Ngaba Ubutyebi BukaKumkani USolomon Babubaxiwe?
“Ukulinganiswa kwegolide, eyeza kuSolomon ngamnyaka mnye, kwaba ngamakhulu mathandathu anamanci mathandathu anesithandathu iitalente.”—1 Kumkani 10:14.
NGOKUTSHO kwale ndinyana yeBhayibhile, uKumkani uSolomon wazuza ngaphezu kwama-25 eetoni zegolide ngonyaka omnye! Oku namhlanje bekunokuxabisa ama-R1 044 000 000. Le golide phantse iyiphindaphinda kabini igolide eyayisembiwa ehlabathini lonke ngonyaka we-1800. Ingaba oku kwakunokwenzeka? Bubonisa ntoni ubungqina bokumbiwa kwezinto zakudala? Bubonisa ukuba imbali yeBhayibhile engobutyebi bukaSolomon ngokwenene isenokuthenjwa. IBiblical Archaeology Review ithi:
◻ UKumkani uThutmose III waseYiputa (iwaka lesibini leminyaka ngaphambi kweXesha lethu Eliqhelekileyo) wanikezela malunga neetoni ezili-13,5 zegolide etempileni ka-Amon-Ra eKarnak—le yayiyinxalenye nje yesipho.
◻ Imibhalo yaseYiputa inengxelo yezipho ezisisimbuku esimalunga nama-383 eetoni zegolide nesilivere ezanikelwa nguKumkani uOsorkon I (ngasekuqaleni kwewaka lokuqala leminyaka ngaphambi kweXesha lethu Eliqhelekileyo) koothixo.
Ukongezelela, umqulu iClassical Greece kungcelele oluthi Great Ages of Man uyachaza:
◻ Nyaka ngamnye imigodi yase Pangaeum eThrace iye yavelisa ngaphezu kweetoni ezingama-37 zegolide eyayisiya kuKumkani uFilipu II (359-336 B.C.E.).
◻ Xa unyana kaFilipu uAlesandire Omkhulu (336-323 B.C.E.) wathimba iSusa, ikomkhulu lobukhosi bamaPersi, kwafumaneka ubutyebi obungaphaya kwe-1 000 leetoni zegolide.—The New Encyclopædia Britannica.
Ngoko ke inkcazelo yeBhayibhile ngobutyebi bukaKumkani uSolomon ayibaxwanga. Khumbula kwakhona ukuba, uSolomon waba “ngaphezu kookumkani bonke behlabathi, ngobutyebi nangobulumko” ngelo xesha.—1 Kumkani 10:23.
USolomon wabusebenzisa njani ubutyebi awayenabo? Itrone yakhe yayalekwe “ngegolide engcwengiweyo” izinto zokusela zazenziwe “ngegolide,” wayenamakhaka amakhulu angama-200 nama-300 eengweletshetshe “zegolide engumkhando.” (1 Kumkani 10:16-21) Ngaphezu koko, igolide kaSolomon yasetyenziswa ukulungisa itempile kaYehova eYerusalem. Iziphatho zezibane zasetempileni nezixhobo ezingcwele, iifolokhwe, izitya, iingqayi nezitya zokuhlambela zazenziwe ngegolide nesilivere. Iikherubhi ezinobude obuziimitha ezi-4,5 ezikwiNgcwele kaNgcwele, isibingelelo sokuqhumisa, kwanangaphakathi endlwini kwakwalekwe ngegolide.—1 Kumkani 6:20-22; 7:48-50; 1 Kronike 28:17.
Kuthekani ngetempile eyayalekwe ngegolide? Okubangela umdla kukuba, ukusetyenziswa kwegolide ngolo hlobo kwakuqheleke ngeyona ndlela kwihlabathi lamandulo. IBiblical Archaeology Review ibonisa ukuba uAmenophis III waseYiputa “wanikela imbeko kuthixo omkhulu uAmun ngokumakhela itempile eThebes ‘eyayalekwe yonke ngegolide, umgangatho wayo uhonjiswe ngesilivere, nemigubasi ihonjiswe nge-electrum’”—umxube wegolide nesilivere. Ukongezelela, uEsar-haddon waseAsiriya (ngenkulungwane yesixhenxe ngaphambi kweXesha lethu Eliqhelekileyo) waleka iingcango waza, waleka iindonga zengcwaba lika-Ashur ngegolide. Ngokuphathelele itempile yaseSin eHarran, uNabonidus waseBhabhiloni (ngenkulungwane yesithandathu ngaphambi kweXesha lethu Eliqhelekileyo) wabhala: “Ndaleka iindonga zayo ngegolide nesilivere, ndazenza zakhazimla njengelanga.”
Ngaloo ndlela, imbali ibonisa ukuba ingxelo yeBhayibhile engobutyebi bukaKumkani uSolomon ayibaxwanga.