Ukumkani Onobutyebi Nobulumko

Ngaba ucinga ukuba ubutyebi bunokukwenza wonwabe? Ukuba ubani ebekunike intywenka yemali, ngaba ubungayi kuvuyiswa koko? Mhlawumbi ubuya kwenjenjalo. Kusenokwenzeka ukuba ubunokucinga ngeendlela zokuyisebenzisa.

KUYAVUNYWA ukuba, zininzi izinto ezinokuthengwa ezinokwenza ubomi banelise buze bunandipheke ngakumbi. Imali isenokuba “ngumthunzi” kwiingxaki ezingalindelekanga, ezinjengesifo okanye ukungaqeshwa.​—⁠INtshumayeli 7:⁠12.

Kodwa imali nolonwabo zidibana njani? Ngaba ucinga ukuba, njengokuba abaninzi becinga, ulonwabo lubangelwa bubutyebi? Kusenokuba nzima ukufumana iimpendulo kule mibuzo kuba imali ngokulula isenokulinganiswa, okanye ibalwe, ngoxa oko kungenakwenziwa kulonwabo. Akunakulubeka ulonwabo esikalini uze ululinganise.

Yaye, kwakhona, bambi abantu abazizityebi babonakala bonwabile, ngoxa abanye bengonwabanga. Oku kukwanjalo nakwabo bangamahlwempu. Sekunjalo, inkoliso yabantu​—⁠kwanabo sele bezizityebi⁠—​ikholelwa ekubeni imali engakumbi iya kuyizisela ulonwabo olungakumbi.

Umntu owabhala ngemibandela enjalo yayinguKumkani uSolomon wakwaSirayeli wamandulo. Wayengomnye wabona bantu bazizityebi abakhe baphila. Usenokufunda ngenkcazelo yentaphane yobutyebi bakhe kwisahluko 10 sencwadi yeBhayibhile yokuQala yooKumkani. Ngokomzekelo, phawula ukuba indinyana 14 ithi: “Ke kaloku ukulinganiswa kwegolide, eyeza kuSolomon ngamnyaka mnye, kwaba ngamakhulu mathandathu anamanci mathandathu anesithandathu iitalente zegolide.” (Akekeliswe sithi.) Elo nani lilingana neetoni ezingama-25 zegolide. Namhlanje, loo golide ingako inokuxabisa ngaphezu kwee-R900 000 000!

Sekunjalo, uSolomon wayengesosityebi nje kuphela; wayesikelelwe nguThixo ngobulumko. IBhayibhile ithi: “Waba mkhulu ke ukumkani uSolomon, ngaphezu kookumkani bonke behlabathi, ngobutyebi nangobulumko. Lonke ihlabathi laye lifuna ubuso bukaSolomon, ukuba live ubulumko bakhe, awayebubeke entliziyweni yakhe uThixo.” (1 Kumkani 10:​23, 24) Nathi sinokungenelwa kubulumko bukaSolomon, ekubeni oko wakubhalayo kuyinxalenye yengxelo yeBhayibhile. Makhe sibone oko akuthethayo ngendlela imali nolonwabo ezidibana ngayo.

[Umfanekiso okwiphepha 3]

Reproduced from Die Heilige Schrift - Übersetzt von Dr. Joseph Franz von Allioli. Druck und Verlag von Eduard Hallberger, Stuttgart