“Ukuthi Cwaka Kunexesha Lako, Ukuthetha Kunexesha Lako”

KUFUTHI kangakanani ukhalaza ngelithi, “Akwaba bendingawathethanga la mazwi”? Ukanti, usenokukhumbula ezinye izihlandlo ongazange uyithethe into owawufanele uyithethe. Xa ukhumbula okudlulileyo, usenokuba wacinga oku, ‘Akwaba ngendandithethe okuthile.’

IBhayibhile ithi “ukuthi cwaka kunexesha lako, ukuthetha kunexesha lako.” (INtshumayeli 3:7) Ngoko, ingxaki yile—ukwazi ixesha ofanele uthethe ngalo nofanele uthi cwaka ngalo. Ngokufuthi ukungafezeki kwethu kusiqhubela ekwenzeni nasekuthetheni izinto ngexesha elingelilo. (Roma 7:19) Sinokululawula njani ulwimi lwethu olugwenxa?—Yakobi 3:2.

Iindlela Zokuqeqesha Ulwimi

Ukuze sazi ixesha esifanele sithethe ngalo nesifanele sithi cwaka ngalo, akuyomfuneko ukuba sibe noluhlu olude olufikelela zonke iinkalo zobomi bethu. Kunoko, kufuneka sikhokelwe ziimpawu eziyinxalenye ebalulekileyo yobuntu bomKristu. Ziziphi ezo mpawu?

UYesu Kristu wathi uthando luphawu oluyintloko olulawula abafundi bakhe. Wathi: “Ngako oku bonke baya kwazi ukuba ningabafundi bam, ukuba ninothando phakathi kwenu.” (Yohane 13:35) Okukhona sibonakalisa olo thando lobuzalwana, kokukhona siya kuphucula ekulawuleni ulwimi lwethu.

Iimpawu ezimbini ezifana nolo ziya kukunceda kakhulu. Olunye lwazo kukuthobeka. Kusenza ‘sibagqale abanye njengabongamileyo kunathi.’ (Filipi 2:3) Olunye bubulali, obusenza sihlale ‘sizibambile phantsi kobubi.’ (2 Timoti 2:24, 25) UYesu Kristu wasimisela umzekelo ogqibeleleyo wendlela ezifanele zisetyenziswe ngayo ezi mpawu.

Ekubeni kunzima ngakumbi ukulawula ulwimi lwethu xa sicinezelekile, makhe sicinge ngobusuku bangaphambi kokufa kukaYesu—ixesha ‘awayekhathazeke gqitha’ ngalo. (Mateyu 26:37, 38) Akumangalisi ukuba uYesu wayevakalelwa ngolo hlobo, ekubeni ikamva likanaphakade loluntu lonke lalixhomekeke ekubeni ahlale ethembekile kuThixo.—Roma 5:19-21.

Ngokuqinisekileyo eli yayilixesha lokuba uYesu athethe noYise wasezulwini. Ngoko ke wahamba esiya kuthandaza, ecela abafundi bakhe abathathu ukuba balinde. Emva kwexesha elithile wabuya waza wafika belele. Akubabona wathi kuPetros: “Beningenako na ukulinda nam nakangangelixa elinye?” Esi siluleko sothando sasihamba namazwi awabonisa ukuba wayebuqonda ubuthathaka babo. Wathi: “Kambe ke, umoya unentumekelelo, kodwa inyama ibuthathaka.” Kamva, uYesu waphinda wabuya waza wafika abafundi belele. Wathetha nabo kakuhle waza “waya kuthandaza okwesihlandlo sesithathu.”—Mateyu 26:36-44.

Xa uYesu wafika abafundi belele nakwisihlandlo sesithathu, akazange abangxolise kodwa wathi: “Ngexesha elinjengeli nilele yaye niphumle! Khangelani! Ilixa lisondele ukuba uNyana womntu angcatshwe kwizandla zaboni.” (Mateyu 26:45) Kuphela ngumntu onentliziyo ephuphuma uthando, onomoya wobulali nothobekileyo, owayenokulisebenzisa ngaloo ndlela ulwimi lwakhe kwixesha elinzima ngolo hlobo.—Mateyu 11:29; Yohane 13:1.

Kungekudala emva koko, uYesu wabanjwa waza wasiwa ematyaleni. Apha sifunda ukuba maxa wambi kokona kulungileyo ukuthi cwaka, kwanaxa sikubulungiseleli bethu bamaKristu. Bezimisele ukumtyhola uYesu, ababingeleli abakhulu babengenamdla konke konke wokwazi inyaniso. Ngoko kuloo meko ingazinzanga, uYesu wazola.—Thelekisa uMateyu 7:6.

Noko ke, uYesu akazange ahlale ezolile xa umbingeleli omkhulu wathi: “NgoThixo ophilayo ndiyakufungisa ukuba usixelele enoba unguKristu uNyana kaThixo kusini na!” (Mateyu 26:63) Ekubeni uYesu wayefungisiwe, yayilixesha lokuba athethe. Ngoko waphendula: “Nawe ngokwakho utshilo. Kodwa ndithi kuni, Ukususela ngoku niya kumbona uNyana womntu ehleli ngakwisandla sasekunene samandla yaye esiza ngamafu ezulu.”—Mateyu 26:64.

Ebudeni bolo suku lungenakulibaleka, uYesu walulawula ngokugqibeleleyo ulwimi lwakhe. Kwimeko yakhe, uthando, ubulali nokuthobeka zaziyinxalenye yobuntu bakhe bokwemvelo. Sinokuzisebenzisa njani ezi mpawu ukulawula ulwimi lwethu xa sicinezelekile?

Ukulawula Ulwimi Xa Ucaphukile

Xa sicaphukile, ngokufuthi siye singakwazi ukululawula ulwimi lwethu. Ngokomzekelo, uPawulos noBharnabhas bakha abavisisana. “UBharnabhas wayezimisele ukuba kuthatyathwe kwanoYohane, owayebizwa ngokuba nguMarko. Kodwa uPawulos akazange acinge ukuba kufanelekile ukumthabatha lo kunye nabo, ekubeni wayemkile kubo ePamfiliya waza akahamba kunye nabo ukuya emsebenzini. Ngako oko kwabakho ukudubuleka kabukhali komsindo, kangangokuba bahlukana.”—IZenzo 15:37-39.

UMichael,a obesebenza kwimisebenzi yolwakhiwo kangangeminyaka, uyabalisa: “Elwakhiweni kwakukho umntu endandimazi kakuhle nendandimhlonela. Kodwa wayesoloko ewuhlab’ amadlala umsebenzi wam. Ndandiphazamiseka yaye ndicaphuke kodwa ndandizibamba. Ngenye imini imbiza yavuthwa xa wagxeka umsebenzi endandisandul’ ukuwenza.

“Ndawukhupha wonke umsindo endandiwufukamile. Ngenxa yomsindo endandinawo, ndandingacingi ngendlela endandizihlaza ngayo kwabo babesingqongile. Loo mini, ndandingafuni tu ukuthetha naye okanye kwaukumbona. Ndiyaqonda ngoku ukuba andizange ndiyisingathe kakuhle loo ngxaki. Ngekwakubhetele ukuba ndandithe cwaka ndize ndithethe xa uhlile umsindo.”

Okuvuyisayo kukuba, uthando lobuKristu lwabashukumisela aba babini ukuba baxolelane. UMichael uyachaza: “Emva kokuthetha ngokuphandle, saqondana ngakumbi, yaye ngoku singabahlobo abakhulu.”

Njengoko uMichael wafundayo, ukuba sicaphukile, maxa wambi kububulumko ukuthi cwaka. IMizekeliso 17:27 ithi: “Omoya upholileyo yindoda enengqondo.” Ukuqonda nothando lobuzalwana luya kusinceda sikuphephe ukuthetha izinto ezimbi. Ukuba soniwe, masithethe naloo mntu eyedwa sinomoya wobulali nowokuthobeka, sinomnqweno wokudala uxolo. Kuthekani ukuba sele ugqajukelwe ngumsindo? Ngoko uthando luya kusishukumisela ekubeni singabi nekratshi yaye ngokuthobeka sizabalazele ukulungisa izinto. Eli lixesha lokuthetha, ubonakalise ukuzisola uze umenze axole omonileyo ngokuthetha naye ngokunyanisekileyo.—Mateyu 5:23, 24.

Xa Ukuthula Kungesosicombululo

Ukuba nomsindo okanye ukucaphuka kunokusenza singathethi nomntu osicaphukisayo. Oku kunokuba yingozi. UMaríab uthi: “Ebudeni bonyaka wokuqala womtshato wethu, maxa wambi ndandiye ndingafuni ukuthetha nomyeni wam kangangeentsuku eziliqela. Ngokuqhelekileyo, oku kwakungabangelwa ziingxaki ezinkulu kodwa, kunoko, kwakungenxa yokufumba kweempazamo ezincinane. Ndazifukamela ezo mpazamo zicaphukisayo de zaba ngumqobo onjengentaba. Ngenye imini ndaphelelwa ngumonde, yaye ndasuka ndayeka ukuncokolisana nomyeni wam de umsindo waphela.”

UMaría wongezelela esithi: “Esinye isibhalo seBhayibhile—‘malingatshoni ilanga nikwimo yokucaphuka’—sandinceda ndayilungisa indlela endandicinga ngayo. Mna nomyeni wam sazabalazela ukuluphucula unxibelelwano phakathi kwethu ukuze iingxaki zingakhuli. Bekungekho lula, kodwa emva kweminyaka elishumi sitshatile, ndiyakuvuyela ukuthi amathuba okungancokolisani anqabile. Noko ke, ndimele ndivume ukuba ndisazama ukululawula olu tyekelo.”—Efese 4:26.

Njengoko uMaría wafumanisayo, xa abantu ababini bengavisisani, ukungancokolisani akusosicombululo. Phantsi kweemeko ezinjalo, ingqumbo iye ikhule, yaye ulwalamano lwabo lusenokuba sengozini. UYesu wathi sifanele ‘siyizinzise ngokukhawuleza imicimbi.’ (Mateyu 5:25) “Ilizwi elithethwe latyapha” linokusinceda ‘sisukele uxolo.’—IMizekeliso 25:11; 1 Petros 3:11.

Kwakhona sifanele sithethe phandle xa sifuna uncedo. Ukuba sibandezelekile ngenxa yengxaki ethile yokomoya, sisenokuziva simadolw’ anzima ukubathwalisa uxanduva abanye. Kodwa ukuba asithethi nabo, ingxaki isenokuba nzulu ngakumbi. Abadala abamiselweyo abangamaKristu bayasikhathalela yaye, ukuba siyabavumela, ngokungathandabuzekiyo bakulungele ukusinceda. Eli lixesha lokuba sithethe.—Yakobi 5:13-16.

Ngaphezu kwako konke oko, sifanele sithethe noYehova rhoqo ngomthandazo osuka entliziyweni, njengoko uYesu wenzayo. Ngenene, ‘masiziphalaze iintliziyo zethu’ kuBawo wethu wasezulwini.—INdumiso 62:8; thelekisa amaHebhere 5:7.

‘Ixesha Lokuthetha’ NgoBukumkani BukaThixo

Ubulungiseleli bamaKristu luthumo lobuthixo olumele luphunyezwe ngaphambi kokuba isiphelo sifike. Kunanini na ngaphambili kubalulekile ukuba abakhonzi bakaYehova bazivakalise iindaba ezilungileyo zoBukumkani. (Marko 13:10) Ngokufanayo nabapostile, amaKristu okwenyaniso ‘akanakuyeka ukuthetha ngezinto azibonileyo nazivileyo.’—IZenzo 4:20.

Kakade ke, asinguye wonke umntu ofuna ukuziva iindaba ezilungileyo. Eneneni, xa wayethuma abafundi bakhe ukuya kushumayela, uYesu wathi bafanele ‘bafune abafanelekileyo.’ Ekubeni uYehova engaze anyanzele namnye ukuba amnqule, asisayi kuqinisa imixhadi sithetha nomntu osichase ngokukrakra isigidimi soBukumkani. (Mateyu 10:11-14) Kodwa siyakuvuyela ukuthetha ngobukumkani bukaYehova kwabo ‘banotyekelo olufanelekileyo ngobomi obungunaphakade.’—IZenzo 13:48; INdumiso 145:10-13.

Uthando, ubulali nokuthobeka ziimpawu ezinokusinceda silulawule utyekelo lwethu lokungafezeki lokuthetha ngokungxama okanye ukusuka singafuni ukuthetha konke konke. Njengoko sizihlakulela ezi mpawu, siya kukufanelekela ngakumbi ukwahlula phakathi kwexesha esifanele nesingafanele sithethe ngalo.

[Imibhalo esemazantsi]

[Umfanekiso okwiphepha 23]

Iingxaki zinokuconjululwa ngonxibelelwano oluhle