IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • w96 4/1 iphe. 22-26
  • “Sebenzelani, Kungekhona Ukutya Okutshabalalayo”

No video available for this selection.

Sorry, there was an error loading the video.

  • “Sebenzelani, Kungekhona Ukutya Okutshabalalayo”
  • IMboniselo Evakalisa UBukumkani BukaYehova—1996
  • Imixholwana
  • Amanqaku Afanayo
  • Umzekelo KaMama Wokuthembeka
  • Uzahlulelo Nobhaptizo
  • Ukukhonza Kwikomkhulu Lehlabathi
  • Intsapho Elukhuthazo
  • Umtshato Nentsapho
  • Ndilondolozwa Kukutya Kokomoya
  • Ukwenza Inkonzo Yexesha Elizeleyo Ibe Ngumsebenzi Wobomi
    IMboniselo Evakalisa UBukumkani BukaYehova—1989
  • Ubomi Obutyebileyo Enkonzweni KaYehova
    IMboniselo Evakalisa UBukumkani BukaYehova—2001
  • Ukufuna Kuqala Ubukumkani—Ubomi Obunqabisekileyo Nobonwabisayo
    IMboniselo Evakalisa UBukumkani BukaYehova—2003
  • Kufuneka Abasebenzi Bokuzithandela Abangakumbi Kwinkonzo YaseBheteli
    Ubulungiseleli Bethu BoBukumkani—1995
Khangela Okunye
IMboniselo Evakalisa UBukumkani BukaYehova—1996
w96 4/1 iphe. 22-26

“Sebenzelani, Kungekhona Ukutya Okutshabalalayo”

NGOKUBALISWA NGUDAVID LUNSTRUM

Mna nomninawa wam uElwood sasisebenza kwindawo ekwiimitha ezingaphezu kwezisithoba ukuphakama, sipeyinta umqondiso omtsha wesakhiwo somzi-mveliso weWatchtower. Kwiminyaka engaphezu kwama-40 kamva, usekho, ubongoza usithi: “FUNDA ILIZWI LIKATHIXO IBHAYIBHILE ENGCWELE IMIHLA NGEMIHLA.” Veki nganye, amawaka abantu ayawubona lo mqondiso njengoko ewela ngeenqwelo-mafutha kwiBrooklyn Bridge edumileyo.

IINKUMBULO zam zobuntwana ziquka usuku lokuhlamba impahla yentsapho. Ngentsimbi yesi-5:00 kusasa, uMama wayeba sele evukile, ehlamba iimpahla zentsapho yethu enkulu, yaye uTata wayelungiselela ukuya emsebenzini. Babesiba nenye yeengxubusho zabo ezishushu, uTata emi ngelokuba umntu wadaleka ngandlel’ ithile kwiminyaka ezizigidi, yaye uMama engqina ngokusuka eBhayibhileni ukuba abantu badalwa nguThixo ngokungqalileyo.

Nangona ndandineminyaka esixhenxe kuphela ubudala, ndaphawula ukuba uMama wayenyanisile. Nangona ndandimthanda uTata, ndandibona ukuba inkolelo yakhe yayinganiki themba ngekamva. Hayi indlela abenokuvuya ngayo uMama akuva ukuba kwiminyaka emininzi kamva, oonyana bakhe ababini bapeyinta umqondiso okhuthaza abantu ukuba bafunde iBhayibhile, incwadi awayeyithanda gqitha!

Kodwa ndiyangxama. Kwenzeka njani ukuba ndifumane lo msebenzi ulilungelo? Kufuneka ndibuyele emva phayaa kunyaka we-1906, kwiminyaka emithathu ngaphambi kokuba ndizalwe.

Umzekelo KaMama Wokuthembeka

Ngelo xesha uMama noTata babesandul’ ukutshata yaye behlala ententeni eArizona. UMfundi weBhayibhile, njengoko amaNgqina kaYehova ayebizwa ngolo hlobo ngoko, wafika waza wanika uMama iqela leencwadi ezazibhalwe nguCharles Taze Russell, ezinomxholo othi Studies in the Scriptures. Wahlala ubusuku bonke ezifunda yaye kungekudala waphawula ukuba leyo yayiyinyaniso awayeyifuna. Wayesitsha ziintambo elinde uTata abuye ekufuneni umsebenzi.

NoTata wayenganelisekanga koko iicawa zazikufundisa, ngoko wazamkela okwexeshana ezi nyaniso zeBhayibhile. Noko ke, kamva wahamba kolwakhe unqulo ibe wade wamchasa uMama. Kodwa akazange ayeke ukunyamekela iintswelo zokwenyama nezokomoya zabantwana bakhe.

Andinakuze ndizilibale izihlandlo uMama awayedla ngokuza ngazo kumgangatho ongaphantsi busuku ngabunye, emva kokusebenza nzima imini yonke, ukuza kusifundela indawo ethile eBhayibhileni okanye ukuza kwabelana nathi ngezinto ezithile ezixabisekileyo zokomoya. UTata wayekhuthele naye, yaye njengoko ndandisiya ndikhula, wandifundisa umsebenzi wokupeyinta. Ewe, uTata wandifundisa ukusebenza, kodwa uMama wandifundisa oko ndandimele ndikusebenzele, njengoko uYesu wayalelayo, ‘ukutya okungatshabalaliyo.’—Yohane 6:27.

Ekugqibeleni intsapho yethu yahlala kwidolophana yaseEllensburg kwilizwana laseWashington, malunga neekhilomitha ezili-180 kwimpuma Seattle. Xa saqalisa ukuya ezintlanganisweni zaBafundi beBhayibhile noMama, sasihlanganisana emakhayeni. Onke amadoda alishiya iqela lethu lesifundo xa kwagxininiswa imfuneko yokuba nesabelo kubulungiseleli bendlu ngendlu. Kodwa uMama akazange ayekelele. Oku kwandenza ndanomnqweno ohlala uhleli wokuba ndikholose ngolwalathiso lwentlangano kaYehova.

Ekugqibeleni uTata noMama baba nabantwana abasithoba. Ndazalwa ngo-Oktobha 1, 1909, ndingumntwana wabo wesithathu. Xa sisonke, saba bathandathu abaxelisa umzekelo omhle kaMama saza saba ngamaNgqina kaYehova anenzondelelo.

Uzahlulelo Nobhaptizo

Xa ndandingasekupheleni kweminyaka yeshumi elivisayo, ndazahlulela kuYehova, ndaza oku ndakufuzisela ngobhaptizo lwasemanzini ngowe-1927. Ubhaptizo lwaqhutywa eSeattle kwisakhiwo esidala esasifudula siyicawa yaseBhaptizi. Ndiyavuya kuba babelususile uphondo olutsolo lwecawa. Saphelekwa sasiwa edamini kumgangatho ongaphantsi sanikwa iingubo ezinde ezimnyama ukuba sizinxibe. Sasingathi siya emngcwabeni.

Kwiinyanga ezimbalwa kamva ndandiseSeattle kwakhona, ibe ngesi sihlandlo ndanikela ubungqina kwindlu ngendlu okokuqala. Lowo wayenikela ukhokelo wandiyalela oku, “Wena hamba kweli cala lesitrato, yaye mna ndiza kuhamba kweliya.” Phezu kwalo nje uvalo endandinalo, ndahambisa izixa ezibini zeencwadana kwelinye ibhinqa elalinobuhlobo gqitha. Ndaqhubeka nobulungiseleli bendlu ngendlu xa ndabuyela e-Ellensburg, yaye ngoku, kwiminyaka ephantse ibe ngama-70 kamva, loo nkonzo isandivuyisa.

Ukukhonza Kwikomkhulu Lehlabathi

Kungekudala emva koko, umntu othile owayekhonza kwiBheteli yaseBrooklyn, kwikomkhulu lehlabathi leWatch Tower Society, wandikhuthaza ukuba ndizenze ndifumanekele ukuya kukhonza khona. Kamsinya emva kwencoko yethu, kwavela isaziso kwiphephancwadi iMboniselo sokuba kufuneka uncedo eBheteli. Ngoko ndafaka isicelo. Andinakululibala uvuyo endaba nalo xa ndafumana isaziso sokuya kuqalisa inkonzo yaseBheteli eBrooklyn, eNew York, ngoMatshi 10, 1930. Ngaloo ndlela yaqalisa inkonzo yam yexesha elizeleyo yokusebenzela ‘ukutya okungatshabalaliyo.’

Ubani usenokucinga ukuba ngenxa yamava am okupeyinta, ndandiza kwabelwa ukuba ndiye kupeyinta into ethile. Kunoko, umsebenzi wam wokuqala yaba kukusebenza kumatshini wokuthunga iincwadana namaphephancwadi kumzi-mveliso. Nangona lo yayingumsebenzi osisizungu gqitha, ndawunandipha kangangeminyaka engaphezu kwemithandathu. Umatshini wokushicilela omkhulu werotary esasiwuthanda siwubiza ngokuba yinqanawa endala yedabi wawuvelisa iincwadana ezazithunyelwa kumgangatho wethu ongezantsi ngebhanti ehambisa izinto. Sasikunandipha ukubona ukuba sasinokuthunga iincwadana ngesantya ezaziphuma ngaso kwinqanawa yedabi.

Kamva ndasebenza kwiqela lamasebe, kuquka esasisenza iigramafoni kulo. Sasisebenzisa aba matshini ukuze sidlale izigidimi ezirekhodiweyo zeBhayibhile emizini. Igramafoni emi nkqo yenziwa yaza yaveliswa ngabasebenzi bokuzithandela kwisebe lethu. Le gramafoni yayingadlali izigidimi ezirekhodiweyo kuphela kodwa yayineendawo ezikhethekileyo zokufaka iincwadi mhlawumbi neqebengwana. Ndaba nelungelo lokubonisa indlela yokusebenzisa esi sixhobo sitsha kwindibano eyayiseDetroit, eMichigan, ngowe-1940.

Noko ke, sasingenzi oomatshini abantsonkothileyo kuphela. Sasisenza nohlengahlengiso olubalulekileyo kwizinto zokomoya. Ngokomzekelo, amaNgqina kaYehova ayedla ngokufaka isipeliti esinomnqamlezo nesithsaba. Kodwa kamva saqonda ukuba uYesu wabulawelwa esibondeni esimi nkqo, kungekhona emnqamlezweni. (IZenzo 5:30) Ngoko sayeka ukufaka ezi zipeliti. Ndafumana ilungelo lokususa izinto zokuqhobosha ezazikwezi zipeliti. Kamva loo golide yanyibilikiswa yaza yathengiswa.

Nangona sasinocwangciso oluxakekileyo lokusebenza iintsuku ezintlanu nesiqingatha ngeveki, sasibandakanyeka kubulungiseleli bamaKristu ngeempelaveki. Ngenye imini, abali-16 kuthi babanjwa baza bavalelwa entolongweni eBrooklyn. Kwakutheni? Kaloku, ngaloo mihla unqulo sasilugqala njengonqulo lobuxoki. Ngoko sasiphatha imiqondiso kwelinye icala eyayibhalwe “Unqulo Lusisibatha Nesirhintyelo” yaye kwelinye ibhalwe “Khonza UThixo NoKristu UKumkani.” Ngenxa yokuphatha le miqondiso, savalelwa entolongweni, kodwa uHayden Covington, igqwetha leWatch Tower Society, wasikhupha ngebheyile. Ngelo xesha kwakukho amatyala amaninzi abandakanya inkululeko yonqulo awayexoxwa kwiNkundla Ephakamileyo yaseUnited States, yaye kwakumnandi ukuba seBheteli nokuva iingxelo zokuqala ngoloyiso lwethu.

Ekugqibeleni ndabelwa kwimisebenzi eyayifuna amava am okupeyinta. KwiStaten Island, omnye wemimandla emihlanu yeSixeko saseNew York, sasinesikhululo sethu sikanomathotholo iWBBR. Iipali zesi sikhululo sikanomathotholo zaziphakame kangangeemitha ezingaphezu kwama-60, ibe zazineeseti ezintathu zeentambo zokuzixhasa. Ndahlala kwisitulo esinobude obuziisentimitha ezingama-90 nobubanzi obuziisentimitha ezingama-20 ngoxa omnye endandisebenza naye wayendinyusa. Ndihleli kweso situlo sincinane phezulu emoyeni, ndapeyinta iintambo zokuxhasa kunye nezo pali. Bambi baye bandibuza ukuba sasingathandazi kakhulu na ngoxa sisenza loo msebenzi!

Umsebenzi wasehlotyeni endingasayi kuze ndiwulibale yayikukuhlamba iifestile nokupeyinta iintsimbi zeefestile zezakhiwo zomzi-mveliso. Sasiwubiza ngokuba ziiholide zehlobo. Sasimisa isikefele sethu esenziwe ngamaplanga size sinyuke sisihla kweso sakhiwo sinemigangatho esibhozo, sisebenzisa isixhobo sokunyusa imithwalo ngentambo.

Intsapho Elukhuthazo

Ngowe-1932 utata wafa, ibe ndazibuza enoba ndandifanele ndibuyele ekhaya ndize ndinyamekele uMama kusini na. Ngoko ngenye imini ngaphambi kwesidlo sasemini, ndashiya umyalezo kwitafile eyintloko apho uMzalwana uRutherford, umongameli woMbutho wayehlala khona. Kuloo myalezo ndacela ukuthetha naye. Akuba evile ngexhala endandinalo yaye efumanise ukuba ndinabanakwethu noodadewethu abasahlala ekhaya, wabuza, “Ngaba uyafuna ukuhlala eBheteli uze wenze umsebenzi weNkosi?”

“Ngokuqinisekileyo ndiyafuna,” ndaphendula.

Ngoko wacebisa ukuba ndibhalele uMama ukuze ndiqonde enoba wayevumelana nesigqibo sam sokuba ndihlale. Ndakwenza oko, ibe wandiphendula evumelana ngokupheleleyo nesigqibo sam. Ndabuxabisa ngokwenene ububele necebiso likaMzalwan’ uRutherford.

Ebudeni beminyaka yam emininzi ndiseBheteli, ndandiyibhalela rhoqo intsapho yakowethu yaye ndiyikhuthaza ukuba ikhonze uYehova, kanye njengoko uMama wandikhuthazayo. UMama wafa ngoJulayi we-1937. Enjani yona impembelelo awayenayo entsatsheni yethu! Yayingumkhuluwa wam nodade wethu omdala, uPaul noEsther, nodade wethu omncinane uLois kuphela abangazange babe ngamaNgqina. Noko ke, uPaul wayewuthanda umsebenzi wethu ibe wasipha isiza esakha kuso iHolo yoBukumkani yethu yokuqala.

Ngowe-1936 udade wethu uEva waba nguvulindlela, okanye umshumayeli wexesha elizeleyo. Kwangaloo nyaka mnye watshata noRalph Thomas, ibe ngowe-1939 babelwa kumsebenzi wokuhambahamba bekhonza amabandla amaNgqina kaYehova. Kamva bafudukela eMexico, apho bachitha iminyaka engama-25 bencedisa kumsebenzi woBukumkani.

Ngowe-1939 udade wethu uAlice noFrances nabo bangenela inkonzo yobuvulindlela. Olunjani uvuyo endaba nalo ndakubona uAlice kwindibano eyayiseSt. Louis ngowe-1941 engasemva kwetafile ebonisa indlela yokusebenzisa igramafoni endandifake isandla ekuyiveliseni! Nangona uAlice kwakufuneka ngamaxesha athile abuyeke ubuvulindlela ngenxa yeembopheleleko zentsapho, wachitha iminyaka engama-40 xa iyonke kubulungiseleli bexesha elizeleyo. UFrances waya kwiSikolo seWatchtower seBhayibhile saseGiliyadi ngowe-1944 waza wakhonza njengomvangeli wasemazweni ePuerto Rico kangangexesha elithile.

UJoel noElwood, ababini abangabona bancinane entsatsheni, baba ngoovulindlela eMontana ekuqaleni kweminyaka yee-1940. UJoel uye wahlala eliNgqina elithembekileyo ibe ngoku ukhonza njengesicaka solungiselelo. UElwood wandithelela eBheteli ngowe-1944, ebangela uvuyo entliziyweni yam. Wayeneminyaka engaphantsi kwemihlanu ubudala xa ndemkayo ekhaya. Njengoko besenditshilo ngaphambilana, sasisebenza kunye ekupeyinteni umqondiso wesakhiwo somzi-mveliso, “Funda ILizwi LikaThixo IBhayibhile Engcwele Imihla Ngemihla.” Ndisoloko ndizibuza ukuba bangaphi abantu abaye bawubona lo mqondiso obukho kangangeminyaka abaye bakhuthazwa ukuba bafunde iBhayibhile.

UElwood wakhonza eBheteli de kwangowe-1956 xa watshata uEmma Flyte. Kangangeminyaka emininzi uElwood noEmma babesebenza kunye kubulungiseleli bexesha elizeleyo, bekhonza kangangexeshana eKenya, eAfrika, naseSpeyin. UElwood wafunyanwa ngumhlaza waza wafa eSpeyin ngowe-1978. UEmma ebeqhubeka nomsebenzi wobuvulindlela eSpeyin unanamhla.

Umtshato Nentsapho

NgoSeptemba we-1953, ndayishiya iBheteli ndaza ndatshata noAlice Rivera, uvulindlela owayekwiBandla iBrooklyn Center endandikulo. Ndamxelela uAlice ukuba ndandinethemba lokuphila ezulwini, kodwa sekunjalo wayenomdla wokutshata nam.—Filipi 3:14.

Emva kweminyaka engama-23 ndihlala eBheteli, yayiluhlengahlengiso olulucelo-mngeni ukuqalisa umsebenzi wokuziphilisa wokupeyinta ukuze ndixhase mna noAlice kumsebenzi wobuvulindlela. UAlice wayesoloko endixhasa, kwanaxa kwafuneka ayeke ubuvulindlela ngenxa yempilo. Ngowe-1954 sasiza kufumana izibulo lethu. Ukuzalwa kwalo akuzange kuqhubeke kakuhle, nangona unyana wethu, uJohn, wayengumqabaqaba. UAlice wopha kakhulu ebudeni bokuzala kusetyenziswa utyando kangangokuba oogqirha babecinga ukuba wayengayi kuphila. Ngaxa lithile babengakuva nokubetha kwentliziyo. Kodwa wasinda ngobo busuku yaye ethubeni wachacha ngokupheleleyo.

Emva kweminyaka embalwa, xa uyise kaAlice wafayo, safudukela kwiLong Island ukuze sihlale nonina. Ekubeni sasingenanqwelo-mafutha, ndandibetha ngezikaTshiwo okanye ndisebenzise ibhasi nololiwe ohamba ngaphantsi komhlaba. Ngaloo ndlela ndakwazi ukuqhubeka nomsebenzi wobuvulindlela kwaye ndixhasa intsapho yam. Uvuyo lobulungiseleli bexesha elizeleyo luye lwazidlula lee naziphi na izinto endiye ndazincama. Ukunceda abantu—abanjengoJoe Natale, owayeka umdlalo webaseball awayenekamva eliqaqambileyo kuwo ukuze abe liNgqina—kuye kwaba yenye yeentsikelelo ezininzi endizinandiphayo.

Ngowe-1967, njengoko iimeko zazisiya zisiba mbi kummandla waseNew York, ndagqiba kwelokuba mna, uAlice noJohn sifudukele kwidolophu endazalelwa kuyo iEllensburg. Ngoku ndikufumanisa kungumvuzo ukubona abazukulwana nabantwana babazukulwana bakamama benesabelo kubulungiseleli bexesha elizeleyo. Bambi bakhonza eBheteli. UJohn kunye nomfazi wakhe kunye nabantwana bakhonza uYehova ngokuthembeka.

Okulusizi kukuba ndalahlekelwa ngumfazi wam endimthandayo, uAlice, owafa ngowe-1989. Ukuzigcina ndixakekile kubulungiseleli bexesha elizeleyo kuye kwandinceda ukuze ndinyamezele oko kulahlekelwa. Ngoku mna nodadewethu uAlice sinandipha ubuvulindlela kunye. Hayi indlela ekukuhle ngayo ukuphinda sihlale ndawonye size sixakeke kulo msebenzi ubaluleke kangaka!

Ngentlakohlaza yowe-1994, ndatyelela eBheteli okokuqala emva kweminyaka engama-25. Olunjani uvuyo endaba nalo xa ndabona iqela labo ndandisebenza nabo kwiminyaka engaphezu kwama-40 eyadlulayo! Xa ndaya eBheteli ngowe-1930, kwakukho abangama-250 kuphela kuloo ntsapho, kodwa namhlanje intsapho yaseBheteli eBrooklyn ingaphaya kwama-3 500!

Ndilondolozwa Kukutya Kokomoya

Amaxesha amaninzi kusasa ndiye ndolule imilenze ndisihlisa uMlambo iYakima ekufutshane nekhaya lethu. Xa ndilapho ndinokuyibona iMount Rainier enkulu egqunywe likhephu enobude obuziimitha ezingama-4 300 ukuphakama. Izilwanyana zasendle zininzi. Maxa wambi ndiye ndibone ixhama, ibe ndakha ndabona ielk (ixhama elikhulu).

La maxesha azolileyo, endiba ndedwa ngawo andinika ithuba lokucamngca ngamalungiselelo amangalisayo kaYehova. Ndithandazela amandla okuqhubeka ndimkhonza ngokuthembeka uThixo wethu, uYehova. Kwakhona ndiyakuthanda nokucula ngoxa ndihamba, ngokukodwa ingoma ethi “Ukuvuyisa Intliziyo KaYehova,” enamazwi athi: “Yehova senze isifungo sokwenza ukuthanda kwakho. Size sibe nesabelo ekuvuyiseni intliziyo.”

Ndiyavuya kuba ndikhethe umsebenzi ovuyisa intliziyo kaYehova. Ndithandazela ukuba ndiqhubeke ndiwenza lo msebenzi de ndifumane umvuzo wokuya ezulwini othenjisiweyo. Umnqweno endinawo kukuba le ngxelo ingashukumisela nabanye ukuba basebenzise ubomi babo ‘ekusebenzeleni, kungekhona ukutya okutshabalalayo.’—Yohane 6:27.

[Umfanekiso okwiphepha 23]

UElwood epeyinta umqondiso othi “FUNDA ILIZWI LIKATHIXO IBHAYIBHILE ENGCWELE IMIHLA NGEMIHLA”

[Umfanekiso okwiphepha 24]

Ndikunye noGrant Suiter noJohn Kurzen, sibonisa indlela esebenza ngayo igramafoni entsha endibanweni ngowe-1940

[Umfanekiso okwiphepha 25]

Ngowe-1944 bonke abantakwethu ababesenyanisweni babekubulungiseleli bexesha elizeleyo. Ukusuka ekhohlo: UDavid, uAlice, uJoel, uEva, uElwood noFrances

[Umfanekiso okwiphepha 25]

Izalamane ezisaphilayo ukusuka ekhohlo: uAlice, uEva, uJoel, uDavid noFrances

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share