Imibuzo Evela Kubafundi

UYesu wathi: “Ukuba nithi nixolele izono zabo nabaphi na abantu, zihlala bezixolelwe; ukuba nithi nigcine ezo zabo nabaphi na abantu, zihlala zigciniwe.” Ngaba la mazwi athetha ukuthi amaKristu anokuzixolela izono?

Abukho ubungqina obungokweZibhalo obubonisa ukuba onke amaKristu, okanye kwanabadala abamiselweyo emabandleni, anegunya elingokobuthixo lokuxolela izono. Sekunjalo, okwathethwa nguYesu kubafundi bakhe kuYohane 20:23, ocatshulwe ngasentla, kubonisa ukuba uThixo wanika abapostile amandla akhethekileyo ngokuphathelele oku. Yaye okuthethwa nguYesu apho kusenokungqinelana noko wakuthetha kuMateyu 18:18 ngezigqibo zasezulwini.

AmaKristu anozikuxolela iziphoso ezithile, ngokuvisisana nesiluleko sompostile uPawulos esikweyabase-Efese 4:32: “Yibani nobubele omnye komnye, ninemfesane yofefe, nixolelana ngesisa kanye njengokuba noThixo wanixolelayo ngesisa ngaye uKristu.” UPawulos apha wayethetha ngeengxaki zobuqu phakathi kwamaKristu, ezinjengokuthetha ngokungenankathalo. Ayefanele azabalazele ukuyilungisa loo nto, exolelana. Khumbula amazwi kaYesu: “Ukuba, ngoko, uzisa isipho sakho esibingelelweni yaye ulapho ukhumbule ukuba umzalwana wakho unento nxamnye nawe, sishiye isipho sakho apho phambi kwesibingelelo, uze umke; yenza uxolo kuqala nomzalwana wakho, yaye wandule ke, wakubuya, unikele isipho sakho.”—Mateyu 5:23, 24; 1 Petros 4:8.

Noko ke, umongo kaYohane 20:23 ubonisa ukuba uYesu wayebhekisela kwizono ezinzulu ngakumbi, njengoko kubonakala kwenye into awayithetha kamva kwabo baphulaphuli bakhe bakhethekileyo. Makhe sibone isizathu soko.

Ngosuku awavuswa ngalo, uYesu wabonakala kubafundi bakhe ababesegumbini elitshixiweyo eYerusalem. Ingxelo ithi: “UYesu, ke ngoko, wathi kubo kwakhona: ‘Ngamana ningaba noxolo. Kanye njengoko uBawo eye wathumela mna, kanjalo nam ndiyanithuma.’ Kwaye emva kokutsho oku wabavuthela waza wathi kubo: ‘Yamkelani umoya oyingcwele. Ukuba nithi nixolele izono zabo nabaphi na abantu, zihlala bezixolelwe; ukuba nithi nigcine ezo zabo nabaphi na abantu, zihlala zigciniwe.’”—Yohane 20:21-23.

Kusenokwenzeka ukuba abafundi abakhankanyiweyo ngokuyintloko yayingabapostile abathembekileyo. (Thelekisa Yoh 20 indinyana 24.) Ngokubavuthela nangokuthi “Yamkelani umoya oyingcwele,” uYesu wayebenzela umqondiso wokuba kungekudala umoya oyingcwele wawuya kuthululwa phezu kwabo. UYesu wahlabela mgama esithi babeya kuba negunya lokuxolela izono. Ngokusengqiqweni, zombini ezi zinto wazithethayo zinxibelelene, enye ikhokelela kwenye.

Kwiintsuku ezingama-50 emva kokuba evusiwe, ngomhla wePentekoste, uYesu wathulula umoya oyingcwele. Kwaphumeza ntoni oko? Phakathi kwezinye izinto, abo bamkela umoya bazalwa ngokutsha njengoonyana bokomoya bakaThixo abanethemba lokulawula noKristu ezulwini. (Yohane 3:3-5; Roma 8:15-17; 2 Korinte 1:22) Kodwa oko kuthululwa komoya kwenza okungaphezulu koko. Abanye abawamkelayo baba namandla okwenza imimangaliso. Ngaloo ndlela abanye babenokuthetha iilwimi zasemzini ababengazazi. Abanye babenokuprofeta. Kanti abanye babenokuphilisa abagulayo okanye bavuse abafileyo.—1 Korinte 12:4-11.

Ekubeni amazwi kaYesu akuYohane 20:22 ayesalatha koku kuthululwa komoya oyingcwele kubapostile, amazwi anxibelelene nawo athetha ngokuxolelwa kwezono abonakala ethetha ukuba abapostile babenikwe nguThixo igunya elikhethekileyo lokuxolela nokugcina izono ngelungiselelo lomoya.—Bona IThe Watchtower, kaMatshi 1, 1949, iphepha 78.

IBhayibhile ayisiniki ngxelo ipheleleyo yazo zonke izihlandlo abathi abapostile basebenzisa eli gunya, kodwa ayiyinikeli nengxelo yazo zonke izihlandlo abathi basebenzisa ngazo isipho esingummangaliso sokuthetha ngeelwimi, ukuprofeta okanye ukuphilisa.—2 Korinte 12:12; Galati 3:5; Hebhere 2:4.

Esinye isihlandlo esasibandakanya igunya labapostile lokuxolela okanye ukugcina izono sasibandakanya uAnaniyas noSafira, abaxokisa umoya. UPetros, owamvayo uYesu xa wayethetha oku sikufunde kuYohane 20:22, 23, wambhenca uAnaniyas noSafira. UPetros waqala wathetha noAnaniyas, owafa ngoko nangoko. Xa kamva kwafika uSafira waza waqhubeka exoka, uPetros wavakalisa isigwebo sakhe. UPetros akazange asixolele isono sakhe kodwa wathi: “Khangela! Iinyawo zabo bangcwabe indoda yakho zisemnyango, yaye baya kukuthwalela ngaphandle.” Naye wafa ngoko nangoko.—IZenzo 5:1-11.

Kule meko umpostile uPetros wasebenzisa igunya elikhethekileyo lokuvakalisa ukugcinwa okuqinisekileyo kwesono, ulwazi olungummangaliso lokuba uThixo wayengayi kusixolela isono sika-Ananiyas noSafira. Kwakhona abapostile kubonakala ngathi babenengqiqo engaphaya kweyomntu kwimicimbi ababeqinisekile ukuba izono ziye zaxolelwa ngesizinzi sedini likaKristu. Ngoko ke abo bapostile babenikwe amandla ngumoya babenokuvakalisa ukuxolelwa okanye ukugcinwa kwezono.a

Oku akuthethi kuthi bonke abadala ababethanjiswe ngomoya ngoko babenelo gunya lingummangaliso. Sinokukubona oko koko kwathethwa ngumpostile uPawulos ngendoda eyayisusiwe kubudlelane kwibandla laseKorinte. UPawulos akazange athi, ‘Ndiyasixolela isono sale ndoda’ okanye athi, ‘Ndiyazi ukuba le ndoda ixolelwe ezulwini, ngoko yamkeleni kwakhona.’ Kunoko, uPawulos wabongoza lonke ibandla ukuba limxolele lo mKristu ubuyiselweyo lize libonise uthando kuye. UPawulos wongezelela esithi: “Nantoni na enimxolela yona ngobubele nabani na, nam ndenjenjalo.”—2 Korinte 2:5-11.

Yakuba ibuyiselwe ebandleni le ndoda, bonke abazalwana noodade abangamaKristu babenokuyixolela ngengqiqo yokungabi nenqala ngenxa yoko yayikwenzile. Noko ke, kuqala, yayifanele iguquke ize ibuyiselwe. Kwakunokwenzeka njani oko?

Kukho izono ezinzulu abadala bebandla abafanele bazisingathe, ezinjengokuba, ukuxoka, okanye ukuziphatha vakalala. Bayazama ukubalungisa baze babaluleke abo benze ububi, babenza baguquke. Kodwa ukuba umntu othile wenza isono esinzulu engaguquki, aba badala basebenzisa ulwalathiso lukaThixo lokumsusa kubudlelane umenzi wobubi. (1 Korinte 5:1-5, 11-13) Okwathethwa nguYesu kuYohane 20:23 akusebenzi kwiimeko ezinjalo. Aba badala abanazo iziphiwo zomoya zokwenza imimangaliso, ezinjengokukwazi ukuphilisa abagulayo emzimbeni okanye ukuvusa abafileyo; ezo ziphiwo zayiphumeza injongo yazo kwinkulungwane yokuqala ibe zaphela. (1 Korinte 13:8-10) Ukongezelela koko, abadala namhlanje abanalo igunya elivela kuThixo lokuxolela izono ezinzulu ngengqiqo yokuvakalisa umenzi wesono esinzulu njengococekileyo emehlweni kaYehova. Olu hlobo lokuxolela lufanele lwenziwe ngesizinzi sedini lentlawulelo, yaye nguYehova kuphela onokuxolela ngeso sizinzi.—INdumiso 32:5; Mateyu 6:9, 12; 1 Yohane 1:9.

Njengoko kwakunjalo ngenye indoda kwiKorinte yamandulo, xa umntu owenze isono esinzulu engavumi kuguquka, ufanele asuswe kubudlelane. Ukuba kamva uyaguquka aze avelise imisebenzi ebonakalisa inguquko, uThixo unokumxolela. (IZenzo 26:20) Kwimeko enjalo, iZibhalo zinika abadala isizathu sokukholelwa ukuba uYehova ngokwenene umxolele lo menzi wobubi. Akuba ebuyiselwe loo mntu, abadala banokumnceda ngokomoya ukuba aqine elukholweni. Abanye ebandleni banokumxolela ngendlela efanayo amaKristu aseKorinte awayixolela ngayo indoda eyayisusiwe kubudlelane yaza yabuyiselwa.

Ngokusingatha imicimbi ngolu hlobo, abadala abazibekeli milinganiselo yokugweba. Basebenzisa imigaqo yeBhayibhile baze bayilandele ngokusondeleyo imilinganiselo engokweZibhalo esekwe nguYehova. Ngenxa yoko, nakuphi na ukuxolela nokungaxoleli kwabadala kuya kuvisisana namazwi kaYesu akuMateyu 18:18: “Enyanisweni ndithi kuni, Naziphi na izinto eninokuzibopha emhlabeni ziya kuba zizinto ezibotshwe ezulwini, yaye naziphi na izinto eninokuzikhulula emhlabeni ziya kuba zizinto ezikhululwe ezulwini.” Izenzo zabo ziya kubonakalisa imbono kaYehova ngemicimbi njengoko iboniswa eBhayibhileni.

Ekugqibeleni, okwathethwa nguYesu, njengoko kubhalwe kuYohane 20:23, akuphikisani nezinye iZibhalo, kodwa kubonisa ukuba abapostile babenegunya elikhethekileyo ngokuphathelele ukuxolela, ngokuvisisana nendima yabo ekhethekileyo ekusungulweni kwebandla lamaKristu.

[Umbhalo osemazantsi]