‘Ukuwelela Ngaphaya’ Iminyaka Engaphezu Kwama-50
NGOKUBALISWA NGUEMMANUEL PATERAKIS
Kwiinkulungwane ezilishumi elinesithoba ezadlulayo umpostile uPawulos wafumana esi simemo singaqhelekanga: “Welela ngapha eMakedoniya uze usincede.” UPawulos walamkela ngezandla ezishushu elo thuba litsha ‘lokuvakalisa iindaba ezilungileyo.’ (IZenzo 16:9, 10) Nangona isimemo endasifumanayo singesosakudala kangako, kodwa kukwiminyaka engaphezu kwama-50 eyadlulayo endathi ndavuma ‘ukuwelela ngaphaya’ kwintsimi entsha ndinesimo sengqondo esikuIsaya 6:9: “Ndikho, thuma mna.” Ukuhambahamba kwam kakhulu kwenza ukuba ndiphiwe igama elithi Perpetual Tourist (uMahlal’ Ekhenketha), kodwa umsebenzi wam wawungafani nokukhenketha. Kangangezihlandlo eziliqela, ndakufika kwigumbi lam lehotele, bendiguqa ndize ndimbulele uYehova ngokundikhusela kwakhe.
NDAZALWA ngoJanuwari 16, 1916, eHierápetra, eCrete, yintsapho ezinikele gqitha kunqulo lobuOthodoki. Kwasebusaneni, uMama wayehamba nam kunye noodadewethu abathathu ukuya ecaweni ngeCawa. Utata yena wayekhetha ukuhlala ekhaya aze afunde iBhayibhile. Ndandimthanda utata—indoda enyanisekileyo, elungileyo yaye exolelayo—ibe ukufa kwakhe, xa ndandineminyaka esithoba ubudala, kwandichaphazela ngokunzulu.
Ndikhumbula xa ndandineminyaka emihlanu ubudala, ndifunda umbhalo esikolweni owawusithi: “Yonke into esingqongileyo ingqina ubukho bukaThixo.” Njengoko ndandikhula, ndandikholelwa ngokupheleleyo kuloo nto. Ngaloo ndlela, xa ndandineminyaka eli-11 ubudala, ndakhetha ukubhala isincoko esasinomxholo osekelwe kwiNdumiso 104:24 othi: “Hayi, ukuba zininzi izenzo zakho, Yehova! Zonke ziphela uzenze ngobulumko; uzele umhlaba zizidalwa zakho.” Ndandinemincili yimimangaliso yendalo, kwanezinto ezincinane ezinjengeembewu ezenziwe zaneempiko ezincinane ukuze ziphephetheke nomoya ukusuka kwimithunzi yemithi ezivelisayo. Emva kweveki ndisihambisile isincoko sam, umfundisi-ntsapho wam wasifundela iklasi yonke, waza emva koko wasifundela isikolo sonke. Ngelo xesha, abafundisi-ntsapho babesilwa neengcamango zobuKomanisi yaye babekuvuyela ukundiva ndithethelela ubukho bukaThixo. Mna, ndandivuyele nje ukuvakalisa ukukholelwa kwam kuMdali.
Iimpendulo Zemibuzo Yam
Ndisakukhumbula kakuhle ukudibana kwam okokuqala namaNgqina kaYehova ekuqaleni kweminyaka yee-1930. UEmmanuel Lionoudakis wayeshumayela kuzo zonke iidolophu needolophana zaseCrete. Ndathabatha iincwadana ezininzi kuye, kodwa yincwadi eyayinomxholo othi Bapina Abafileyo? eyayitsala gqitha ingqalelo yam. Ndandikoyika ngokungazenzisiyo ukufa kangangokuba ndandingafuni nokungena kwigumbi awayefele kulo utata. Njengoko ndandiyifunda izihlandlo eziliqela le ncwadana ndaza ndafunda oko iBhayibhile ikufundisayo ngemeko yabafi, ndaluva uloyiko lwam olwalubangelwa ziinkolelo luphela.
Kanye ngonyaka ebudeni behlobo, amaNgqina ayetyelela idolophu yethu aze andizisele uncwadi olungakumbi ukuze ndifunde. Ulwazi lwam ngeZibhalo lwaya lusanda ngokuthe ngcembe, kodwa ndaqhubeka ndisiya kwiCawa yobuOthodoki. Noko ke, incwadi ethi Deliverance yezisa iinguqu. Yawubonakalisa ngokucacileyo umahluko okhoyo phakathi kwentlangano kaYehova nekaSathana. Ukususela ngoko, ndaqalisa ukuyifunda rhoqo iBhayibhile nalo naluphi na uncwadi lweWatch Tower Society endandinokulufumana. Ekubeni amaNgqina kaYehova ayevalwe umlomo eGrisi, ndandifunda ngokufihlakeleyo ebusuku. Kodwa, ndaba nehlombe gqitha ngoko ndandikufunda kangangokuba andizange ndikwazi ukuzibamba ekuthetheni nabantu bonke ngako. Kungekudala amapolisa andirhanela, endityelela rhoqo nanini na ebusuku nasemini efuna uncwadi.
Ngowe-1936, ndaya entlanganisweni okokuqala, kumgama oziikhilomitha ezili-120 ukusuka eIráklion. Ndavuya gqitha ndakudibana namaNgqina. Inkoliso yawo yayingamadoda athobekileyo, ubukhulu becala ingabalimi, kodwa andinceda andeyisela ekubeni yinyaniso le. Ngoko nangoko ndazahlulela kuYehova.
Ukubhaptizwa kwam sisiganeko endingasayi kuze ndisilibale. Ngobunye ubusuku ngowe-1938, mna nezifundo zam zeBhayibhile ezibini sathatyathwa nguMzalwan’ uLionoudakis ngongcwalazi wasisa elunxwemeni. Emva kokuthandaza, wasifak’ emanzini.
Ukubanjwa
Andizibaxi izinto xa ndisithi, kwisihlandlo sokuqala ndisiya kushumayela saba namahla-ndinyuka. Ndadibana nomhlobo wam wakudala ndisesesikolweni owayesele engumfundisi, ibe ndaba nengxubusho entle kunye naye. Kodwa emva koko wandichazela ukuba ngokomyalelo webhishophu, wayenyanzelekile ukuba andibambe. Ngoxa sasilinde kwiofisi kasodolophu ukuba kufike amapolisa avela kwidolophana ekude kufuphi, kwahlanganisana isihlwele esithile ngaphandle. Ngoko ndathabatha iTestamente Entsha yesiGrike eyayikuloo ofisi ndaza ndaqalisa ukunikela intetho esekelwe kuMateyu isahluko 24. Ekuqaleni aba bantu abazange bafune ukuphulaphula, kodwa lo mfundisi wangenelela. Wathi: “Myekeni athethe. Usebenzisa iBhayibhile yethu.” Ndakwazi ukuthetha kangangeyure enesiqingatha. Ngaloo ndlela usuku lwam lokuqala kubulungiseleli lwaba lusuku endandiqala ukunikela intetho yesidlangalala ngalo. Ekubeni amapolisa ayengekafiki ukugqiba kwam, usodolophu naloo mfundisi bagqiba kwelokuba iqela elithile lamadoda lindikhuphele ngaphandle kwaloo dolophu. Kwigophe lokuqala laloo ndlela, ndasimbela isinqe kangangoko ndandinako ukuze ndiphephe amatye awayewagibisela.
Ngosuku olulandelayo amapolisa amabini, ekhatshwa ngubhishophu, andibamba ndisemsebenzini. Sakufika kwisikhululo samapolisa, ndakwazi ukunikela ubungqina kubo ndisebenzisa iBhayibhile, kodwa ekubeni uncwadi lwam lweBhayibhile lwalungenaso isitampu sikabhishophu esingokwasemthethweni, ndatyholwa ngokwenza amaguquka nangokusasaza uncwadi olungekho mthethweni. Ndakhululwa ndaza ndalinda ukuchotshelwa kwelo tyala.
Ityala lam lachotshelwa emva kwenyanga. Xa ndandizithethelela ndachaza ukuba ndandithobela umyalelo kaKristu wokushumayela kuphela. (Mateyu 28:19, 20) Ijaji yaphendula ngeliphoxayo isithi: “Mntwan’ am, Lowo wanikela loo myalelo wabethelelwa emthini. Ngelishwa, andinalo igunya lokukohlwaya ngolo hlobo wena.” Noko ke, igqwetha eliselula endandingalazi laphakama laza landithethelela, lisithi ekubeni ubuKomanisi nokungakholelwa kubukho bukaThixo kuxhaphakile, inkundla yayimele ibe neqhayiya kuba kukho abafana ababekulungele ukuthethelela iLizwi likaThixo. Landula ke landincoma ngokufudumeleyo ngengxelo yam entle ebhaliweyo, eyayikwifayile yam. Lichukunyiswe kukuba ndiselula, landimela ngaphandle kokufuna intlawulo. Kunokugwetywa ubuncinane iinyanga ezintathu, ndagwetywa iintsuku ezilishumi kuphela entolongweni ndaza ndahlawuliswa iidrachma ezingama-300. Loo nkcaso yasuka yasomeleza isigqibo sam sokukhonza uYehova ndize ndimele inyaniso yakhe.
Ngesinye isihlandlo xa ndandibanjiwe, ijaji yaphawula indlela endandiyicaphula lula ngayo iBhayibhile. Yacela ubhishophu ukuba aphume eofisini yayo, isithi: “Uwenzile umsebenzi wakho. Ndiza kubona ukuba ndenze ntoni ngaye.” Yandula ke yakhupha iBhayibhile yayo, saza sathetha ngoBukumkani bukaThixo yonke loo mvakwemini. Iziganeko ezinjalo zazindikhuthaza ukuba ndiqhubeke phezu kwabo nje ubunzima.
Ukugwetyelwa Intambo
Ngowe-1940, ndabizwa kwinkonzo yasemkhosini ndaza ndabhala ileta ndicacisa isizathu sokuba ndingavumi ukuya. Emva kweentsuku ezimbini ndabanjwa ndaza ndabethwa kanobom ngamapolisa. Ndandula ke ndathunyelwa edabini eAlbania, apho ndavavanywa yinkundla yasemkhosini ngenxa yokuba ndingazange ndivume ukulwa. Abasemagunyeni emkhosini bandixelela ukuba babengenamdla wakwazi enoba ndandisenza into elungileyo okanye engalunganga ngaphezu kokuxhalabela impembelelo owawuya kuba nayo umzekelo wam emajonini. Ndagwetywa intambo, kodwa ngenxa yesiphazamiso esithile esingokwasemthethweni, kwatsho kwathi qabu xa esi sigwebo sathotywa saba yiminyaka elishumi yokusebenza nzima. Iinyanga ezimbalwa ezalandelayo ndazichitha kwintolongo yasemkhosini eGrisi phantsi kweemeko ezinzima kakhulu, nangoku endisathwaxwa yimiphumo yazo ngokwasemzimbeni.
Noko ke, ukuba sentolongweni akuzange kundiyekise ukushumayela. Akunjalo konke konke! Kwakulula ukuqalisa incoko, ekubeni abaninzi babezibuza ukuba wayefuna ntoni umntu ongelojoni kwintolongo yomkhosi. Enye ingxubusho endaba nayo nomnye umfana onyanisekileyo yakhokelela kwisifundo seBhayibhile kwintendelezo yentolongo. Emva kweminyaka engama-38 ndadibana nalo mfo kwakhona endibanweni. Wayeyamkele inyaniso ibe wayekhonza njengomveleli webandla kwisiqithi saseLefkás.
Xa imikhosi kaHitler yahlasela iYugoslavia ngowe-1941, satshintshelwa emazantsi kwintolongo esePreveza. Ebudeni bolo hambo, umngcelele weenqwelo esasihamba ngazo wahlaselwa ziinqwelo-moya zomkhosi zaseJamani, ibe thina mabanjwa asizange siphiwe kutya. Xa laphelayo iqhekeza lesonka endandinalo, ndathandaza kuThixo ndisithi: “Ukuba kukuthanda kwakho ukuba ndibulawe yindlala emva kokuba undisindise kwisigwebo sentambo, makwenzeke ke ukuthanda kwakho.”
Ngosuku olulandelayo igosa elithile landikrwecela bucala ngexesha ekwakuhlolwa ngalo amabanjwa, laza lakuba liqondile ukuba ndingowaphi, ngoobani abazali bam nesizathu sokuba ndibe sentolongweni, lathi mandililandele. Landisa kwindawo atyela kuyo amagosa edolophini landalathisa itafile eyayinesonka, isonka samasi nenyama yegusha eyosiweyo, laza lathi manditye. Kodwa ndalicacisela ukuba ekubeni amanye amabanjwa angama-60 ayengenanto yokutya, isazela sam sasingandivumeli ukuba nditye. Eli gosa laphendula: “Andinakondla wonk’ ubani! Uyihlo wayenobubele gqitha kum. Ndiziva ndibophelelekile ukuba ndikuncede kodwa akunjalo ngabanye aba.” Ndaphendula ndathi: “Ukuba kunjalo ke ndiyahamba ndiphindela emva.” Lacinga okomzuzwana laza landinika ingxowa enkulu ukuze ndifake ukutya okuninzi kangangoko ndandinako.
Ekufikeni kwam entolongweni, ndabeka phantsi loo ngxowa ndaza ndathi: “Naku ukutya kwenu manene.” Oku kwangqamana nento eyayenzeke ngengokuhlwa yezolo, amanye amabanjwa ayendibeka ityala ngemeko awayekuyo kuba ndandingafuni ukuthelela kwimithandazo yawo kuMariya Onyulu. Noko ke, ndathethelelwa lelinye iKomanisi. Ngoku lakubona ukutya, lathi kwabanye: “Uphi ‘uMariya Onyulu’ wenu? Benisithi siza kufa ngenxa yalo mfo, kodwa nguye osiphathela ukutya.” Emva koko labhekisa kum lisithi: “Emmanuel! Yiza uzokuthandaza.”
Kamsinya emva koko, ukuhlasela komkhosi waseJamani kwabangela abagcini-mabanjwa basabe, saza sakhululeka ekuthinjweni. Ndasinga ePatras ukuze ndifumane amanye amaNgqina ngaphambi kokuba ndiye eAthens ekupheleni kukaMeyi wowe-1941. Apho ndakwazi ukufumana ezinye iimpahla nezihlangu ndaza ndakwazi nokuhlamba umzimba wam emva kwesithuba esingaphezu konyaka ndingasawazi amanzi. AmaJamani ayendiyekisa rhoqo ukushumayela de emka, kodwa awazange andibambe. Elinye lawo lathi: “EJamani siyawadubula amaNgqina kaYehova. Kodwa apha akwaba zonke iintshaba zethu bezingamaNgqina!”
Umsebenzi Wasemva Kwemfazwe
Ngokungathi iGrisi yayingekaneli yimfazwe, yaqhubeka idlakazeliswa yimfazwe yamakhaya ukususela ngowe-1946 ukuya kowe-1949, ibulala amawaka abantu. Abazalwana babelufuna gqitha ukhuthazo ukuze bahlale bomelele xa ukuya nje ezintlanganisweni kwakunokubangela ukuba babanjwe. Abazalwana abaninzi bagwetywa intambo ngenxa yobundilele babo. Kodwa phezu kwako nje oku, abantu abaninzi basabela kwisigidimi soBukumkani, ibe sasiba nomntu omnye okanye ababini ababhaptizwayo veki nganye. Ukususela ngowe-1947, ndaqalisa ukusebenza kwiiofisi zoMbutho eAthens ebudeni bemini ndize ndityelele amabandla njengomveleli ohambahambayo ebusuku.
Ngowe-1948, ndavuya ndakufumana isimemo sokuya kwiSikolo seBhayibhile seWatchtower saseGiliyadi, eUnited States. Kodwa ndandinengxaki. Ngenxa yamatyala am angaphambili, ndandingakwazi ukufumana incwadana yokundwendwela. Noko ke, esinye sezifundo zam zeBhayibhile sasinobuhlobo nenjengele ethile. Ngenxa yesi sifundo, kwiiveki nje ezimbalwa, ndayifumana incwadana yam yokundwendwela. Kodwa ndaba nexhala xa, ngaphambi nje kokuba ndihambe, ndabanjwa ngenxa yokuhambisa IMboniselo. Ipolisa elithile landisa kumphathi weState Security Police eAthens. Ndamangaliswa ngokupheleleyo kukuthi kanti wayengomnye wabamelwane bam! Eli polisa lachaza isizathu sokuba ndibanjwe laza lamnika isixa samaphephancwadi. Ummelwane wam wakhupha imfumba yeeMboniselo kwidesika yakhe waza wathi kum: “Andinayo inkupho yakutshanje. Ngaba ndingawufumana omnye umbhalo wayo?” Kwatsho kwathi qabu unoqolomb’ efile nje ndakubona uncedo lukaYehova kwimibandela enjalo!
Iklasi ye-16 yaseGiliyadi, ngowe-1950, yayingamava atyebileyo. Ekupheleni kwayo, ndabelwa eCyprus, apho kungekudala ndafumanisa ukuba inkcaso yabefundisi yayisophul’ izikeyi njengaseGrisi. Ngokufuthi kwakufuneka sijamelane namahlokondiba abazondeleli abanempambano bonqulo ababephambaniswe yimpembelelo yabefundisi bamaOthodoki. Ngowe-1953 imvume yam yokuhlala eCyprus ayizange ihlaziywe, ibe ndabelwa eIstanbul, eTurkey. Nalapho, andizange ndihlale xesha lide. Ungquzulwano lwezobupolitika olwaluphakathi kweTurkey neGrisi lwabangela ukuba, phezu kwayo nje imiphumo emihle kumsebenzi wokushumayela, ndinyanzeleke ukuba ndiye kwesinye isabelo—e-Egypt.
Ngoxa ndandisentolongweni, ndandidla ngokucinga ngeNdumiso 55:6, 7. Apho uDavide wayevakalisa umnqweno wokusabela entlango. Ayizange ithi qatha engqondweni yam into yokuba ngenye imini ndandiya kufika apho. Ngowe-1954, emva kohambo oludinayo lweentsuku eziliqela ngololiwe nangephenyane kumNayile, ndade ndafika apho ndandisiya khona—eKhartoum, eSudan. Ekuphela kwento endandifuna ukuyenza yayikukuhlamba umzimba ndize ndilale. Kodwa ndandilibele ukuba kwakusemin’ emaqanda. Amanzi, awayegcinwe kwitanki eliphezu kophahla lwendlu, anditshisa, ndaza ndanyanzeleka ukuba ndinxibe umnqwazi ofana nesigcina-ntloko wokukhusela ilanga kangangeenyanga eziliqela de intlonze yam iphole.
Ngokufuthi ndandiziva ndililolo apho, ndindedwa phakathi kwiSahara, kwiikhilomitha eziliwaka elinamakhulu amathandathu ukusuka kwelona bandla likufutshane, kodwa uYehova wandilondoloza waza wandinika amandla okuqhubeka. Maxa wambi ukhuthazo lwaluvela kubantu endandingazange ndilulindele kubo. Ngenye imini ndadibana nomalathisi weMyuziyam yaseKhartoum. Wayenengqondo ephangaleleyo, ibe saba nengxubusho entle. Akuva ukuba ndandingumGrike, wandibuza ukuba ndandingenakumnceda na ngokuya kwimyuziyam ndize ndiguqulele imibhalo ethile ekwizinto ezafunyanwa kwicawa yenkulungwane yesithandathu. Emva kweeyure ezintlanu ndifuthaniseleke kumgangatho ongaphantsi komhlaba, ndafumana isityana esasinegama likaYehova, iTetragrammaton. Khawuthelekelele uvuyo endaba nalo! EYurophu akunto ingaqhelekanga ukubona igama likaThixo ezicaweni, kodwa akuqhelekanga oko kumbindi weSahara!
Emva kwendibano yezizwe ngezizwe ngowe-1958, ndafumana isabelo sokuba ngumveleli wecandelo ndize ndityelele abazalwana kumazwe angama-26 nakwimimandla ekuMbindi nakwiMpuma Ekufutshane nengqonge iMeditera. Ngokufuthi ndandingayazi indlela yokuphuma kwimeko enzima, kodwa uYehova wayesoloko esenza icebo lokuphuma.
Ndandisoloko ndichukunyiswa yinkathalo ebonakaliswa yintlangano kaYehova kumaNgqina awayekwiindawo ezikwanti kumazwe athile. Ngesinye isihlandlo, ndadibana nomzalwana ongumIndiya owayesebenza kwindawo evelisa ioli. Kubonakala ngathi yayinguye yedwa iNgqina kwelo lizwe. Kwindawo agcina kuyo impahla yakhe wayeneempapasho zeelwimi ezahlukeneyo ezili-18, awayezinika abo wayesebenza nabo. Kwanakwelo lizwe apho lonke olunye unqulo luvalwe umlomo ngokungqongqo, umzalwana wethu akazange ayilibale imbopheleleko yakhe yokushumayela iindaba ezilungileyo. Abahlobo bakhe bachukumiseka bakubona ukuba kwakuthunyelwe ummeli wonqulo lwakhe ukuba aze kumtyelela.
Ngonyaka we-1959 ndandityelela eSpeyin nasePortugal. Omabini la mazwe ayephantsi kolawulo loozwilakhe bomkhosi ngelo xesha, yaye umsebenzi wamaNgqina kaYehova wawuvalwe umlomo ngokungqongqo. Ngenyanga enye ndakwazi ukuqhuba iintlanganiso ezingaphezu kwekhulu, ndikhuthaza abazalwana ukuba bangayekeleli phezu kwabo nje ubunzima.
Andindedwa Ngoku
Kangangeminyaka engaphezu kwama-20, bendikhonza uYehova kwinkonzo yexesha elizeleyo njengendoda engatshatanga, kodwa ndasuka ndadikwa kukusoloko ndihamba ndingenakhaya elisisigxina. Kwakumalunga nelo xesha endadibana noAnnie Bianucci, uvulindlela okhethekileyo waseTunisia. Satshata ngowe-1963. Uthando lwakhe ngoYehova nangenyaniso, ukuzinikela kwakhe kubulungiseleli kunye nobuchule bakhe bokufundisa, nokwazi kwakhe iilwimi kwangqineka kuyintsikelelo yokwenene kubulungiseleli bethu nakumsebenzi wesiphaluka kumntla nakwintshona Afrika naseItali.
NgoAgasti wowe-1965 mna nomkam sabelwa eDakar, eSenegal, apho ndaba nelungelo lokulungelelanisa iofisi yesebe yalapho. ISenegal yayililizwe elalibalasele ngokuvumela lonke unqulo, alithandabuzeki elokuba oko kwakungenxa yomongameli walo uLeopold Senghor, omnye wabalawuli bamazwe aseAfrika abambalwa ababhalela uMongameli uBanda waseMalawi bexhasa amaNgqina kaYehova ebudeni bentshutshiso ekrakra eyayiseMalawi kwiminyaka yee-1970.
Intsikelelo KaYehova Etyebileyo
Ngowe-1951, xa ndandishiya iGiliyadi ndisiya eCyprus, ndahamba ndiphethe iisutikheyisi ezisixhenxe. Xa ndandisiya eTurkey, zazihle zaya kutsho kwezintlanu. Kodwa ekubeni ndandihamba gqitha, kwafuneka ndiqhelane nokulinganisela umthwalo wam kwiikhilogram ezingama-20, kuquka iifayile zam kunye nomatshini wokuchwetheza “omncinane.” Ngenye imini ndathi kuMzalwan’ uKnorr, ngoko owayengumongameli weWatch Tower Society: “Niyandikhusela ekuthandeni izinto eziphathekayo. Nindenza ndiphile ngeekhilogram ezingama-20, ibe ndiyaphumelela ngokwenjenjalo.” Andizange ndizive ndicinezelekile ngenxa yokungabi nezinto ezininzi.
Eyona ngxaki yam inkulu ebudeni bokuhambahamba kwam yayikukungena nokuphuma emazweni. Ngenye imini kwilizwe apho umsebenzi wawuvaliwe, igosa elihlola izinto ezingenayo neziphumayo laqalisa ukuphengulula iifayile zam. Oku kwakuwabeka engozini amaNgqina elo lizwe, ngoko ndakhupha ileta eyayivela kumkam ebhatyini yam ndaza ndathi kweli gosa lihlolayo: “Ndiyabona ukuba uyathanda ukufunda iileta. Ngaba ungakuvuyela ukufunda nale leta ivela kumkam, engekhoyo kwiifayile?” Lidanile, langxengxeza laza landivumela ukuba ndidlule.
Ukususela ngowe-1982 mna nomkam besikhonza njengabavangeli basemazweni eNice, kumzantsi weFransi. Ngenxa yempilo enkenenkene, andisakwazi ukwenza njengoko ndandisenza. Kodwa oko akuthethi kuthi uvuyo lwethu luye lwaphela. Siye sabona ukuba ‘ukubulaleka kwethu akulolize.’ (1 Korinte 15:58) Ndiye ndavuya ndakubona abantu abaninzi endiye ndanelungelo lokufundisisa nabo kwiminyaka edluleyo kunye namalungu entsapho yam angaphezu kwama-40 ekhonza uYehova ngokuthembeka.
Andizisoli tu kwaphela ngokuzincama okuye kwabangelwa bubomi bam ‘bokuwelela ngaphaya.’ Ngapha koko, akukho ukuzincama esikwenzayo okunokulingana noko uYehova noNyana wakhe, uKristu Yesu, abaye basenzela kona. Xa ndikhumbula iminyaka engaphezu kwama-60 endiye ndasenyanisweni ngayo, ndinokutsho ndithi uYehova uye wandithululela iintsikelelo. Kunjengoko iMizekeliso 10:22 isitsho, “intsikelelo kaYehova, yiyo etyebisayo.”
Alithandabuzeki elokuba ‘inceba kaYehova ilungile ngaphezu kobomi.’ (INdumiso 63:3) Njengoko iingxaki zokwaluphala zisanda, ngokufuthi ndiye ndikhankanye amazwi omdumisi ophefumlelweyo emithandazweni yam: “Ndizimela ngawe, Yehova, mandingaze ndidane naphakade. Ngokuba ulithemba lam, Nkosi yam, Yehova, inkoloseko yam kwasebuncinaneni bam. Thixo, undifundisile kwasebuncinaneni bam; unangoku ndiyayixela imisebenzi yakho ebalulekileyo. Thixo, musa ukundishiya kude kuye ebuxhegweni nasezimvini.”—INdumiso 71:1, 5, 17, 18.
[Umfanekiso okwiphepha 25]
Ndikunye nomkam, uAnnie, namhlanje