Alondolozwa Ngoyena Mhlobo Wawo Mkhulu

KUKHO obunye ubuhlobo obuwalondoloza ngokukhethekileyo amaNgqina kaYehova. Lulwalamano lwawo oluxabisekileyo noyena Mhlobo wawo mkhulu, uYehova uThixo. (Thelekisa uYakobi 2:23.) Uyawaxhasa ebudeni bovavanyo olukhulu lokholo lwawo.

Ingxelo yokugcin’ ingqibelelo kwamaNgqina phantsi kwabalawuli abangoozwilakhe iye yanconywa ngabantu abaninzi. Omnye wabo nguJiří Krupička, ugqirha wentandabulumko nenzululwazi yemvelo owafuduka eCzechoslovakia ngowe-1968 emva kokuchitha iminyaka emininzi kwiinkampu zoxinaniso zamaKomanisi. Kwincwadi yakhe ethi Renesance rozumu (Ukuvuselelwa Kolwazi), ugqabaza ngokubandezeleka nokungaxengaxengi kwamaNgqina awayevalelwe entolongweni ngenxa yobundilele.

Phantsi korhulumente wamaKomanisi, amaNgqina amaninzi avalelwa ezintolongweni ngenxa yokholo lwawo. Nangona ayevalelwe, akazange avume ukumba iuranium eyayisetyenziselwa iinjongo zemfazwe. (Isaya 2:4) UKrupička ubalisa ngento awayibonayo komnye waloo migodi ngowe-1952. Wabona abantu ababini bemi ngathi yimifanekiso eqingqiweyo egqunywe ngumkhenkce kwimozulu eyayiqhaqhazelisa amazinyo yasebusika. Iintloko nemizimba yabo engasentla yayigqunywe yimigqomo yentsimbi.

UKrupička uyabhala: “Babemi apho ukususela ngenj’ ixukuxa benxibe amadlavu asentolongweni. Babekwazi njani ukuma ixesha elide kangako ngaloo milenze yomileyo yingqele? Ngamandla okholo. Loo migqomo yayimidala yaye inomhlwa. Isikhohlakali esithile sayibethelela ngamandla ezintlokweni nasemagxeni abo kangangokuba udini lwayo olubukhali lwasika ibhatyi lwaza lwaya kutsho esikhumbeni senye yala madoda, yaye igazi lalithontsiza emkhonweni webhatyi yayo.

“Umgcini-mabanjwa wemisa uluhlu lwethu phambi kwabo, yaye umphathi-mkhosi wagqugula nathi. Wathi, ukungavumi ukusebenza yimvukelo ibe wohlwaywa ngokufanelekileyo. Akukho zimvakalelo zibubuvuvu ngemfazwe nokubulala ziya kubanceda aba bachasi, ezi ntshaba zobusoshiyali.”

Umphathi-mkhosi wachola umgqala wentsimbi waza wabetha omnye waloo migqomo. Indoda eyayingaphantsi kwawo yesuka yee khithatha phantsi intloko yayo isengaphakathi kwaloo mgqomo. Okwalandelayo kubethelelekile kwinkumbulo kaKrupička.

Uthi: “Kwatsho ingoma eyayisuka ngaphakathi kuloo migqomo. Amazwi amyoli, ukusebeza bethandaza kuThixo, onokuva nayiphi na into nokuba iphi na—nomzamo wokucula ngaphakathi komgqomo omdala, onomhlwa we-uranium. Uwuva ngaphezu kwengoma eculwa kwicawa enkulu.”

NgoSeptemba 1, 1993, umsebenzi wamaNgqina kaYehova kwiCzech Republic wamkelwa ngokusemthethweni. Ngoku amaNgqina aseCzech avuyiswa kukuqhubeka nomsebenzi wawo wokufundisa wamaKristu ekhululekile. Ewe, ayakuvuyela ukuxelela abanye ngoYehova, oyena Mhlobo wawo omkhulu.

[Umfanekiso okwiphepha 7]

Abebeze endibanweni kwiCzech Republic