Ukubuyela Eluthulini—Njani?
“ULUTHULI, uya kubuyela kwaseluthulini.” Xa umntu wokuqala, uAdam, weva la mazwi, wayeyazi into eyayiza kwenzeka. Wayenziwe ngothuli lomhlaba ibe wayeza kubuyela eluthulini. Wayeza kufa ngenxa yokungamthobeli uMdali wakhe, uYehova uThixo.—Genesis 2:7, 15-17; 3:17-19.
IBhayibhile ibonisa ukuba abantu benziwe ngothuli. Kwakhona ithi: “Umphefumlo owonayo, kuya kufa wona.” (Hezekile 18:4; INdumiso 103:14) Ukufa kuye kwezisa intlungu kwizigidi zabantu yaye ngokuphindaphindiweyo kuye kwaphakamisa imibuzo malunga nokufihlwa kwezidumbu zabantu.
Uqheliselo Lwamandulo Nolwale Mihla
Izidumbu zabantu zazifihlwa njani ngabantu bakaThixo bamandulo? Kwinxalenye yayo yokuqala, iBhayibhile ikhankanya iindlela ezahlukeneyo zokufihla abafileyo, kuquka ukungcwaba emhlabeni. (Genesis 35:8) Usolusapho uAbraham nomfazi wakhe uSara, nonyana wakhe uIsake nomzukulwana wakhe uYakobi bangcwatywa kumqolomba waseMakapela. (Genesis 23:2, 19; 25:9; 49:30, 31; 50:13) Abagwebi abangamaSirayeli uGidiyon noSamson bangcwatywa ‘kumangcwaba ooyise.’ (ABagwebi 8:32; 16:31) Oku kubonisa ukuba abantu bakaThixo bamandulo babekhetha ukuba nesiza samangcwaba entsapho. Xa uYesu Kristu wafayo ngenkulungwane yokuqala yeXesha lethu Eliqhelekileyo, umzimba wakhe wafakwa kwingcwaba elitsha elalimbiwe elulwalweni. (Mateyu 27:57-60) Ngelo xesha, ngokuqhelekileyo izidumbu zabantu zazingcwatywa emhlabeni okanye zifakwe emangcwabeni. Kusenziwa into efanayo kwinkoliso yeendawo emhlabeni jikelele.
Noko ke, kweminye imimandla yehlabathi namhlanje ukunqongophala kakhulu komhlaba neendleko eziphakamileyo zokuthenga umhlaba zenza kube nzima ukufumana indawo yokungcwaba. Ngenxa yoko, abanye abantu bazama ezinye iindlela zokufihla izidumbu zabantu.
Ukulahlwa kothuthu emva kokutshiswa kwesidumbu somntu kuya kuxhaphaka ngakumbi. ENgilani abantu abafileyo abamalunga nama-40 ekhulwini bafihlwa ngolo hlobo ngoku. ESweden, apho abantu abafileyo abangaphezu kwama-80 ekhulwini ezidolophini betshiswa, amahlathi athile enziwa indawo yokulahla uthuthu. Yaye eShanghai nakwezinye iidolophu ezimbalwa eziselunxwemeni zaseTshayina, amagunya ezixeko ayakuxhasa ukulahlwa kothuthu elwandle kangangezihlandlo eziliqela ngonyaka.
Lunokulahlwa phi uthuthu? Alunakulahlwa naphi na. Bambi basenokoyika ukuba ukulahla uthuthu kuyawonakalisa umhlaba. Noko ke, eneneni nayiphi na ingozi yokusasazeka kwesifo iyancitshiswa ngokutshiswa kwesidumbu. Amangcwaba athile aseNgilani kunye neepaki zesikhumbuzo zaseUnited States ziba nengca elinyiweyo okanye izitiya zeentyatyambo ekulahlwa kuzo uthuthu. Kakade ke, amaKristu anomdla ngokukhethekileyo kwimbono yeZibhalo ngokutshiswa kwezidumbu nokulahlwa kothuthu.
Ithini Imbono YeBhayibhile?
Xa wayevakalisa umgwebo ‘kukumkani waseBhabheli,’ umprofeti uIsaya wathi: “Ulahlelwe kude nengcwaba lakho.” (Isaya 14:4, 19) Ngaba ukulahlwa kothuthu kufanele kuthelekiswe nehlazo elinjalo? Hayi, kuba akubhekiselwa ekutshisweni nasekugcinweni kwezidumbu okanye ekulahlweni kothuthu olusalayo.
UYesu Kristu wathetha ngovuko lwabafileyo lwasemhlabeni oluya kubakho ebudeni boLawulo lwakhe lweMinyaka Eliwaka xa wathi: “Bonke abo bakumangcwaba enkumbulo balive ilizwi [lam] baze baphume.” (Yohane 5:28, 29) Noko ke, isibakala sokuba akuyomfuneko ukuba umntu abe sengcwabeni lokoqobo ukuze avuswe siqinisekiswa yenye inkcazelo engokwesiprofeto yovuko. ISityhilelo 20:13 sithi: “Nolwandle lwabakhupha abo bafileyo bakulo, nokufa neHadesi kwabakhupha abo bafileyo balapho.” Ngoko, ayibalulekanga indawo okanye indlela umntu ‘abuyela ngayo eluthulini.’ Kunoko, okubalulekileyo kukukhunjulwa nokuvuswa kwakhe nguThixo. (Yobhi 14:13-15; thelekisa uLuka 23:42, 43.) Ngokuqinisekileyo uYehova akafuni mangcwaba amahle ukuze amncede akhumbule abantu. Ukutshiswa kwezidumbu akukuthinteli ukuvuswa komntu. Yaye ukuba ukulahlwa kothuthu kwenziwa ngezizathu ezifanelekileyo yaye kwenziwa ngaphandle kwezithethe zonqulo lobuxoki, akuyi kungqubana neZibhalo.
Abo bagqiba kwelokuba balahle uthuthu kuya kufuneka banikele ingqalelo kumthetho welo lizwe. Kwakhona kuya kuba yinto efanelekileyo ukuba bacinge ngeemvakalelo zabo bafelweyo nabanye. Abakhonzi bakaYehova baya kuba benza kakuhle xa belumkela ukuba ukuqhelisela kwabo inkululeko engokweZibhalo kulo mbandela kungezisi ugculelo kwigama elihle analo amaKristu. Oku kubaluleke ngokukodwa kumazwe apho ukutshiswa kwezidumbu nokulahlwa kothuthu kuyinto eyamkelekileyo ngokwasemthethweni kodwa kungekamkelwa ngokupheleleyo luluntu. Kakade ke, umKristu uya kuzinxwema kuwo nawaphi na amasiko okanye izithethe ezisekelwe kwinkolelo yokungafi komphefumlo womntu.
Ukukhululeka Ngokupheleleyo Kwimfuneko Yokungcwaba!
Bambi abakhuthaza ukulahlwa kothuthu lwezidumbu bathi kuthetha ukukhululeka ekungcwabeni. Noko ke, into eya kuzisa isiqabu nangaphezulu kukuzaliseka kwedinga leBhayibhile elithi “njengotshaba lokugqibela, ukufa kuza kutshitshiswa.”—1 Korinte 15:24-28.
Oku kuthetha ukuthi amangcwaba, ukutshisa izidumbu nokulahla uthuthu, ziya kuba zizinto zexesha elidluleyo. Ewe, ukufa kuya kube kungasekho. Ephefumlelwe nguThixo umpostile uYohane wabhala: “Ndeva ilizwi elikhulu livela etroneni lisithi: ‘Khangela! Intente kaThixo iseluntwini, yaye uya kuhlala nalo, ibe lona luya kuba ngamaqela abantu bakhe. NoThixo ngokwakhe uya kuba nalo. Kwaye uya kuzisula zonke iinyembezi emehlweni alo, yaye ukufa akusayi kubakho, kungayi kubakho nakukhedama nasikhalo nantlungu kwakhona. Izinto zangaphambili zidlule.’”—ISityhilelo 21:3, 4.
Zonke ezi zinto ziya kwenzeka xa ukufa kwabantu okwabangelwa sisono sika-Adam kuya kube kushenxiswe ngokupheleleyo phantsi koBukumkani bukaThixo. Ngelo xesha uluntu oluthobelayo aluyi kujamelana nolindelo lokubuyela eluthulini.
[Imifanekiso ekwiphepha 29]
Iindlela eziqhelekileyo zokufihla izidumbu zabantu
[Umfanekiso okwiphepha 31]
Ukulahla uthuthu eSagami Bay, eJapan
[Inkcazelo]
Courtesy of Koueisha, Tokyo