Xa Kusihla Iintlekele Zemvelo
EAccra, eGhana, ngoJulayi 4, 1995: Ezona mvula zinkulu zakha zana kwiminyaka emalunga nama-60 zabangela izantyalantyala ezoyikekayo. Bangama-200 000 abaphulukana nezinto zabo zonke, abangama-500 000 baphulukana namakhaya abo yaye abangama-22 baphulukana nobomi babo.
ESan Angelo, eTexas, eU.S.A., ngoMeyi 28, 1995: Iinkanyamba nesichotho zasidlakazelisa esi sixeko sinabemi abangama-90 000, zibangela umonakalo oqikelelwa kwiirandi ezingama-522 ezigidi.
EKobe, eJapan, ngoJanuwari 17, 1995: Inyikima eyathabatha imizuzwana engama-20 nje kuphela yashiya amawaka abantu efile, amashumi amawaka enzakele yaye amakhulu amawaka engenamakhaya.
SIPHILA kwixesha elisenokubizwa ngokuba leleentlekele. Ingxelo yeZizwe Ezimanyeneyo ityhila ukuba kwiminyaka engama-30 esusela kowe-1963 ukusa kowe-1992, inani labantu ababuleweyo, abenzakeleyo okanye ababa ziimbacu ngenxa yeentlekele liye landa ngomlinganiselo wesi-6 ekhulwini nyaka ngamnye. Le meko imaxongo iye yabangela iZizwe Ezimanyeneyo zibize iminyaka yee-1990 ngokuthi “yi-International Decade for Natural Disaster Reduction.”
Kakade ke, amandla emvelo—anjengesaqhwithi, intaba-mlilo okanye inyikima—awasoloko ebangela intlekele. Kukho amakhulu azo awenzeka minyaka le ngaphandle kokwenzakalisa abantu. Kodwa xa kubandakanyeke kakhulu ubomi babantu nezinto zabo, kunokutshiwo ngokufanelekileyo ukuba yintlekele.
Ukwanda kweentlekele zemvelo kubonakala kungenakuthinteleka. Incwadi ethi Natural Disasters—Acts of God or Acts of Man? ithi: “Abantu bayayiguqula imeko-bume yabo baze bayenze ichanabeke kwiintlekele ezithile, kwaye benza izinto ngendlela ebabeka esichengeni ngakumbi kwezo ngozi.” Le ncwadi yenza umzekelo wokuxhasa le ngongoma: “Kwindawo enezindlu ezakhiwe ngezitena ezinzima zodaka kwindawo ethambekileyo inyikima encinane inokuba yintlekele ngokubulala abantu ize ibangele ukubandezeleka. Kodwa ngaba loo ntlekele ibangelwa kukushukuma komhlaba okanye ibangelwa kukuba abantu behlala kwizindlu ezinobungozi ezikwindawo enobungozi ngolo hlobo?”
Kubafundi beBhayibhile, kukho nesinye isizathu sokuba ukwanda kweentlekele zemvelo kungabothusi. Malunga neminyaka engama-2 000 eyadlulayo, uYesu Kristu waxela kwangaphambili ukuba, phakathi kwezinye izinto, ‘ukuqosheliswa kwenkqubo yezinto,’ kwakuya kuphawulwa ‘kukunqongophala kokutya neenyikima zomhlaba kwiindawo ngeendawo.’ (Mateyu 24:3, 6-8) Kwakhona iBhayibhile yaxela kwangaphambili ukuba ebudeni ‘bemihla yokugqibela,’ abantu babeya kuba ngabazithandayo, abathandi bemali, bengenawo umsa wemvelo yaye bengenakuthanda kulunga.a (2 Timoti 3:1-5) Olu tyekelo ngokufuthi lubangela abantu bonakalise imeko-bume yabo, besenza abantu bachanabeke ngakumbi kwiintlekele zemvelo. Iintlekele ezenziwa ngabantu zikwabangelwa libutho labantu elingenaluthando inkoliso yabantu emele iphile phakathi kwalo.
Okukhona isijikelezi-langa sethu siya sisiba nabantu abaninzi, okukhona izenzo zomntu zibeka abantu esichengeni, yaye okukhona iimveliso zomhlaba zilawulwa kakubi nangakumbi, iintlekele ziya kuqhubeka zimthwaxa umntu. Ukunikela uncedo kuba lucelomngeni, njengoko inqaku elilandelayo libonisa.
[Umbhalo osemazantsi]
a Ukuze ufumane inkcazelo engakumbi ngomqondiso wemihla yokugqibela, bona incwadi ethi Ulwazi Olukhokelela Kubomi Obungunaphakade, iphepha 98-107, epapashwe yiWatchtower Bible and Tract Society of New York, Inc.
[Inkcazelo Ngomfanekiso okwiphepha 2]
COVER: Maxie Roberts/Courtesy of THE STATE
[Inkcazelo Ngomfanekiso okwiphepha 3]
Top: Information Services Department, Ghana; right: San Angelo Standard-Times