Ndiye Ndathembeka KuThixo Kangangeminyaka Engaphezu Kwama-70

Kubalisa uJosephine Elias

Umyeni wam wasebeza engaphaya kwezitshixo esithi: “Ungakhathazeki, enoba bayandibulala okanye bayandikhulula, ndakuhlala ndithembekile kuYehova.” Nam ndandizimisele ukuhlala ndithembekile. Nanamhl’ oku ndisavakalelwa ngaloo ndlela.

NDAZALWA ngowe-1916 eSukabumi, kwisixeko esincinane esikwiintaba ezikwiNtshona yeJava, eIndonesia. Abazali bam babezizinhanha ezingamaTshayina, ezazinendlu enkulu enabaqeshwa. Abantakwethu babebahlanu, abathathu bengaphambi kwam, ndisalekelwa ngababini. Yayindim tshuqu intombazana, yaye loo nto yandenza ndangunongayindoda. Ndandiluqabela uphahla lwendlu yaye ndiyithanda imidlalo. Kodwa, ikho into eyayindikhathaza.

Ndandiyoyika into yokutshiswa esihogweni. Ootitshalakazi bethu babedla ngokuthi amantombazana asileyo asiwa esihogweni. Yaye ngenxa yokuba ndandise oku kwam, ndandicinga ukuba ndiza kuphelela apho. Kamva, ngoxa ndandikwisikolo samabanga aphezulu saseJakarta (eyayiyiBatavia ngelo xesha) ndagula. Ugqirha wayecinga ukuba ndiza kufa, ngoko ibhinqa endandiqeshise kulo lazama ukundithuthuzela lisithi ndiza kuba sezulwini kungekudala. Noko ke, ndandixhaxha luloyiko kuba ndandizixelele ukuba ndiya ngqo esihogweni.

Umama, uKang Nio nobhuti uDodo bakhawuleza baya kundithatha eJakarta. Endleleni egodukayo, uDodo wabuza wathi, “Ngaba uyazi ukuba akukho ndawo ithetha ngesihogo eBhayibhileni?”

Ndabuza, “Wazi njani?” UMama wafunda iZibhalo ezibonisa ukuba abafileyo abazi nto yaye balindele ukuvuswa. (INtshumayeli 9:5, 10; Yohane 5:28, 29) Bathi, “Ezi zinto sizifunde kumaNgqina kaYehova.” Bandinika incwadana enomxholo othi, “Where Are the Dead? yaye ndayifunda ngoko nangoko.a Ndingekafiki nasekhaya ndathi, “Yinyaniso le!”

Ukuxelela Abanye Ngeenkolelo Zam

Ngelo xesha intsapho yakuthi yayisele ifudukele eBandung, isixeko esikhulu esikwiNtshona yeJava. Kulapho ndafika khona kwaba bhetele ukugula kwam. NgoMatshi 1937, satyelelwa nguClem Descham, iNgqina elivela Ostreliya, elalishumayela eJakarta. Ngoxa wayesityelele, mna, umama noobhuti—uFelix, uDodo, noPeng—sabonisa ukuba sizahlulele kuThixo ngokuthi sibhaptizwe. Kamva, abantakwethu abandalekelayo uHartanto, uJusak notata, uTan Gim Hok, baba ngamaNgqina.b

Emva kokuba sibhaptiziwe, saba kunye noClem kwiphulo lokushumayela iintsuku ezisithoba. Wasibonisa indlela yokushumayela ngamakhadi anesigidimi seBhayibhile esibhalwe ngeelwimi ezintathu. Kwakhona sasishumayela kwizizalwane nakubahlobo bethu. Kungekudala iqela lethu elalilincinane laseBandung laba libandla lesibini eIndonesia.

Ngasekupheleni kwaloo nyaka safudukela eJakarta ukuya kushumayela kubemi abangama-80 000 abangamaTshayina. Mna, umama noFelix sashumayela ixesha elizeleyo njengoovulindlela. Ndashumayela eBandung, eSurabaya nakwezinye iindawo. Ixesha elininzi ndandishumayela ndedwa. Ndandisemtsha, ndinamandla yaye ndikuvuyela ukukhonza uThixo. Noko ke, kwakuza kubakho imfazwe yaye ukholo lwam lwaluza kuvavanywa kungekudala.

Izilingo Ezabangelwa Yimfazwe

NgoDisemba 1941, iAsia yangena zwabha kwiMfazwe Yehlabathi II. URhulumente Womkhosi WaseJapan woyisa i-Indonesia waza wayilawula. Iincwadi zethu zeBhayibhile zavalwa yaye kwakunzima nokushumayela. Ndandiphatha ibhodi yechess xa ndisiya kumakhaya anabantu abanomdla ukuze kucingwe ukuba ndiye kudlala yona.

Ngowe-1943, ndatshata noAndré Tan, owayenguvulindlela ongoyiki ngokoyikiswa, nonelizwi elikhulu. Sasithubelezisa uncwadi lweBhayibhile kumaNgqina aseJava. Ukubhaqwa kwethu kwakuthetha ukuba siya kuthuthunjiswa size sibulawe. Sasinda cebetshu amaxesha amaninzi.

Kwathi ngenye imini sikhwele uloliwe eSukabumi, mna noAndré samiswa ngamaKempeitai, amajoni aseJapan. Ndandifake uncwadi olwalelweyo ngaphantsi kwibhegi endandiyiphethe. Elinye kula majoni labuza, “Yintoni ekuloo bhegi?”

UAndré waphendula wathi, “Yimpahla.”

Laphinda labuza, “Kukho ntoni ngaphantsi kwezo mpahla?”

“Ezinye iimpahla,” waphendula ngelitshoyo uAndré.

“Kodwa yintoni esezantsi kule bhegi?,” labuza ijoni. Ndalinda ndinyukelwe zizibilini ngoxa ndandithandaza kuYehova ngaphakathi. “Mhlawumbi ungazikhangelela,” uAndré waphendula watsho.

Elinye ijoni elalihamba neli lasifaka satshona isandla kule bhegi. Likhwaza ngenxa yeentlungu, lakhawuleza lasikhupha eso sandla. Lalihlatywe ngunotaka. Liphoxekile lakhawuleza lasiyalela ukuba sivale le bhegi size sibuyele kuloliwe.

Kanti ngesinye isihlandlo xa sasisiya eSukabumi, amaKempeitai andibona ukuba ndiliNgqina aza athi mandiye kwikomkhulu lawo elikulo ngingqi. UAndré nobhuti uFelix bahamba nam. Sisakufika apho kwaqala kwancinwa uAndré. Waphekw’ esophulwa ngemibuzo. “Angoobani amaNgqina kaYehova? Ngaba wena umchasile urhulumente waseJapan? Ngaba uyintlola?”

“Singabakhonzi bakaThixo uSomandla yaye akukho kwanto iphosakeleyo siyenzileyo,” waphendula watsho uAndré. Eli gosa lakhupha ikrele elalihlonywe edongeni laza laliphakamisela phezulu.

“Ungathini ukuba ndinokukubulala ngoku?” labuza ngomsindo. UAndré wabek’ intloko yakhe phezu kwedesika waza wathandazela ngaphakathi. Kwathi cwaka ixesha elide, kwaza kwathi gquzu intsini. “Unesibindi!” latsho eli gosa. Lamgxotha uAndré laza langenisa mna nobhuti uFelix. Lathi lakufumanisa ukuba sithetha intw’ efanayo nal’ ibithethwa nguAndré, eli gosa lakhwaza lisithi: “Anizontlola. Phumani niphel’ apha!”

Sobathathu sagoduka sichwayitile sidumisa uYehova. Sasingekazi ukuba kwakuza kuthi kungekudala sigagane nezona mvavanyo zinzima kunezi.

Ezinye Iimvavanyo Zokholo

Kwiinyanga ezalandelayo, uAndré watyholwa ‘ngabazalwana bobuxoki’ waza wavalelwa ngamaKempeitai. (2 Korinte 11:26) Ndaya kumbona entolongweni. Ndafika enqinile yaye engenamandla. Wayephila ngokutya ukutya awayekuchola kwigatha yentolongo. Amagosa entolongo akazange akwazi ukuluphelisa ukholo lwakhe. Njengoko kubonisiwe ekuqaleni wasebeza wathi: “Ungakhathazeki, enoba bayandibulala okanye bayandikhulula, ndakuhlala ndithembekile kuYehova. Baya kundikhupha apha ndisisidumbu, hayi umngcatshi.”

Emva kweenyanga ezintandathu esentolongweni, uAndré wavela phambi kweNkundla Ephakamileyo yaseJakarta. Intsapho yakowethu nabahlobo bethu bazalisa loo nkundla. Kwakukubi.

“Kutheni ungafuni ukuba kumkhosi waseJapan nje?” yabuza yatsho ijaji.

“Ndilijoni loBukumkani bukaThixo yaye ijoni alinakuba kwimikhosi emibini ngaxeshanye.” waphendula watsho uAndré.

“Ngaba ubuya kuthi abanye abantu mabangangeni emkhosini?,” yabuza ijaji.

“Hay’ ke, baya kuzikhethela bona,” watsho uAndré.

UAndré wazithethelela, ecaphula kanobom eBhayibhileni. Le jaji neyayiliSilamsi elizimiseleyo yachukumiseka kakhulu. Yathi: “Iinkolelo zethu azifani, kodwa ke andinakunyanzela mntu ukuba angathobeli isazela sakhe. Ukhululekile.”

Kwathi qabu noko kuloo nkundla, yaye nam ndavuya okomntwana. UAndré weza kum waza wandibamba ngesandla. Intsapho nabahlobo bethu bangungelana kuthi, bevuyisana nathi.

Ukushumayela Inkululeko Yokwenene

Emva kweMfazwe Yehlabathi II, kwavukelwa ulawulo lwamaDatshi eIndonesia kangangeminyaka emine. Kwabulawa amawakawaka abantu baza abaninzi bashiya iilali namakhaya abo. Abalweli benkululeko basinyanzela ukuba sikhwaze igama elithi, “Merdeka,” elithetha “Inkululeko.” Kodwa sabaxelela ukuba asithathi cala kwimiba yezopolitiko.

Phakathi kwezo zixholoxholo saphinda saqalisa ukushumayela kwindlu ngendlu. Sasebenzisa amakhadi ethu anesigidimi kunye noncwadi olwalusele ngaphambi kwemfazwe. Zathi zakudamba ezi zixholoxholo, ngoMeyi 1948, mna noAndré saphinda saba ngoovulindlela yaye yayisithi sedwa oovulindlela eIndonesia. Emva kweminyaka emithathu kwasivuyisa ukufika kwamaNgqina ali-14 eJakarta, onke evela kwiSikolo SeBhayibhile SeWatchtower SaseGiliyadi kumantla eNew York, eUnited States. Asixhobisela iimbopheleleko ezingakumbi.

NgoJuni 1952, sinoAndré samiselwa njengoovulindlela abakhethekileyo eSemarang ekumbindi weJava. Kunyaka owalandelayo nathi saba kwiklasi yama-22 yaseGliyadi. Sakuba siphumelele apho sabuyela eIndonesia saza sathunyelwa eKupang, eTimor. Kamva sathunyelwa kuMzantsi weSulawesi nakuMantla ayo. Nalapho ukholo lwethu lwavavanywa ngakumbi.

Saphinda Savalwa Umlomo

Ngowe-1965 ilinge lobhukuqo labangela ukuba kufe amakhulu amawaka abantu. Abefundisi beNgqobhoko bangena zwabha kuloo ngxwaba-ngxwaba baza batyhola amaNgqina kaYehova ngokuba ngamaKomanisi. Ngethamsanqa amagunya akazange ayikholelwe loo nto. Kodwa ke, aba befundisi abazange bayeke ukuwanyelisa amaNgqina. Ekugqibeleni ngoDisemba 25, 1976, amaNgqina kaYehova avalwa umlomo.

Emva nje kwesaziso sokuvalwa kwethu umlomo, igqwetha lesithili saseManado labizela uAndré kwiofisi yalo. “Uyayazi into yokuba amaNgqina kaYehova avalwe umlomo?” labuza.

“Ewe,” waphendula watsho uAndré.

“Ngaba ngoku uza kulutshintsha unqulo lwakho?” lambuza.

UAndré wahlalela phambili esitulweni, ezingomb’ esifubeni wathi: “Ungade ukhuphe intliziyo le yam apha esifubeni, kodwa soze undinyanzele ukuba ndilutshintshe unqulo lwam,” wakhwaza esitsho.

Lothukile eli gqwetha, labuza, “Ndibhale ndithini ke kwingxelo yam?”

“Yithi ndiseliNgqina likaYehova yaye akukho nto iphosakeleyo ndiyenzileyo,” watsho uAndré.

“Ndiza kuluthatha lonke uncwadi onalo,” latsho eli gqwetha.

Ngobo busuku, ulutsha olungamaNgqina lwathatha lonke uncwadi olwalukwikhaya lethu, lushiya iibhokisi ezingenanto. Saqhubeka sishumayela sisebenzisa iBhayibhile kuphela. Igqwetha lesithili, alizange liphinde lisikhathaze.

Ndiphile Ubomi Obunenjongo!

Kamva sinoAndré saba ngoovulindlela eSurabaya, kwisiqithi saseJava nakwesaseBangka ngakumzantsi mpuma weSumatra. Noko ke, ngowe-1982, ngenxa yempilo enkenenkene kwanyanzeleka ukuba sibuyele eJakarta. Kulapho ekwathi ngowama-2000, uAndré wasweleka eneminyaka engama-85 ubudala esenguvulindlela ozimiseleyo. Kunyaka olandela lowo, umsebenzi wethu wavulwa.

Ubomi endibuphilileyo bebunenjongo ngokwenene! Sithethanje ndineminyaka engama-93 ubudala yaye ndichithe ngaphezu kweminyaka engama-70 ndinguvulindlela. Ngowe-1937, ukubhaptizwa kwam, kwakukho amaNgqina kaYehova angama-25 kuphela eIndonesia. Namhlanje, amalunga nama-22 000. Indivuyisa gqitha into yokuba ndiye ndanegalelo kolo lwando! Kodwa kukhona ndibuqalayo ubomi. Ndifuna ukukhonza uThixo ngokuthembeka ngonaphakade.

[Imibhalo esemazantsi]

[Amagama acatshulweyo akwiphepha 13]

“Ndilijoni loBukumkani bukaThixo yaye ijoni alinakuba kwimikhosi emibini ngaxeshanye”

[Amagama acatshulweyo akwiphepha 14]

“Ungade ukhuphe intliziyo le yam apha esifubeni, kodwa soze undinyanzele ukuba ndilutshintshe unqulo lwam”

[Imaphu ekwiphepha 15]

(Ukuba ufuna inkcazelo ehlahlelwe kakuhle, yiya kwimpapasho)

Iindawo esahlala saza sashumayela kuzo

EINDONESIA

ESulawesi

EManado

ESumatra

EBangka

EJava

EJAKARTA

ESukabumi

EBandung

ESemarang

ESurabaya

ETimor

EKupang

[Umfanekiso okwiphepha 15]

Ndim noAndré ngeminyaka yee-1970

[Imifanekiso ekwiphepha 15]

Xa ndandineminyaka eli-15 incwadana ethi “Where Are the Dead?” yandenza ndanomdla kwinyaniso yeBhayibhile