Isizathu Sokuba UThixo Alusikelele Unqulo Lokwenyaniso

“Dumisani uYa! Usindiso nozuko namandla ngakaThixo wethu, ngenxa yokuba imigwebo yakhe iyinyaniso yaye ibubulungisa.”—ISITYHILELO 19:1, 2.

1. Iya kutshatyalaliswa njani iBhabhiloni Enkulu?

“IBHABHILONI ENKULU” iwile ngokwembono kaThixo yaye ngoku ijamelene nokubhangiswa. Iziprofeto zeBhayibhile zibonisa ukuba kungekudala eli henyukazi lilunqulo lwehlabathi lonke liza kugwetywa ngezithandani zalo zobupolitika; isiphelo salo siya kufika size sidlule ngokukhawuleza. Isityhilelo sikaYesu kuYohane sasiqulethe la mazwi esiprofeto: “Ingelosi eyomeleleyo yaphakamisa ilitye elinjengelitye elikhulu lokusila yaza yaliphosa elwandle, isithi: ‘Ngaloo ndlela ngokugadlela okukhawulezileyo iBhabhiloni isixeko esikhulu iya kuphoselwa phantsi, ibe ayisayi kuze ifunyanwe kwakhona.’”—ISityhilelo 18:2, 21.

2. Abakhonzi bakaYehova baya kusabela njani ekutshatyalalisweni kweBhabhiloni?

² Abathile kwihlabathi likaSathana baya kukukhalela ukutshatyalaliswa kweBhabhiloni Enkulu kodwa ngokuqinisekileyo kungekhona abakhonzi bakaThixo, abasezulwini okanye emhlabeni. Benovuyo baya kudumisa uThixo besithi: “Dumisani uYa! Usindiso nozuko namandla ngakaThixo wethu, ngenxa yokuba imigwebo yakhe iyinyaniso yaye ibubulungisa. Kuba uye waphumeza umgwebo kwihenyukazi elikhulu elawonakalisayo umhlaba ngohenyuzo lwalo, ibe yena uliphindezelele igazi lamakhoboka akhe esandleni salo.”—ISityhilelo 18:9, 10; 19:1, 2.

Sisiphi Isiqhamo Esimele Siveliswe Lunqulo Lokwenyaniso?

3. Yiyiphi imibuzo ekufuneka iphendulwe?

³ Ekubeni unqulo lobuxoki luza kutshayelwa luphele emhlabeni, lunqulo olunjani oluya kusala? Sinokulibona njani namhlanje iqela lonqulo eliya kusinda ekutshatyalalisweni kobukhosi behlabathi bonqulo lobuxoki lukaSathana? Sisiphi isiqhamo sobulungisa esimele siveliswe lelo qela? Ubuncinane zilishumi iimpawu ezahlula unqulo lokwenyaniso lukaYehova.—Malaki 3:18; Mateyu 13:43.

4. Yiyiphi into yokuqala efunekayo kunqulo lokwenyaniso, yaye uYesu wawumisela njani umzekelo kule nkalo?

⁴ Okokuqala nokona kubalulekileyo, amaKristu okwenyaniso amele aphakamise ulongamo awafa ngenxa yalo uYesu—ulongamo lukaYise. UYesu akazange abuncamele ezobupolitika, uhlanga, isizwe, okanye ibutho loluntu ubomi bakhe. Wabeka uBukumkani bukaYise ngaphambi kwazo zonke izilangazelelo zezobupolitika nezemvukelo yamaYuda. Xa uSathana wamthembisa ngamagunya ehlabathi, wamphendula ngala mazwi: “Hamb’ umke, Sathana! Kuba kubhaliwe kwathiwa, ‘NguYehova uThixo wakho omele umnqule, yaye kukuye yedwa omele unikele inkonzo engcwele.’” Ngokusuka kwiZibhalo zesiHebhere wayesazi ukuba uYehova kuphela koMongami womhlaba uphela. Liliphi iqela lonqulo eliluxhasa ngokupheleleyo ulawulo lukaYehova kunokuxhasa iinkqubo zobupolitika zeli hlabathi?—Mateyu 4:10; INdumiso 83:18.

5. (a) Abanquli bokwenyaniso bafanele baligqale njani igama likaThixo? (b) Yintoni ebonisa ukuba amaNgqina kaYehova ayalihlonela elo gama?

⁵ Into yesibini efunekayo kukuba unqulo lokwenyaniso lumele luphakamise luze lungcwalise igama likaThixo. USomandla walityhilela abantu bakhe amaSirayeli igama lakhe elithi Yehova, (eliguqulelwe ngokuthi Yahweh kwezinye iinguqulelo zeBhayibhile), yaye lisetyenziswa izihlandlo ezingamawaka kwiZibhalo zesiHebhere. Kwanangaphambi koko, uAdam, uEva nabanye babelazi elo gama, nangona ngokufuthi babengalihloneli. (Genesis 4:1; 9:26; 22:14; Eksodus 6:2) Ngoxa abaguquleli beNgqobhoko nabamaYuda ngokufuthi bebelishenxisa igama likaThixo kwiiBhayibhile zabo, amaNgqina kaYehova aye alibuyisela kwindawo yalo yaye alinika intlonelo elifaneleyo elo gama kwiNew World Translation of the Holy Scriptures. Ayalihlonela elo gama, kanye njengokuba amaKristu okuqala ayesenjenjalo. UYakobi wathi: “USimiyon ubalise ngokucokisekileyo indlela uThixo okwesihlandlo sokuqala awayiphethulela ngayo ingqalelo yakhe ezintlangeni ukuba kuzo athabathe iqela labantu begama lakhe. Yaye amazwi abaProfeti ayavumelana noku, . . . ‘ukuze abo baseleyo ebantwini bamfune ngokunyamekileyo uYehova, ndawonye nabantu beentlanga zonke, abantu ababizwa ngegama lam, utsho uYehova, ozenzayo ezi zinto.’”—IZenzo 15:14-17; Amosi 9:11, 12.

6. (a) Yiyiphi into yesithathu efunekayo kunqulo lokwenyaniso? (b) UYesu noDaniyeli balugxininisa njani ulawulo loBukumkani? (Luka 17:20, 21)

⁶ Into yesithathu efunekayo kunqulo lokwenyaniso kukuba lufanele luphakamise uBukumkani bukaThixo njengobukuphela kwesicombululo esikhoyo nesinokuthenjwa kwiingxaki zolawulo loluntu. UYesu wabafundisa kakuhle abalandeli bakhe ukuba bakuthandazele ukufika kobo Bukumkani, ukuba kulawule uThixo emhlabeni. UDaniyeli waphefumlelwa ukuba aprofete oku ngokuphathelele imihla yokugqibela: “UThixo wamazulu uya kumisa ubukumkani obungayi konakala naphakade. . . . Buya kuzicola buzigqibe zonke ezo zikumkani [zehlabathi nezobupolitika], bona bume ngonaphakade.” Kule nkulungwane yama-20, ngoobani abazibonakalise ngekhondo labo ukuba banikele ingqalelo epheleleyo kobo Bukumkani—ngaba ziinkonzo zeBhabhiloni Enkulu okanye ngamaNgqina kaYehova?—Daniyeli 2:44; Mateyu 6:10; 24:14.

7. Abanquli bokwenyaniso bayigqala njani iBhayibhile?

⁷ Into yesine efunekayo ukuze lwamkeleke kuThixo kukuba abakhonzi bakaThixo bokwenyaniso bafanele bayigqale iBhayibhile njengeLizwi likaThixo eliphefumlelweyo. Ngoko abayi kuba yinxalenye yohlalutyo oluqatha, oluzama ukwenza iBhayibhile ibonakale njengencwadi eneempazamo ezininzi kuba besithi ibhalwe ngumntu. AmaNgqina kaYehova akholelwa ukuba iBhayibhile liLizwi likaThixo eliphefumlelweyo, kanye njengokuba uPawulos wabhalela uTimoti esithi: “Sonke iSibhalo siphefumlelwe nguThixo kwaye siyingenelo ekufundiseni, ekohlwayeni, ekubekeni izinto ngokuthe tye, ekuqeqesheleni ebulungiseni, ukuze umntu kaThixo afaneleke ngokuzeleyo, ewuxhobele ngokupheleleyo wonke umsebenzi olungileyo.”a Ngoko ke, amaNgqina kaYehova ayigqala njengokhokelo lwawo iBhayibhile, yincwadi aphila ngayo kubomi bawo bemihla ngemihla, yaye ikwangumthombo wawo wethemba ngekamva.—2 Timoti 3:16, 17.

Unqulo Lothando, Kungekhona Olwentiyo

8. Yiyiphi into yesihlanu efunekayo kunqulo lokwenyaniso?

⁸ UYesu wabahlula njani abalandeli bakhe bokwenyaniso? Impendulo yakhe isifikisa kuphawu lwesihlanu olubalulekileyo lonqulo lokwenyaniso. UYesu wathi: “Ndininika umyalelo omtsha, wokuba nithandane; kanye njengoko ndinithandileyo mna, ukuba kwanani nithandane. Ngako oku bonke baya kwazi ukuba ningabafundi bam, ukuba ninothando phakathi kwenu.” (Yohane 13:34, 35) UYesu walubonakalisa njani uthando lwakhe? Ngokunikela ngobomi bakhe njengedini lentlawulelo. (Mateyu 20:28; Yohane 3:16) Kutheni uthando lokwenene luluphawu olufunekayo kumaKristu okwenyaniso? UYohane wachaza: “Zintanda, masiqhubeke sithandana, ngenxa yokuba uthando luvela kuThixo . . . Lowo ungathandiyo akafikelelanga ekumazini uThixo, ngenxa yokuba uThixo uluthando.”—1 Yohane 4:7, 8.

9. Ngoobani ababonakalise uthando lokwenyaniso, yaye njani?

⁹ Ngoobani namhlanje ababonakalisa uthando olunjalo, kwanaxa bejamelene nentiyo yobuhlanga neyobuzwe? Ngoobani abaluphumeleleyo uvavanyo oluqatha, de kuse ekufeni, ukuze uthando lwabo luhlale luhleli? Ngaba sinokuthi ngabefundisi noonongendi bamaKatolika abakuvumayo ukuba nabo banetyala ngokubulawa kwabantu eRwanda ngowe-1994? Ngaba ngamaOthodoki aseSerbia okanye amaKatolika aseCroatia aye abandakanyeka “ekutshayelweni kohlanga” nakwezinye izenzo ezingezizo ezobuKristu kuloo mfazwe yamakhaya ikumazwe akwiiBalkan? Okanye ngaba ngabefundisi bamaKatolika okanye bamaProtestanti abebephembelela ikhethe nentiyo eMantla Ireland kumashumi eminyaka eyadlulayo? Ngokuqinisekileyo amaNgqina kaYehova akanakutyholwa ngokuba nenxaxheba kwiimbambano ezinjalo. Aye abandezeleka ezintolongweni nakwiinkampu zoxinaniso, de abulawa, kunokuba atyeshele uthando lwawo njengamaKristu.—Yohane 15:17.

10. Kutheni amaKristu okwenyaniso elondoloza ubundilele?

¹⁰ Into yesithandathu efunekayo ukuze unqulo lwamkeleke kuThixo bubundilele kwimicimbi yezobupolitika yeli hlabathi. Kutheni amaKristu efanele ahlale engoondilele kwezobupolitika? UPawulos, uYakobi noYohane basinika izizathu ezininzi kulo mba. Umpostile uPawulos wabhala esithi uSathana ‘nguthixo wale nkqubo yezinto,’ omfamekisa iingqondo zabangakholwayo ngayo nantoni na, kuquka nezobupolitika eziphelisa umanyano. Umfundi uYakobi wathi “ubuhlobo kunye nehlabathi bubutshaba kunye noThixo,” yaye umpostile uYohane wathi “ihlabathi liphela lilele emandleni alowo ungendawo.” Ngoko ke, umKristu wokwenyaniso akanakulalanisa kuzinikelo lwakhe kuThixo ngokuzibandakanya kwezobupolitika nakulawulo lwehlabathi likaSathana elonakeleyo.—2 Korinte 4:4; Yakobi 4:4; 1 Yohane 5:19.

11. (a) AmaKristu ayigqala njani imfazwe? (b) Oku kuma kusekelwe phi eZibhalweni? (2 Korinte 10:3-5)

¹¹ Ngokusuka kwizinto ezifunekayo ezimbini zokugqibela, eyesixhenxe ecacileyo yeyokuba, abanquli bokwenyaniso abangamaKristu abafanele babe nenxaxheba kwiimfazwe. Ekubeni unqulo lokwenyaniso luyilwe bubuzalwana bazwenibanzi obusekelwe eluthandweni, ngoko ayikho into enokwahlula okanye iphelise olo “manyano lwabazalwana luphela ehlabathini.” UYesu wafundisa uthando, kungekhona intiyo; uxolo, kungekhona imfazwe. (1 Petros 5:9; Mateyu 26:51, 52) Kwalowo “ungendawo,” uSathana, owenza ukuba uKayin abulale uAbheli uyaqhubeka ehlwayela intiyo phakathi koluntu yaye ebangela iimbambano nokuphalala kwegazi ngenxa yezobupolitika, unqulo nobuhlanga. AmaKristu okwenyaniso ayeka ‘ukufunda ukulwa,’ enoba uya kuba yintoni na umphumo woko. Ngokungathi kunjalo, sele ‘ewakhandile amakrele awo aba ngamakhuba, nezikhali zawo zaba zizitshetshe zeediliya.’ Avelisa isiqhamo soxolo somoya kaThixo.—1 Yohane 3:10-12; Isaya 2:2-4; Galati 5:22, 23.

UThixo Uyayisikelela Ihambo Neemfundiso Ezinyulu

12. (a) Yiyiphi into yesibhozo efunekayo, kodwa ziziphi iiyantlukwano ozibonayo elunqulweni? (b) UPawulos wayibalaselisa njani le nto yesibhozo ifunekayo?

¹² Umanyano lwamaKristu yinto yesibhozo efunekayo kunqulo lokwenyaniso. Noko ke, iinkonzo zeNgqobhoko ezingamanyananga azibanga luncedo kule nkalo. Iimvaba ezininzi ekuthiwa zinempembelelo ziye zaqhekeka zangamahlelo amaninzi ahlukahlukeneyo, yaye oko kuphumele ekudidekeni. Ngokomzekelo, unqulo lwamaBhaptizi eUnited States, oluqhekeke lwayiBhaptizi yaseMantla (American Baptist Churches eU.S.A.) neBhaptizi yaseMazantsi (Southern Baptist Convention), kwanenye inkitha yamanye amaqela angamaBhaptizi abangelwe lolo qhekeko. (World Christian Encyclopedia, iphepha 714) Ubukhulu becala ukwahlukana kuzalwa kukungavumelani ngeemfundiso okanye ulawulo lwecawa (ngokomzekelo, amaRhabe, amaEpiscopal, namaCongregational). Ukwahlukana okukwiNgqobhoko kuyafana noko kukwiinkonzo ezingekho kwiNgqobhoko—enoba bubuBhuda, ubuSilamsi okanye ubuHindu. Wawaluleka esithini umpostile uPawulos amaKristu okuqala? “Ke kaloku ndiyanibongoza, bazalwana, ngegama leNkosi yethu uYesu Kristu ukuba nifanele nonke nithethe ngokuvumelanayo, nokuba kufanele kungabikho kwahlukana phakathi kwenu, kodwa ukuba nibe nokumanyana ngokufanelekileyo engqondweni enye nasengcamangweni enye.”—1 Korinte 1:10; 2 Korinte 13:11.

13, 14. (a) Kuthetha ukuthini ‘ukuba ngcwele’? (b) Unqulo lokwenyaniso lugcinwa njani lucocekile?

¹³ Yiyiphi into yesithoba efunekayo ukuze unqulo lwamkelwe nguThixo? Umgaqo weBhayibhile okwiLevitikus 11:45 uthi: “Ize nibe ngcwele, ngokuba ndiyiNgcwele.” Umpostile uPetros wakuphinda oku xa wabhala esithi: “Ngokuvumelana naLowo uNgcwele wanibizayo, kanjalo yibani ngcwele nani kuyo yonke ihambo yenu.”—1 Petros 1:15.

¹⁴ Kuthetha ukuthini ukuthi sifanele sibe ngcwele? Kuthetha ukuba abanquli bakaYehova bafanele bacoceke ngokomoya nangokokuziphatha. (2 Petros 3:14) Abafuneki abantu abona ngabom nabangaguqukiyo, abazibonakalisa ngehambo yabo ukuba bayalicekisa idini lentlawulelo likaKristu. (Hebhere 6:4-6) UYehova ufuna ibandla lamaKristu ligcinwe licocekile yaye lingcwele. Kuphunyezwa njani oko? Ngokuyinxenye ngenyathelo lokubagweba ngokubasusa kubudlelane abo banokulingcolisa ibandla.—1 Korinte 5:9-13.

15, 16. Ziziphi iinguqulelo ezenziwe ngamaKristu amaninzi okwenyaniso ebomini bawo?

¹⁵ Ngaphambi kokwazi inyaniso yamaKristu, abaninzi babephila ubomi bokuzifica, bokuzonwabisa nobokuzingca. Kodwa iindaba ezingoKristu zabaguqula, yaye baye bazixolelwa izono zabo. UPawulos wakuvakalisa ngamandla oku xa wabhala oku: “Intoni! Anazi na ukuba abantu abangengomalungisa abayi kubudla ilifa ubukumkani bukaThixo? Ningalahlekiswa. Abahenyuzi, nabanquli-zithixo, nabakrexezi, namadoda agcinelwe iinjongo ezingezozamvelo, namadoda alala namadoda, namasela, nabantu ababawayo, namanxila, nabatshabhisi, nabaphangi abayi kubudla ilifa ubukumkani bukaThixo. Ukanti oko koko bambi kuni babekuko. Kodwa niye nahlanjwa.”—1 Korinte 6:9-11.

¹⁶ Kubonakala ukuba uYehova wamkela abo baguqukayo kwihambo yabo engekho zibhalweni, batshintshe iindlela zabo, baze babe ngabalandeli bokwenyaniso bakaKristu neemfundiso zakhe. Babathanda ngokwenene abamelwane babo njengoko bezithanda yaye oko bakubonakalisa ngeendlela ezininzi, njengokuqhubeka nobulungiseleli obudlulisela isigidimi sobomi kubo bonke abaphulaphulayo.—2 Timoti 4:5.

“Inyaniso Iya Kunikhulula”

17. Yiyiphi into yeshumi efunekayo kunqulo lokwenyaniso? Zekelisa.

¹⁷ Kukho into yeshumi ayifunayo uYehova kwabo bamnqula ngomoya nangenyaniso—imfundiso enyulu. (Yohane 4:23, 24) UYesu wathi kubalandeli bakhe: “Niya kuyazi inyaniso, ibe inyaniso iya kunikhulula.” (Yohane 8:32) Inyaniso yeBhayibhile iyasikhulula kwiimfundiso zokungahloneli Thixo, ezinjengokungafi komphefumlo, isihogo somlilo nentlambululo-miphefumlo. (INtshumayeli 9:5, 6, 10; Hezekile 18:4, 20) Iyasikhulula kwimfihlelo yeNgqobhoko ‘KaBathathu Emnye Ongcwele’ waseBhabhiloni. (Duteronomi 4:35; 6:4; 1 Korinte 15:27, 28) Ukuthobela inyaniso yeBhayibhile kwenza abantu babe nothando, inkathalo, ububele nenceba. UbuKristu bokwenyaniso abuzange bukhuthaze impindezelo, ukuncinwa kwamakholwa, njengoko wenzayo uTomás de Torquemada, okanye abaqhwayi bemfazwe abanentiyo, abanjengoopopu ababekhuthaza iiMfazwe Zomnqamlezo. Ukanti, esi sisiqhamo esiveliswe yiBhabhiloni Enkulu kwimbali yoluntu, mhlawumbi ukususela ngexesha likaNimrodi ukuza kuthi ga ngoku.—Genesis 10:8, 9.

Igama Elahlukileyo

18. (a) Ngoobani abazibonakalisayo ezi zinto zilishumi zifunekayo kunqulo lokwenyaniso yaye bakwenza njani oko? (b) Yintoni esimele siyenze ukuze sizizuze njengelifa iintsikelelo ezingaphambi kwethu?

¹⁸ Ngoobani namhlanje abazizalisekisa ngokwenene ezi zinto zilishumi zifunekayo kunqulo lokwenyaniso? Ngoobani abaziwa nabadume ngokulondoloza ingqibelelo noxolo? Ehlabathini lonke amaNgqina kaYehova aziwa ngokungabi “yonxalenye yehlabathi.” (Yohane 15:19; 17:14, 16; 18:36) Kuluzuko kubantu bakaYehova ukuthwala igama lakhe nokuba ngamaNgqina akhe, kanye njengokuba uYesu Kristu wayelingqina elithembekileyo kuYise. Silithwele elo gama lingcwele, yaye siyayiqonda imbopheleleko yokuphila ngokuvisisana nomnini walo. Yaye, njengamaNgqina akhe, elinjani ukuzuka ithemba elingaphambi kwethu! Ukuba yinxalenye yentsapho yoluntu olunentobelo nolumanyeneyo, olunqula uMongami Wendalo iphela kwiparadisi ebuyiselwe apha emhlabeni. Ukuze siyifumane loo ntsikelelo, masiqhubeke sizimisa ngakunqulo lokwenyaniso size silithwale ngeqhayiya igama elithi amaNgqina kaYehova “ngenxa yokuba imigwebo yakhe iyinyaniso yaye ibubulungisa”!—ISityhilelo 19:2; Isaya 43:10-12; Hezekile 3:11.

[Umbhalo osemazantsi]

Ubuya Kuphendula Uthini?

◻ Abakhonzi bakaYehova bakugqala njani ukutshatyalaliswa kweBhabhiloni Enkulu?

◻ Ziziphi izinto ezingundoqo kunqulo lokwenyaniso?

◻ Ikukhulula njani inyaniso?

◻ Luluphi uzuko olukhethekileyo esinalo njengamaNgqina kaYehova?

[Imifanekiso ekwiphepha 17]

AmaNgqina kaYehova ashumayela yaye afundisa iindaba ezilungileyo zoBukumkani bukaThixo

[Imifanekiso ekwiphepha 18]

AmaKristu okwenyaniso ebesoloko engoondilele kwezobupolitika nakwiimfazwe zehlabathi

[Inkcazelo]

Airplane: Courtesy of the Ministry of Defense, London