amaYuda ayengathembekanga. Waba yintoni umphumo? Abantu bakaThixo bathinjwa, yaye ilizwe labo lasala lisenkangala kangangeminyaka engama-70.—2 Kronike 36:15-21.
6. Nguwuphi umahluko okhoyo phakathi koko kwakuza kwenzeka kumaEdom nakoko kwakuza kwenzeka kumaYuda?
6 Noko ke, kukho umahluko omkhulu phakathi kwamaEdom namaYuda. Impindezelo kaThixo kumaEdom ayizange iphele; de lwatshabalala olo hlanga. Ewe, usenokutyelela kumabhodlo akhal’ ibhungane akwindawo eyayihlala amaEdom, njengamabhodlo adumileyo asePetra. Kodwa namhlanje, alukho uhlanga okanye abantu ekuthiwa ‘ngamaEdom.’ Kwelinye icala, ngaba ukutshatyalaliswa kukaYuda ngamaBhabhiloni kwakuza kuhlala ngonaphakade, kuhlale kungekho vuyo kwelo lizwe ngonaphakade?
7. Asenokuba asabela njani kuIsaya isahluko 35 amaYuda awayethinjwe eBhabhiloni?
7 Esi siprofeto simnandi sifumaneka kuIsaya isahluko 35 sinentsingiselo echulumancisayo. Sisenokubizwa ngokuba sisiprofeto sokubuyiselwa, kuba saqala ukuzaliseka xa amaYuda abuyela kwilizwe lawo ngowama-537 B.C.E. AmaSirayeli awayethinjwe eBhabhiloni akhululwa ukuba abuyele kwilizwe lawo. (Ezra 1:1-11) Ukanti, ngoxa kwakungekenzeki oko, amaYuda awayesiva esi siprofeto engabathinjwa eBhabhiloni asenokuba ayezibuza ukuba ayeza kufika linjani na ilizwe lawo, kwaYuda. Yaye wona ayeza kuba kuyiphi imeko? Iimpendulo zale mibuzo zinento yokwenza nesizathu sokuba sifanele simemelele ngovuyo. Makhe sibone.
8. AmaYuda ayeza kufumana ziphi iimeko ekubuyeni kwawo eBhabhiloni? (Thelekisa uHezekile 19:3-6; Hoseya 13:8.)
8 Iimeko ezazikho zazingayi kuwanika themba kwaphela amaYuda kwanaxa esiva ukuba angabuyela kwilizwe lawo. Ilizwe lawo lalisenkangala kangangeminyaka engamashumi asixhenxe, minyaka leyo ephilwa ngumntu. Kwakwenzeke ntoni kwelo lizwe? Onke amasimi, izidiliya, okanye imiyezo imele ukuba yayingumqwebedu. Izitiya ezazinkcenkceshelwa zimele ukuba zaba yinkqantosi okanye intlango. (Isaya 24:1, 4; 33:9; Hezekile 6:14) Kwakhona, cinga ngezilwanyana zasendle ezazidakasa apho. Oku kwakuya kuquka izilwanyana ezitya inyama, njengeengonyama namahlosi. (1 Kumkani 13:24-28; 2 Kumkani 17:25, 26; INgoma yazo iiNgoma 4:8) Yaye babengenakuzibetha ngoyaba iibhere, ezazinamandla okubulala indoda, umfazi, okanye umntwana. (1 Samuweli 17:34-37; 2 Kumkani 2:24; IMizekeliso 17:12) Asisathethi ke ngamarhamba nezinye iinyoka ezinobuhlungu noonomadudwane. (Genesis 49:17; Duteronomi 32:33; Yobhi 20:16; INdumiso 58:4; 140:3; Luka 10:19) Ukuba wawukunye naloo maYuda awayebuya evela eBhabhiloni ngowama-537 B.C.E., mhlawumbi wawunokuba madolw’ anzima ukuhambahamba kwindawo enjalo. Akazange afikele eparadisi.
9. Sasiyintoni isizathu sokuba amaYuda awayegoduka abe nesizathu sokuba nethemba?
9 Sekunjalo, nguYehova owayebagodusa abanquli bakhe, ibe unawo amandla okuhlaziya indawo ebifudula iyinkangala. Ngaba uyakholelwa ukuba uMdali unokukwenza oko? (Yobhi 42:2; Yeremiya 32:17, 21, 27, 37, 41) Ngoko yintoni awayeza kuwenzela yona—iyintoni awawenzela yona—loo maYuda awayebuya ekuthinjweni nelizwe lawo? Oku kubachaphazela njani abantu bakaThixo banamhlanje nemeko yakho—yangoku neyexesha elizayo? Masiqale sibone okwenzekayo emva phayaa.
Ukuvuyela Iimeko Eziguqukileyo
10. Ziziphi iinguqulelo ezaxelwa kwangaphambili kuIsaya 35:1, 2?
10 Kwakuza kwenzeka ntoni xa uKoreshi evumela amaYuda ukuba abuyele kwelo lizwe libharhileyo? Funda ngesi siprofeto sichukumisayo kuIsaya 35:1, 2: “Inemihlali intlango nomqwebedu; iyagcoba inkqantosi, iyadubula njengomfiyo. Iyatyatyamba, ithi rhoqo; iyagcoba, ewe, iyagcoba, imemelele, inikwe ubuqaqawuli beLebhanon, ubungangamela beKarmele neSharon; ezo ndawo ziya kububona ubuqaqawuli bukaYehova, ubungangamela boThixo wethu.”
11. UIsaya wazekelisa ngawaphi amazwe ngokusekelwe kulwazi awayenalo?
11 Kumaxesha okubhalwa kweBhayibhile, iLebhanon, iKarmele neSharon zazidume ngokuba nohlaza oluhle. (1 Kronike 5:16; 27:29; 2 Kronike 26:10; INgoma yazo iiNgoma 2:1; 4:15; Hoseya 14:5-7) UIsaya wazekelisa ngaloo mazwe echaza indlela elaliya kuba yiyo eli lizwe xa liguqukile, ngoncedo lukaThixo. Kodwa ngaba oku kwakuya kwenzeka emhlabeni kuphela? Akunjalo konke konke!
12. Kutheni sinokuthi isiprofeto esikuIsaya isahluko 35 sithetha ngabantu?
12 UIsaya 35:2 uthetha ngelizwe ‘eligcobayo nelimemelelayo.’ Siyazi ukuba ilizwe nezityalo ‘zazingagcobi yaye zazingamemeleli’ ngokoqobo. Sekunjalo, ukwenziwa kwalo lichume nezityalo zalo zibe nemveliso kwakunokwenza abantu bavakalelwe ngolo hlobo. (Levitikus 23:37-40; Duteronomi 16:15; INdumiso 126:5, 6; Isaya 16:10; Yeremiya 25:30; 48:33) Iinguqulelo ezenzeka ngokoqobo emhlabeni zaziya kuhambisana neenguqulelo ezaziza kwenzeka ebantwini, kuba ngokuyintloko esi siprofeto sithetha ngabantu. Ngenxa yoko, amazwi kaIsaya sifanele siwaqonde njengabhekisela kwiinguqulelo ezenzeka kumaYuda awayebuya ekuthinjweni, ngokukodwa kuvuyo awaba nalo.
13, 14. Yiyiphi inguqulelo eyayiza kwenzeka ebantwini eyaxelwa kwangaphambili kuIsaya 35:3, 4?
13 Ngokuvisisana noko, masisihlolisise ngakumbi esi siprofeto sichulumancisayo ukuze sibone indlela esazaliseka ngayo emva kokukhululwa kwamaYuda nokubuya kwawo evela eBhabhiloni. Kwindinyana 3 neyesi-4, uIsaya uthetha ngezinye iinguqulelo ezenzeka kuloo maYuda awayebuya ekuthinjweni: “Yomelezani izandla eziwileyo, niwaqinise amadolo agexayo. Yithini kwabantliziyo zingxamayo, Yomelelani, ningoyiki. Yabonani, uThixo wenu uyeza enempindezelo, enembuyekezo kaThixo; uya kuza yena anisindise.”
14 Ngaba akusomelezi ukwazi ukuba uThixo wethu, owaba namandla okuhlaziya umhlaba owawuyinkangala, unomdla ongaka kubanquli bakhe? Wayengafuni ukuba amaYuda awayethinjiwe azive edimazekile, etyhafile, okanye axhalele ikamva. (Hebhere 12:12) Yiba nomfanekiso-ngqondweni wemeko awayekuyo loo maYuda ayesekuthinjweni. Ngaphandle kwethemba awayenokulifumana kwiziprofeto zikaThixo ngekamva lawo, ngekwakunzima ukuba abe nethemba. Kwakungathi ayelahlwe kwesinomhlwa, esengxingweni yaye engakwazi ukukhonza uYehova ngenzondelelo. Ayenokusuka abe nemvo yokuba akukho kukhanya ngaphambili.—Thelekisa iDuteronomi 28:29; Isaya 59:10.
15, 16. (a) Singagqiba ngelithini ngenxa yoko uYehova wakwenzela amaYuda awayebuya ekuthinjweni? (b) Sasiyintoni isizathu sokuba loo maYuda angalindeli ukuphiliswa ngokoqobo ngokungummangaliso, kunoko wenza ntoni uThixo ngokuvisisana noIsaya 35:5, 6?
15 Noko ke, hayi indlela ezaguquka ngayo izinto, xa uYehova wasebenzisa uKoreshi ukuwakhulula abuyele ekhaya! IBhayibhile ayinikeli bungqina bokuba uThixo wawavula ngokungummangaliso amehlo amaYuda awayeziimfama, wavula iindlebe zezithulu, okanye waphilisa aneziphene okanye angenamilenze nazingalo. Noko ke, wenza into engaphezulu kunaleyo. Waphinda wawanika ukhanyo nenkululeko yelizwe lawo alithandayo.
16 Akukho nto ibonisa ukuba loo maYuda awayebuya ekuthinjweni ayelindele ukuba uYehova enze imimangaliso yokuwaphilisa ngokoqobo. Amele ukuba ayeqonda ukuba uThixo wayengenzanga njalo kuIsake, uSamson, okanye uEli. (Genesis 27:1; ABagwebi 16:21, 26-30; 1 Samuweli 3:2-8; 4:15) Kodwa ukuba ayelindele ukuba uThixo aguqule imeko yawo yokomfuziselo, akazange aphoxeke. Ngokuqinisekileyo Isa 35 indinyana 5 neyesi-6 zazaliseka ngokomfuziselo. UIsaya wakuchaza ngokuchanileyo kusengaphambili oku: “Aya kuvulwa amehlo eemfama, zivulwe iindlebe zezithulu; size sitsibe njengexhama isiqhwala, lumemelele ulwimi lwesidenge.”
Ukwenza Ilizwe Lifane NeParadisi
17. Ziziphi iinguqulelo zokoqobo ekubonakala ukuba zenziwa nguYehova?
17 Ngokuqinisekileyo loo maYuda awayebuya ekuthinjweni ayefanele amemelele ngovuyo ngenxa yeemeko ezinjengezo zachazwa nguIsaya ngokulandelayo: “Ngokuba kuya kugqobhoka amanzi entlango, nemilambo enkqantosini; isanga sibe lidike, neendawo ezinxaniweyo zimpompoze amanzi. Esikhundleni sempungutye, apho ibuthuma khona, kuya kuba butyani neengcongolo nemikhanzi.” (Isaya 35:6b, 7) Nangona loo mmandla usenokungabonakali unjalo wonke namhlanje, ubungqina bubonisa ukuba ummandla owawukade ungowakwaYuda wakha waba “ngamadlelo ayiparadisi.”a
18. AmaYuda awayebuya ekuthinjweni anokuba asabela njani kwiintsikelelo zikaThixo?
18 Njengezizathu zokuvuya, cinga ngendlela emele ukuba yavakalelwa ngayo intsalela yamaYuda xa yabuyiselwa kwiLizwe Ledinga! Yayikulungele ukuguqula elo lizwe liyinkqantosi nelalihlala iimpungutye nezinye izilwanyana ezifana nayo. Ngaba ngekwakungazange kukuvuyise ukwenza loo msebenzi wokubuyisela elo lizwe kwimeko yalo, ngokukodwa ukuba wawusazi ukuba uThixo wayeyisikelela imigudu yakho?
19. Ukubuya ekuthinjweni kwaseBhabhiloni kwakuphantsi kwemiqathango ngayiphi ingqiqo?
19 Noko ke, yayingenguye nawuphi na umYuda owayethinjwe eBhabhiloni owayeza kubuya aze abe nesabelo kwezo nguqulelo zivuyisayo. UThixo wamisela imiqathango. Nabani na owayengcoliswe luqheliselo lwaseBhabhiloni nalunqulo lwabahedeni wayengenalungelo lakubuyela apho. (Daniyeli 5:1, 4, 22, 23; Isaya 52:11) Yaye nabani na owayethe ngobuyatha walandela ikhondo elingelolabulumko wayengenakubuyela. Bonke abantu abanjalo babengafaneleki. Kwelinye icala, abo babeyifikelela imilinganiselo kaThixo, awayebagqala njengabangcwele ngokomlinganiselo othile, babenokubuyela kwaYuda. Ngokungathi kunjalo babeya kuhamba ngeNdlela Engcwele. UIsaya walenza lacaca elo kwindinyana 8: “Kuya kubakho umendo khona, kubekho indlela, kuthiwe ukubizwa kwayo, yindlela engcwele le. Akuyi kudlula nto iyinqambi ngayo; yeyabo yona: abahamba loo ndlela—nabazizihula abayi kulahleka kuyo.”
20. Yintoni ekwakungeyomfuneko ukuba ayoyike amaYuda ekubuyeni kwawo, nto leyo eyakhokelela entwenini?
20 Kwakungeyomfuneko ukuba amaYuda awayebuyela ekhaya oyike ukuhlaselwa ngabantu abafana namarhamncwa okanye ngabaphangi. Ngoba? Ngenxa yokuba uYehova wayengayi kubavumela abanjalo ukuba bahambe kuloo Ndlela nabantu bakhe abakhululeyo. Ngoko babenokuhamba beneentliziyo ezinovuyo, benamathemba onwabisayo. Phawula indlela awakuchaza ngayo oku uIsaya ekupheleni kwesi siprofeto: “Akuyi kubakho ngonyama khona, aliyi kuqabela khona irhamncwa eliqwengayo; aliyi kufunyanwa khona; kuya kuhamba khona abakhululwe ngokuhlawulelwa; abakhululwa bakaYehova babuye beze eZiyon bememelela; benovuyo olungunaphakade phezu kweentloko zabo; baya kufumana imihlali nemivuyo, sisabe isingqala nosizi.”—Isaya 35:9, 10.
21. Sifanele siyijonge njani inzaliseko kaIsaya isahluko 35 esele yenzekile namhlanje?
21 Onjani wona umfanekiso esiwenzelwa sesi siprofeto! Noko ke, asifanele sikujonge oku njengokubhekisele kwixesha elidluleyo kuphela, ngokungathi libali elimnandi elingenanto yakwenza kangako nemeko okanye ikamva lethu. Isibakala sesokuba esi siprofeto sizaliseka ngendlela emangalisayo namhlanje phakathi kwabantu bakaThixo, ngoko ngenene sichaphazela ngamnye wethu. Sisenza sibe nesizathu esivakalayo sokumemelela ngovuyo. Ezi nkalo zichaphazela ubomi bakho ngoku nakwikamva zixutyushwe kwinqaku elilandelayo.
[Umbhalo osemazantsi]
a Ngokuphuma kuhlolisiso lwakhe ngalo mmandla, ingcali yomhlaba uWalter C. Lowdermilk (omela iU.N. Food and Agriculture Organization) waphetha ngelithi: “Eli lizwe lakha laba ngamadlelo ayiparadisi.” Kwakhona wabonisa ukuba imo yezulu yalapho ayitshintshanga kakhulu “ukususela kumaxesha amaRoma,” yaye “‘intlango’ ekweli lizwe lalikade lichumile yabangelwa ngumntu, kungekhona yindalo.”
Uyakhumbula Na?
◻ Wazaliseka nini okwesihlandlo sokuqala uIsaya isahluko 35?
◻ Inzaliseko yokuqala yesi siprofeto yayiza kuba nawuphi umphumo?
◻ UYehova wamzalisekisa njani uIsaya 35:5, 6?
◻ Ziziphi iinguqulelo ezenzekayo kumhlaba nakwimeko yamaYuda awayebuye ekuthinjweni?
[Umfanekiso okwiphepha 9]
Amabhodlo asePetra, akummandla awayekade ehlalakuwo amaEdom
[Inkcazelo]
Garo Nalbandian
[Imifanekiso ekwiphepha 10]
Ngoxa amaYuda ayesekuthinjweni, inkoliso yelakwaYuda yayisenkangala, kudakasa amarhamncwa asendle anjengeebhere neengonyama
[Inkcazelo]
Garo Nalbandian
Bear and Lion: Safari-Zoo of Ramat-Gan, Tel Aviv