Ngaba Umphefumlo Awufi?
ABAHLOBO kunye nentsapho badlula bezolile ngakwibhokisi yomngcwabo evulekileyo. Baqwalasela isidumbu senkwenkwe eneminyaka eli-17 ubudala. Abahlobo bayo basesikolweni abasakwazi kuyifanisa. Unyango lwemichiza luye lwazigqiba iinwele zayo; umhlaza uyitsho yabhitya. Ngaba ngumhlobo wabo ngokwenene lo? Kwiiveki ezimbalwa ezidlulileyo, yayineengcamango ezininzi, inemibuzo, inamandla—iphilile! Unina wale nkwenkwe uphindaphinda la mazwi elila: “UTommy wonwabile ngoku. UThixo ebefuna uTommy abe kunye naye ezulwini.”
Lo mama utyumke intliziyo ufumana ithemba nokuthuthuzeleka kwingcamango yokuba ngandlel’ ithile unyana wakhe usaphila. Ecaweni ufundiswe ukuba umphefumlo awufi, uyindawo apho ubuntu, iingcinga, neenkumbulo zikhoyo—“umntu ngokwakhe.” Ukholelwa ukuba umphefumlo wonyana wakhe awufanga kwaphela; ungumntu wokomoya ophilayo, wohlukene nomzimba wakhe xa esifa waza waya ezulwini ukuze ube kunye noThixo neengelosi.
Xa kuhle intlekele, intliziyo yomntu ibambelela kuyo nayiphi na into enika ithemba, ngoko kulula ukubona isizathu sokuba le nkolelo ibe nomtsalane gqitha. Ngokomzekelo, qwalasela indlela umfundisi wezakwalizwi uJ. Paterson-Smyth athetha ngayo kwiThe Gospel of the Hereafter: “Ukufa kuyinto encinane gqitha xa kuthelekiswa noko kulandela emva kwako—elo hlabathi limangalisa gqitha okuthi uKufa kusikhokelele kulo.”
Ehlabathini jikelele nakwiinkonzo nezizwe ezininzi, abantu bakholelwa ekubeni umntu unomphefumlo ongafiyo, umoya oqhubeka uphila emva kokufa komzimba. Le nkolelo ifumaneka phantse kuwo onke amawaka eenkonzo namahlelo eNgqobhoko. Yimfundiso esemthethweni nakubuYuda. AmaHindu akholelwa kwelokuba umntu ongaphakathi, okanye umphefumlo, wadalwa ekuqaleni, uvalelwa emzimbeni womntu xa ezalwa, yaye xa esifa uyemka uye komnye umzimba kumjikelezo oqhubekayo wokuphila kwakhona. AmaSilamsi akholelwa kwelokuba umphefumlo ungena emzimbeni uze uphile emva kokuba umzimba ufile. Ezinye iinkonzo—ezaseAfrika ezikholelwa ekubeni umphefumlo wahlukile emzimbeni, amaShinto, kwanamaBhuda ngandlel’ ithile—ziyifundisa ngeendlela ezahlukeneyo le mfundiso.
Imibuzo Enzima
Ngoxa ingcamango yomphefumlo ongafiyo inomtsalane ongenakuthelekiswa nanto nophantse ube ngowamkeleke ngokubanzi, sekunjalo iphakamisa imibuzo enzima. Ngokomzekelo, abantu bayazibuza ukuba umphefumlo womntu abamthandayo uyaphi ukuba ebengaphili ngendlela engumzekelo. Ngaba uya kuphila kwakhona sele ephila uhlobo oluthile lobomi obuphantsi? Okanye ngaba uya kwindawo yokuhlambulula imiphefumlo, apho aya kuhlanjululwa ngomlilo de akufanelekele ukuya ezulwini? Okona kubi nangakumbi, ngaba uya kuthuthunjiswa ngonaphakade kwisihogo esivuthayo? Okanye ngaba, njengoko zifundisa iicawa ezininzi ezikholelwa ekubeni umphefumlo wahlukile emzimbeni, ungumoya omelwe uxoliswe?
Iingcamango ezinjalo zibangela ulindelo olungumthwalo kwabo baphilayo. Ngaba simele siyixolise imimoya yabafileyo esibathandayo kuba sisoyika ukuba basiqumbele? Ngaba sifanele sibancede baphume kwindawo ethile eyoyikekayo yokuhlambulula imiphefumlo? Okanye ngaba sifanele nje singcangcazele singenakuzinceda xa sicinga ngokubandezeleka kwabo esihogweni? Okanye ngaba sifanele siphathe izilwanyana ezithile ngokungathi zithwele imiphefumlo yabantu abafayo?
Imibuzo ephakamayo ngokuphathelele uThixo iphazamisa nangaphezulu. Ngokomzekelo, abazali abaninzi, njengomama okhankanywe ngaphambilana, ekuqaleni bayathuthuzeleka yingcamango yokuba uThixo “uwuthathile” umphefumlo ongafiyo womntwana wabo ukuze ube kunye naye ezulwini. Noko ke, ngokukhawuleza emva koko abaninzi baqalisa ukuzibuza ukuba nguThixo onjani lo uthwaxa umntwana omsulwa ngesifo esibuhlungu ngolo hlobo, esohlutha loo mntwana uxabisekileyo kubazali abatyumke intliziyo ukuze afudusele loo mntwana ezulwini eseze ngobuso elizweni. Kuphi okusesikweni, uthando, inceba, kuThixo onjalo? Bambi bade babuthandabuze ubulumko boThixo onjalo. Bayabuza, kwakutheni ukuze uThixo olumkileyo azise yonke le miphefumlo emhlabeni ukuba kanti yonke ifanele iphelele ezulwini? Ngaba oko bekungayi kuthetha ukuthi ukudalwa komhlaba ngokwenene kwakuyinkcitha xesha nje?—Thelekisa iDuteronomi 32:4; INdumiso 103:8; Isaya 45:18; 1 Yohane 4:8.
Ngoko ke, kucacile ukuba imfundiso yokungafi komphefumlo womntu, enoba ifundiswa njani na, iphakamisa imibuzo enzima, ide ibangele ukungangqinelani kwezibakala. Ngoba? Unobangela wale ngxaki unento yokwenza nemvelaphi yale mfundiso. Usenokukufumanisa kuluncedo ukuhlola ngokufutshane imvelaphi yayo; yaye usenokumangaliswa kukufunda oko iBhayibhile ikutshoyo ngomphefumlo. Inikela ithemba elilunge ngakumbi ngobomi emva kokufa kunoko iicawa zehlabathi ngokuqhelekileyo zikufundisayo.