Ukwabelana Ngentuthuzelo Enikelwa NguYehova

“Ithemba lethu ngani alixengaxengi, sisazi njengoko kunjalo ukuba, kanye njengoko ninesabelo ngeembandezelo, ngendlela efanayo kanjalo niya kwabelana ngentuthuzelo.”—2 KORINTE 1:7.

1, 2. Ngawaphi amava abaye banawo abaninzi abaye bangamaKristu namhlanje?

ABANTU abaninzi abafunda IMboniselo ngoku bakhula bengenalo ulwazi ngenyaniso kaThixo. Mhlawumbi kunjalo nangawe. Ukuba kunjalo, cinga ngendlela owavakalelwa ngayo njengoko amehlo akho engqiqo ayeqalisa ukuvuleka. Ngokomzekelo, xa okwesihlandlo sokuqala wafunda ukuba abafi abathuthumbi kunoko abakho zingqondweni, ngaba akuzange kuthi ngco entliziyweni? Yaye xa weva ngethemba labafi, lokuba amawaka ezigidi aya kubuyiselwa ebomini kwihlabathi likaThixo elitsha, ngaba akuzange uthuthuzeleke?—INtshumayeli 9:5, 10; Yohane 5:28, 29.

² Kuthekani ngedinga likaThixo lokuphelisa ubungendawo aze aguqule lo mhlaba ube yiparadisi? Xa wafunda ngoku, ngaba akuzange kukuthuthuzele yaye kukwenze ukhangele phambili kwikamva? Wavakalelwa njani xa okwesihlandlo sokuqala wafunda ukuba unokungaze ufe kodwa unokusindela kwiParadisi yasemhlabeni ezayo? Ngokungathandabuzekiyo waba nemincili. Ewe, wawufumana isigidimi sikaThixo sentuthuzelo esishunyayelwa ehlabathini lonke ngoku ngamaNgqina kaYehova.—INdumiso 37:9-11, 29; Yohane 11:26; ISityhilelo 21:3-5.

3. Kutheni abo babelana nabanye ngesigidimi sikaThixo sentuthuzelo nabo bethwaxwa ziimbandezelo?

³ Noko ke, xa wazama ukwabelana nabanye ngesigidimi seBhayibhile, wafumanisa nokuba “ukholo asinto banayo bonke abantu.” (2 Tesalonika 3:2) Mhlawumbi bambi ababesakuba ngabahlobo bakho bakugculela ngokuba nokholo kumadinga eBhayibhile. Usenokuba wade watshutshiswa ngokuqhubeka ufundisisa iBhayibhile namaNgqina kaYehova. Loo nkcaso isenokuba yade yaqatha njengoko wawuqalisa ukwenza iinguqulelo ukuze ubomi bakho buvisisane nemigaqo yeBhayibhile. Waqalisa ukuyingcamla imbandezelo ebangelwa nguSathana nehlabathi lakhe kubo bonke abayamkelayo intuthuzelo kaThixo.

4. Ziziphi iindlela ezahlukeneyo abasenokuzisingatha ngazo iimbandezelo abasandul’ ukuba nomdla?

⁴ Njengoko uYesu waxela kwangaphambili, okulusizi kukuba imbandezelo yenza bambi bakhubeke baze bayeke ukunxulumana nebandla lamaKristu. (Mateyu 13:5, 6, 20, 21) Abanye bayayinyamezela imbandezelo ngokunamathelisa iingqondo zabo kumadinga athuthuzelayo abawafundayo. Ekugqibeleni bahlulela ubomi babo kuYehova baze babhaptizwe njengabafundi boNyana wakhe, uYesu Kristu. (Mateyu 28:19, 20; Marko 8:34) Kakade ke, imbandezelo ayipheli emva kokuba umKristu ebhaptiziwe. Ngokomzekelo, ukuhlala unyulu kunokuba lucelomngeni kumntu owayekade eziphethe kakubi. Abanye kufuneka bahlale besilwa nenkcaso yamalungu entsapho angakholwayo. Enoba bajamelana nayiphi na imbandezelo, bonke abathembekileyo kwikhondo labo lokuzahlulela kuThixo banokuqiniseka ngento enye. Ngamnye kubo uya kufumana intuthuzelo noncedo olunikelwa nguThixo.

‘UThixo Wentuthuzelo Yonke’

5. Ndawonye nezilingo ezininzi awajamelana nazo uPawulos, yintoni enye awaba namava ayo?

⁵ Umntu owayeyixabisa ngokunzulu intuthuzelo enikelwa nguThixo yayingumpostile uPawulos. Emva kwexesha elalizaliswe zizilingo eAsiya naseMakedoniya, wafumana isiqabu ngokuva ukuba ibandla laseKorinte lalisabele kakuhle kwileta awayelikhalimela kuyo. Oku kwamshukumisela ekubeni alibhalele ileta yesibini, equlethe amazwi endumiso alandelayo: “Makabongwe uThixo noYise weNkosi yethu uYesu Kristu, uYise weenceba zofefe noThixo wentuthuzelo yonke, osithuthuzelayo kuyo yonke imbandezelo yethu.”—2 Korinte 1:3, 4.

6. Sifunda ntoni kumazwi kaPawulos afumaneka kweyesi-2 yabaseKorinte 1:3, 4?

⁶ La mazwi aphefumlelweyo athetha lukhulu. Makhe siwahlolisise. Xa uPawulos edumisa okanye ebulela uThixo okanye ecela okuthile kuye kwiileta zakhe, ngokufuthi sifumanisa ukuba uquka namazwi abonakalisa uxabiso olunzulu ngoYesu, iNtloko yebandla lamaKristu. (Roma 1:8; 7:25; Efese 1:3; Hebhere 13:20, 21) Ngoko, uPawulos uvakalisa la mazwi endumiso athi “uThixo noYise weNkosi yethu uYesu Kristu.” Emva koko, okwesihlandlo sokuqala kwimibhalo yakhe, usebenzisa isibizo sesiGrike esiguqulelwe ngokuthi ‘iinceba zofefe.’ Esi sibizo sisuka kwigama elisetyenziselwa ukuchaza intlungu ngokubandezeleka komnye umntu. Ngoko uPawulos uthetha ngofefe uThixo analo ngaye nawuphi na umkhonzi wakhe othembekileyo obandezelekayo—ufefe olushukumisela uThixo ukuba abenzele inceba. Ekugqibeleni, uPawulos wayekhangela kuYehova njengomthombo wolu phawu luhle ngokumbiza ngokuba ‘nguYise weenceba zofefe.’

7. Kutheni sinokuthi uYehova ‘nguThixo wentuthuzelo yonke’?

⁷ ‘Iinceba zofefe’ zikaThixo zibangela isiqabu kumntu obandezelekileyo. Ngoko uPawulos uhlabela mgama echaza uYehova ‘njengoThixo wentuthuzelo yonke.’ Ngoko ke, enoba sifumana luphi na uhlobo lwentuthuzelo kwamanye amakholwa, sinokuqiniseka ukuba umthombo wayo nguYehova. Ayikho intuthuzelo yokwenene nehlala ihleli, ngaphandle kwephuma kuThixo. Ngapha koko, nguye owadala umntu ngokomfanekiselo wakhe, ngaloo ndlela esenza sikwazi ukuba ngabathuthuzeli. Yaye ngumoya oyingcwele kaThixo oshukumisela abakhonzi bakhe ukuba babonakalise inceba enofefe kwabo bafuna intuthuzelo.

Ukuqeqeshelwa Ukuba Ngabathuthuzeli

8. Nangona uThixo engenguye umthombo wezilingo zethu, kunokuba nawuphi umphumo oyingenelo ukunyamezela kwethu iimbandezelo?

⁸ Ngoxa uYehova uThixo ezivumela izilingo ezahlukahlukeneyo ukuba zibafikele abakhonzi bakhe abathembekileyo, akaze abe ngumthombo wezilingo ezinjalo. (Yakobi 1:13) Noko ke, intuthuzelo ayinikelayo xa sijamelene neembandezelo inokusiqeqeshela ukuba siziphaphele iimfuno zabanye. Ngawuphi umphumo? “Ukuze sikwazi ukuthuthuzela abo bakulo naluphi na uhlobo lwembandezelo ngayo intuthuzelo nathi ngokwethu esithuthuzelwa ngayo nguThixo.” (2 Korinte 1:4) Ngoko uYehova usiqeqeshela ukuba sabelane kakuhle ngentuthuzelo yakhe namanye amakholwa kuquka nabo sidibana nabo kubulungiseleli bethu njengoko sixelisa uKristu yaye ‘sithuthuzela bonke abanesijwili.’—Isaya 61:2; Mateyu 5:4.

9. (a) Yintoni eya kusinceda sinyamezele ukubandezeleka? (b) Abanye bathuthuzeleka njani xa sikunyamezela ngokuthembeka ukubandezeleka?

⁹ UPawulos wazinyamezela iimbandezelo zakhe ezininzi ngenxa yentuthuzelo egqithisileyo awayeyifumana kuThixo ngoKristu. (2 Korinte 1:5) Nathi sinokufumana intuthuzelo ngokucamngca ngamadinga kaThixo axabisekileyo, ngokuthandazela inkxaso yomoya wakhe oyingcwele, nangokubona uThixo eyiphendula imithandazo yethu. Ngaloo ndlela, siya komelela size siqhubeke siluphakamisa ulongamo lukaYehova yaye uMtyholi simngqine elixoki. (Yobhi 2:4; IMizekeliso 27:11) Xa siyisingatha ngokuthembeka nayiphi na imbandezelo, ngokufanayo noPawulos, yonke indumiso sifanele siyibhekise kuYehova, onika amaKristu intuthuzelo ewenza ahlale ethembekile ngaphantsi kwezilingo. Unyamezelo lwamaKristu athembekileyo luyintuthuzelo nakwabanye abazalwana, lubenza bazimisele ‘ukunyamezela iimbandezelo ezifanayo.’—2 Korinte 1:6.

10, 11. (a) Ziziphi ezinye zezinto ezalenza labandezeleka ibandla laseKorinte lamandulo? (b) UPawulos walithuthuzela njani ibandla laseKorinte, yaye wavakalisa liphi ithemba?

¹⁰ NabaseKorinte bazifumana iimbandezelo ezifikela onke amaKristu okwenyaniso. Ukongezelela, kwafuneka bafumane isiluleko sokumsusa kubudlelane umhenyuzi owayengafuni kuguquka. (1 Korinte 5:1, 2, 11, 13) Ukungalithabathi elo nyathelo nokungaziphelisi iimbambano neeyantlukwano kwakulizisele ihlazo elo bandla. Kodwa ekugqibeleni basisebenzisa isiluleko sikaPawulos baza babonakalisa inguquko esuk’ entliziyweni. Ngoko, wabancoma ngokufudumeleyo waza wabachazela nokuba ukusabela kwabo kakuhle kwileta yakhe kwamenza wathuthuzeleka. (2 Korinte 7:8, 10, 11, 13) Kubonakala ukuba, nowayesusiwe kubudlelane wayeguqukile. Ngoko uPawulos wabakhuthaza ukuba ‘bamxolele baze bamthuthuzele, ukuze angathi ngandlel’ ithile umntu onjalo aginywe kukuba buhlungu kwakhe ngokugqithiseleyo.’—2 Korinte 2:7.

¹¹ Ileta yesibini kaPawulos imele ukuba yalithuthuzela ngokwenene ibandla laseKorinte. Yaye oko kwakuyinxalenye yeenjongo zakhe. Wachaza: “Ithemba lethu ngani alixengaxengi, sisazi njengoko kunjalo ukuba, kanye njengoko ninesabelo ngeembandezelo, ngendlela efanayo kanjalo niya kwabelana ngentuthuzelo.” (2 Korinte 1:7) Ekuqukumbeleni ileta yakhe, uPawulos wababongoza: “Qhubekani . . . nithuthuzelwa . . . yaye uThixo wothando nowoxolo uya kuba kunye nani.”—2 Korinte 13:11.

12. Yiyiphi into efunwa ngawo onke amaKristu?

¹² Esinjani ukubaluleka isifundo esinokusifumana koku! Onke amalungu ebandla lamaKristu afanele “abelane ngentuthuzelo” enikelwa nguThixo ngeLizwi lakhe, umoya wakhe oyingcwele nangentlangano yakhe yasemhlabeni. Kwanabantu abasusiweyo kubudlelane basenokuyifuna intuthuzelo ukuba baye baguquka baza balilungisa ikhondo labo eliphosakeleyo. Ngaloo ndlela, “ikhoboka elithembekileyo neliyingqondi” liye lenza ilungiselelo lenceba lokubanceda. Kanye ngonyaka abadala ababini basenokubatyelela abathile abasusiweyo kubudlelane. Aba basenokuba abasabonakalisi moya wemvukelo okanye ababandakanyekanga kwisono esinzulu yaye basenokuba bafuna uncedo ukuze bathabathe amanyathelo ayimfuneko ukuze babuyiselwe.—Mateyu 24:45; Hezekile 34:16.

Imbandezelo KaPawulos EAsiya

13, 14. (a) UPawulos walichaza njani ixesha lembandezelo awayejamelene nayo eAsiya? (b) Sisiphi isiganeko asenokuba wayecinga ngaso uPawulos?

¹³ Iimbandezelo elalisele lijamelene nazo ibandla laseKorinte zazingenakuthelekiswa neembandezelo ezininzi awajamelana nazo uPawulos. Ngoko ke, wawakhumbuza oku: “Asinqweneli ukuba ningabi nalwazi, bazalwana, ngembandezelo eyenzeka kuthi kwisithili saseAsiya, ukuba sasikwingcinezelo egqithileyo ngaphaya kwamandla ethu, kangangokuba sasingaqinisekanga kakhulu kwanangobomi bethu. Enyanisweni, savakalelwa ngaphakathi kwethu kukuba sasifumene isigwebo sokufa. Oku yayikukuze sikholose, kungekhona ngathi ngokwethu, kodwa ngoThixo ovusa abafileyo. Kwinto enkulu kangako njengokufa wathi wasihlangula yaye uya kusihlangula; kwaye ithemba lethu likuye lokuba usaya kusihlangula ngokubhekele phaya.”—2 Korinte 1:8-10.

¹⁴ Bambi abaphengululi beBhayibhile bakholelwa kwelokuba uPawulos wayebhekisela kwisaqunge sase-Efese, engesasikhokelele ekufeni kukaPawulos namaqabane akhe amabini aseMakedoniya awayehambahamba nawo, uGayo noAristarko. La maKristu mabini agxagxanyiselwa kwibala elalizaliswe lihlokondiba ‘elalikhwaza kangangeeyure ezimalunga nezimbini lisithi: “Mkhulu uArtemis [uthixokazi] wamaEfese!”’ Ekugqibeleni, igosa lesixeko laphumelela ekusidambiseni eso sihlwele. Eso sisongelo kubomi bukaGayo noAristarko simele ukuba samnxunguphalisa ngokwenene uPawulos. Eneneni, wayefuna ukungena aze aqiqe neso sihlwele sinempambano, kodwa wanqandwa ukuba angabeki ubomi bakhe esichengeni ngokwenza loo nto.—IZenzo 19:26-41.

15. Yiyiphi imeko embi ngakumbi ekusenokuba kuthethwa ngayo kweyoku-1 kwabaseKorinte 15:32?

¹⁵ Noko ke, uPawulos usenokuba wayethetha ngemeko embi ngakumbi kunechazwe ngasentla. Kwileta yakhe yokuqala eya kwabaseKorinte, uPawulos wabuza: “Ukuba, njengabantu, ndiye ndalwa namarhamncwa e-Efese, kundilungela ngantoni na oko?” (1 Korinte 15:32) Oku kusenokuthetha ukuba ubomi bukaPawulos babusongelwa kungekhona ngabantu abafana namarhamncwa kuphela kodwa kwanazizilwanyana zasendle zokoqobo kwibala lase-Efese. Maxa wambi izaphuli-mthetho zazisohlwaywa ngokunyanzelwa ukuba zilwe namarhancwa ngoxa izihlwele ezinxanelwe igazi zibukele. Ukuba uPawulos wayethetha ukuba wayejamelene namarhamncwa okoqobo, umele ukuba wasinda ngokungummangaliso ngomzuzu wokugqibela ekufeni ngokumanyumnyezi, kanye njengokuba uDaniyeli wasindiswa emlonyeni weengonyama zokoqobo.—Daniyeli 6:22.

Imizekelo Yanamhlanje

16. (a) Kutheni amaNgqina kaYehova amaninzi enokuziqonda iimbandezelo awajamelana nazo uPawulos? (b) Yintoni esinokuqiniseka ngayo ngokuphathelele abo bafa ngenxa yokholo lwabo? (c) Ukusinda cebetshu kwamanye amaKristu kube nawuphi umphumo omhle?

¹⁶ AmaKristu anamhlanje amaninzi anokuziqonda iimbandezelo awajamelana nazo uPawulos. (2 Korinte 11:23-27) Nanamhlanje, amaKristu aye ‘akwingcinezelo egqithileyo engaphaya kwamandla awo,’ yaye amaninzi aye ajamelana neemeko ezawenza ‘akaqiniseka kakhulu ngobomi bawo.’ (2 Korinte 1:8) Wambi aye abulawa ngamahlokondiba nabatshutshisi abakhohlakeleyo. Sinokuqiniseka ukuba amandla kaThixo athuthuzelayo awenza akwazi ukunyamezela kwanokuba afa iintliziyo neengqondo zawo zimiliselwe kwinzaliseko yethemba lawo, enoba elo lithemba lasezulwini okanye lelasemhlabeni. (1 Korinte 10:13; Filipi 4:13; ISityhilelo 2:10) Kwezinye iimeko, uYehova uye wayisingatha ngokwakhe imicimbi, yaye abazalwana bethu baye basindiswa ekufeni. Ngokungathandabuzekiyo abo basindiswe ngolo hlobo baye banokholo olungakumbi ‘kuThixo ovusa abafileyo.’ (2 Korinte 1:9) Emva koko, baye bakwazi ukuthetha benolweyiseko olungakumbi xa besabelana nabanye ngesigidimi sikaThixo sentuthuzelo.—Mateyu 24:14.

17-19. Ngawaphi amava abonisa ukuba abazalwana bethu baseRwanda baye babelana ngentuthuzelo kaThixo?

¹⁷ Kutshanje abazalwana bethu abathandekayo baseRwanda baba namava afanayo nakaPawulos namaqabane akhe. Abaninzi bafa, kodwa imigudu kaSathana yokutshabalalisa ukholo lwabo ayizange iphumelele. Kunoko, abazalwana bethu beli lizwe baye bayibona ngeendlela ezininzi intuthuzelo enikelwa nguThixo. Ebudeni bembubhiso yamaTutsi namaHutu aseRwanda, kwakukho amaHutu awabeka ubomi bawo esichengeni ekhusela amaTutsi namaTutsi ekhusela amaHutu. Bambi babulawa ngenxa yokukhusela abanye abakholwa kunye nabo. Ngokomzekelo, iNgqina elingumHutu ekwakusithiwa nguGahizi labulawa emva kokufihla udade ongumTutsi ogama linguChantal. Umyeni kaChantal ongumTutsi, uJean, wayefihlwe kwenye indawo ngudade ongumHutu ogama linguCharlotte. Kangangeentsuku ezingama-40 uJean nomnye umzalwana ongumTutsi babezimele kwitshimini enkulu, bephuma ebusuku kangangexeshana elifutshane. Ngalo lonke elo xesha, uCharlotte wayebanika ukutya yaye ebakhusela, nangona ehlala kufutshane nenkampu yomkhosi wamaHutu. Kweli phepha, kukho umfanekiso kaJean noChantal sele bedibene kwakhona, bababulela ngokungazenzisiyo abakhonzi abakunye nabo abangamaHutu ‘ababeka iintamo zabo esichengeni’ ngenxa yabo, njengoko uPriska noAkwila benza kumpostile uPawulos.—Roma 16:3, 4.

¹⁸ Elinye iNgqina elingumHutu, uRwakabubu, lanconywa liphephandaba i-Intaremara ngokukhusela amanye amakholwa angamaTutsi.a Lathi: “Kukwakho noRwakabubu, omnye wamaNgqina kaYehova, owaqhubeka efihla abantu kwizindlu zabazalwana abahlukahlukeneyo (leyo yindlela abizana ngayo amakholwa). Wayedla ngokuchitha imini yonke ebaphathela ukutya namanzi okusela nangona engumntu wesifuba. Kodwa uThixo wamenza wanamandla ngendlela emangalisayo.”

¹⁹ Kwakhona, cinga ngesibini esinomdla esingamaHutu ekuthiwa nguNicodeme noAthanasie. Ngaphambi kokuqalisa kwembubhiso ebikwelo lizwe, esi sibini sitshatileyo sasifundisisa iBhayibhile neNgqina elingumTutsi ekuthiwa nguAlphonse. Sibeka ubomi baso esichengeni, safihla uAlphonse ekhayeni laso. Kamva saqonda ukuba ikhaya laso lalingeyondawo ikhuselekileyo kuba abamelwane abangamaHutu babesazi ukuba sasinomhlobo ongumTutsi. Ngoko ke, uNicodeme noAthanasie bafihla uAlphonse kumgxuma okwiyadi yabo. Eso yayisisenzo sobulumko kuba abamelwane babo baqalisa ukuza kumkhangela uAlphonse phantse mihla le. Ngoxa wayelele kuloo mngxuma kangangeentsuku ezingama-28, uAlphonse wayecamngca ngamabali eBhayibhile afana nelikaRahabhi, owafihla amaSirayeli amabini eluphahleni lwendlu yakhe eYeriko. (Yoshuwa 6:17) Namhlanje uAlphonse usaqhubeka ekhonza eRwanda njengomshumayeli weendaba ezilungileyo, enombulelo kuba izifundo zakhe zeBhayibhile ezingamaHutu zabeka ubomi bazo esichengeni ngenxa yakhe. Yaye kuthekani ngoNicodeme noAthanasie? Ngoku bangamaNgqina kaYehova abhaptiziweyo yaye baqhuba izifundo zeBhayibhile ezingaphezu kwama-20 nabantu abanomdla.

20. UYehova uye wabathuthuzela ngayiphi indlela abazalwana bethu baseRwanda, kodwa yintoni abasaqhubeka beyifuna abaninzi kubo?

²⁰ Ekuqaliseni kwembubhiso yaseRwanda, kwakukho abavakalisi beendaba ezilungileyo abangama-2 500 kwelo lizwe. Nangona abaninzi bafa okanye kwanyanzeleka ukuba balishiye elo lizwe, inani lamaNgqina liye landa langaphezu kwama-3 000. Obo bubungqina bokuba uThixo ebebathuthuzela abazalwana bethu. Kuthekani ngeenkedama nabahlolokazi abaninzi abaphakathi kwamaNgqina kaYehova? Njengoko kulindelekile, basathwaxwa ziimbandezelo yaye bayakufuna ukuhlala bethuthuzelwa. (Yakobi 1:27) Iinyembezi zabo ziya kosulwa ngokupheleleyo ekuqaliseni kovuko kwihlabathi likaThixo elitsha. Noko ke, ngoncedo nentuthuzelo yabazalwana babo nangenxa yokuba bengabanquli ‘boThixo wentuthuzelo yonke’ bayakwazi ukuqhubeka bephila.

21. (a) Ziziphi ezinye iindawo apho bebeyifuna ngamandla intuthuzelo kaThixo abazalwana bethu, yaye yiyiphi enye indlela esinokunceda ngayo xa sisonke? (Bona ibhokisi ethi “Intuthuzelo Ebudeni Beminyaka Emine Yemfazwe.”) (b) Ukufuna kwethu intuthuzelo kuya kwaneliswa nini ngokupheleleyo?

²¹ Kwezinye iindawo ezininzi, ezinjenge-Eritrea, eSingapore nakwindawo eyayisakuba yiYugoslavia, abazalwana bethu bayaqhubeka bekhonza uYehova ngokuthembeka phezu kwazo nje iimbandezelo. Ngamana singabanceda abo bazalwana ngokuhlala sithandazela ukuba bafumane intuthuzelo. (2 Korinte 1:11) Yaye ngamana singahlala sithembekile de lifike ixesha laxa uThixo esebenzisa uYesu Kristu eya “kuzisula zonke iinyembezi emehlweni [ethu]” ngengqiqo epheleleyo. Ngelo xesha siya kuyifumana ngokupheleleyo intuthuzelo uYehova aya kuyinikela kwihlabathi lakhe elitsha lobulungisa.—ISityhilelo 7:17; 21:4; 2 Petros 3:13.

[Umbhalo osemazantsi]

Ngaba Uyazi?

◻ Kutheni uYehova ebizwa ngokuba ‘nguThixo wentuthuzelo yonke’?

◻ Sifanele sizijonge njani iimbandezelo?

◻ Ngoobani esinokwabelana nabo ngentuthuzelo?

◻ Ukufuna kwethu intuthuzelo kuya kwaneliswa njani ngokupheleleyo?

[Umfanekiso okwiphepha 17]

UJean noChantal, nangona bengamaNgqina angamaTutsi, bafihlwa kwiindawo ezahlukeneyo ngamaNgqina angamaHutu ebudeni bembubhiso yaseRwanda

Picture on page 17]

AmaNgqina kaYehova ayaqhubeka esabelana nabamelwane bawo ngesigidimi sikaThixo sentuthuzelo eRwanda