Ukho Umntu Okhathala Ngokwenene
AMAWAKA abantu abonisa ukuba ngokwenene ayakhathala. Akanalunya nakuzingca ecinga ukuba akafanele azixhalabise ngeengxaki zabanye abantu. Kunoko, enza konke okusemandleni—maxa wambi ade abeke nobomi bawo esichengeni—ukuze aphelise ukubandezeleka. Lo ngumsebenzi onzima gqitha, oye wenziwa nzima ngakumbi yimikhosi enamandla angaphezu kwawawo.
Iingxaki ezinjengokubawa, iingxwabangxwaba kwezobupolitika, iimfazwe, neentlekele zokwemvelo zinokuyiphuthisa “kwaneyona mizamo iphucukileyo neyokuzimisela yokuphelisa indlala,” utsho omnye umsebenzi. Ukuphelisa indlala kukuphela kwenye kwiingxaki ezininzi ezibaxhalabisayo abantu abanenkathalo. Kwakhona bajamelene nezinto ezinjengezifo, ubuhlwempu, ukungabikho kokusesikweni, nokubandezeleka okuninzi okubangelwa yimfazwe. Kodwa ngaba bayaphumelela?
Igosa eliyintloko lenye indawo yokunceda lathi abo benza “imizamo ecacileyo neyokuzimisela” ukuze baphelise indlala nentlungu bafana nomSamariya onemfesane ochazwe kumzekeliso kaYesu Kristu. (Luka 10:29-37) Kodwa enoba yintoni abayenzayo, wathi, inani lamaxhoba liyanda. Ngoko wabuza: “Yintoni amele ayenze umSamariya olungileyo ukuba uhamba kuloo ndlela inye yonke imihla kangangeminyaka eliqela aze afumanise elinye ixhoba eliphangiweyo veki nganye ecaleni kwendlela?”
Kusenokuba lula ukuyekelela koko kubizwa ngokuba ‘sisigulo esibuhlungu sokudinwa kukusoloko unceda’ uze unikezele ukhathazekile. Okuncomekayo kukuba, abo banenkathalo yokwenene abanikezeli. (Galati 6:9, 10) Ngokomzekelo, indoda eyabhalela kwiJewish Telegraph yaseBritani yancoma amaNgqina kaYehova, awathi ngexesha leJamani yamaNazi “anceda amawaka amaYuda ukuba aphile kwiinkxwaleko zaseAuschwitz.” Lo mbhali wathi: “Xa ukutya kwakunqabile, babesabelana ngesonka nabazalwana noodade wethu [abangamaYuda]!” AmaNgqina aqhubeka esenza oko anako ukukwenza ngezinto awayenazo.
Sekunjalo, inyaniso kukuba isonka ekwabelwana ngaso asinakuze siphelise ukubandezeleka kwabantu. Le asiyondlela yokujongela phantsi oko kwenziwe ngabantu abanemfesane. Nasiphi na isenzo esikunciphisa ngokusengqiqweni ukubandezeleka ngokuqinisekileyo sibalulekile. La maNgqina ayinciphisa intlungu yamanye amabanjwa ngandlel’ ithile, yaye ekugqibeleni ubuNazi batshatyalaliswa. Noko ke, inkqubo yezinto ebangela ingcinezelo enjalo, nabantu abangakhathaliyo isekho ngobuninzi bayo. Enyanisweni, “kukho isizukulwana esimazinyo angamakrele, simabamba azizitshetshe zokudla iintsizana ehlabathini, namahlwempu phakathi kwesintu.” (IMizekeliso 30:14) Kusenokwenzeka ukuba uzibuza isizathu sokuba oku kube njalo.
Kutheni Kukho Ubuhlwempu Nengcinezelo?
UYesu Kristu wakha wathi: “Amahlwempu nisoloko nikunye nawo, ibe xa sukuba nifuna ninako ukusoloko niwenzela okulungileyo, kodwa mna anisoloko ninam.” (Marko 14:7) Ngaba uYesu wayethetha ukuba ubuhlwempu nengcinezelo azinakuze ziphele? Njengabanye abantu, ngaba wayekholelwa ukuba ukubandezeleka okunjalo kulilungiselelo likaThixo ukuze anike abo banemfesane ithuba lokuba babonakalise indlela abanenkathalo ngayo? Akunjalo! UYesu wayengakholelwa koko. Wayebonisa nje isibakala sokuba ubuhlwempu buya kuhlala bukho lo gama nje isekho le nkqubo yezinto. Kodwa kwakhona uYesu wayekwazi oku: Yayingeyiyo injongo kaYise wasezulwini ukuba kubekho iimeko ezinjengezi emhlabeni.
UYehova uThixo wadala umhlaba ukuba ube yiparadesi, ungabi yindawo ezaliswe bubuhlwempu, ukungabikho kokusesikweni, nengcinezelo. Wabonisa indlela awayeyikhathalele ngayo intsapho engabantu ngokwenza amalungiselelo amahle awayeza kuba negalelo ekunandipheni ubomi. Kaloku, cinga nje ngegama lesitiya abazifumanisa bekuso abazali bethu bokuqala, uAdam noEva! Sasibizwa ngokuba yiEden, igama elithetha “Uyolo.” (Genesis 2:8, 9) UYehova akazange abanike nje abantu izinto eziyimfuneko ukuba baphile kwimeko-bume ekruqulayo, necinezelayo. Akugqiba umsebenzi wakhe omhle wokudala, uYehova wahlolisisa yonke into awayenzayo waza wayibona ‘ilunge gqitha.’—Genesis 1:31.
Ngoko ke, kutheni ubuhlwempu, ingcinezelo nezinye izinto ezibangela ukubandezeleka zigqugqisile emhlabeni namhlanje? Le nkqubo yezinto ingendawo ikho ngenxa yokuba abazali bethu bokuqala bakhetha ukumvukela uThixo. (Genesis 3:1-5) Oku kwabangela amathandabuzo enoba kwakulungile kusini na ngoThixo ukuba afune ukuthotyelwa zizidalwa zakhe. Ngoko uYehova wavumela inzala ka-Adam ukuba ibe nenkululeko kangangexesha elithile. UThixo wayesakukhathalele oko kwenzeka kwintsapho engabantu. Wenza ilungiselelo lokuphelisa bonke ubuhlungu obabuza kubangelwa kukungamthobeli. Yaye kungekudala, uYehova uya kuphelisa bonke ubuhlwempu nengcinezelo—enyanisweni, konke ukubandezeleka.—Efese 1:8-10.
Ingxaki Engenakuconjululwa Ngumntu
Ebudeni beenkulungwane ukususela ekudalweni komntu, uluntu luye lwayicezela imilinganiselo kaYehova. (Duteronomi 32:4, 5) Ekuqhubekeni kwabo beyigatya imithetho nemilinganiselo kaThixo, abantu baye balwa, yaye ‘umntu uye wagunyazela omnye kwakubi kuye.’ (INtshumayeli 8:9) Yonke imizamo yokuzisa ihlabathi elinobulungisa, elingenazo izinto ezimbi ezibangela abantu babandezeleke, iphazanyiswa ngabo bafuna ukuzenza ngendlela yabo izinto kunokuba bazithobe kulongamo lukaThixo.
Kukho nenye ingxaki—leyo abaninzi abanokungayikholelwa besithi ziinkolelo ezingabhadlanga. Umphembeleli wabantu ukuba bavukele uThixo naye usakhokelela abantu ebubini nasekuzingceni. NguSathana uMtyholi, yaye uYesu Kristu wambiza ngokuba ‘ngumphathi wehlabathi.’ (Yohane 12:31; 14:30; 2 Korinte 4:4; 1 Yohane 5:19) Kwisityhilelo esaboniswa umpostile uYohane, uSathana uchazwa njengombangeli wenkathazo—lowo ngokuyintloko ‘ulahlekisa umhlaba omiweyo uphela.’—ISityhilelo 12:9-12.
Kungakhathaliseki indlela abanye abantu ababanyamekela ngayo abanye, abanakuze bakwazi ukumsusa uSathana uMtyholi okanye baguqule le nkqubo izaliswe ngamaxhoba amaninzi andayo. Ngoko, yintoni efunekayo ukuze kuconjululwe iingxaki zoluntu? Isicombululo asingomntu onenkathalo nje kuphela. Kufuneka umntu onomnqweno namandla okutshabalalisa uSathana nayo yonke inkqubo yakhe engendawo.
“Makwenzeke Ukuthanda Kwakho . . . Nasemhlabeni”
UThixo uthembisa ukuyitshabalalisa le nkqubo yezinto ingendawo. Unomnqweno namandla afunekayo okwenza oko. (INdumiso 147:5, 6; Isaya 40:25-31) Kwincwadi yeBhayibhile yesiprofeto kaDaniyeli, kwaxelwa kwangaphambili ukuba: “Ngemihla yabo kumkani, uThixo wamazulu uya kumisa ubukumkani obungayi konakala naphakade. Obo bukumkani abuyi kusala nabantu bambi; buya kuzicola buzigqibe zonke ezo zikumkani, bona bume ngonaphakade”—ewe, bungabi nasiphelo. (Daniyeli 2:44) UYesu Kristu wayecinga ngorhulumente wasezulwini ongenasiphelo nonesisa xa wafundisa abafundi bakhe ukuba babongoze uThixo ngomthandazo bathi: “Mabufike ubukumkani bakho. Makwenzeke ukuthanda kwakho nasemhlabeni, njengasezulwini.”—Mateyu 6:9, 10.
UYehova uya kuyiphendula imithandazo enjalo ngenxa yokuba uyikhathalele ngokwenene intsapho engabantu. Ngokutsho kwamazwi esiprofeto akwiNdumiso 72, uThixo uya kuyalela uNyana wakhe, uYesu Kristu, ukuba azise isicombululo esingenasiphelo kwaba bangamahlwempu, ababandezelekileyo, nabacinezelekileyo abaxhasa ulawulo lukaYesu. Ngaloo ndlela, umdumisi ophefumlelweyo wacula esithi: “Makagwebe [uKumkani onguMesiya kaThixo] ityala labaziintsizana ebantwini, asindise oonyana bamahlwempu, abatyumze abacudisi. . . . Ngokuba uya kulihlangula ihlwempu elizibikayo, nabaziintsizana abangenaluncedo; abenzele inceba abasweleyo nabangamahlwempu; asindise imiphefumlo yamahlwempu; akhulule imiphefumlo yawo ekuxinezelweni nasekugonyamelweni.”—INdumiso 72:4, 12-14.
Kumbono ochaza ngomhla wethu, umpostile uYohane wabona “izulu elitsha nomhlaba omtsha,” inkqubo yezinto entsha ngokupheleleyo emiselwe nguThixo. Enjani yona intsikelelo okuya kuba yiyo oko kuluntu! Echaza kusengaphambili oko aya kukwenza uYehova, uYohane wathi: “Ndeva ilizwi elikhulu livela etroneni lisithi: ‘Khangela! Intente kaThixo iseluntwini, yaye uya kuhlala nalo, ibe lona luya kuba ngamaqela abantu bakhe. NoThixo ngokwakhe uya kuba nalo. Kwaye uya kuzisula zonke iinyembezi emehlweni alo, yaye ukufa akusayi kubakho, kungayi kubakho nakukhedama nasikhalo nantlungu kwakhona. Izinto zangaphambili zidlule.’ Waza Lowo uhleli etroneni wathi: ‘Khangela! Zonke izinto ndizenza ntsha.’ Kanjalo, uthi: ‘Bhala, ngenxa yokuba la mazwi athembekile ibe ayinyaniso.’ ”—ISityhilelo 21:1-5.
Ewe, sinokuwakholelwa la mazwi, kuba athembekile ibe ayinyaniso. Kungekudala emhlabeni uYehova uya kuphelisa ubuhlwempu, indlala, ingcinezelo, ukugula nako konke ukungabikho kokusesikweni. Kanye njengokuba eli phephancwadi belisoloko libonisa ngokuphuma eZibhalweni, kukho ubungqina obuninzi obubonisa ukuba siphila kumaxesha eziya kuzaliseka ngawo ezi ziprofeto. Ihlabathi elitsha elithenjiswe nguThixo lisemnyango! (2 Petros 3:13) Kungekudala, uYehova uya “kuginya ukufa kuphele” aze ‘azisule iinyembezi ebusweni bonke.’—Isaya 25:8.
De oko kwenzeke, sinokuvuya ngenxa yokuba bakho abantu abakhathala ngokwenene. Isizathu esingakumbi sokuba sivuye kukuba naye uYehova uThixo ukhathala ngokwenene. Kungekudala uza kuphelisa ingcinezelo nokubandezeleka.
Unokuba nentembelo yokwenene kwizithembiso zikaYehova. Ngokuqinisekileyo umkhonzi wakhe uYoshuwa wayenayo. Kungekho nanto eyayimthintela, wabaxelela oku abantu bakaThixo bamandulo: “Niyazi ngentliziyo yenu yonke, nangomphefumlo wenu wonke, ukuba akuwanga phantsi nalinye ilizwi emazwini onke alungileyo, abewathethile uYehova uThixo wenu ngani; onke enzekile kuni; akuwanga phantsi nalinye ilizwi kuwo.” (Yoshuwa 23:14) Ngoko, ngoxa le nkqubo yezinto isekho, musa ukoyiswa zizilingo ekunokufuneka ujamelane nazo. Liphosele kuYehova lonke ixhala lakho, kuba ukukhathalele.—1 Petros 5:7.
[Imifanekiso ekwiphepha 7]
Kwihlabathi elitsha elithenjiswe nguThixo, ubuhlwempu, ingcinezelo, ukugula nokungabikho kokusesikweni kuya kuphela emhlabeni