Intuthuzelo Kwabo Bacinezelekileyo

NGABA uphawulile ukuba ebomini bakho bekusoloko kukho amagama asetyenziswa rhoqo ezindabeni? Ngaba ukruqukile kukufunda amagama anjengelithi imfazwe, ulwaphulo-mthetho, intlekele, indlala nokubandezeleka? Noko ke, kukho igama ebelinqabe ngokuphawulekayo ezindabeni. Sekunjalo, ligama eliphathelele into efunwa ngokwenene luluntu. Elo gama lithi “intuthuzelo.”

“Ukuthuthuzela” kuthetha “ukomeleza nokunika ithemba” kukwathetha “ukuthuthuzela ubani kwintlungu okanye ingxaki” akuyo. Ngenxa yesaqunge ebesikho kweli hlabathi kule nkulungwane yama-20, ukunikwa ithemba nentuthuzelo ngenxa yentlungu kufuneka ngokwenene. Liyinyaniso elokuba bambi kuthi namhlanje baphila ubomi obutofotofo xa buthelekiswa nobookhokho bethu. Ubukhulu becala oku kubangelwe yinkqubela yenzululwazi. Kodwa inzululwazi nobugcisa azisithuthuzelanga ngengqiqo yokuphelisa oonobangela bokubandezeleka koluntu. Ngabaphi aba nobangela?

Kwiinkulungwane ezininzi ezadlulayo, indoda esisilumko uSolomon yathetha ngomnye unobangela osisiseko wokubandezeleka xa yathi: “Umntu agunyazele umntu, kube kubi kuye.” (INtshumayeli 8:9) Inzululwazi nobugcisa abukwazanga ukuluguqula utyekelo lomntu lokufuna ukulawula abanye abantu. Kule nkulungwane yama-20, oku kuye kwavelisa oozwilakhe abacinezelayo kumazwe ngamazwe nakwiimfazwe ezoyikekayo phakathi kwamazwe ahlukahlukeneyo.

Ukususela ngowe-1914 abantu abangaphezu kwekhulu lesigidi baye bafa ngenxa yeemfazwe. Cinga ngentlungu eziyibangelayo ebantwini—izigidi zeentsapho ziba sentlungwini yokufelwa yaye zifuna intuthuzelo. Yaye iimfazwe zibangela ezinye iintlobo zokubandezeleka ngaphandle kokufa ngethuba lemfazwe. Ekupheleni kwemfazwe yehlabathi yesibini, kwakukho iimbacu ezingaphezu kwezigidi ezili-12 eYurophu. Kwiminyaka yakutshanje, abantu abangaphezu kwesigidi esinesiqingatha babhaca kummandla wemfazwe eMzantsi Mpuma Asiya. Imfazwe ekumazwana akwiBalkan iye yanyanzelela abangaphezu kwezigidi ezibini ukuba bashiye amakhaya abo—kwiimeko ezininzi bebaleka “ukutshayelwa njengohlanga.”

Ngokuqinisekileyo iimbacu ziyayifuna intuthuzelo, ngokukodwa ezo zishiya amakhaya azo ziphethe imigodlwana emincinane, zingazi apho zinokuya khona okanye oko ikamva likufumbathele iintsapho zazo. Abantu abanjalo baphakathi kwawona maxhoba alusizi engcinezelo; yaye bayakufuna ukuthuthuzelwa.

Kumazwe anomlinganiselo othile woxolo, izigidi ziphila njengamakhoboka enkqubo yezoqoqosho yehlabathi. Liyinyaniso elokuba bambi banentabalala yezinto eziphathekayo. Noko ke, mihla le abaninzi kufuneka balwe nzima ukuze bahlale bephila. Abaninzi bafuna iindawo ezindilisekileyo zokuhlala. Liyanda nenani labangaqeshwanga. Iphephandaba laseAfrika lithi: “Ihlabathi lijamelene nentlekele yokwanda kwabantu abangaqeshwanga, kuba ngonyaka wama-2020 kuya kube kukho abantu abangaphezu kwesi-1,3 lewaka lesigidi abafuna umsebenzi.” Ngokuqinisekileyo abacinezelekileyo ngokwezoqoqosho bafuna “ukomelezwa nokunikwa ithemba”—bafuna intuthuzelo.

Ngenxa yeemeko ezimaxongo, bambi babhenela kulwaphulo-mthetho. Kakade ke, oku kubangela ubunzima kwabo bangamaxhoba, yaye ukwanda kolwaphulo-mthetho kubangela ukuxinezeleka okungakumbi. Umxholo ophambili wephephandaba lakutshanje laseRhawutini, eMzantsi Afrika, iThe Star ufundeka ngolu hlobo: “Umzekelo wosuku oluqhelekileyo ‘kwelona lizwe liyingozi ehlabathini.’” Elo nqaku lalithetha ngosuku oluqhelekileyo kummandla waseRhawutini nakufutshane nawo. Ngolo suku lunye, kwagwintwa abantu abane yaye abasibhozo bohluthwa iinqwelo-mafutha zabo. Kwaqhekezwa kwizindlu ezili-17 komnye ummandla wabantu abakumgangatho ophakathi. Ukongezelela, kwakukho abantu abaliqela abakhuthuza bexhobile. Ngokutsho kweli phephandaba, amapolisa aluchaza olu suku ‘njengoluzolileyo ngokwentelekiso.’ Kuyaqondakala ukuba izalamane zabantu ababuleweyo nezabo bangamaxhoba okuqhekezelwa izindlu nokukhuthuzwa iinqwelo-mafutha baziva bexinezeleke ngokwenene. Bafuna ukuqinisekiswa nokunikwa ithemba—bafuna intuthuzelo.

Kwamanye amazwe, kukho abazali abathengisa ngabantwana babo ukuze babe ngoonongogo. Kukho nengxelo yokuba kwelinye ilizwe laseAsiya elinentaphane yabakhenkethi abafuna “ukuzifica ngesini” kukho oonongogo abazizigidi ezibini, abaninzi kubo bathengwa okanye bathinjwa besengabantwana. Ngaba bakho abantu abaxinezeleke ngaphezu kwala maxhoba aselusizini? Lixubusha ngolu rhwebo lungcolileyo, iphephancwadi iTime lanikela ingxelo kwinkomfa yowe-1991 yeentlangano zamabhinqa aseMzantsi Mpuma Asiya. Apho, kwaqikelelwa ukuba “amabhinqa azizigidi ezingama-30 aye athengiswa ehlabathini lonke ukususela embindini weminyaka yee-1970.”

Kakade ke, bambi abantwana bangamaxhoba ngoxa bengathengiswa njengoonongogo. Liyanda inani labantwana abaxhatshazwa ngokwasemzimbeni okanye abadlwengulwa emakhayeni abo ngabazali nazizalamane. Abantwana abanjalo banokuhlala bexhelekile ngokweemvakalelo kangangexesha elide. Ngokuqinisekileyo, njengamaxhoba okuxinezeleka, bayayifuna intuthuzelo.

Umfundi Wamandulo Wengcinezelo

UKumkani uSolomon wakhwankqiswa kukwanda kwengcinezelo yabantu. Wabhala: “Ndabuya ke mna, ndakubona konke ukucudisa okwenziwayo phantsi kwelanga. Ndazibona iinyembezi zabacudisiweyo, bengenamthuthuzeli; esandleni sabacudisi babo kuphuma ububhovubhovu, bengenamthuthuzeli bona.”—INtshumayeli 4:1.

Ukuba kwiminyaka engama-3 000 eyadlulayo loo kumkani waqonda ukuba abacinezelekileyo bamfuna ngokwenene umthuthuzeli, ebenokuthini namhlanje? Noko ke, uSolomon wayesazi ukuba akakho umntu ongafezekanga, kuquka naye siqu, owayenokunikela intuthuzelo efunwa luluntu. Kwakufuneka umntu omkhulu ngakumbi ukuphelisa amandla abo bacinezela abanye. Ngaba ukho umntu onjalo?

EBhayibhileni, INdumiso 72 ithetha ngomthuthuzeli ozukileyo wabo bonke abantu. Le ndumiso yabhalwa ngubawo kaSolomon, uKumkani uDavide. Umbhalo wayo ongasentla uthi: “EkaSolomon.” Kubonakala ukuba yabhalwa nguKumkani uDavide owalupheleyo ngokuphathelele Lowo wayeza kufumana itrone yakhe njengelifa. Ngokutsho kwale ndumiso, Lowo wayeya kuyiphelisa ngokupheleleyo ingcinezelo. “Malityatyambe ngemihla yakhe ilungisa, nobuninzi boxolo, ide ingabi sabakho inyanga. Makaphathe ubukhosi ethabathela elwandle ase elwandle, . . . ase eziphelweni zehlabathi.”—INdumiso 72:7, 8.

Mhlawumbi, xa uDavide wayebhala la mazwi, wayecinga ngonyana wakhe uSolomon. Kodwa uSolomon waqonda ukuba kwakungaphaya kwamandla akhe ukunceda uluntu ngendlela echazwe kule ndumiso. Wayenokuzalisekisa inxalenye encinane yamazwi aloo ndumiso yaye ancede uhlanga lakwaSirayeli kuphela, kungangenelwa abemi bomhlaba uphela. Kubonakala ukuba le ndumiso iphefumlelweyo yayiprofeta isalatha kumntu omkhulu ngakumbi kunoSolomon. Yayingubani lowo? Ayinakuba ngomnye umntu ngaphandle kukaYesu Kristu.

Xa ingelosi yayivakalisa ngokuzalwa kukaYesu, yathi: “UYehova uThixo uya kumnika itrone kaDavide uyise.” (Luka 1:32) Ukongezelela, uYesu wabhekisela kwisiqu sakhe ‘njengokuthile okungaphezu koSolomon.’ (Luka 11:31) Ukususela ekuvusweni kukaYesu aze abe kwisandla sasekunene sikaThixo, ebesezulwini, kwindawo anokuthi kuyo azalisekise amazwi eNdumiso 72. Ngaphezu koko, uThixo umnike amandla negunya lokwaphula idyokhwe yabo bacinezela uluntu. (INdumiso 2:7-9; Daniyeli 2:44) Ngoko nguYesu oya kuzalisekisa amazwi eNdumiso 72.

Ingcinezelo Iza Kuphela Kungekudala

Kuthetha ukuthini oku? Kuthetha ukuba ukukhululeka kuzo zonke iintlobo zokucinezeleka kwesintu kuza kuba yinto yokwenene kungekudala. Ukubandezeleka nengcinezelo egqithisileyo esiye sayibona ebudeni bale nkulungwane yama-20 yaxelwa kwangaphambili nguYesu njengenxalenye yomqondiso owawuya kuphawula ‘ukuqosheliswa kwenkqubo yezinto.’ (Mateyu 24:3) Phakathi kwezinye izinto, wathi: “Uhlanga luya kuvukelana nohlanga nobukumkani buvukelane nobukumkani.” (Mateyu 24:7) Loo nxalenye yesiprofeto yaqalisa ukuzaliseka ngexesha lokuqhambuka kwemfazwe yehlabathi yokuqala ngowe-1914. UYesu wongezelela: “Ngenxa yokwanda kokuchas’ umthetho uthando lwenani elikhulu ngakumbi luya kuphola.” (Mateyu 24:12) Ukuchaswa nokungathandwa komthetho kuvelise isizukulwana esingendawo nesicinezelayo. Ngoko, limele ukuba lisondele ixesha lokuba uYesu Kristu angenelele njengoKumkani omtsha womhlaba. (Mateyu 24:32-34) Kuya kuthetha ntoni oko ngabantu abacinezelekileyo abanokholo kuYesu Kristu nabakhangele kuye njengoMthuthuzeli woluntu omiselwe nguThixo?

Ukuze sifumane impendulo yaloo mbuzo, makhe sifunde iindinyana ezingakumbi zeNdumiso 72 eziya kuzalisekiswa nguKristu Yesu: “Uya kulihlangula ihlwempu elizibikayo, nabaziintsizana abangenaluncedo; abenzele inceba abasweleyo nabangamahlwempu; asindise imiphefumlo yamahlwempu; akhulule imiphefumlo yawo ekuxinezelweni nasekugonyamelweni; linqabile emehlweni akhe igazi lawo.” (INdumiso 72:12-14) Ngaloo ndlela uKumkani omiselwe nguThixo, uYesu Kristu, uya kuqinisekisa ukuba akukho bani uya kubandezeleka ngenxa yengcinezelo. Unamandla okuphelisa zonke iintlobo zokungabikho kokusesikweni.

Bambi basenokuthi, ‘Oko kuvakala kubangel’ umdla, kodwa kuthekani ngexesha langoku? Yiyiphi intuthuzelo abanokuyifumana abo babandezelekayo ngoku?’ Eneneni, ikho intuthuzelo kwabo bacinezelekileyo. Amanqaku amabini alandelayo kweli phephancwadi aza kubonisa indlela abazizigidi abasele beyifumana ngayo intuthuzelo ngokuhlakulela ulwalamano olusenyongweni noThixo oyinyaniso, uYehova, noNyana wakhe othandekayo, uYesu Kristu. Ulwalamano olunjalo lunokusithuthuzela ebudeni bala maxesha acinezelayo yaye umntu lunokumenza afumane ubomi obungunaphakade obungenangcinezelo. Ethandaza kuThixo, uYesu wathi: “Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso, nangalowo umthumeleyo, uYesu Kristu.”—Yohane 17:3.

[Umfanekiso okwiphepha 4, 5]

Akukho mntu uya kucinezela omnye kwihlabathi likaThixo elitsha