Benza Ukuthanda KukaYehova

UDaniyeli Wazingisa Ekukhonzeni UThixo

AKUFANE kwenzeke ukuba imbali itshintshe ngokukhawuleza. Kodwa, oko kwenzeka ngowama-539 B.C.E., xa uBukhosi baseBhabhiloni babhukuqwa ngamaMedi namaPersi kwiiyure nje ezimbalwa. Ngaloo nyaka, umprofeti kaYehova uDaniyeli wayehlala eBhabhiloni njengomYuda othinjiweyo kangangeminyaka engama-80. Kubonakala ukuba xa wayemalunga nama-90 eminyaka, uDaniyeli wayeza kujamelana nenye yezona mvavanyo ziqatha zengqibelelo yakhe kuThixo.

Emva kokuwa kweBhabhiloni, ekuqaleni kwabonakala ngathi izinto zaziza kumhambela kakuhle uDaniyeli. Ukumkani omtsha yayinguDariyo umMedi, indoda eyayineminyaka engama-62 eyayimthanda uDaniyeli. Inyathelo lokuqala elathatyathwa nguDariyo njengokumkani yayikukunyula ii-satraps (iirhuluneli) ezili-120 waza wanyula amadoda amathathu ukuba abe ngabalawuli abakwizikhundla eziphezulu.a UDaniyeli wayengomnye waloo madoda mathathu athandwayo. Ephawula isiphiwo esikhethekileyo uDaniyeli awayenaso, uDariyo wayekulungele ukummisela njengomlawuli! Noko ke, emva koko kwenzeka into eyatshintsha iminqweno kakumkani ngequbuliso.

Iqhinga Elichuliweyo

Amagosa aphezulu awayesebenza noDaniyeli, ekunye neqela elikhulu leerhuluneli, aya kukumkani eneyelenqe alicebileyo. Abongoza uDariyo ukuba amisele umthetho othi: “Bonke abathandaza umthandazo nakongubani, uthixo nomntu ongenguwe, kumkani, ngeentsuku ezimashumi mathathu mabajulelwe emhadini weengonyama.” (Daniyeli 6:7) KuDariyo kwakubonakala ngathi la madoda ayegxininisa ukuthembeka kwawo kuye. Usenokuba naye waqiqa ngelokuba lo mthetho wawuya kumnceda, njengomphambukeli, ukuze aqinise isikhundla sakhe sokuba yintloko yobukumkani.

Noko ke, la magosa aphezulu neerhuluneli akazange amisele lo mthetho ukuze kulungelwe ukumkani. Ayefuna ‘ukuba afumane ithuba ngakuDaniyeli mayela nobukumkani. Ke akabanga nako ukufumana nalinye ithuba, nantlondi imbi kuye.’ Ngoko ke la madoda anamaqhinga aqiqa ngelithi: “Asiyi kufumana nalinye ithuba ngakulo Daniyeli, ngaphandle kokuba silifumane kuye mayela nomthetho woThixo wakhe.” (Daniyeli 6:4, 5) Esazi ukuba uDaniyeli wayethandaza kuYehova yonke imihla, afuna ukwenza oku kube sisohlwayo sokufa.

Mhlawumbi la magosa aphezulu neerhuluneli ayemzondile uDaniyeli ngenxa yokuba ‘wawongamela ngokuba egqithisele ngomoya omhle; ukumkani wacinga ngokummisa phezu kobukumkani bonke.’ (Daniyeli 6:3) Ukuthembeka kukaDaniyeli kumele ukuba kwawuthintela umoya wokungathembeki nokuzuza izinto ngokuqhatha nto leyo eyayingathandwa. Enoba imeko yayinjani, la madoda anyanzela ukumkani ukuba atyobele lo myalelo uvela kwabasemagunyeni, ewenza inxalenye ‘yomthetho wamaMedi namaPersi ongenakutshintshwa bani.’—Daniyeli 6:8, 9.

UDaniyeli Uhlala Eqinile

Emva kokuba evile ngommiselo omtsha, ngaba uDaniyeli wayeka ukuthandaza kuYehova? Nakanye! Eguqe ngamadolo kwigumbi eliphezulu lendlu yakhe, wathandaza kuThixo izihlandlo ezithathu ngemini, “ngenxa enokuba ebesenjenjalo kakade.” (Daniyeli 6:10) Ngoxa wayethandaza, iintshaba zakhe zeza “zamfumana uDaniyeli ethandaza, etarhuzisa phambi koThixo wakhe.” (Daniyeli 6:11) Xa oku zakuzisa kwingqalelo kakumkani, uDariyo wakhathazeka xa wafumanisa ukuba lo mthetho wayewutyobele wawuya kumfaka engxakini uDaniyeli. Ingxelo ithi, “Wamnyamekela uDaniyeli ukuba amsindise, wazama ukuba amhlangule, lada latshona ilanga.” Kodwa nangona kunjalo ukumkani wayengenako ukuwurhoxisa umthetho awayewumisele. Ngoko ke uDaniyeli wasiwa emhadini weengonyama, ekubonakala ukuba wawuyindawo esezantsi okanye engaphantsi komhlaba. Ukumkani wamqinisekisa uDaniyeli wathi, “wanga uThixo wakho, ombusa ngamaxesha onke, angakusindisa.”—Daniyeli 6:12-16.

Emva kokungalali buhlayo ngobo busuku nokuzila ukutya, uDariyo wakhawuleza ukuya emhadini. UDaniyeli wayephilile yaye engenzakalanga! Ukumkani wathabatha inyathelo elikhawulezileyo. Njengempindezelo wayalela ukuba kuphoswe iintshaba zikaDaniyeli neentsapho zazo emhadini weengonyama. Kwakhona uDariyo wakwenza kwacaca kubo bonke ubukumkani ukuba “ezindaweni zonke zegunya lobukumkani bam, badidizele bothuke abantu phambi koThixo kaDaniyeli.”—Daniyeli 6:17-27.

Esikufundayo Koku

UDaniyeli wayengumzekelo omhle wokuthembeka. Kwanokumkani, owayengamkhonzi uYehova, waphawula ukuba uDaniyeli ‘wazingisa’ ekukhonzeni Yena. (Daniyeli 6:16, 20) Igama lesiAramiki eliguqulelwe ngokuthi “ukuzingisa” ngokusisiseko lithetha “ukujikeleza usenza isangqa.” Libonisa ukuqhubeka, ukuqhubela phambili. Hayi indlela okuyichaza ngayo oku ingqibelelo eyomeleleyo awayenayo uDaniyeli kuYehova!

UDaniyeli wahlakulela ikhondo lokuzingisa kudala ngaphambi kokuba aphoswe emhadini weengonyama. Ngoxa wayelibanjwa eliselula eBhabhiloni, akazange avume ukutya okanye ukusela izinto ezazalelwe nguMthetho kaMoses okanye izinto ezazingcoliswe zizithethe zobuhedeni. (Daniyeli 1:8) Kamva, ngenkalipho washumayela isigidimi sikaThixo kukumkani waseBhabhiloni uNebhukadenetsare. (Daniyeli 4:19-25) Kwiiyure nje ezimbalwa ngaphambi kokuwa kweBhabhiloni, uDaniyeli ngokungenaloyiko wamazisa uKumkani uBheletshatsare ngomgwebo kaThixo. (Daniyeli 5:22-28) Ngoko xa uDaniyeli wayejamelene nomhadi weengonyama, waqhubeka kwikhondo lokuthembeka nto leyo ekwakukudala eyenza.

Nawe unokumkhonza uYehova ngokuzingisa. Ngaba ungumntu oselula? Ngoko thabatha amanyathelo ngoku ngokuhlakulela ikhondo lokuzingisa ngokuluphepha unxulumano olubi lweli hlabathi nehambo yalo eyonakeleyo. Ukuba ubukhonza uThixo kangangexesha elithile, londoloza ikhondo lokuhlala unyamezela ngokuthembeka. Unganikezeli, kuba silingo ngasinye esijamelana naso sisinika ithuba lokuzingqina phambi koYehova ukuba sizimisele ukuzingisa ekumkhonzeni.—Filipi 4:11-13.

[Umbhalo osemazantsi]