Luhlobo Olunjani Lonqabiseko Olulangazelelayo?
ABANTU abahlukahlukeneyo baneengcamango ezahlukeneyo ngonqabiseko. Bambi balujonga njengenzolo phakathi kwemikhosi emibini echaseneyo. Ngokomzekelo, awona magunya anamandla ehlabathini kunye namazwe aseYurophu ancedisana nawo aye avumelana kwimilinganiselo emininzi yokunciphisa ingozi yokuba iziganeko ezincinane ziphethukele ekubeni yimfazwe yenyukliya yehlabathi lonke. IStockholm International Peace Research Institute Yearbook 1990 ivakalisa ukothuswa kukungabi namdla kwamazwe kwimilinganiselo enjalo “kweminye imimandla yehlabathi.”
Noko ke, kwizigidi zabantu eziphila kumazwe ahluphekayo, “unqabiseko” luthetha ukubonelelwa ngokutya nokunyanyekelwa kwempilo. Isazinzulu ngeepolitiki uYash Tandon sicacisa sisithi: “Xa kucingwa ‘ngoxolo nonqabiseko,’ ngokuqhelekileyo abantu bacinga ngokwesamela kwempucuko yaseNtshona. . . . ‘Unqabiseko’ lujongwa njengombandela wezixhobo nokubekwa phantsi kwazo, ebekelw’ ecaleni amaxhala okunqabiseka kwabantu abangenakutya nabangenamakhaya abangaphezu kwesiqingatha sabemi behlabathi.”
IBhayibhile, ithembisa ukuba phantsi koBukumkani bukaThixo akusayi kuphinda kubekho mfazwe. “Ulophelisa iimfazwe kude kuse eziphelweni zehlabathi; waphula isaphetha, angqumze umkhonto, atshise iinqwelo zokulwa ngomlilo.” (INdumiso 46:9; Isaya 2:4) Izigulo zomzimba ziya kuba zizinto zexesha elidlulileyo. “Akayi kuthi ummi wakhona, Ndiyafa; abantu abahleliyo khona babuxolelwe ubugwenxa babo.”—Isaya 33:24.
Phantsi kobo Bukumkani, ukunganqabiseki ngokwezoqoqosho akusayi kuphinda kusongele nabani na. “Baya kwakha izindlu, bazihlale; batyale izidiliya, badle iziqhamo zazo. Abayi kwakha, kuhlale bambi; abayi kutyala, kudle bambi.”—Isaya 65:21, 22.
Noko, okubaluleke ngakumbi kukuba, uBukumkani buya kushenxisa unozala wokungabikho koxolo nonqabiseko. Ngubani obebangela imbali ende yoluntu yoorhulumente abangaphumeleliyo nabacinezelayo? Ngoxa uThixo eye, ngezizathu ezilungileyo, wabavumela ukuba babekho, umntu obekek’ ityala nguSathana, ekubeni iBhayibhile isithi ‘ihlabathi liphela lilele emandleni akhe.’—1 Yohane 5:19, NW.
Ngoko, esinjani sona isiqabu, xa phantsi koBukumkani bukaThixo, amazwi uPawulos awawathetha kumaRoma eya kuzalisekiswa ekugqibeleni: “UThixo ke woxolo uya kumtyumza uSathana kamsinya phantsi kweenyawo zenu”! (Roma 16:20) Kuphela buBukumkani bukaThixo basemazulwini, phantsi koKumkani onguYesu Kristu, obunokufeza into enjalo. Ngenxa yoko, kuphela kuphantsi kobo Bukumkani eliya kuthi ihlabathi liguqulelwe ekubeni yiparadisi.—Genesis 1:28; Luka 23:43.
Ewe, unqabiseko oluthenjiswe eBhayibhileni lungaphaya yaye lunemiphumo emihle ngakumbi kunayo nayiphi na into ecetywe ngumntu. Ewe, sifunda ukuba ‘akusayi kuphinda kubekho kufa, kungabi sabakho nasijwili, nakukhala, nantlungu’! (ISityhilelo 21:4) Ngaba sinokuwathemba amadinga anjalo? Ewe, ngenxa yokuba avela kuMdali ongusomandla, uYehova uThixo, okwabhengeza oku: “Ilizwi lam eliphuma emlonyeni wam; aliyi kubuyela kum lilambatha, lingakwenzanga endikuthandayo, lingakuphumelelisanga oko ndilithumela kuko.” (Isaya 55:11) Kwanamanyathelo uYehova uThixo awathabathayo ngoku okuzisela uluntu uxolo, unqabiseko nempumelelo ehlala ihleli neyonwabisayo ekuthethelweni kolongamo Lwakhe lukanaphakade aphumelela ngokungathandabuzekiyo.