Unqabiseko Lokwenyaniso—Ngoku Nangonaphakade

ALITHANDABUZEKI elokuba uYehova uThixo unokubenza banqabiseke abantu bakhe. ‘UnguSomandla.’ (INdumiso 68:14) Igama lakhe elimahlulayo lithetha “Obangela Kubekho.” Oku kumenza abe ngokuphela kwaLowo unokoyisa nawuphi na umqobo ukuze azalisekise amadinga akhe yaye enze ukuthanda kwakhe kwindalo iphela. UThixo uthi: “Liya kuba njalo ilizwi lam eliphuma emlonyeni wam; aliyi kubuyela kum lilambatha, lingakwenzanga endikuthandayo, lingakuphumelelisanga oko ndilithumela kuko.”—Isaya 55:11.

UThixo ubenza banqabiseke abo bakholose ngaye. ILizwi lakhe liyakuqinisekisa oku. Ephefumlelwe nguThixo, uKumkani uSolomon osisilumko wathi: “Yinqaba ende eliqele igama likaYehova; ilungisa ligidimela kulo, libe sengxondeni.” Wongezelela wathi: “Okholose ngoYehova uya kuphakanyiselwa phezulu.”—IMizekeliso 18:10; 29:25.

Unqabiseko Lwabakhonzi BakaThixo

UYehova ubesoloko ebenza banqabiseke abo bakholose ngaye. Ngokomzekelo, umprofeti uYeremiya wakhuselwa nguThixo. Xa imikhosi yaseBhabhiloni yayingqinge iYerusalem ewexukileyo, kwanyanzeleka ukuba abantu “basidle isonka ngomlinganiselo.” (Hezekile 4:16) Le meko yaba mbi kangangokuba abanye abafazi bapheka baza batya abantwana babo. (IZililo 2:20; 4:10) Nangona uYeremiya wayevalelwe esitokisini ngenxa yokushumayela kwakhe ngenkalipho, uYehova waqinisekisa ukuba unikwa “intenda yesonka imihla ngemihla esitratweni saboji, sada saphela sonke isonka phakathi komzi.”—Yeremiya 37:21.

Xa iYerusalem yathinjwa ngamaBhabhiloni, uYeremiya akazange abulawe engazange asiwe eBhabhiloni njengebanjwa. Kunoko, “umthetheli wabasiki [waseBhabhiloni] wamnika umxhesho nesipho, wamndulula.”—Yeremiya 40:5.

Kwiinkulungwane kamva uYesu Kristu waqinisekisa abakhonzi bakaThixo esithi: “Ningaze nixhale nize nithi, ‘Siza kudla ntoni na?’ okanye, ‘Siza kusela ntoni na?’ okanye, ‘Siza kunxiba ntoni na?’ Kuba zonke ezi zizinto iintlanga ezizisukela ngentumekelelo. Kuba uYihlo wasemazulwini uyazi ukuba ziyimfuneko kuni zonke ezi zinto. Qhubekani, ke ngoko, nifuna kuqala ubukumkani nobulungisa bakhe, yaye zonke ezinye izinto ziya kongezelelwa kuni.”—Mateyu 6:31-33.

Ngaba oku kuthetha ukuba abakhonzi bakaYehova baya kukhuselwa nguThixo kuzo zonke iintlekele zale mihla? Hayi, akuthethi loo nto. Abathembekileyo bayehlelwa zizinto ezibuhlungu. AmaKristu okwenyaniso ayagula, atshutshiswe, abe ngamaxhoba ogonyamelo, afe kwiingozi yaye abandezeleke nangezinye iindlela.

Nangona uYehova engekabenzi banqabiseke ngokupheleleyo kwizinto ezibuhlungu, iingxelo zibonisa ukuba uyawasebenzisa amandla akhe ukuze alungiselele abakhonzi bakhe yaye abakhusele. AmaKristu akwakhuselwa kwiingxaki ezininzi ngenxa yokuba esebenzisa imigaqo yeBhayibhile ebomini bawo. (IMizekeliso 22:3) Ukongezelela koko, anandipha unqabiseko lolwalamano lwazweni banzi lwabazalwana noodade bokomoya abanothando, abancedanayo ngamaxesha obunzima. (Yohane 13:34, 35; Roma 8:28) Ngokomzekelo, esabela kwimeko elusizi yabazalwana bawo abakwiRwanda edlakazwe yimfazwe, amaNgqina kaYehova aseYurophu ngokukhawuleza athumela iitoni ezingama-65 zempahla namayeza, ukutya, nezinye izinto ezixabisa i-R5 800 000.—Thelekisa IZenzo 11:28, 29.

Nangona uYehova ezivumela iimvavanyo ukuba ziwafikele amaKristu okwenyaniso, aqinisekile ukuba uya kuwanika amandla, uncedo nobulumko ukuze anyamezele. Ebhalela amanye amakholwa, umpostile uPawulos wathi: “Akukho sihendo [silingo] sinibambileyo ngaphandle koko kuqhelekileyo ebantwini. Kodwa uThixo uthembekile, yaye akayi kuniyekela nihendwe [nilingwe] ngaphaya koko ninokukuthwala, kodwa kunye nesihendo [nesilingo] eso uya kwenza kwanendlela yokuphuma ukuze nikwazi ukusinyamezela.”—1 Korinte 10:13; The Emphatic Diaglott.

Oko UThixo Akwenzela Abantu Bakhe

Namhlanje, izigidi zabantu ziyakuvuyela ukwenza ukuthanda kukaThixo. Azinyanzelwa ukuba zikhonze uThixo; zenjenjalo kuba zimazi yaye zimthanda. Kwelinye icala, ngenxa yokuba uYehova ebathanda abakhonzi bakhe abanyanisekileyo, injongo yakhe kukuguqula umhlaba ube yiparadisi apho uluntu oluthobelayo luya kunandipha uxolo, ukuba sempilweni nokunqabiseka ngonaphakade.—Luka 23:43.

UThixo uya kukuphumeza oku ngorhulumente wasezulwini, olawulwa nguKumkani wakhe omiselweyo, uYesu Kristu. (Daniyeli 7:13, 14) IBhayibhile ibhekisela kulo rhulumente ngokuthi ‘bubukumkani bukaThixo’ nangokuthi ‘bubukumkani bamazulu.’ (1 Korinte 15:50; Mateyu 13:44) UBukumkani bukaThixo buya kuthabathel’ indawo bonke oorhulumente babantu. Kunokuba kubekho oorhulumente abaninzi emhlabeni, kuya kubakho urhulumente omnye kuphela. Uya kulawula ngobulungisa kuwo wonke umhlaba.—INdumiso 72:7, 8; Daniyeli 2:44.

UYehova umema bonke abantu ukuba baphile phantsi kobo Bukumkani. Enye indlela akwenza ngayo oku kungokusasazwa ngokubanzi kweBhayibhile, incwadi ecacisa oko uBukumkani buya kubenzela kona abantu. IBhayibhile yeyona ncwadi isasazwa kakhulu ehlabathini, yaye ngoku ifumaneka, iphelele okanye ingaphelelanga, ngeelwimi ezingaphezu kwama-2 000.

UYehova uThixo ngothando unceda abantu ukuba baqonde oko kufundiswa yiBhayibhile ngoBukumkani. Ukwenza oku ngokuyalela nangokuthumela abantu ukuba baye kucacisa iZibhalo kwabanye. Ngoku angaphezu kwezigidi ezihlanu amaNgqina kaYehova avakalisa iindaba ezilungileyo zoBukumkani bukaThixo kumazwe angaphezu kwama-230.

Ngaba Kobakho Unqabiseko Lokwenyaniso Kubo Bonke?

Ngaba wonke ubani uya kusamkela isimemo sokuba ngumlawulwa woBukumkani bukaThixo ngokuphila ngokwemilinganiselo yakhe yobulungisa? Hayi, kuba abantu abaninzi abanamdla wakwenza ukuthanda kukaThixo. Bayayichasa imigudu yokubanceda baphucule ubomi babo. Enyanisweni, bazibonakalisa benjengabo uYesu awathetha wenjenje ngabo: “Kuba intliziyo yaba bantu iye yaba lukhuni, ibe ngeendlebe zabo baye beva abasabela, yaye baye bawavala amehlo abo; ukuze bangaze babone ngamehlo abo kwaye beve ngeendlebe zabo baze bafumane ingqiqo yako ngeentliziyo zabo baze babuye, ndize [mna Thixo] ndibaphilise.”—Mateyu 13:15.

Lunokuze lubekho njani unqabiseko lokwenyaniso emhlabeni ekubeni kukho abantu abangafuniyo ukuphila ngokuvisisana neendlela zikaThixo zobulungisa? Alunakuze lubekho. Abantu abangathobeli Thixo basisisongelo kunqabiseko lwabo bafuna ukukhonza uYehova.

UThixo akabanyanzeli abantu ukuba baguquke, yaye engayi kubunyamezela ngonaphakade ubungendawo. Nangona ngomonde uYehova eqhubeka ethumela amaNgqina akhe ukuba afundise abantu ngeendlela nangeenjongo zakhe, akayi kukwenza xesha lide oko. UYesu Kristu waxela kwangaphambili: “Ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga; kwandule ke kufike ukuphela.”—Mateyu 24:14.

Kuya kuthetha ntoni “ukuphela” kwabo bayichasayo imilinganiselo kaThixo? Kuya kuthetha ukugwetywa nokutshatyalaliswa kwabo. IBhayibhile ithetha ‘ngokuza kwempindezelo kwabo bangamaziyo uThixo nakwabo bangazithobeliyo iindaba ezilungileyo ezingeNkosi yethu uYesu. Kanye aba baya kuva isohlwayo sesigwebo sentshabalalo engunaphakade.’—2 Tesalonika 1:6-9.

Ekugqibeleni—Unqabiseko Lokwenyaniso Ngonaphakade!

Emva kokutshatyalaliswa kwabo bachasa iindlela zikaYehova zoxolo, uBukumkani bukaThixo buya kunikela ulwalathiso kwixesha elizukileyo lokunqabiseka ukuze kungenelwe abangamalungisa abasemhlabeni. (INdumiso 37:10, 11) Hayi indlela eliya kwahluka ngayo elo hlabathi litsha kweli siphila kulo namhlanje!—2 Petros 3:13.

Akuyi kubakho kulamba nandlala. Wonke ubani uya kuba nentabalala yokutya. IBhayibhile ithi ‘zonke izizwe ziya kunandipha isidlo sezinto ezityebileyo.’ (Isaya 25:6) Akusayi kubakho kunqongophala kokutya, kuba kuya kubakho “intabalala yengqolowa ezweni, ise encotsheni yeentaba.”—INdumiso 72:16.

Akusayi kubakho bantu bahlala ematyotyombeni. Phantsi kolawulo loBukumkani bukaThixo, bonke abantu baya kuba namakhaya amahle, yaye baya kutya ukutya okuveliswe ngumhlaba wabo. IBhayibhile iyathembisa: “Baya kwakha izindlu, bazihlale; batyale izidiliya, badle iziqhamo zazo.”—Isaya 65:21.

Endaweni yokunqaba kwemisebenzi okwandileyo, kuya kubakho umsebenzi onemveliso, yaye abantu baya kuyibona imiphumo emihle yawo. ILizwi likaThixo lithi: “Badle into esetyenzwe zizandla zabo abanyulwa bam. Abayi kuzixhamla ngokulambathayo.”—Isaya 65:22, 23.

Phantsi kolawulo loBukumkani, abantu abayi kubandezeleka baze bafe ngenxa yezifo. ILizwi likaThixo liyasiqinisekisa: “Akayi kuthi ummi wakhona, Ndiyafa.”—Isaya 33:24.

KwiParadisi yasemhlabeni eza kubakho kungekudala, ukubandezeleka nentlungu, usizi nokufa, ziya kushenxiswa. Ewe, kwanokufa! Abantu baya kuphila ngonaphakade eParadisi! IBhayibhile ithi uThixo “uya kuzisula zonke iinyembezi emehlweni alo, yaye ukufa akusayi kubakho, kungayi kubakho nakukhedama nasikhalo nantlungu kwakhona. Izinto zangaphambili zidlule.”—ISityhilelo 21:4.

Phantsi kolawulo lukaYesu Kristu, “uMthetheli Woxolo,” ekugqibeleni ubomi emhlabeni buya kunqabiseka ngokwenene. Eneneni, unqabiseko lwehlabathi lonke luya kubakho phantsi kolawulo lobulungisa, olunothando lorhulumente omnye—uBukumkani bukaThixo.—Isaya 9:6, 7; ISityhilelo 7:9, 17.

[Amagama acatshulweyo akwiphepha 4]

“Ukunqabiseka kwabantu kubonisa ukuba nethemba ngekamva, . . . [ukuba nethemba] lokuzinza kwemeko yezobupolitika neyoqoqosho.”—Ibhinqa elihlala eAsia

[Amagama acatshulweyo akwiphepha 5]

“Eyona nto ikwenza uzive unganqabisekanga lugonyamelo nezenzo ezibi.”—Indoda ehlala kuMzantsi Merika

[Amagama acatshulweyo akwiphepha 6]

“Andizange ndizive ndinqabisekile ebudeni . . . bohlaselo. Bangaziva njani benqabisekile abantu xa kusiliwa elizweni?”—Umfundi kwisikolo samabanga aphantsi kuMbindi Mpuma

[Amagama acatshulweyo akwiphepha 7]

“Ndiya kuziva ndinqabisekile xa ndisazi ukuba ndinokuhamba esitratweni ebusuku yaye ndingadlwengulwa.”—Intombazana ehamba isikolo yaseAfrika