UYehova Ungqineke Enam
Ngokubaliswa Ngumax Henning
Kwakungowe-1933, yaye uAdolf Hitler wayesandul’ ukuqalisa ukulawula eJamani. Noko ke, amaNgqina kaYehova amalunga nama-500 kummandla waseBerlin akazange axengaxenge. Ulutsha oluninzi lwaba ngoovulindlela, okanye abalungiseleli bexesha elizeleyo, yaye lumbi lwada lwamkela izabelo kwamanye amazwe aseYurophu. Mna nomhlobo wam uWerner Flatten sasidla ngokubuzana: “Kutheni silibele kukuthandabuza nje, sizichithela ixesha? Kutheni singabi ngoovulindlela?”
KWIINTSUKU ezisibhozo emva kokuba ndizelwe ngowe-1909, ndakhuliswa ngabazali abanothando abangengobazali bam. Ngowe-1918 intsapho yakowethu yagutyungelwa lilifu elimnyama xa udadewethu omncinane oyintombi yaba bazali wathi ngequbuliso wafa. Kungekudala emva koko aBafundi beBhayibhile, njengokuba amaNgqina kaYehova ayebizwa njalo ngelo xesha, basityelela yaye aba bazali bam bayamkela ngovuyo inyaniso yeBhayibhile. Kwakhona bandifundisa ukuzixabisa izinto zokomoya.
Ndazimisela kwimfundo yehlabathi ndaza ndaba ngumsebenzi ngemibhobho yamanzi. Kodwa okona kubalulekileyo kukuba, ndema ndiqinile ngokomoya. Mna noWerner saqalisa ukuba ngoovulindlela ngoMeyi 5, 1933. Sasidla ngokusebenzisa iibhayisikile ukuya kwidolophu emalunga neekhilomitha ezili-100 ngaphandle kweBerlin, apho sasihlala size sishumayele kangangeeveki ezimbini. Emva koko sasibuyela eBerlin ukuze sinyamekele eminye imicimbi. Emva koko sasibuyela kumhlaba wethu esishumayela kuwo kangangezinye iiveki ezimbini.
Safaka isicelo sokukhonza kwelinye ilizwe, yaye ngoDisemba 1933 safumana isabelo kwindawo ngoko eyayiyiYugoslavia. Noko ke, ngaphambi kokuba siye apho, isabelo sethu satshintshelwa eUtrecht eNetherlands. Kungekudala emva koko ndabhaptizwa. Ngaloo maxesha kwakungagxininiswa kakhulu ekubhaptizweni; eyona nto yayibalulekile yayibubulungiseleli. Ngoku ukuthembela kuYehova kwakuyeyona nto ebalulekileyo ebomini bam. Andithuthuzela gqitha amazwi omdumisi weBhayibhile athi: “Yabona, uThixo ngumncedi wam; iNkosi yam ikwabasekela umphefumlo wam.”—INdumiso 54:4.
Ukuba Nguvulindlela ENetherlands
Kungekudala emva kokuba sifikile eNetherlands, sabelwa kwakhona kwisixeko saseRotterdam. Ubawo nonyana kwintsapho esasihlala nayo babekwangoovulindlela. Kwiinyanga ezimbalwa kamva, kwathengwa indlu enkulu eLeersum, idolophu engekude eUtrecht, njengendawo yokuhlala oovulindlela yaye mna noWerner safudukela apho.
Ngoxa sasihlala kwelo khaya loovulindlela, sasihamba ngebhayisekile ukuya kwimihlaba ekufuphi yaye sasisebenzisa inqwelo-mafutha ethwala abantu abasixhenxe ukuya kwimimandla ethe qelele. Ngelo xesha, kwakukho amaNgqina alikhulu kuphela kulo lonke elaseNetherlands. Namhlanje, kwiminyaka engama-60 kamva, umhlaba esasisebenza kuwo ukusuka kwelo khaya loovulindlela unabavakalisi abangaphezu kwama-4 000 kumabandla amalunga nama-50!
Sasisebenza nzima, ukusa kwiiyure ezili-14 kubulungiseleli suku ngalunye, yaye oko kwasigcina sonwabile. Injongo yethu eyintloko yayikukuhambisa uncwadi oluninzi kangangoko kunokwenzeka. Ngokuqhelekileyo sasidla ngokuhambisa ngaphezu kweencwadana ezilikhulu ngosuku kwabanomdla. Ukwenza amabuyelo nokuqhuba izifundo zeBhayibhile ngelo xesha kwakungeyonxalenye yomsebenzi wethu esiwenza rhoqo.
Ngenye imini mna neqabane lam sasisebenza kwidolophu yaseVreeswijk. Ngoxa lalinikela ubungqina kwindoda eyayisesangweni lenqaba yomkhosi, ndalisebenzisa elo xesha ekufundeni iBhayibhile yam. Yayikrwelwe ngokucacileyo ngemibala ebomvu neluhlaza. Kamva, umchweli owayesebenza kuphahla olwalukufuphi apho wayilumkisa le ndoda ngelithi ndandikhangeleka ndiyintlola. Umphumo waba kukuba, kwangaloo mini inye ndabanjwa ngoxa ndandinikela ubungqina kunovenkile yaye iBhayibhile yam yathinjwa.
Ndasiwa enkundleni. Apho ndabekwa isityholo sokuba iimpawu eziseBhayibhileni yam zazingumgudu wokuzoba le nqaba. Ndavakaliswa ndinetyala, yaye ijaji yandigweba iminyaka emibini entolongweni. Noko ke, kwenziwa isibheno kwelo tyala yaye ndakhululwa. Hayi indlela endandikuvuyela ngayo ukukhululeka, kodwa ndavuya ngakumbi xa iBhayibhile yam nawo onke amanqaku awayekuyo abuyiselwa kum!
Ebudeni behlobo lowe-1936, mna noRichard Brauning, omnye woovulindlela ababekwelo khaya, sachitha ihlobo sishumayela kumantla elo lizwe. Kwinyanga yokuqala, sachitha iiyure ezingama-240 kubulungiseleli yaye sahambisa intaphane yoncwadi. Sasihlala ententeni yaye sasinyamekela zonke iimfuno zethu, sizihlambela impahla, siziphekela, njalo njalo.
Kamva ndatshintshelwa kwiphenyane ekuthiwa yiLightbearer, elalisaziwa ngokubanzi emantla eNetherlands. Babebahlanu oovulindlela ababehlala kwelo phenyane, yaye ukusuka kulo sasikwazi ukufikelela imihlaba emininzi ekwanti.
Amalungelo Awongezelelekileyo
Ngowe-1938, ndabelwa ukuba ndibe sisicaka secandelo, njengoko abaveleli besiphaluka bamaNgqina kaYehova babebizwa njalo ngoko. Ngoko ndayishiya iLightbearer ndaza ndaqalisa ukutyelela amabandla namaNgqina akwanti kumaphondo amathathu akumazantsi elizwe.
Ibhayisikile yayikuphela kohlobo lwesithuthi esasinaso. Kwakusoloko kuthabatha usuku lonke ukuhamba usuka kwelinye ibandla okanye iqela labanomdla ukuya kwelinye. Phakathi kwezixeko endandizityelela yayiyiBreda, apho ndihlala khona ngoku. Ngelo xesha, eBreda kwakungekho bandla ibe kwakukho nje isibini esele sikhulile esingamaNgqina.
Ngoxa sasikhonza abazalwana eLimburg, ndamenyelwa ukuba ndiphendule imibuzo emininzi eyayibuzwa ngumsebenzi wasemgodini ogama linguJohan Pieper. Wayimela ngokuqinileyo inyaniso yeBhayibhile waza waba ngumshumayeli onenkalipho. Kwiminyaka emine kamva wabanjwa wavalelwa kwinkampu yoxinaniso, apho wachitha iminyaka emithathu enesiqingatha. Emva kokuba ekhululwe waqalisa ukushumayela ngokuzimisela kwakhona, ibe nanamhlanje usengumdala othembekileyo. Ela bandla lincinane linamaNgqina ali-12 eLimburg ngoku liye lakhula laba ngamabandla ali-17 anabavakalisi abanokuba li-1 550!
Phantsi Kolawulo LwamaNazi
NgoMeyi 1940 amaNazi ahlasela iNetherlands. Ndafumana isabelo kwiofisi yesebe yeWatch Tower Society eAmsterdam. Kwakufuneka silumke gqitha ngoxa sasiqhubeka nomsebenzi wethu, okwasenza sawuxabisa umzekeliso weBhayibhile othi: “Umhlobo . . . umzalwana uzalelwe imbandezelo.” (IMizekeliso 17:17) Umanyano olwanelisayo olwakhula ebudeni belo xesha loxinezeleko lwandinceda kakhulu ndakhula ngokomoya yaye lwandixhobisela neentsuku ezinzima ngakumbi ezazingaphambili.
Isabelo sam sasikukuvelela ukuhanjiswa koncwadi emabandleni, ngokuqhelekileyo okwakusenziwa ngabathunywa. AmaGestapo ayethe gqolo efuna abafana ababeza kusebenza eJamani, ngenxa yoko sasebenzisa oodade abangamaKristu njengabathunywa. Ekuhambeni kwexesha uWilhelmina Bakker, owayesaziwa ngokuba nguNonnie, wathunyelwa esuka eThe Hague ibe ndamsa apho umveleli wesebe lethu, uArthur Winkler, wayezimele khona. Ukuzama ukungaqondwa kangangoko kunokwenzeka, ndanxiba njengomlimi ongumDatshi, izihlangu zamaplanga nezinye izinto ezazinxitywa ngamafama yaye ndamkhapha uNonnie ngenqwelo-mafutha ehamba kumgaqo kaloliwe. Kamva ndafumanisa ukuba wayengakwazi ukuzibamba yintsini, ekubeni wayevakalelwa kukuba ndandiqondakala.
Ngo-Oktobha 21, 1941, indawo yokugcina incwadi nephepha eAmsterdam yaziwa lutshaba. Ngoxa amaGestapo ayegqogqa, uWinkler noNonnie babanjwa. Xa basiwa entolongweni, beva abathunywa ababini abangamaGestapo bethetha ngendlela ebebesukela ngayo “umfana oneenwele ezimnyama” abathe balahlekana naye kwizitrato ezinenyambalala yabantu. Kwakucacile ukuba babethetha ngam, ngoko uWinkler wakwazi ukudlulisela esi sigidimi kubazalwana. Ngokukhawuleza, ndafuduselwa eThe Hague.
Ngelo xesha uNonnie wakhululwa entolongweni, yaye wabuyela eThe Hague ukuze abe nguvulindlela. Ndadibana naye apho kwakhona. Kodwa xa isicaka sebandla eRotterdam sathi sabanjwa, ndathunyelwa ukuze ndingene endaweni yaso. Kamva isicaka seBandla laseGouda sabanjwa, yaye ndafuduselwa apho ukuze ndingene endaweni yaso. Ekugqibeleni, ngoMatshi 29, 1943, ndabanjwa. Ngoxa ndandisahlola isitokhwe soncwadi lweBhayibhile, ndothuswa kukugqogqa kwamaGestapo.
Ngaphandle koncwadi lweBhayibhile olwaluzalise itafile, kwakukho noludwe lwamagama abazalwana noodade abangamaKristu, nangona ayemelwa ngoonobumba. Ndisentlungwini, ndathandazela ukuba uYehova andinike indlela yokukhusela abo babesakhululekile ukuba bangashumayela. Ndingabonwa, ndakwazi ukubeka isandla phezu kolo ludwe ndaza ndalushwabanisa. Emva koko ndacela imvume yokuya kwindlu yangasese, apho ndafika ndalukrazula olo ludwe ndaza ndalugungxulela.
Ngoxa ndandikule ngxubakaxaka, ndafunda ukufumana amandla kwiinkqubano zikaYehova nabantu bakhe kwixesha elidluleyo nakwizithembiso zakhe zokubakhulula. Esi sesinye isiqinisekiso esiphefumlelweyo ebendisoloko ndisikhumbula kakuhle: “Ukuba besingaxhaswa [nguYehova] ekuhlaselweni kwethu lutshaba, ngelusiginye sihleli.”—INdumiso 124:2, 3, TE.
Iintolongo Neenkampu Zoxinaniso
Ndasiwa kwintolongo yaseRotterdam, apho ndaba nombulelo gqitha ngokuba neBhayibhile yam. Ndandinayo nencwadi ethi Salvation, iinxalenye zencwadi ethi Children nexesha elininzi lokufunda lonke olu ncwadi. Emva kweenyanga ezintandathu ndagula ngokungaginyisi mathe yaye kwafuneka ndiye esibhedlele. Ngaphambi kokuba ndimke kuloo ntolongo, olo ncwadi ndalufihla phantsi komatrasi endandilala kuwo. Kamva ndeva ukuba elinye iNgqina, uPiet Broertjes, watshintshelwa kwisisele sam waza walufumana olo ncwadi. Ngaloo ndlela olo ncwadi lwalusasetyenziselwa ukomeleza ukholo lwabanye.
Xa ndachachayo ndatshintshelwa kwenye intolongo eThe Hague. Ngoxa ndandilapho ndadibana noLeo C. van der Tas, ofundela ubugqwetha owayesentolongweni ngenxa yokuvukela ulawulo lwamaNazi. Wayengazange eve ngamaNgqina kaYehova, yaye ndafumana ithuba lokunikela ubungqina kuye. Maxa wambi wayedla ngokundivusa ezinzulwini zobusuku aze andibuze imibuzo. Wayengakwazi ukuyifihla indlela awayewathanda ngayo amaNgqina, ingakumbi emva kokuba efumanise ukuba sasinokukhululwa ukuba sasinokutyikitya uxwebhu lokulahla ukholo lwethu. Emva kwemfazwe, uLeo waba ligqwetha yaye waxoxa amatyala amaninzi angokwasemthethweni eWatch Tower Society awayebandakanya inkululeko yonqulo.
NgoAprili 29, 1944, ndakhweliswa kuloliwe ukuze ndithabathe uhambo olungcungcuthekisayo lweentsuku ezili-18 ukuya eJamani. NgoMeyi 18 ndavalelwa kwiinkampu zoxinaniso zaseBuchenwald. Ubomi babumasikizi ngendlela engenambaliso, de sakhululwa yimikhosi eManyeneyo phantse emva konyaka. Abangamawaka bafa, uninzi lusifa sijongile. Ekubeni ndala ukusebenza kumzi-mveliso owawukufuphi apho owawuvelisa izixhobo zokulwa, kwathiwa mandisebenze kumjelo ohamba amanzi amdaka.
Ngenye imini lo mzi-mveliso waqhushumbiswa. Abaninzi babalekela kwizindlu zamajoni ukuze basinde, ngoxa abanye babebalekela emahlathini. Iibhombu ezazingagityiselwanga apho zatsho kwezo zindlu zamajoni yaye iibhombu ezitshisayo zatshisa loo mahlathi. Kwakungumbono ohambis’ umzimba! Abaninzi babesitsha behleli! Ndafumana indawo ekhuselekileyo yokuzimela, yaye xa umlilo wadambayo, ndadlula kwinkungu nelanga yezidumbu ukubuyela enkampini.
Abantu abaninzi namhlanje bayakwazi ukuba manyumnyezi kokubulawa kwabantu Ngenkohlakalo ngamaNazi. Ndiyambulela uYehova ngokundomeleza ngokwasengqondweni, kuba izinto ezimanyumnyezi endiye ndajamelana nazo azikhange ziyilawule indlela endicinga ngayo ukutyhubela iminyaka. Xa ndicinga ngexesha endandisentolongweni ngalo, eyona mvakalelo ibalaseleyo luvuyo ngenxa yokuba ndagcina ingqibelelo kuYehova ukuze kuzukiswe igama lakhe.—INdumiso 124:6-8.
Umsebenzi Wasemva Kwemfazwe
Emva kokuba ndikhululwe ndaza ndabuyela eAmsterdam, ndaya ngqo kwiofisi yesebe ukuze ndifumane isabelo. Ndandingxamele ukuva okwakwenzekile ebudeni bexesha endandingekho ngalo. UNonnie wayesele esebenza apho. Ebudeni bonyaka wokugqibela wemfazwe, wayesebenza njengomthunywa ehambisa uncwadi lweBhayibhile emabandleni. Akazange aphinde abanjwe, nangona amaxesha amaninzi wayesinda ngokulambisa.
Ndaba nguvulindlela ithutyana eHaarlem, kodwa ngowe-1946, ndacelwa ukuba ndiye kwisebe laseAmsterdam ukuya kusebenza kwiSebe Lokuthunyelwa Koncwadi. Ngasekupheleni kowe-1948, mna noNonnie satshata, yaye salishiya isebe saya kuba ngoovulindlela kunye. Isabelo sethu sobuvulindlela sasiseAssen. Kwiminyaka eli-12 ngaphambilana mna noRichard Brauning sasichithele ihlobo apho, sihlala ententeni yaye sishumayela. Ndeva ukuba uRichard wadutyulwa wafa esendleleni eya kwinkampu yoxinaniso.
Ixesha endandisentolongweni ngalo layonakalisa ngokuphawulekayo impilo yam. Kwiminyaka emithandathu emva kokuba ndikhululwe eBuchenwald, ukugula kwandigcina ebhedini kangangeenyanga ezine. Kwiminyaka kamva, ngowe-1957, ndangqulwa phantsi sisifo sephepha unyaka wonke. Umzimba waba buthathaka, kodwa umoya endandinawo wobuvulindlela wawusekho ngamandla. Ebudeni bokugula kwam, ndandixhakamfula naliphi na ithuba lokunikela ubungqina. Ndivakalelwa kukuba umoya wobuvulindlela wawuyeyona nto yayindinceda ndingavumeli imeko yokugula kwam ukuba indenze ndibe sisifede nje sendoda egulayo. Mna noNonnie sizimisele ukuqhubeka nenkonzo yexesha elizeleyo logama impilo isasivumela.
Emva kokuba ndichachile, sabelwa kwisixeko saseBreda. Kwakusemva kweminyaka engama-21 emva kokuba ndandityelele kwesi sixeko njengesicaka secandelo. Ukufika kwethu ngowe-1959, kwakukho ibandla elincinane elinamaNgqina angama-34. Namhlanje, kwiminyaka engama-37 kamva, liye landa langamabandla amathandathu anamaNgqina angaphezu kwama-500, ahlanganisana kwiiHolo zoBukumkani ezintathu! Kwiintlanganiso zethu zasekuhlaleni nakwiindibano, sibona abaninzi abafumana ulwazi lwenyaniso yeBhayibhile ngenxa yemigudu yethu. Sisoloko sivakalelwa njengompostile uYohane xa wabhala wathi: “Akukho nobangela mkhulu ngakumbi ndinaye wokuba nombulelo kunezi zinto, zokuba ndibe ndingeva ukuba abantwana bam bayaqhubeka behamba enyanisweni.”—3 Yohane 4.
Ngoku sele sikhulile. Ndineminyaka engama-86 ibe uNonnie uneminyaka engama-78 ubudala, kodwa ndimele nditsho ukuba ubuvulindlela bungumsebenzi onik’ impilo. Ukususela ekufikeni kwam eBreda, ndiye ndaloyisa uninzi lweengxaki zam zempilo endazifumana ebudeni bokuvalelwa kwam. Kwakhona ndiye ndanandipha iminyaka emininzi enemveliso enkonzweni kaYehova.
Ukukhangela emva kwiminyaka emininzi yenkonzo enesiqhamo kungumthombo wovuyo kuthi sobabini. Esikuthandazelayo imihla ngemihla kukuba uYehova asinike umoya namandla okuqhubeka enkonzweni yakhe logama nje sisadla amazimba. Ngentembelo, sivakalisa amazwi omdumisi athi: “Yabona, uThixo ngumncedi wam; iNkosi yam ikwabasekela umphefumlo wam.”—INdumiso 54:4.
[Umfanekiso okwiphepha 23]
Ndimi ecaleni kwentente esasiyisebenzisa ngoxa sasingoovulindlela ngeminyaka yee-1930
[Umfanekiso okwiphepha 23]
Iphenyane esasilisebenzisa ukufikelela umhlaba okwanti
[Umfanekiso okwiphepha 23]
Udliwano-ndlebe kucwangciso lwendibano ngowe-1957
[Umfanekiso okwiphepha 24]
Ndikunye nomfazi wam namhlanje