Ukuvuya Ngoku Nangonaphakade
“Yibani nemihlali, nigcobe nanini yiloo nto ndiyidalayo; ngokuba, yabonani, ndiyayidala iYerusalem ukuba igcobe, nabantu ukuba babe nemihlali.”—ISAYA 65:18.
1. Unqulo lokwenyaniso lubachaphazele njani abantu abahlukahlukeneyo ukutyhubela iinkulungwane?
UKUTYHUBELA iinkulungwane, izihlwele ziye zafumana uvuyo olukhulu ngokukhonza uThixo oyinyaniso, uYehova. UDavide wayengomnye wabantu ababenovuyo ngenxa yokuba kunqulo lokwenyaniso. IBhayibhile ithi xa kwakusiwa ityeya yomnqophiso eYerusalem, “OoDavide nendlu yonke kaSirayeli babeyinyusa ke ityeya kaYehova, beduma.” (2 Samuweli 6:15) Olo vuyo lokukhonza uYehova aluyonto nje yexesha elidluleyo. Unokuluxhamla nawe. Yaye kungekudala unokude ufumane uvuyo ongazange ulubone!
2. Ngaphandle kwenzaliseko yangaphambili kaIsaya isahluko 35 kumaYuda awayebuya ekuthinjweni, ngoobani namhlanje ababandakanyeke kwenye inzaliseko?
2 Kwinqaku elandulelayo, sixubushe ngenzaliseko yokuqala yesiprofeto esichulumancisayo esibhalwe kuIsaya isahluko 35. Ngokufanelekileyo sinokuthi esi sisiprofeto sokubuyiselwa kuba sazalisekisa kanye oko kumaYuda amandulo. Sikwanenzaliseko efanayo nakumhla wethu. Njani? Kaloku, ukususela kubapostile bakaYesu nabanye ababekho ngePentekoste yama-33 C.E., uYehova ebesebenzisana namaSirayeli okomoya. Aba ngabantu abathanjiswe ngomoya oyingcwele kaThixo nabayinxalenye yoko umpostile uPawulos akubiza ngokuba ‘nguSirayeli kaThixo.’ (Galati 6:16; Roma 8:15-17) Kwakhona, khumbula ukuba kweyoku-1 kaPetros 2:9, kuthiwa la maKristu “sisizukulwana esinyuliweyo, isibingeleli esibukumkani, uhlanga olungcwele, abantu abayinqobo.” UPetros uhlabela mgama echaza isabelo esinikwa uSirayeli wokomoya esithi: “[Nifanele] nivakalise isidima salowo wanibizayo ukuba niphume ebumnyameni, ningene ekukhanyeni kwakhe okungummangaliso.”
Inzaliseko Yomhla Wethu
3, 4. Zazinjani iimeko ekuzalisekeni kukaIsaya isahluko 34 kumhla wethu?
3 Ebutsheni bale nkulungwane kwakukho ixesha xa intsalela yoSirayeli wokomoya esesemhlabeni yayingasivakalisi ngenkuthalo eso sigidimi. Yayingakuvuyeli ngokupheleleyo ukukhanya kukaThixo okungummangaliso. Eneneni, yayisentsunguzini yobumnyama. Kwakunini ngoko? Yaye uYehova uThixo wenza ntoni ngaloo nto?
4 Kwakusebudeni beMfazwe Yehlabathi I, emva nje kokumiselwa koBukumkani bukaThixo obungoMesiya emazulwini ngowe-1914. Iintlanga, ezazixhaswa ngabefundisi beecawa zamazwe ahlukahlukeneyo, zaziqumbelene. (ISityhilelo 11:17, 18) Kambe ke, uThixo wayeyichasile iNgqobhoko ewexukileyo nodidi lwayo lwabefundisi oluziphakamisileyo kanye njengokuba wayeluchasile uhlanga olwalunekratshi lwakwaEdom. Ngoko, iNgqobhoko, eyayifuziselwa nguEdom, iza kwehlelwa yinzaliseko yanamhlanje kaIsaya isahluko 34. Le nzaliseko yokutshatyalaliswa kweNgqobhoko ngonaphakade iqinisekile kanye njengokuba kwakunjalo ngenzaliseko yokuqala kuEdom.—ISityhilelo 18:4-8, 19-21.
5. UIsaya isahluko 35 uzaliseke njani kumhla wethu?
5 Kuthekani ngesiprofeto sikaIsaya esikwisahluko 35, esigxininisa uvuyo? Naso sizalisekile kumhla wethu. Ngaluphi uhlobo? Siye sazaliseka ngokubuyiselwa koSirayeli wokomoya obekuhlobo oluthile lokuthinjwa. Makhe sihlolisise iziganeko zakutshanje eziyimbali yobuthixo, neziye zabonwa ngabaninzi abasaphilayo ngoku.
6. Kutheni kunokutshiwo ukuba intsalela yoSirayeli wokomoya yaba kwimeko efana nokuthinjwa?
6 Kangangethuba elithile ebudeni beMfazwe Yehlabathi I, intsalela yoSirayeli wokomoya ayizange izigcine icocekile ngokupheleleyo ngokuvisisana nokuthanda kukaThixo. Inxalenye yayo yayingcoliswe ziimfundiso zonqulo ezingachananga yaye yalalanisa ngokungammeli ngokupheleleyo uYehova xa yayiphantsi kwengcinezelo yokuxhasa iintlanga ezazisemfazweni. Ebudeni baloo minyaka yemfazwe, yathwaxwa zizo zonke iintlobo zentshutshiso, uncwadi lwayo lweBhayibhile lwada lwavalwa kwiindawo ezininzi. Ekugqibeleni, bambi kubazalwana ababekhokela bagwetywa baza bavalelwa ngezimangalo zobuxoki. Eneneni, akunzima ukubona ukuba, ngandlel’ ithile, abantu bakaThixo babekwimeko efana nokuthinjwa, babengakhululekanga. (Thelekisa uYohane 8:31, 32.) Amehlo abo okomoya ayebona luzizi. (Efese 1:16-18) Babefana nezimumu ekudumiseni uThixo, nto leyo eyaphumela ekubeni bangavelisi ziqhamo ngokomoya. (Isaya 32:3, 4; Roma 14:11; Filipi 2:11) Ngaba uyayibona indlela ekufana ngayo oku nemeko yamaYuda amandulo awayesekuthinjweni eBhabhiloni?
7, 8. Luhlobo olunjani lokubuyiselwa okwafunyanwa yintsalela yanamhlanje?
7 Kodwa ngaba uThixo wayeya kubayekela kuloo meko abakhonzi bakhe banamhlanje? Akunjalo, wayezimisele ukubabuyisa, ngokuvisisana noko kwakuxelwe kwangaphambili ngoIsaya. Ngoko esi siprofeto sikwisahluko 35 sinenzaliseko ebalaseleyo kumhla wethu, ngokubuyiselwa kwentsalela yoSirayeli wokomoya kwimpumelelo nakwimpilo entle kwiparadisi yokomoya. KumaHebhere 12:12, uPawulos wasebenzisa uIsaya 35:3 ngokufuziselayo, exhasa ukuchana kwesibakala sokuba le nxalenye yesiprofeto kaIsaya inenzaliseko yokomoya.
8 Kwithuba lasemva kwemfazwe, ngokungathi kunjalo, intsalela ethanjisiweyo yoSirayeli wokomoya yakhululwa ekuthinjweni. UYehova uThixo wasebenzisa uYesu Kristu, uKoreshi Omkhulu, ukuba ayikhulule. Ngaloo ndlela, le ntsalela yakwazi ukwenza umsebenzi wokwakha kwakhona, ofana nomsebenzi owenziwa yintsalela yamaYuda amandulo, awayebuyele kwilizwe lawo ukuze aphinde akhe itempile yokoqobo eyayiseYerusalem. Ngaphezu koko, la maSirayeli okomoya anamhlanje ayenokuqalisa ukulungiselela nokuvelisa iparadisi yokomoya entle nechumileyo, engumyezo wase-Eden wokomfuziselo.
9. Yenzeka njani into efana naleyo ichazwe kuIsaya 35:1, 2, 5-7 kumhla wethu?
9 Sicinga ngoku kungasentla, masiphinde sihlolisise uIsaya isahluko 35, size siqale ukufunda ngendinyana 1 neyesi-2. Okwakubonakala kungumqwebedu kwaqalisa ukutyatyamba nokuvelisa njengamathafa amandulo akwaSharon. Emva koko, funda Isa 35 indinyana 5 ukusa kweyesi-7. Intsalela, abaliqela kuyo abasaphilayo nabasakhutheleyo enkonzweni kaYehova, yavulwa amehlo engqiqo. Yatsho yakwazi ukuyibona kakuhle intsingiselo yoko kwenzeka ngowe-1914 nasemva koko. Oko kuye kwanempembelelo nakwinkoliso yethu abayinxalenye ‘yesihlwele esikhulu,’ esikhonza kunye nentsalela ngoku.—ISityhilelo 7:9.
Ngaba Unenxaxheba Kwinzaliseko?
10, 11. (a) Kukuchaphazele njani ukuzaliseka kukaIsaya 35:5-7? (b) Uvakalelwa njani ngezi nguqulelo?
10 Ngokomzekelo, khawucinge ngesiqu sakho. Ngaphambi kokuba udibane namaNgqina kaYehova, ngaba wawuyifunda rhoqo iBhayibhile? Ukuba wawusenjenjalo, wawunolwazi olungakanani? Ngokomzekelo, ngoku uyayazi inyaniso ngemeko yabafi. Mhlawumbi nomntu onomdla kulo mbandela ungambonisa izibhalo ezibhekisele koku kwiGenesis isahluko 2, INtshumayeli isahluko 9 noHezekile isahluko 18, kwanezinye iindinyana ezininzi. Ewe, usenokuba uyakuqonda oko kufundiswa yiBhayibhile kweminye imibandela emininzi. Ngamafutshane, uyayiqonda iBhayibhile, yaye inxalenye yayo enkulu unokuyicacisa kwabanye, njengoko ngokungathandabuzekiyo uye wenjenjalo.
11 Noko ke, besiya kwenza kakuhle ukuba besinokuzibuza oku, ‘Ndalufumana njani olu lwazi ndinalo ngenyaniso yeBhayibhile? Ngaphambi kokufundisisa nabantu bakaYehova, ngaba ndandizazi zonke ezi ndinyana zikhankanyiweyo? Ngaba ndandiziqonda yaye ngaba ndenza izigqibo ezifanelekileyo ngentsingiselo yazo?’ Mhlawumbi impendulo engqalileyo kule mibuzo nguhayi. Akukho bani ofanele akhutyekiswe ngala mazwi, kodwa kunokutshiwo ukuba eneneni wawuyimfama xa kuthethwa ngezi ndinyana nentsingiselo yazo. Akunjalo na? Zaziphambi kwakho eBhayibhileni, kodwa wawungaziboni okanye ungayiqondi intsingiselo yazo. Ngoko, avulwa njani amehlo akho ngokomoya? Avulwa koko uYehova akwenzileyo ezalisekisa uIsaya 35:5 kwintsalela ethanjisiweyo. Emva kwexesha, nawakho amehlo avulwa. Akusekho bumnyameni ngokomoya. Uyabona.—Thelekisa ISityhilelo 3:17, 18.
12. (a) Kutheni sinokuthi eli asiloxesha lemimangaliso yokuphilisa ngokoqobo? (b) Imeko kaMzalwana uF. W. Franz yayibonakalisa njani indlela azaliseka ngayo uIsaya 35:5 kumhla wethu?
12 Abafundi abakhutheleyo beBhayibhile nabezinto ebezisenziwa nguThixo kwiinkulungwane ezidluleyo bayazi ukuba eli asiloxesha lemimangaliso yokuphilisa ngokoqobo. (1 Korinte 13:8-10) Ngoko asilindelanga ukuba uYesu Kristu avule amehlo eemfama ukungqina ukuba unguMesiya, umProfeti kaThixo. (Yohane 9:1-7, 30-33) Yaye akavuli iindlebe zezithulu ukuba zive kwakhona. Njengoko uFrederick W. Franz, omnye wabathanjiswa nowayengumongameli weWatch Tower Society, wayesondela kubudala beminyaka eli-100, waba norhatyazo yaye kwafuneka asebenzise izixhobo zokuva. Kangangeminyaka wayengakwazi ukufunda ngenxa yokungaboni; ukanti, ngubani owayenokumgqala njengemfama okanye isithulu xa kucingwa ngoIsaya 35:5? Iliso lakhe lokomoya elibukhali laliyintsikelelo kubantu bakaThixo emhlabeni wonke.
13. Kukuphi ukulungiswa okanye ukubuyiselwa okuye kwabonwa ngabantu bakaThixo banamhlanje?
13 Okanye kuthekani ngolwimi lwakho? Abathanjiswa bakaThixo basenokuba babezizimumu ebudeni bokuthinjwa kwabo ngokomoya. Kodwa emva kokuba uThixo eyilungisile loo meko, ulwimi lwabo lwaqalisa ukumemelela ngovuyo ngenxa yoko babekwazi ngoBukumkani bukaThixo obumiselweyo namadinga akhe ekamva. Basenokuba bakunceda nawe wakwazi ukuthetha. Kwixesha elidluleyo wawuthetha kangakanani ngenyaniso yeBhayibhile nabanye? Mhlawumbi ngaxa lithile, wawucinga uze uthi, ‘Ndiyakuthanda ukufundisisa, kodwa andinakuze ndiye kuthetha nabantu endingabaziyo.’ Noko ke, ngaba aliyonyaniso na elokuba “ulwimi lwesidenge [longakwazi kuthetha]” ngoku ‘luyamemelela’?—Isaya 35:6.
14, 15. Abaninzi baye bahamba njani ‘kwiNdlela Engcwele’ kumhla wethu?
14 AmaYuda amandulo awayekhululwe eBhabhiloni ayejongene nohambo olude oluya kwilizwe lawo. Kufanekisela ntoni oko kumhla wethu? Funda uIsaya 35:8: “Kuya kubakho umendo khona, kubekho indlela, kuthiwe ukubizwa kwayo, yindlela engcwele le. Akuyi kudlula nto iyinqambi ngayo.”
15 Ukususela ekukhululweni kwayo ekuthinjweni ngokomoya, intsalela ethanjisiweyo, ekunye nezigidi zezinye izimvu ngoku, iphumile kwiBhabhiloni Enkulu yangena kumendo wokomfuziselo, indlela engcwele necocekileyo ekhokelela kwiparadisi yokomoya. Senza konke okusemandleni ethu ukuze siyifanelekele size sihlale kule Ndlela Ingcwele. Cinga ngesiqu sakho. Ngaba imilinganiselo yakho yokuziphatha nemigaqo ophila ngayo ngoku ayiphakamanga kunangokuya wawusesehlabathini? Ngaba akwenzi konke okusemandleni akho ukuze ukucinga nehambo yakho kuvisisane nokukaThixo?—Roma 8:12, 13; Efese 4:22-24.
16. Ziziphi iimeko esinokuzinandipha ngoxa sihamba kwiNdlela Engcwele?
16 Njengoko uhamba kule Ndlela Ingcwele, ngokusisiseko ukhululekile ekoyikeni abantu abafana namarhamncwa. Liyinyaniso elokuba, ehlabathini kufuneka uphaphe ukuze abantu ababawayo okanye abakhohlakeleyo bangakutyi uhleli, ngokungathi kunjalo. Abantu abaninzi gqitha babaphatha ngenkohlakalo abanye. Onjani wona umahluko phakathi kwabantu bakaThixo! Ukhuselekile phakathi kwabo. Kakade ke, namanye amaKristu akafezekanga; maxa wambi omnye wawo uye enze impazamo okanye akukhubekise. Kodwa uyazi ukuba abazalwana bakho abananjongo yakukwenzakalisa okanye yokukuqwenga. (INdumiso 57:4; Hezekile 22:25; Luka 20:45-47; IZenzo 20:29; 2 Korinte 11:19, 20; Galati 5:15) Kunoko, banomdla kuwe; baye bakunceda ngaphambili; bafuna ukukhonza ndawonye nawe.
17, 18. Ikho ngayiphi ingqiqo iparadisi ngoku, yaye oko kusichaphazela njani thina?
17 Ngoko xa sifunda uIsaya isahluko 35, sinokucinga ngenzaliseko yanamhlanje yendinyana 1 ukuya kweyesi-8. Ngaba alisicacelanga elokuba sikufumene oko ngokufanelekileyo kubizwa ngokuba yiparadisi yokomoya? Hayi, ayikagqibeleli—okwangoku. Kodwa iyiparadisi yokwenene, kuba njengoko kuchazwa kwindinyana 2, ‘siyabubona kwanangoku ubuqaqawuli bukaYehova, ubungangamela boThixo wethu.’ Yaye uyintoni umphumo woko? Isa 35 Indinyana 10 ithi: “Abakhululwa bakaYehova babuye beze eZiyon bememelela; benovuyo olungunaphakade phezu kweentloko zabo; baya kufumana imihlali nemivuyo, sisabe isingqala nosizi.” Ngenene, ukuphuma kwethu kunqulo lobuxoki nokuzondelela kwethu unqulo oluyinyaniso sinenkoloseko kaThixo kubangela uvuyo.
18 Uvuyo olubangelwa lunqulo oluyinyaniso luhlala lusanda, akunjalo na? Ubona abasandul’ ukuba nomdla besenza iinguqulelo baze bazinze kwinyaniso yeBhayibhile. Ubukela ulutsha lukhula yaye lusenza inkqubela ngokomoya ebandleni. Kukho ababhaptizwayo, phakathi kwabo ubukela obaziyo bebhaptizwa. Ngaba ezo zinto azibangeli vuyo, uvuyo olungathethekiyo, namhlanje? Hayi indlela ekuvuyisa ngayo ukubona abanye besithelela kwinkululeko yokomoya nakwiimeko zethu ezifana neparadisi!
Inzaliseko Ezayo!
19. UIsaya isahluko 35 usenza sihlale sinaliphi ithemba?
19 Ukuza kuthi ga ngoku sihlolisise ukuzaliseka kukaIsaya isahluko 35 okokuqala ekubuyeni kwamaYuda nokuzaliseka kwakhe ngokomoya namhlanje. Kodwa akuphelelanga apho. Kusekho okungakumbi. Kunento yokwenza nesiqinisekiso seBhayibhile sokubuyiselwa kweparadisi yokoqobo emhlabeni.—INdumiso 37:10, 11; ISityhilelo 21:4, 5.
20, 21. Kutheni kusengqiqweni yaye kungokweZibhalo ukukholelwa ukuba kuseza kubakho enye inzaliseko kaIsaya isahluko 35?
20 UYehova ebeya kuba uyaziphikisa ukuba ebenokunikela inkcazelo ebangel’ umdla yeparadisi aze ayizalisekise kwizinto zokomoya kuphela. Kakade ke, oku akuthethi ukuba inzaliseko yokomoya ayibalulekanga. Kwanokuba ibinokusekwa iparadisi yokoboqo, ibingayi kusanelisa into yokuba kuloo mhlaba mhle unezilwanyana eziseluxolweni besingqongwe ngabantu abonakeleyo ngokomoya, abantu abaziphatha njengamarhamncwa asendle. (Thelekisa uTito 1:12.) Ewe, inzaliseko yokomoya imele ize kuqala, kuba yeyona ibalulekileyo.
21 Noko ke, iParadisi ezayo ayisayi kuphelela kwizinto zokomoya esizinandiphayo ngoku nesiseza kuzinandipha kwixesha elizayo. Sinezizathu ezininzi zokulindela inzaliseko yokoqobo yeziprofeto ezinjengoIsaya isahluko 35. Ngoba? Kaloku, kwisahluko 65, uIsaya wachaza kwangaphambili ‘ngamazulu amatsha nehlabathi elitsha.’ Umpostile uPetros wasebenzisa eso sibhalo xa wayechaza okuya kwenzeka emva kwemini kaYehova. (Isaya 65:17, 18; 2 Petros 3:10-13) UPetros wayebonisa ukuba izinto ezachazwa nguIsaya ziya kwenzeka ngokwenene xa ‘ihlabathi elitsha’ lifikile. Oko kuquka inkcazelo osenokuba uyiqhelile—ukwakha izindlu nokuhlala kuzo; ukutyala izidiliya nokudla iziqhamo zazo; ukunandipha ukusebenza ngezandla zakho; ukuhlala kwengcuka nemvana ndawonye; nokuba kungabikho nto yonakaliswayo emhlabeni wonke. Ngamanye amazwi, ubomi obude, amakhaya anqabisekileyo, ukutya okuyintabalala, umsebenzi owanelisayo noxolo phakathi kwezilwanyana naphakathi kwezilwanyana nabantu.
22, 23. Ziziphi izizathu zokuvuya eziya kubakho ngokuzaliseka kukaIsaya 35 kwakhona?
22 Ngaba elo themba alikwenzi uzale luvuyo? Lifanele lenjenjalo, kuba uThixo wasidalela ukuba siphile ngolo hlobo. (Genesis 2:7-9) Ngoko, linayiphi intsingiselo elo themba ngokuphathelele isiprofeto esikuIsaya isahluko 35 esixubusha ngaso? Lisinika isizathu esithe chatha sokumemelela ngovuyo. Iinkqantosi nemiqwebedu yokoqobo iya kutyatyamba, isenze sivuye. Yaye abantu abaziimfama, abanamehlo aluhlaza okanye amdaka, okanye aneminye imibala emihle, baya kubona kwakhona. Amanye amaKristu esikhonza nawo azizithulu, okanye kwanabo kuthi bangeva kakuhle, baya kukwazi ukuva kakuhle. Hayi indlela ekuvuyisa ngayo ukusebenzisa eso siphiwo ukuphulaphula iLizwi likaThixo lifundwa yaye licaciswa, nokuphulaphula ukurhashaza kwemithi, ukuhleka komntwana nentsholo yeentaka!
23 Kwakhona kuya kuthetha ukuba iziqhwala, kuquka nabo banesifo samathambo, baya kuqhathula. Esinjani sona isiqabu! Kuya kubaleka imifula yokoqobo entlango. Siya kuwabona amanzi enkcenkceza size siwaphulaphule empompoza. Siya kube sihambahamba apho kwingca eluhlaza naphakathi kwemizi. Iya kuba yiParadisi ebuyiselweyo ngokwenene. Kuthekani ngovuyo lokuhlala nengonyama okanye esinye isilwanyana esifana nayo ungoyiki? Akuyomfuneko ukuba sityatyadule sichaza oko, kuba sonke sikhe sacinga ngako oku.
24. Kutheni unokuvumelana namazwi akuIsaya 35:10?
24 UIsaya usiqinisekisa ngelithi: “Abakhululwa bakaYehova babuye beze eZiyon bememelela; benovuyo olungunaphakade phezu kweentloko zabo.” Ngoko sinokuvuma ukuba sinesizathu sokumemelela ngovuyo. Sinovuyo ngenxa yoko uYehova akwenzela abantu bakhe ngoku kwiparadisi yethu yokomoya, novuyo ngenxa yoko sinokukulindela kwiParadisi yokoqobo esemnyango. Ngokuphathelele abo banovuyo—okanye thina—uIsaya ubhala oku: “Baya kufumana imihlali nemivuyo, sisabe isingqala nosizi.”—Isaya 35:10.
Ngaba Uphawulile?
◻ UIsaya isahluko 35 uzaliseke ngaluphi uhlobo okwesibini?
◻ Yintoni efanayo ngokomoya neenguqulelo ezingummangaliso awaprofeta ngazo uIsaya?
◻ Ube nesabelo njani ekuzalisekeni kwesi siprofeto?
◻ Kutheni sinokuthi uIsaya isahluko 35 usenza sibe nethemba ngekamva?
[Umfanekiso okwiphepha 15]
Intolongo iRaymond Street yaseBrooklyn, eNew York ababevalelwe kuyo abazalwana abasixhenxe abaphambili ngoJuni 1918
[Umfanekiso okwiphepha 16]
Nangona wayenorhatyazo ebudaleni bakhe, iliso lokomoya likaMzalwan’ uFranz lahlala libukhali
[Imifanekiso ekwiphepha 17]
Ukukhula nenkqubela yokomoya kubangela uvuyo