Isahluko Sesibhozo
Uhlangulwa Emilonyeni Yeengonyama!
1, 2. (a) UDariyo umMedi wabulungelelanisa njani ubukhosi bakhe obukhulu? (b) Khawuchaze iimbopheleleko negunya awayenalo amabamba.
IBHABHILONI yayiwile! Ubungangamsha bayo obathabatha inkulungwane yonke iligunya lehlabathi bathi nqum ngeeyure nje ezimbalwa. Amaxesha ayetshintshile—kwakukhonya amaMedi namaPersi. Ekubeni wayengene esihlalweni sikaBheleshatsare, ngoku uDariyo umMedi wayejamelene nocelomngeni lokulungelelanisa ubukhosi bakhe obukhulu.
2 Elinye lamanyathelo okuqala awathatyathwa nguDariyo yayikukumisela amabamba ali-120. Kucingelwa ukuba abo babenikwa ezi zikhundla maxa wambi babekhethwa kwizalamane zikakumkani. Phofu ke, ibamba ngalinye lalilawula isithili okanye isiphaluka esithile sobukhosi. (Daniyeli 6:1) Omnye wemisebenzi yalo yayikukuqokelela irhafu nokuthumela iminikelo ebhotwe. Nangona lalikhe lihlolwe ngummeli kakumkani owayetyelela ngamathuba athile, ibamba lalinomlinganiselo othile wegunya. Isibizo salo sasithetha “umkhuseli woBukumkani.” Kwiphondo lalo, ibamba laligqalwa njengokumkani ongaphantsi, linegunya elingaphezu kwakhe nabani na ngaphandle nje kukakumkani.
3, 4. Yintoni le yayisenza uDariyo amthande uDaniyeli, ibe lo kumkani wambeka kwisiphi isikhundla?
3 Wayeza kungena phi ke uDaniyeli kweli lungiselelo litsha? Ngaba uDariyo umMedi wayeza kumnika umhlala-phantsi lo mprofeti ongumYuda walupheleyo ngoku owayesele ekwiminyaka yamashumi asithoba ubudala? Nokuba sel’ ethanda! UDariyo umele ukuba waqonda ukuba uDaniyeli wayekuchaze ngokuchanileyo kusengaphambili ukuwa kweBhabhiloni nokuba isiprofeto esinjalo sasifuna ukuqonda okungaphaya kwamandla omntu. Ngaphezu koko, uDaniyeli wayesele enamava xa kufikwa kumba wokuqhubana namaqela ngamaqela awayethinjwe eBhabhiloni. UDariyo wayenenjongo yokugcina ulwalamano loxolo phakathi kwakhe nabantu bakhe abatsha. Ngenxa yoko, ngokuqinisekileyo wayeya kufuna umntu olumke nonamava njengoDaniyeli abe yintonga yakhe yasekhosi. Wayeya kuba kwisiphi isikhundla?
4 Yayiya kuwothusa umzi into yokuba uDariyo amisele lo mthinjwa ungumYuda unguDaniyeli njengebamba. Kodwa ke khawuthelekelele ingxokozelo eyabakhoyo njengoko uDariyo wayevakalisa isigqibo sakhe sokwenza uDaniyeli abe ngomnye wamagosa aphakamileyo amathathu awayeza kuvelela amabamba! UDaniyeli akazange aphelele apho kodwa ‘wazibalula ngokuthe ngcembe,’ ezingqina enobulumko kunamanye amagosa aphakamileyo. Liyinyaniso elokuba, kwafunyanwa ‘umoya ongaqhelekanga’ kuye. UDariyo wayezimisele nokumnika isikhundla sokuba yinkulumbuso.—Daniyeli 6:2, 3.
5. Amele ukuba asabela njani amanye amagosa aphakamileyo namabamba ngokumiselwa kukaDaniyeli, yaye ngoba?
5 Amanye amagosa aphakamileyo kunye namabamba amele ukuba ayelugcalagcala ngumsindo. Kaloku, ayengenakuyimela into yokuba uDaniyeli—owayengenguye nomMedi okanye umPersi okanye ke umntwan’ egazi—abekwe kwisikhundla esingaphezulu kwesawo! Wayengenwe yintoni phofu yena uDariyo ngokumisela iveza-ndlebe kwisikhundla esiphakame kangako, eshiya amadoda akowabo, kwanemilowo ngokwayo? Esi senzo sisenokuba sabonakala sinonyawo lwemfene. Ngaphezu koko, kuyabonakala ukuba la mabamba ayeyigqala ingqibelelo kaDaniyeli njengomqobo ongathandekiyo kwizenzo zawo zokunyotywa nobuqhetseba. Kodwa ke, loo magosa aphakamileyo namabamba akazange abe nabuganga bakuzityand’ igila kuDariyo ngalo mba. Kaloku, uDaniyeli lo wayeyinceke kaDariyo.
6. Amagosa aphakamileyo namabamba azama njani ukuhlazisa uDaniyeli, ibe kutheni ungazange uphumelele loo mgudu?
6 Aba balawuli babebhuqwa ngumona bapheka iyelenqe bebodwa. Bazama “ukufumana isizathu sokumbek’ ityala uDaniyeli ngokuphathelele ubukumkani.” Ngaba bethu lwalunokubakho unyawo lwemfene kwindlela awayezisingatha ngayo iimbopheleleko zakhe? Ngaba wayenganyanisekanga? La magosa aphakamileyo namabamba akazange afumane nentwana le yokunganyaniseki okanye ubungendawo kwindlela uDaniyeli awayezisingatha ngayo iimbopheleleko zakhe. Aqiqa ngelithi: “Asiyi kuze sifumane nto sinokumbek’ ibala ngayo lo Daniyeli, ngaphandle kokuba simmangalele ngomthetho kaThixo wakhe.” Kwathi kanti alifumene iqhinga la maqotha-qikili. Ayecinga ukuba eli laliya kumcim’ igama kuphele uDaniyeli.—Daniyeli 6:4, 5.
KUQALISWA IYELENQE LOKUBULALA
7. Sisiphi isicelo esenziwa ngamagosa aphakamileyo namabamba kukumkani, ibe asaneka ngayiphi indlela?
7 UDariyo wafikelwa ligqiza lamagosa aphakamileyo namabamba ‘elangena lingumndilili.’ Ibinzana lesiAramiki elisetyenziswe apha lithetha ukudala isiphithi-phithi. Kuyabonakala ukuba, la madoda enza ngathi kukho umbandela ongxamisekileyo awayefuna ukumphakela wona uDariyo. Asenokuba aqiqa ngelithi wayengenakufane asithandabuze isicelo sawo ukuba ayesaneke ngobuciko aza asichaza njengento ekufuneka yenziwe ngokukhawuleza. Ngenxa yoko, angen’ emxholweni, esithi: “Onke amagosa aphakamileyo ebukumkanini nabathetheli namabamba namagosa aphakamileyo asebukhosini neerhuluneli, acebe ukuba kumiselwe ummiselo wasebukhosini, kubekwe nesalelo sokuba wonk’ ubani obongoza nakuwuphi na uthixo okanye umntu ongenguwe, kumkani, kwiintsuku ezingamashumi amathathu, ufanele aphoswe emhadini weengonyama.”a—Daniyeli 6:6, 7.
8. (a) Kwakutheni ukuze uDariyo awufumanise unomtsalane lo mthetho? (b) Yintoni kanye kanye le yayifunwa ngamagosa aphakamileyo namabamba?
8 Iincwadi zembali ziyangqina ukuba kwakuyinto eqhelekileyo ukuba ookumkani baseMesopotamiya bagqalwe baze banqulwe njengoothixo. Ngoko alithandabuzeki elokuba esi sicelo samshiya encume yedwa uDariyo. Eny’ into usenokuba naye wayibona iluncedo le nto. Khumbula kaloku ukuba, abo babehlala eBhabhiloni babengamazi yaye bengamqhelanga uDariyo. Lo mthetho mtsha wawuza kumthwesa njengokumkani, ibe wawuza kukhuthaza izihlwele ezazihlala eBhabhiloni ukuba zivume ekuhleni ukuba zinyanisekile yaye ziyamxhasa lo rhulumente mtsha. Noko ke, xa ayecebisa ukuba kuwiswe lo mthetho, amagosa aphakamileyo namabamba ayengakhathalele kulungelwa kukakumkani. Eyona nto iphambili kubo yayikukurhintyela uDaniyeli, kuba ayewazi umkhwa wakhe wokuthandaza kuThixo kathathu ngosuku ephambi kweefestile ezivuliweyo zegumbi lakhe eliseluphahleni.
9. Kutheni lo mthetho mtsha ungazange ube yingxaki kwinkoliso yabantu ababengengomaYuda?
9 Ngaba lo mqathango uphathelele umthandazo wawuza kuba yingxaki kuwo onke amaqela onqulo awayeseBhabhiloni? Akunjalo, ingakumbi ngenxa yokuba wawuza kusebenza kangangenyanga enye kuphela. Ngaphezu koko, bambalwa ababengengomaYuda ababegqala ukunqulwa komntu okwexeshana njengokulalanisa. Omnye umphengululi weBhayibhile uthi: “Ukunqulwa kukaKumkani kwakungeyonto ixhomis’ amehlo kwinkoliso yeentlanga ezazinqula izithixo; yaye ngenxa yoko xa kwathiwa amaBhabhiloni makanqule umlawuli—uDariyo umMedi—njengoko ebeya kwenza kuthixo, ayenza lula nje loo nto. YayingamaYuda kuphela awayengayiginyi kwaphela loo nto.”
10. AmaMedi namaPersi ayewugqala njani umthetho owiswe ngukumkani wawo?
10 Hay’ ke, iindwendwe zikaDariyo zambongoza ukuba ‘awubhale lo mmiselo aze awutyobele, ukuze ungabi nakutshintshwa, ngokomthetho wamaMedi namaPersi, ongatshintshwayo.’ (Daniyeli 6:8) KwiMpuma yamandulo, umyalelo kakumkani wawugqalwa njengogqibeleleyo. Le nto yayimenza ahlale egqalwa njengongenakuphazama. Kwanomthetho owawunokubangela ukuba kufe abantu abamsulwa wawumele uqhubeke usebenza!
11. UDaniyeli wayeza kuchaphazeleka njani sisalelo sikaDariyo?
11 Emlibele shici uDaniyeli, uDariyo wawutyobela loo myalelo. (Daniyeli 6:9) Ngokwenjenjalo, engazi wayeyalela ukuba kubulawe igosa eliyintonga yakhe esekhosi. Ewe, uDaniyeli wayengayi kubhungca kulo mmiselo.
UDARIYO UNYANZELWA UKUBA AWISE ISIGWEBO ESIQATHA
12. (a) Yintoni eyenziwa nguDaniyeli akuva ngalo mthetho mtsha? (b) Ngoobani ababebukele uDaniyeli, yaye kwakutheni?
12 Kungekudala uDaniyeli weva ngalo mthetho uthi makungathandazwa. Ngokukhawuleza, wangena endlwini yakhe waza waya kwigumbi eliseluphahleni, elalineefestile ezivuliweyo nezijonge eYerusalem.b Ekwelo gumbi, uDaniyeli waqalisa ukuthandaza kuThixo “njengoko wayeqhele ukwenjenjalo.” UDaniyeli usenokuba wayecinga ukuba uyedwa, kodwa abo babemenzele iyelenqe babembukele. ‘Bahlanganisana’ ngokukhawuleza, ngokuqinisekileyo behambela phezulu kanye ngendlela ababeyiyo xa babeye kuDariyo. Ngoku babembone ngawabo amehlo—uDaniyeli “ebongoza, ecela ubabalo kuThixo wakhe.” (Daniyeli 6:10, 11) La magosa aphakamileyo kunye namabamba ayenabo bonke ubungqina awayebufuna ukuze amangalele uDaniyeli kukumkani.
13. Yintoni ezafika zayixelela ukumkani iintshaba zikaDaniyeli?
13 Zisebenzisa ubuqili, iintshaba zikaDaniyeli zabuza uDariyo zisithi: “Akukho salelo usityobeleyo na sokuba nabani na obongoza nawuphi na uthixo okanye umntu ongenguwe, kumkani, kwiintsuku ezingamashumi amathathu, ufanele aphoswe emhadini weengonyama?” UDariyo waphendula esithi: “Lo mbandela umiselwe kakuhle ngokomthetho wamaMedi namaPersi, ongatshitshiswayo.” Ngoku aba dyakalashe bankone bangen’ emxholweni. “UDaniyeli, wakubathinjwa bakwaYuda, akakunanzanga wena, kumkani, naloo mmiselo uwutyobeleyo, kodwa izihlandlo ezithathu ngemini wenza isibongozo sakhe.”—Daniyeli 6:12, 13.
14. Ngokutsho kobungqina, kwakutheni ukuze amagosa aphakamileyo namabamba abhekisele kuDaniyeli njengalowo “wakubathinjwa bakwaYuda”?
14 Into yokuba amagosa aphakamileyo namabamba abize uDaniyeli ngokuthi “wakubathinjwa bakwaYuda” inanto ithile esityebisela ngayo. Kuyabonakala ukuba, ayefuna ukulitsolisa elokuba lo Daniyelindini owayephakanyiselwe kwisikhundla esiphakame kangako nguDariyo xa kuthethw’ inyaniso wayesisaphuselana nje sekhoboka lomYuda. Babekholelwa ukuba ngenxa yoko, ngokuqinisekileyo wayengabalulekanga ngaphezu komthetho—enoba uvakalelwa njani na ukumkani ngaye!
15. (a) Wasabela njani uDariyo akuva iindaba awayeziphakelwa ngamagosa aphakamileyo namabamba? (b) Amagosa aphakamileyo namabamba aqhubeka njani ebonisa ukuba amthiy’ egazini uDaniyeli?
15 Mhlawumbi ke la magosa aphakamileyo namabamba ayelindele ukuba ukumkani awafumbathise nto ithile ngenxa yokuba eye angoontamnani. Ukuba kunjalo, akazange ayichole naphantsi loo nto ayeyifuna. UDariyo waxheleka gqitha zezi ndaba wayeziphathelwe. Kunokuba abe lugcwabevu ngumsindo kuDaniyeli okanye ke ayalele ukuba ngoko nangoko aphoswe emhadini weengonyama, uDariyo wachitha imini yonke ejija iqhinga lokumhlangula. Kodwa imigudu yakhe yawa phantsi. Kuthe kungekabi phi, abuya loo maxhwangusha, sele evath’ iqaqa, emfun’ esiqwini uDaniyeli.—Daniyeli 6:14, 15.
16. (a) Yintoni eyayisenza uDariyo amhlonele uThixo kaDaniyeli? (b) Liliphi ithemba uDariyo awayeqamele ngalo ngokuphathelele uDaniyeli?
16 UDariyo wabona ukuba akukho ndlela mbini. Umthetho wawungenakutshintshwa, kananjalo kungenakuxolelwa “ukunxaxha” kukaDaniyeli. Ekuphela kwamazwi awathethwa nguDariyo kuDaniyeli ngathi “wanga uThixo wakho omkhonza rhoqo, angakuhlangula.” Kuyacaca ukuba uDariyo wayemhlonela uThixo kaDaniyeli. Kaloku yayinguYehova owayenike uDaniyeli amandla okuxela kwangaphambili ngokuwa kweBhabhiloni. Kwakhona nguThixo owayenike uDaniyeli “umoya ongaqhelekanga” owawumbalula kwamanye amagosa aphakamileyo. Mhlawumbi ke uDariyo wayesazi ukuba kumashumi eminyaka ngaphambilana kwalo Thixo mnye wahlangula abafana abathathu bamaHebhere ezikweni lomlilo. Mhlawumbi, lo kumkani wayeqamele ngelokuba nangesi sihlandlo uYehova wayeya kumhlangula uDaniyeli, ekubeni uDariyo wayengakwazi ukuwutshintsha umthetho awayewuwisile. Ngoko ke, uDaniyeli waphoswa emhadini weengonyama.c Emva koko, “kwaziswa ilitye, labekwa emlonyeni womhadi, waza ukumkani walitywina ngomsesane wakhe wokutywina nangomsesane wokutywina wezihandiba zakhe, khon’ ukuze imeko kaDaniyeli ingabi nakuguqulwa.”—Daniyeli 6:16, 17.
ISIKHUNI SIBUYA NOMKHWEZELI
17, 18. (a) Yintoni ebonisa ukuba uDariyo wayekhathazekile ngenxa yemeko awayekuyo uDaniyeli? (b) Kwenzeka ntoni xa ukumkani wabuyela kumhadi weengonyama ngentsasa elandelayo?
17 UDariyo wabuyela ebhotweni lakhe edakumbile. Akuzange kubekho zimvumi ziziswa phambi kwakhe, kuba wayengenamdla wakonwatyiswa. Kunoko, uDariyo akazange alale ubusuku bonke, ezilile. “Waphelelwa nabubuthongo.” Kuthe xa kumpondo zankomo, uDariyo waphum’ exhabashile esiya kumhadi weengonyama. Wakhwaza ngelizwi elidangeleyo esithi: “Owu Daniyeli, mkhonzi woThixo ophilayo, ube nako na uThixo wakho omkhonza rhoqo ukukuhlangula ezingonyameni?” (Daniyeli 6:18-20) Wothuka—phofu evuye okosana—akuva ukuba kukho ilizwi eliphendulayo!
18 “Phila ngonaphakade kumkani.” Ngokukhahlela ngentlonelo olo hlobo, uDaniyeli wabonisa ukuba wayengenanqala kukumkani. Wayeqonda ukuba eyona mbangi yokutshutshiswa kwakhe yayingengoDariyo kodwa yayingamagosa aphakamileyo namabamba awayegqushalaza ngumona. (Thelekisa uMateyu 5:44; IZenzo 7:60.) UDaniyeli wahlabela mgama esithi: “UThixo wam uthumele ingelosi yakhe, yayivala imilomo yeengonyama, azandenzakalisa, njengoko ndifumaniseke ndimsulwa phambi kwakhe; naphambi kwakho, kumkani, andonanga.”—Daniyeli 6:21, 22.
19. La magosa aphakamileyo namabamba ayemqhathe aza amsebenzisa njani uDariyo?
19 Hayi indlela amele ukuba loo mazwi amhlaba ngayo uDariyo! Lonk’ ixesh’ eli ebesazi ukuba uDaniyeli wayebhutywa ngobubende engadlanga nyama xa wayephoswa kumhadi weengonyama. UDariyo wayesazi kakuhle ukuba yayingamagosa aphakamileyo namabamba awayenze iyelenqe lokubulala uDaniyeli nokuba ayesebenzise ukumkani ukuze aphumeze usukelo lwawo lokuzingca. Xa ayesithi “onke amagosa aphakamileyo ebukumkanini” avumile ukuba ubekwe loo mmiselo, ayethetha ukuthi noDaniyeli wayexelelwe ngalo mba. UDariyo wayeza kuqubisana nala mabhedengu kamva. Kodwa ke kuqala wayalela ukuba uDaniyeli akhutshwe emhadini weengonyama. Isimanga sezimanga, uDaniyeli wayengenawo nomncinane lo umkrwelo!—Daniyeli 6:23.
20. Kwenzeka ntoni kwiintshaba zikaDaniyeli ezazinolunya?
20 Ngoku ekubeni uDaniyeli wayesindile, uDariyo wayenomcimbi othile awayemele awuqabelise. “Ukumkani wayalela ukuba kuziswe la madoda omeleleyo ayemangalele uDaniyeli, baza bawaphosa emhadini weengonyama, wona noonyana bawo nabafazi bawo; yaye bathi bengekafiki nasezantsi emhadini, zabaganga iingonyama, zawanqwamza onke amathambo abo.”d—Daniyeli 6:24.
21. Kumba wokuqhubana namalungu entsapho yomenzi wobubi, nguwuphi umahluko owawuphakathi koMthetho kaMoses nemithetho yezinye iintlanga zamandulo?
21 Ukubulala kungekuphela aba somaqhingashe kodwa nabafazi nabantwana babo kusenokubonakala kuqatha noko. Ngokwahlukileyo koko, uMthetho kaThixo owadluliselwa ngoMoses wawusithi: “Ooyise mabangabulawa ngenxa yabantwana, nabantwana mabangabulawa ngenxa yooyise. Ngamnye makabulawe ngesono sakhe.” (Duteronomi 24:16) Noko ke, kwezinye iintlanga zamandulo, kwakuyinto eqhelekileyo ukuba amalungu entsapho abulawe kunye nomenzi wobubi, xa enze isenzo esinzulu solwaphulo-mthetho. Mhlawumbi oku kwakusenzelwa ukuba amalungu entsapho angafuni kuziphindezela kamva. Noko ke, ngokuqinisekileyo le yokubulawa kweentsapho zamagosa aphakamileyo namabamba yayingabangelwanga nguDaniyeli. Kusenokwenzeka ukuba, wayekhathazekile ngenxa yeshwangusha elalibangelwe ngala maqotha-qikili ezintsatsheni zawo.
22. Sisiphi isibhengezo esitsha esakhutshwa nguDariyo?
22 Oosomaqhinga abangamagosa aphakamileyo namabamba babengasekho. UDariyo wakhupha isibhengezo, esithi: “Ndiyalela ukuba bonke abaphantsi kolawulo lobukumkani bam, bamngcangcazelele, bamoyike uThixo kaDaniyeli. Kuba unguThixo ophilayo nohlala ukusa kumaxesha angenammiselo, yaye ubukumkani bakhe bobo bungayi konakaliswa, nolawulo lwakhe lolukanaphakade. Uyahlangula yaye uyakhulula, wenza imiqondiso nemimangaliso emazulwini nasemhlabeni, kuba umhlangule uDaniyeli emathupheni eengonyama.”—Daniyeli 6:25-27.
KHONZA UTHIXO NGOKUTHE RHOQO
23. Nguwuphi umzekelo owamiselwa nguDaniyeli ngokuphathelele umsebenzi wakhe wempangelo, yaye sinokumxelisa njani?
23 UDaniyeli wamisela umzekelo omhle kubo bonke abakhonzi bakaThixo bale mihla. Ihambo yakhe yayisoloko ingenabala. Emsebenzini wakhe wempangelo, uDaniyeli ‘wayethembekile, akwafumaneka nakunye ukunganyaniseki nokungakhathali kuye.’ (Daniyeli 6:4) Ngendlela efanayo, umKristu ufanele akhuthale yaye abe nentlonelo emsebenzini wakhe. Oku akuthethi kuthi yiba nguqhina kaqhonono omaqhinga kwezoshishino obufuna ngamehlw’ amnyama ubutyebi okanye omba eqolo kwabanye ukuze anyuselwe emsebenzini. (1 Timoti 6:10) IZibhalo zithi umKristu makazalisekise iimbopheleleko zakhe zasemsebenzini enyanisekile yaye oko ekwenza ngomphefumlo uphela, ‘ngokungathi wenzela uYehova.’—Kolose 3:22, 23; Tito 2:7, 8; Hebhere 13:18.
24. UDaniyeli wazingqina njani ukuba wayengalalanisi xa kufikwa kunqulo?
24 Xa kufikelelwa kunqulo lwakhe, uDaniyeli wayengacengi ndolalaphi. Umkhwa wakhe wokuthandaza wawusaziwa ngabantu. Ukongezelela, amagosa aphakamileyo namabamba ayesazi kakuhle ukuba uDaniyeli wayelugqala njengento ebalulekileyo unqulo lwakhe. Enyanisweni, ayesazi ukuba wayeza kuqhubeka naloo mkhwa kwanokuba kwakukho umthetho owalelayo. Onjani ukuba mhle umzekelo kumaKristu ale mihla! Nawo aziwa ngokubeka unqulo lukaThixo kwindawo yokuqala. (Mateyu 6:33) Oku kumele kubonwe ngabantu ababukeleyo, kuba uYesu wayalela abalandeli bakhe esithi: “Malukhanye ngokunjalo ukhanyiselo lwenu phambi kwabantu, ukuze babone imisebenzi yenu emihle baze bazukise uYihlo osemazulwini.”—Mateyu 5:16.
25, 26. (a) Sisiphi isigqibo bambi abasenokufikelela kuso ngokuphathelele isenzo sikaDaniyeli? (b) Kwakutheni ukuze uDaniyeli akugqale ukutshintsha kumkhwa wakhe njengokulalanisa?
25 Bambi basenokuthi uDaniyeli ngewayeyiphephile yonke le ntshutshiso ukuba wayethandaze kuYehova ngasese ngezo ntsuku zingama-30. Ngapha koko, ubani akanyanzelekanga ukuba eme ngendlela ethile okanye abe kwindawo ethile ukuze aviwe nguThixo. Uyakwazi ukuqonda kwanezinto ubani azicamngca entliziyweni. (INdumiso 19:14) Kodwa ke, uDaniyeli wayegqala naluphi na utshintsho awayenokulwenza kulo mkhwa wakhe njengokulalanisa. Kwakutheni?
26 Ekubeni umkhwa kaDaniyeli wokuthandaza wawusaziwa, kwakuya kudlulisela yiphi ingcamango ukuyeka kwakhe ngequbuliso? Abo babebukele babeya kufikelela kwisigqibo sokuba uDaniyeli lityutyusi lendoda kwaye umyalelo kakumkani wawungaphezulu kunomthetho kaYehova. (INdumiso 118:6) Kodwa izenzo zikaDaniyeli zabonisa ukuba wayezinikele ngokupheleleyo kuYehova. (Duteronomi 6:14, 15; Isaya 42:8) Kambe ke, xa wayesenza oko uDaniyeli wayengawucukucezi ngokungenantlonelo umthetho kakumkani. Engazange kananjalo awungcangcazelele ngokulalanisa. UDaniyeli waqhubeka nje yena ethandaza kwigumbi lakhe eliseluphahleni, “njengoko wayeqhele ukwenjenjalo” ngaphambi kwesalelo sikakumkani.
27. Abakhonzi bakaThixo banamhlanje banokufana njani noDaniyeli (a) ekuthobeleni amagunya awongamileyo? (b) ekuthobeleni uThixo njengomlawuli kunabantu? (c) ekuzabalazeleni ukuba seluxolweni nabantu bonke?
27 Namhlanje abakhonzi bakaThixo banokufunda nto ithile kumzekelo kaDaniyeli. Bayaqhubeka ‘bewathobela amagunya awongamileyo,’ bethobela imithetho yelizwe abaphila kulo. (Roma 13:1) Noko ke, xa imithetho yomntu ingquzulana nekaThixo, abantu bakaYehova balandela oko kwenziwa ngabapostile bakaYesu, abathetha ngenkalipho besithi: “Simele sithobele uThixo njengomlawuli kunabantu.” (IZenzo 5:29) Ngokwenjenjalo, amaKristu akakhuthazi ukuqhwaywa kodushe okanye imvukelo. Kunoko, injongo yawo nje kukuphila ngoxolo nabo bonke abantu ukuze ‘aqhubeke ephila ubomi bokuzola noboxolo ngozinikelo lobuthixo.’—1 Timoti 2:1, 2; Roma 12:18.
28. UDaniyeli wamkhonza “rhoqo” ngayiphi indlela uYehova?
28 UDariyo wayikhankanya izihlandlo zade zazibini into yokuba uDaniyeli wayekhonza uThixo “rhoqo.” (Daniyeli 6:16, 20) Ingcambu yesiAramiki yegama eliguqulelwe ngokuthi “rhoqo” ithetha “ukujikeleza usenza isangqa.” Linengcamango yomjikelo oqhubekayo, okanye into engenasiphelo. Yayinjalo ke ingqibelelo kaDaniyeli. Yayingaguquguquki. Xa ejamelene neemvavanyo, enoba zinkulu okanye zincinane, wawungenakuyithandabuza into uDaniyeli awayeza kuyenza. Wayeza kuqhubeka nekhondo awayeliqale kumashumi eminyaka ngaphambili—ikhondo lokunyaniseka nokuthembeka kuYehova.
29. Abakhonzi bakaYehova banamhlanje banokungenelwa njani kwikhondo lokuthembeka likaDaniyeli?
29 Abakhonzi bakaThixo banamhlanje bafuna ukulandela ikhondo likaDaniyeli. Enyanisweni, umpostile uPawulos wabongoza onke amaKristu ukuba abek’ umnwe kwimizekelo yabantu bamandulo ababesoyika uThixo. Ngokholo, “baphumeza ubulungisa, bazuza izithembiso,” baza—mhlawumbi kubhekiswa kuDaniyeli—“bavingca imilomo yeengonyama.” Njengabakhonzi bakaYehova bale mihla, masibonakalise ukholo nenzondelelo efana nekaDaniyeli size “silubaleke ngonyamezelo ugqatso olubekwe phambi kwethu.”—Hebhere 11:32, 33; 12:1.
[Imibhalo esemazantsi]
a Ubukho ‘bomhadi weengonyama’ eBhabhiloni bungqinelwa yimibhalo yamandulo ebonisa ukuba abalawuli baseMpuma babeneendawo ababegcina kuzo amarhamncwa asendle.
b Igumbi eliseluphahleni yayiligumbi elifihlakeleyo ubani awayephumla kulo xa engafuni kuphazanyiswa mntu.
c Mhlawumbi umhadi weengonyama wawuliqula elingaphantsi komhlaba elalivulekile phezulu. Kusenokwenzeka ukuba lalineengcango okanye imivalo yentsimbi eyayiphakanyiswa ukuze kungeniswe izilwanyana.
d Igama elithi “ayemangalele” liyinguqulelo yebinzana lesiAramiki elinokuguqulelwa ngokuthi “awadl’ izithende.” Oku kubonisa ulunya ezazinalo iintshaba zikaDaniyeli.
UZUZE NTONI?
• Kwakutheni ukuze uDariyo umMedi agqibe kwelokuba abeke uDaniyeli kwisikhundla esiphezulu?
• Liliphi iyelenqe elingcolileyo elenziwa ngamagosa aphakamileyo namabamba? UYehova wamhlangula njani uDaniyeli?
• Ufunde ntoni ngokunikela ingqalelo kumzekelo wokuthembeka kaDaniyeli?
[Umfanekiso ozalise iphepha, kwiphepha 114]
[Umfanekiso ozalise iphepha, kwiphepha 121]
[Umfanekiso okwiphepha 127]
UDaniyeli wamkhonza “rhoqo” uYehova. Ngaba wenjenjalo nawe?