Ukumnika Oko Kumfaneleyo UYehova

NGOKUBALISWA NGUTIMOLEON VASILIOU

Ndandibanjelwe ukufundisa ngeBhayibhile kwidolophana yaseAidhonochori. Amapolisa andikhulula izihlangu aza andibetha ngaphantsi konyawo. Njengokuba ndandibethwa, iinyawo zam zaba ndindisholo yaye ndandingaseva neentlungu. Ngaphambi kokuba ndicacise oko kwakhokelela koku kuxhatshazwa, nto leyo eyayinganqabanga kangako eGrisi, mandibalise indlela endaba ngumfundisi weBhayibhile ngayo.

KUNGEKUDALA emva kokuba ndizelwe ngowe-1921, intsapho yakowethu yafudukela kwidolophu yaseRodholívos, kumantla eGrisi. Ebutsheni bam ndandingalawuleki. Xa ndandineminyaka eli-11, ndaqalisa ukutshaya. Kamva, ndaba linxila nomngcakazi yaye ndandisiya kumatheko andlongondlongo phantse busuku ngabunye. Ndandikwazi ukucula, ngoko ndaba lilungu lelinye iqela lasekuhlaleni. Ngonyaka nje omnye, ndandikwazi ukuzidlala phantse zonke izixhobo zelo qela. Ukanti, kwangaxeshanye, ndandikuthanda ukufunda yaye ndikuthanda okusesikweni.

Ekuqaleni kowe-1940, xa kwaqhambuka IMfazwe Yehlabathi II, iqela lethu lamenywa ukuba licule kumngcwabo wentombazana eselula. Xa sasisemangcwabeni, izalamane nezihlobo zazikhala zingakwazi nokuzibamba ngenxa yentlungu. Ukungabi nathemba okunje kwandenza ndacingisisa nzulu ngezinto. Ndaqalisa ukuzibuza, ‘Kutheni sisifa? Ngaba ikho enye into ebalulekileyo ebomini kunokuphila nje ixesha elifutshane? Ndinokuzifumana phi iimpendulo?’

Kwiintsuku ezimbalwa kamva ndabona umbhalo weTestamente Entsha kwithala leencwadi endlwini yam. Ndayithabatha ndaza ndaqalisa ukuyifunda. Xa ndafunda amazwi kaYesu akuMateyu 24:⁠7 angemfazwe eyayiza kubakho ngomlinganiselo omkhulu njengenxalenye yobukho bakhe, kwatsho kwaqondakala kum ukuba la mazwi kumele ukuba asebenza kwixesha lethu. Kwiiveki ezalandelayo, ndafunda lo mbhalo weZibhalo zesiGrike zamaKristu izihlandlo eziliqela.

Emva koko ngoDisemba 1940, ndatyelela intsapho ekufuphi​—⁠umhlolokazi nabantwana bakhe abahlanu. Kwigumbi elingaphantsi kophahla lwabo, phakathi kweencwadana eziliqela, ndafumana enye ethi A Desirable Government, epapashwe yiWatch Tower Bible and Tract Society. Ndahlala apho kwelo gumbi ndayifunda yonke loo ncwadana. Ngenxa yoko ndakufundayo ndeyiseka kwelokuba ngokwenene siphila kumaxesha iBhayibhile ewabiza ngokuba ‘yimihla yokugqibela’ nokuba uYehova uThixo kungekudala uza kuphelisa le nkqubo yezinto ize ithatyathelw’ indawo lihlabathi elitsha elinobulungisa.​—⁠2 Timoti 3:​1-⁠5; 2 Petros 3:⁠13.

Eyona nto yandichukumisa ngakumbi yayibubungqina obungokweZibhalo bokuba abathembekileyo baya kuhlala ngonaphakade kumhlaba oyiparadesi yaye akusayi kubakho kubandezeleka nokufa kwihlabathi elitsha phantsi kolawulo loBukumkani bukaThixo. (INdumiso 37:​9-11, 29; ISityhilelo 21:​3, 4) Njengokuba ndandifunda, ndambulela uThixo ngomthandazo ngenxa yezi zinto, ndaza ndamcela ukuba andibonise oko akufunayo. Ndacacelwa ukuba uYehova uThixo ufuna ndizinikezele ngomphefumlo uphela.​—⁠Mateyu 22:⁠37.

Ukwenza Oko Ndakufundayo

Ukususela ngelo xesha ukusa phambili, ndayeka ukutshaya, ndayeka ukunxila nokungcakaza. Ndabiza lo mhlolokazi nabantwana bakhe abahlanu nabantwana basekhaya abaza emva kwam abathathu, ndaza ndabacacisela oko ndandikufunde kuloo ncwadana. Kungekudala sakusasaza oko kuncinane sasikwazi. Ekuhlaleni saye saziwa njengamaNgqina kaYehova, nangona sasingazange sidibane nalo naliphi na elinye iNgqina. Ukususela ngoko, ndandichitha ixesha elingaphezu kweeyure ezilikhulu ndichazela abantu ngezinto endizifundileyo ezimangalisayo.

Omnye umfundisi wamaGrike obuOthodoki waya kusibonda wedolophu eyokukhalazela thina. Kodwa kwiintsuku ezidluleyo ngaphambili, thina singazi, iNgqina eliselula, lalifumene ihashe elalilahlekile laza lalibuyisela kumninilo. Ngenxa yokuthembeka okunjalo, usibonda wedolophu wawahlonela amaNgqina, yaye akazange avume ukumphulaphula umfundisi.

Ngenye imini mhlawumbi ngo-Oktobha 1941, ngoxa ndandinikela ubungqina emarikeni, umntu othile wathetha ngeNgqina likaYehova elalihlala kwidolophu ekufuphi. Lalisakuba lipolisa yaye igama lalo lalinguChristos Triantafillou. Ndahamba ukuya kulibona ndaza ndafumanisa ukuba yayiliNgqina ukususela ngowe-1932. Hayi indlela endavuya ngayo xa wandinika ezinye iimpapasho ezindala zeWatch Tower! Ezi zandinceda ndenza inkqubela ngokomoya.

Ngowe-1943, ndafuzisela uzahlulelo lwam kuThixo ngokubhaptizwa emanzini. Ngelo xesha ndandiqhuba izifundo zeBhayibhile kwiidolophana ezintathu​—⁠eDhravískos, ePalaeokomi, naseMavrolofos. Kufundisiso lwethu lweBhayibhile sasisebenzisa incwadi ethi Uhadi LukaThixo. Ekugqibeleni, ndaba nelungelo elingakumbi lokubona amabandla amane amaNgqina kaYehova esekwa kulo mmandla.

Ukushumayela Phezu Kwayo Nje Imiqobo

Ngowe-1944, iGrisi yayeka ukuba phantsi kweJamani, yaye kamva, kwabakho unxulumano neofisi yesebe yeWatch Tower Society eAthens. Iofisi yesebe yandimema ukuba ndibe nesabelo ekushumayeleni kwiindawo phantse esingazange sishunyayelwe kuyo isigidimi soBukumkani. Emva kokufudukela apho, ndasebenza efama kangangeenyanga ezintathu yaye ndachitha unyaka wonke kubulungiseleli.

Ngaloo nyaka ndasikelelwa ngokubona umama ebhaptizwa, kwanomhlolokazi nabantwana bakhe, ngaphandle kwentombi yakhe encinane, uMarianthi, eyabhaptizwa ngowe-1943 yaza yaba ngumfazi wam endimthandayo ngoNovemba waloo nyaka. Kwiminyaka engama-30 kamva, ngowe-1974, utata naye waba liNgqina elibhaptiziweyo.

Ebutsheni bowe-1945 safumana umbhalo weMboniselo (yesiNgesi) okhutshelwe ngomatshini wokukhuphela uvela kwiofisi yesebe. Inqaku elalibalaseliswa lalisithi “Hambani, Nenze Abafundi Iintlanga Zonke.” (Mateyu 28:​19, The Emphatic Diaglott) Mna noMarianthi semka ekhaya ngokukhawuleza ukuya kusebenza kwimimandla ekude kwimpuma yoMlambo iStrymon. Kamva sathelelwa ngamanye amaNgqina.

Ngokufuthi sasihamba ngeenyawo ukuze sifike kwidolophana ethile, sihamba iikhilomitha kwiingxingwa nasezintabeni. Sasisenza oku ukuze sigcine izihlangu zethu ngenxa yokuba xa ziguga, sasingayi kuba nazo ezinye. Ebudeni bowe-1946 ukusa kowe-1949, kwakukho imfazwe yamakhaya eGrisi, yaye kwakuyingozi gqitha ukuhamba. Yayingento ingaqhelekanga ukubona izidumbu ziqungquluze ecaleni kwendlela.

Kunokuba sidimazeke ngenxa yobunzima, saqhubeka sikhonza ngokunenzondelelo. Amaxesha amaninzi ndandiye ndivakalelwe ngendlela awavakalelwa ngayo umdumisi owabhala wathi: “Nokuba ndihamba emfuleni wethunzi lokufa, andiyi koyika bubi, ngokuba unam wena; intonga yakho, umsimelelo wakho, uyandithuthuzela.” (INdumiso 23:⁠4) Ebudeni beli xesha sasiye singabikho ekhaya kangangeeveki, yaye maxa wambi ndandichitha iiyure ezingama-250 ngenyanga kubulungiseleli.

Ubulungiseleli Bethu EAidhonochori

Enye yeedolophana esazityelelayo ngowe-1946 yayiyiAidhonochori, emi phezu kwentaba. Apho safumana enye indoda eyasixelela ukuba kukho amadoda amabini kuloo dolophana afuna ukuva isigidimi seBhayibhile. Noko ke, ngenxa yokoyika abamelwane, le ndoda yayingafuni ukusisa kuwo. Kodwa ke, sakwazi ukuwafumana amakhaya awo yaye samkelwa ngobubele. Enyanisweni, emva kwemizuzu nje embalwa, igumbi lokuhlala lalizele ngabantu! Kwakukho izalamane okanye abahlobo abasenyongweni. Ndandimangalisiwe kukubona indlela ababezole ngayo yaye behleli bephulaphule. Kungekudala safumanisa ukuba babekulangazelela ngovuyo ukuqhagamshelana namaNgqina kaYehova, kodwa ngexesha lokulawula komkhosi waseJamani, kwakungekho nelinye apho. Yintoni eyababangela ukuba babe nomdla ongaka?

Ezi ntloko-ntsapho zimbini zaziphambili kwiqela lamaKomanisi lasekuhlaleni, yaye zaziqalise ukubaxelela abantu ngeengcamango zobuKomanisi. Kodwa zandula ke zabona incwadi ethi Government, epapashwe yiWatch Tower Society. Emva kokuba ziyifundile, zeyiseka kwelokuba ekuphela kwethemba lorhulumente ogqibeleleyo, nonobulungisa buBukumkani bukaThixo.

Asizange silale sithetha nala madoda nabahlobo bawo kwada kwasezinzulwini zobusuku. Ayeneliseke ngokupheleleyo ziimpendulo ezisekelwe eBhayibhileni kwimibuzo yawo. Noko ke, kungekudala emva koko, amaKomanisi akuloo dolophana azama ukundibulala ngenxa yokuba ayesithi ndim lo uguqule abo babesakuba ziinkokeli zawo. Ngethamsanqa, kwathi kanti phakathi kwabo babekho kubusuku bokuqala kwakukho laa ndoda yayindixelele ngabantu abanomdla kuloo dolophana. Ekugqibeleni yenza inkqubela kulwazi lweBhayibhile, yabhaptizwa yaza kamva yaba ngumdala ongumKristu.

Intshutshiso Yenkohlakalo

Kwakungekudala emva kokudibana naba babesakuba ngamaKomanisi apho amapolisa amabini angena egibiseleka kwindlu esasiqhubela kuyo iintlanganiso. Abamba abane kuthi ebajolise ngemipu aza abaqhubela kwisikhululo samapolisa. Apho umphathi wamapolisa, owayenxulumene ngokusondeleyo nabafundisi bamaGrike obuOthodoki, wasigxeka kabukhali. Ekugqibeleni, wabuza, “Yintoni endiza kuyenza ngani?”

“Masibabethe bathi nca!” lakhwaza latsho elinye ipolisa elalimi emva kwethu.

Ngelo xesha kwakusezinzulwini zobusuku. La mapolisa asivalela kumgangatho ongaphantsi aza aya kwenye ibhari eyayikufuphi. Xa ayenxile eludaka, abuya yaye ndakhutshwa ndaza ndasiwa kumgangatho ophezulu.

Xa ndandibona indlela ayiyo, ndaqonda ukuba ayeza kundibulala nangawuphi na umzuzu. Ngoko ndathandaza kuThixo ukuba andinike amandla okunyamezela nantoni na ayenokuyenza kum. Athabatha iintonga yaye, njengokuba benditshilo ekuqaleni, aqalisa ukundibetha ngaphantsi kweenyawo. Emva koko andibetha kuwo wonke umzimba, aza aphinda andigibisela ngaphantsi komgangatho. Kwakhona athabatha omnye aza aqalisa ukumbetha.

Ngelo xesha, ndasebenzisa elo thuba ukuze ndincede amanye amaNgqina amabini aselula ukuze akulungele ukujamelana novavanyo olwaluza kuqalisa. Kodwa kunoko la mapolisa agqiba kwelokuba andibuyisele kumgangatho ophezulu. Andikhulula iimpahla, yaye amahlanu kuwo andibetha kangangeyure, endixusha entloko ngezihlangu zawo zasemkhosini. Emva koko andiwisa kwizinyuko, apho ndahlala ndingekho zingqondweni kangangeeyure ezinokuba li-⁠12.

Xa ekugqibeleni sakhululwa, enye intsapho kuloo dolophana yasamkela ngobo busuku yaza yasinyamekela. Ngosuku olulandelayo, sagoduka. Sasonzakele yaye sidiniwe kukubethwa kangangokuba, umgama esasiwuhamba iiyure ezimbini, sawuhamba iiyure ezisibhozo. Ndandidumbile kukubethwa kangangokuba uMarianthi wayengandazi kakuhle.

Ulwando Phezu Kwayo Nje Inkcaso

Ngowe-1949, ngoxa imfazwe yamakhaya yayiqhubeka, safudukela eThessalonica. Ndabelwa ukuba ndikhonze njengomncedisi wesicaka sebandla selinye lamabandla amane akweso sixeko. Emva konyaka ibandla landa kangangokuba sakwazi ukuseka elinye, yaye ndakhonza njengesicaka sebandla, okanye umveleli owongamelayo. Emva konyaka ibandla elitsha laliphantse liphindaphindeke kabini, yaye kwasekwa elinye kwakhona!

Abachasi baba nomsindo ngenxa yolwando olwalukho kumaNgqina kaYehova eThessalonica. Ngenye imini ngowe-1952 xa ndandigoduka ndivela emsebenzini, ndafika indlu yethu itshe yaluthuthu. UMarianthi wasinda cebetshu. Kwintlanganiso ngobo busuku, kwafuneka sicacise isizathu sokuba sibe lapho sinxibe iimpahla ezimdaka​—⁠sasilahlekelwe yiyo yonke into. Abazalwana bethu abangamaKristu babenovelwano yaye basixhasa.

Ngowe-1961, ndabelwa kumsebenzi wokuhamba-hamba, ndityelela amabandla awahlukahlukeneyo veki nganye ukuze ndomeleze abazalwana ngokomoya. Kwiminyaka engama-27 eyalandelayo, mna noMarianthi satyelela iziphaluka nezithili eMacedonia, eThrace, naseThessaly. Nangona isithandwa sam uMarianthi phantse wayeyimfama ukususela ngowe-1948, wayekhonza nam ngenkalipho, enyamezela iimvamvanyo ezininzi zokholo. Naye wabanjwa, wasiwa ematyaleni, waza wavalelwa entolongweni amaxesha amaninzi. Emva koko impilo yakhe yaqalisa ukuba nkenenkene, yaye wafa ngowe-1988 emva kokulwa ngamandla nomhlaza.

Kwangaloo nyaka mnye, ndonyulwa ukuba ndikhonze njengovulindlela okhethekileyo eThessalonica. Ngoku, emva kweminyaka engaphezu kwama-56 enkonzo kuYehova, ndisakwazi ukuzibhokoxa ndize ndibe nesabelo kuzo zonke iinkalo zobulungiseleli. Maxa wambi, ndiye ndaqhuba izifundo zeBhayibhile ezinokuba ngama-20 veki nganye nabantu abanomdla.

Ndiye ndaqonda ukuba sisesekuqaleni kwenkqubo enkulu yokufundisa eya kuqhubeka kwihlabathi elitsha likaYehova kwanakwiminyaka eliwaka. Ukanti, ndivakalelwa kukuba eli asililo ixesha lokuyekelel’ umxakatho, izinto sizibekel’ amangomso, okanye sichithe ixesha lethu sisanelisa iminqweno yethu yenyama. Ndiyambulela uThixo ngokundinceda ndigcine isithembiso endasenza kanye ngoxa ndandisaqala ngenxa yokuba ngokwenene uYehova ufuna sinikele kuye inkonzo yomphefumlo uphela.

[Umfanekiso okwiphepha 24]

Ndinikela intetho ngoxa umsebenzi wethu wokushumayela wawuvaliwe

[Umfanekiso okwiphepha 25]

Ndikunye nomfazi wam, uMarianthi