ILizwi LikaThixo Lenza “Imimangaliso”
NGOKUBALISWA NGUTHÉRÈSE HÉON
Ngenye imini ngowe-1965, ndangena kwindawo elishishini ndaza ndahambisa imibhalo yephephancwadi IMboniselo noVukani! kubarhwebi. Njengoko ndandijika ukuze ndihambe, ndeva isithonga. Imbumbulu yatsho ecaleni kweenyawo zam. Omnye wabarhwebi wathukisa esithi: “Le yindlela yokuqhubana namaNgqina kaYehova.”
ESO siganeko sanditsho ndabanda—kodwa asizange sindenze ndibuyeke ubulungiseleli bexesha elizeleyo. Iinyaniso zeBhayibhile endandizifundile zazibaluleke gqitha ukuba ndingavumela nantoni na indenze ndibuyeke ubulungiseleli bam. Makhe ndichaze isizathu sokuba nditsho.
Emva kokuzalwa kwam ngoJulayi 1918, abazali bam bahlala eCap-de-la-Madeleine, idolophu encinane yaseQuebec, eKhanada, eyaziwa ngokuba yiThe Place of Miracles (Indawo Yemimangaliso). Iindwendwe zazithontelana apha ukuza kubonakalisa imbeko kwitempile kaMariya Onyulu. Nangona imimangaliso ekuthiwa yenziwa nguMariya ingenakuqinisekiswa, iLizwi likaThixo liye lenza owona mmangaliso mkhulu kubomi babantu abaninzi ekubeni loo dolophana iye yakhula yaba yidolophu enabemi abangaphezulu kwama-30 000.
Xa ndandimalunga neminyaka engama-20 ubudala, utata wabona ukuba ndinomdla kwimibandela yonqulo waza wandinika iBhayibhile yakhe. Xa ndaqalisa ukuyifunda, ndothuka xa ndafunda ukuba kwiEksodus isahluko 20 unqulo lwemifanekiso lwalugxekwa ngokuphandle. Ngokukhawuleza ndaphelelwa yintembelo kwiimfundiso zeCawa yamaKatolika ndaza ndayeka ukuya kuMthendeleko. Ndandingafuni ukunqula imifanekiso eqingqiweyo. Ndisakhumbula uTata esithi, “Thérèse, akuyi ecaweni?” Ndaphendula: “Hayi, ndifunda iBhayibhile.”
Ukufunda iBhayibhile kwaba yinto ebalulekileyo ebomini bam kwanasemva kokuba nditshatile ngoSeptemba we-1938. Ekubeni umyeni wam, uRosaire, ngokufuthi wayesebenza ebusuku, ndakwenza umkhwa ukufunda iBhayibhile xa wayesemsebenzini. Kungekudala ndafikelela kwisigqibo sokuba uThixo umele ukuba unabantu bakhe, ibe ndaqalisa ukubafuna.
Ukufuna Kwam Abantu BakaThixo
Ngenxa yoko ndandikufunde ecaweni, xa ndandiselula, ndandikade ndisoyika ukulala kuba ndisoyika ukuvuka ndisesihogweni. Ukuze ndilwe nolo loyiko, ndandidla ngokuzixelela ukuba uThixo onothando wayengenakuyivumela ukuba into emanyumnyezi ngolo hlobo yenzeke. Ndaqhubeka ndifunda iBhayibhile ngozimiselo, ndifuna inyaniso. Ndandifana nethenwa elingumTiyopiya elalifunda kodwa lingakuqondi oko lalikufunda.—IZenzo 8:26-39.
Umnakwethu uAndré nomfazi wakhe, ababehlala kwigumbi elalikumgangatho ongaphantsi kowethu, baqalisa ukufundisisa iBhayibhile namaNgqina kaYehova malunga nowe-1957. Ndaxelela umkamnakwethu ukuba aze andilumkise ngokunkqonkqoza kwisilingi xa amaNgqina esiza kushumayela kweso sakhiwo. Ngaloo ndlela ndandingayi kuwavulela. Ngenye imini akazange andilumkise.
Ngaloo mini ndavula ucango ndaza ndadibana noKay Munday, uvulindlela, njengoko bebizwa njalo abalungiseleli bexesha elizeleyo bamaNgqina kaYehova. Wandixelela ngegama likaThixo, echaza ukuba uThixo unegama lobuqu, uYehova. Emva kokumka kwakhe ndahlola iBhayibhile yam ukuze ndiqiniseke ukuba oko wayekuthethile ngokwenene kwakuxhaswa ziindinyana zeBhayibhile kusini na. Uphando lwam lwandivuyisa.—Eksodus 6:3, Douay Version, umbhalo osemazantsi; Mateyu 6:9, 10; Yohane 17:6.
Xa uKay wabuyelayo, saxubusha ngemfundiso yamaKatolika kaBathathu Emnye, ethi uThixo ungabantu abathathu abanguThixo omnye. Kamva ndayihlolisisa ngenyameko iBhayibhile yam ukuze ndaneliseke kukuba ayifundisi ngoBathathu Emnye. (IZenzo 17:11) Uhlolisiso lwam lwandiqinisekisa ukuba uYesu akalingani noThixo. Wayedaliwe. Wayenesiqalo, ngoxa uYehova engenaso. (INdumiso 90:1, 2; Yohane 14:28; Kolose 1:15-17; ISityhilelo 3:14) Ndanelisekile koko ndandikufunda, ndakuvuyela ukuqhubeka neengxubusho zeBhayibhile.
Ngenye imini ngowe-1958, kwakusiwa ikhephu ngoNovemba, uKay wandimemela kwindibano yesiphaluka eyayiza kuqhutywa ngaloo ngokuhlwa kwiholo eqeshiweyo. Ndasamkela eso simemo ndaza ndalunandipha ucwangciso. Emva koko, xa ndandincokola nelinye iNgqina eleza kum, ndabuza, “Ngaba umKristu wokwenyaniso umele ashumayele kwindlu ngendlu?”
Lathi: “Ewe, iindaba ezilungileyo zimele zivakaliswe, yaye iBhayibhile ibonisa ukuba ukutyelela abantu emakhayeni abo yindlela ebalulekileyo yokushumayela.”—IZenzo 20:20.
Hayi indlela eyandichulumancisa ngayo impendulo yalo! Yandenza ndeyiseka kwelokuba ndibafumene abantu bakaThixo. Ukuba lalithe, “Hayi, akuyomfuneko,” ngendandikuthandabuzile ukuba ndandiyifumene inyaniso, kuba ndandikwazi oko iBhayibhile ikutshoyo ngokushumayela kwindlu ngendlu. Ukususela ngoko, ndakhawuleza ndenza inkqubela ngokomoya.
Emva kwaloo ndibano yesiphaluka, ndaqalisa ukuya kwiintlanganiso zamaNgqina kaYehova ezaziqhutywa kwidolophu ekufutshane iTrois-Rivières. Ngelo xesha uKay neqabane lakhe lobuvulindlela, uFlorence Bowman, babekuphela kwamaNgqina awayehlala eCap-de-la-Madeleine. Ngenye imini ndathi, “Ndiza kuya kushumayela nani ngomso.” Bakuvuyela ukuba ndibapheleke.
Ukushumayela Kwidolophu Yakokwethu
Ndandicinga ukuba wonke umntu wayeza kusamkela isigidimi seBhayibhile, kodwa kungekudala ndafumanisa ukuba akunjalo. Xa uKay noFlorence babelwa kwenye indawo, yayindim ndodwa kuloo dolophu owayeshumayela iinyaniso zeBhayibhile kwindlu ngendlu. Ndaqhubeka ndishumayela ndodwa ngenkalipho phantse iminyaka emibini de ndabhaptizwa ngoJuni 8, 1963. Ngaloo mini kanye ndabhalisa koko kwakubizwa ngokuba yinkonzo yobuvulindlela bexesha lekhefu.
Ndaqhubeka ndinguvulindlela wexesha lekhefu kangangonyaka. Emva koko, uDelvina Saint-Laurent wandithembisa ngokuza eCap-de-la-Madeleine ukuza kusebenza nam kanye ngeveki ukuba ndandibe nguvulindlela othe ngxi. Ngoko ndazalisa isicelo sam sobuvulindlela. Noko ke, okubuhlungu kukuba kwiiveki ezimbini ngaphambi kokuba ndiqalise ubulungiseleli bexesha elizeleyo, uDelvina wafa. Ndandiza kwenza ntoni? Ndandisenzile isicelo yaye ndandingafuni kurhoxa. Ngoko ngo-Oktobha 1964, ndaqalisa umsebenzi wam wobulungiseleli bexesha elizeleyo. Kwiminyaka emine eyalandelayo, ndandihamba ndedwa kwindlu ngendlu.
AmaKatolika azinikeleyo aseCap-de-la-Madeleine ngokufuthi ayenobutshaba. Amanye abiza amapolisa ezama ukundithintela ekushumayeleni. Ngenye imini, njengoko besenditshilo ekuqaleni, umrhwebi othile wazama ukundiphazamisa ngokudubula ezinyaweni zam. Oku kwaba ngundaba-mlonyeni kuloo dolophu. Isikhululo sikamabonwakude sasekuhlaleni sakubiza oku ngokuba liphulo elalinxamnye namaNgqina kaYehova. Eso siganeko saphumela ekubeni kunikelwe ubungqina obuhle. Okubangel’ umdla kukuba kwiminyaka elishumi kamva, isalamane somthengisi owayendidubule saba liNgqina naso.
“Imimangaliso” Eyenziwa LiLizwi LikaThixo
Ukutyhubela iminyaka, ndiye ndabona udonga lwenkcaso enxamnye neenyaniso zeBhayibhile lusiwa ngokuthe ngcembe eCap-de-la-Madeleine. Malunga nowe-1968, amanye amaNgqina afudukela apha, yaye abahlali baqalisa ukusabela kwiinyaniso zeBhayibhile. Ngasekuqaleni kweminyaka yee-1970, kwabakho, ngenxa yoko, ulwando olukhulu lwenani lezifundo zeBhayibhile. Laba likhulu kangangokuba kwafuneka ndicele amanye amaNgqina ukuba aqhube iqela lezifundo zeBhayibhile endandiziqhuba ukuze ndikwazi ukuqhubeka ndinesabelo kubulungiseleli bendlu ngendlu.
Ngenye imini ibhinqa eliselula lathabatha incwadi yokufundisisa iBhayibhile ethi Inyaniso Ekhokelela Kubomi Obungunaphakade. Iqabane lalo ngelo xesha lalingumfana ogama linguAndré, isikrelemnqa esasibonakala siyindlavini esathi sangenelela kuloo ncoko. Ingxubusho esaba nayo noAndré yawuvuselela umdla wakhe, yaye saqalisa isifundo seBhayibhile. Kungekudala emva koko waqalisa ukuthetha nabahlobo bakhe ngoko wayekufunda.
Ngasihlandlo sithile, ndandifundisisa iBhayibhile noonqalintloko abane, omnye wabo ongazange athethe kakhulu kodwa owayephulaphule gqitha. Igama lakhe lalinguPierre. Ngenye intsasa malunga nentsimbi yesibini, mna nomyeni wam seva kunkqonkqozwa emnyango. Khawube nombono woku kwenzekayo: Oonqalintloko abane bemi emnyango benemibuzo abafuna ndiyiphendule. Ngethamsanqa, uRosaire akazange akhalaze ngoko kutyelelwa ngequbuliso.
Ekuqaleni la madoda mane ayesiya ezintlanganisweni. Noko ke, nguAndré noPierre kuphela abazingisayo. Bavisisanisa ubomi babo nemilinganiselo kaThixo baza babhaptizwa. Sithetha nje la madoda akhonze uYehova ngokuthembeka kangangeminyaka engaphezu kwama-20. Xa aqalisa ukufundisisa, ayesaziwa ngemisebenzi yawo yolwaphulo-mthetho yaye ayebekwe esweni ngamapolisa. Maxa wambi amapolisa ayesiza kuwakhangela emva kwesinye sezifundo zethu zeBhayibhile okanye ebudeni beentlanganiso zebandla. Ndiyavuya kuba ndashumayela kuzo “zonke iintlobo zabantu,” ndaza ngaloo ndlela ndazibonela indlela iLizwi likaThixo elibangela iinguqu ezibonakala zingummangaliso ngokwenene.—1 Timoti 2:4.
Ukuba ekuqaleni kobulungiseleli bam ndandixelelwe ukuba kwakuza kubakho iHolo yoBukumkani eCap-de-la-Madeleine nokuba yayiza kuzaliswa ngabantu bakaYehova, ndandingayi kuyikholelwa loo nto. Okundivuyisayo kukuba ibandla ebelilincinane kwisixeko saseTrois-Rivières liye lakhula laba ngamabandla andayo amathandathu aqhuba iintlanganiso kwiiHolo zoBukumkani ezintathu, kuquka nelaseCap-de-la-Madeleine.
Ndiye ndavuyiswa kukunceda abantu abamalunga nama-30 ukuba bafikelele kwinqanaba lokuzahlulela nokubhaptizwa. Ngoku, ndineminyaka engama-78 ubudala, ngokwenene ndinokutsho ndithi ndiyavuya kuba ubomi bam ndabunikela kuYehova. Noko ke, ndimele ndivume ukuba ndikhe ndihlaselwe kukutyhafa. Ukuze ndiphumelele xa ndijamelene namaxesha anjalo, ngalo lonke ixesha ndivula iBhayibhile ndize ndifunde ezinye iindinyana ezindihlaziya kakhulu. Akunakwenzeka ukuba usuku ludlule ndingakhange ndifunde iLizwi likaThixo. Owona mbhalo undikhuthaza ngokukhethekileyo nguYohane 15:7, othi: “Ukuba nihlala nimanyene nam nawo amazwi am ahlale kuni, celani nakuphi na enikunqwenelayo ibe kuya kwenzeka ngenxa yenu.”
Ndinethemba lokubona uRosaire kwihlabathi elitsha elisemnyango. (2 Petros 3:13; ISityhilelo 21:3, 4) Ngaphambi nje kokufa kwakhe ngowe-1975, wayesenza inkqubela entle sele eza kubhaptizwa. Okwangoku, ndizimisele ukuzingisa kubulungiseleli bexesha elizeleyo ndize ndiqhubeke ndivuya emsebenzini kaYehova.