Imibuzo Evela Kubafundi

Ngaba kububulumko ngomKristu ukuya kugqirha wezigulo zengqondo?

Iingxelo ezisuka kwamanye amazwe zibonisa ukuba kuye kwakho ukwanda kokugula ngokweemvakalelo nangengqondo kule “mihla yokugqibela.” (2 Timoti 3:1) AmaKristu aba buhlungu kakhulu xa amanye akhonza nawo echaphazeleka, kodwa ayaqonda ukuba umntu ngamnye umele azenzele isigqibo enoba ufanele afune unyango lwesigulo sakhe yaye, ukuba uyalufuna, agqibe ngohlobo lonyango alufunayo.a “Ngamnye uya kuthwala umthwalo wakhe.” (Galati 6:5) Bambi, abaye bahlaselwa kanobom sischizophrenia, ibipolar disorder, ukudandatheka kakhulu, ukuba likhoboka lokuthile, ukuzenzakalisa, nezinye izigulo ezibangela ukudandatheka, baye baphila ubomi obuqhelekileyo emva kokuba befumene uncedo lweengcali.

Kwezinye iindawo kuye kwayinto ethandwayo ukufuna unyango. Kwiimeko ezininzi umguli akahlaselwa kukuphazamiseka kwengqondo kodwa ufumana ubunzima bokuhlangabezana nemeko ethile ebomini. Noko ke, iBhayibhile inikela olona ncedo luphumelelayo ekusingatheni iingxaki ezinzima zobomi. (INdumiso 119:28, 143) NgeBhayibhile, uYehova unika ubulumko, amandla okucinga, nolwazi lokwenyaniso—zinto ezo zisomelezayo ngokwasengqondweni nangokweemvakalelo. (IMizekeliso 2:1-11; Hebhere 13:6) Maxa wambi abakhonzi abathembekileyo bakaThixo basenokungawaqiqi amazwi abawathethayo ngenxa yokudubeka ngaphakathi. (Yobhi 6:2, 3) UYakobi 5:13-16 ukhuthaza abakwimeko enjalo ukuba bacele uncedo nesiluleko sabadala. UmKristu usenokuba uyagula ngokomoya, okanye usenokuxhwalekiswa kukungaguquki kwemeko okanye ubhuqwa kukuxinezeleka, okanye usenokuvakalelwa kukuba akaphathwa ngokusesikweni. (INtshumayeli 7:7; Isaya 32:2; 2 Korinte 12:7-10) Umntu onjalo usenokufuna uncedo lwabadala, abaya kuthi ‘bamthambise ngeoli’—oko kukuthi, ngobuchule bamnike icebiso leBhayibile elithuthuzelayo—baze kwakhona “bamthandazele.” Uba yintoni umphumo? “Umthandazo wokholo uya kumenza aphile lowo ungaphilanga, ibe uYehova uya kumvusa [ekuphelelweni kwakhe lithemba okanye ekuvakalelweni kukuba ulahliwe nguThixo].”

Noko ke, kuthekani ukuba ukuxinezeleka kwengqondo komntu nokudideka kuyazingisa phezu kwalo nje uncedo olunobuchule lwabalusi bokomoya? Bambi abakwimeko elolu hlobo baye bakhetha ukuya kuxilongwa ngokucokisekileyo. (Thelekisa IMizekeliso 14:30; 16:24; eyoku-1 kwabaseKorinte 12:26.) Ukugula okusemzimbeni kusenokubangela ukuxhwaleka ngokweemvakalelo okanye engqondweni. Ukunyanga oko kugula kwezinye iimeko kuye kwazisa isiqabu kuloo mntu ugula ngokweemvakalelo.b Ukuba akufunyanwa sigulo sasemzimbeni, loo gqirha, ukuba uceliwe, usenokuncomela ukuba kuyiwe kugqirha wezigulo zengqondo. Yintoni ofanele uyenze? Njengokuba bekutshiwo, esi sisigqibo sobuqu umntu ngamnye amele asihlolisise ngokwakhe. Abanye abafanelanga bahlab’ amadlala okanye bagwebe.—Roma 14:4.

Sekunjalo, kumele kusetyenziswe ubulumko nenyameko ukuze ingalityalwa imigaqo yeBhayibhile. (IMizekeliso 3:21; INtshumayeli 12:13) Kwimeko yokugula ngokwasemzimbeni, abaguli baneentlobo ezahlukeneyo zonyango abanokukhetha kuzo, kukho amayeza aqhelekileyo nonyango lwasemzimbeni olunjengenaturopathy, acupuncture nehomeopathy. Kukwakho noogqirha abahlukahlukeneyo bezigulo zengqondo. Phakathi kwabo kukho oogqirha bengqondo abanyanga ngokuhlolisisa isigulo eso ngaphandle kwamayeza nabanye, basenokuphanda ngembali yomguli ngokuthi bazame ukufumanisa izizathu zokungalungelelani kwendlela aziphethe ngayo okanye iimvakalelo ezibuhlungu. Oogqirha abanyanga izigulo zengqondo nokuziphatha ngaphandle kokusebenzisa amayeza basenokuzama ukunceda umguli afunde indlela entsha yokuziphatha. Bambi oogqirha bengqondo bakholelwa kukuba inkoliso yezigulo zengqondo ifanele inyangwe ngamayeza.c Kuthiwa abanye, bancomela uhlobo oluthile lokutya neevithamini.

Abaguli neentsapho zabo bafanele basebenzise ubulumko xa beqwalasela olu khetho. (IMizekeliso 14:15) Okuphawulekayo kukuba, uNjingalwazi uPaul McHugh, ongumalathisi weDepartment of Psychiatry and Behavioral Sciences kwiJohns Hopkins University School of Medicine, wathi lo msebenzi wokunyanga izigulo zengqondo “bubugcisa bezonyango obunamakhwiniba athile. Akukho ndlela unokuqiniseka ngayo ukuba unyango olufumanayo luthembekile nangona busebenza ngezigulo ezintsonkothileyo—njengezigulo zengqondo neengxaki zokuziphatha.” Le meko ivulela ithuba lokunxaxha nokuqhatha, kwanonyango obelulungiselelwe ukunceda olusenokwenza umonakalo ongakumbi kunokwenza okulungileyo.

Kwakhona kufanele kukhankanywe ukuba nangona oogqirha bezigulo zengqondo namagcisa engqondo befumene uqeqesho olufanelekileyo, benezidanga ezininzi zemfundo enomsila, abanye abaninzi abangakufundelanga ukunyanga banyanga ngomgunyathi ngaphandle kolwalathiso njengabacebisi okanye iingcali zokunyanga. Abanye abantu baye bachitha imali eninzi besiya kubantu abalolo hlobo abangafanelekiyo.

Kwanangogqirha wengqondo oqeqeshiweyo nofanelekayo ngokwemfundo, kukho izinto ezimele ziqwalaselwe. Xa sikhetha ugqirha wezamayeza okanye wotyando, simele siqiniseke ukuba uya kuzihlonela iimbono zethu ezisekelwe eBhayibhileni. Ngokufanayo, kunokuba yingozi ukuya kugqirha wengqondo ongazihloneliyo iimbono zethu zonqulo nezokuziphatha. AmaKristu amaninzi aw’ evuka, phezu kwako nje ukugula ngengqondo nangokweemvakalelo, efuna ukuba “nesimo sengqondo esifanayo neso wayenaso uKristu Yesu.” (Roma 15:5) Lawo anjalo asixhalabele isimo sengqondo sakhe nabani na osenokuchaphazela ukucinga okanye indlela yawo yokuziphatha. Bambi oogqirha bazijonga naziphi na izithintelo ezibangelwa ziinkolelo ezingokweZibhalo njengezingeyomfuneko nezinokuba yingozi kwimpilo engokwasengqondweni. Basenokuvumela, bade bancomele, imikhwa egwetyiweyo yiBhayibhile, enjengobufanasini okanye ukungathembeki emtshatweni.

Ezi ngcamango ziqukiwe koko umpostile uPawulos athi “ziimpikiswano zoko kubizwa ngokuba ‘lulwazi’ kuxokwa.” (1 Timoti 6:20) Ziyayiphikisa inyaniso engoKristu yaye ziyinxalenye ‘yentanda-bulumko nenkohliso elambathayo’ yeli hlabathi. (Kolose 2:8) Lo mlinganiselo weBhayibhile ucacile: “Akukho bulumko, akukho ngqondo, akukho cebo [eliphikisana, NW] noYehova.” (IMizekeliso 21:30) Oogqirha bezigulo zengqondo abathi “okubi kulungile, okulungileyo kubi” ‘bazizinxulumani ezibi.’ Kunokuphilisa iingqondo ezingazinzanga, baya ‘konakalisa imikhwa elungileyo.’—Isaya 5:20; 1 Korinte 15:33.

Ngoko umKristu okubona kubalulekile ukuba adibane nogqirha wezigulo zengqondo ufanele ahlolisise iimfaneleko, isimo sengqondo nodumo lwaloo gqirha nomphumo osenokubakho walo naluphi na unyango aluncomelayo. Ukuba umKristu oxhwalekileyo akanako ukukwenza oku ngokwakhe, mhlawumbi umhlobo oqolileyo, osondeleyo okanye isizalwana sisenokumnceda. UmKristu ongaqinisekanga enoba kububulumko kusini na ukulwamkela unyango oluthile usenokukufumana kuluncedo ukuthetha nabadala ebandleni—nangona isigqibo isesakhe (okanye isesabazali bakhe, okanye sidibanisa indoda nomfazi).d

Inzululwazi ingenza okungakumbi namhlanje kunakumaxesha amandulo ukunciphisa ukubandezeleka. Sekunjalo, kukho izifo ezininzi—emzimbeni nasengqondweni—ngoku ezinganyangekiyo nezimele zinyanyezelwe ukutyhubela le nkqubo yezinto. (Yakobi 5:11) Okwangoku “umkhonzi othembekileyo noqondayo,” abadala, nabanye bonke ebandleni bayavelana nabagulayo yaye bakulungele ukubaxhasa. Yaye kwanoYehova uyabomeleza ukuba banyamezele de kube lixesha apho ukugula kuya kube kuyinto yezolo.—Mateyu 24:45; INdumiso 41:1-3; Isaya 33:24.

[Imibhalo esemazantsi]