Kutheni Zixhaphake Kangaka Iintlekele Zemvelo?

IINTLEKELE zisoloko zisezindabeni. Abantu abangakumbi baya besiba ngamaxhoba eentlekele ezahlukahlukeneyo. ICentre for Research on the Epidemiology of Disasters yaseBelgium inikela ingxelo yokuba ngowama-2010 kuphela, kwabakho iintlekele ezingama-373 kwaza kwafa abantu abangama-296 000 ubuncinane.

Kuyabonakala ukuba inani leentlekele eliye lachazwa liye lantinga kumashumi eminyaka yakutshanje. Ngokomzekelo, phakathi kowe-1975 nowe-1999, nyaka ngamnye kwabakho iintlekele zemvelo ezingaphantsi kwama-300. Noko ke, phakathi kowama-2000 nowama-2010, umlinganiselo wawuphantse ube ngama-400 ngonyaka. Mhlawumbi ungomnye wabantu abafuna ukwazi ukuba ‘Kutheni iintlekele zemvelo zininzi kangaka ngoku?’

Nangona abantu abaninzi besithi iintlele “zibangelwa nguThixo,” oko akuyonyaniso. UThixo akanguye unobangela weentlekele ezehlela abantu abaninzi namhlanje. Nakuba kunjalo, iBhayibhile yaxela kwangaphambili ukuba zaziya kubakho iintlekele kweli xesha lethu. Ngokomzekelo, kuMateyu 24:7, 8 sifunda amazwi kaYesu apho athi: “Kuya kubakho ukunqongophala kokutya neenyikima zomhlaba kwiindawo ngeendawo. Zonke ezi zinto zikukuqala kwenimba.” Kwakutheni ukuze uYesu azixele kusengaphambili ezi ziganeko, kwaye zithetha ntoni kuthi?

UNyana kaThixo uYesu, wayephendula umbuzo awayewubuziwe wokuba “uya kuba yintoni na umqondiso . . . wokupheliswa kwenkqubo yezinto?” (Mateyu 24:3) Wachaza izinto ezininzi ezahlukahlukeneyo eziquka iintlekele ezinjengezi kuthethwe ngazo ngasentla. Waphinda wenza esi silumkiso: “Xa nibona ezi zinto zisenzeka, yazini ukuba ubukumkani bukaThixo bukufuphi.” (Luka 21:31) Ngoko ke, ezi ntlekele zemvelo zithetha okuthile kuthi. Zalatha kwiinguqu ezinkulu eziza kwenzeka kungekudala.

Oonobangela Beentlekele

Abantu bayabuza ukuba, ukuba uThixo akanguye unobangela weentlekele, ngubani ke? Impendulo sinokuyazi kuphela xa siqonda inyaniso ebalulekileyo eseBhayibhileni yokuba: “Ihlabathi liphela lisemandleni ongendawo.” (1 Yohane 5:19) Le vesi ibonisa ukuba asingoThixo unobangela wezinto ezibuhlungu ezenzeka ehlabathini, kunoko kwiimeko ezininzi, lutshaba lwakhe, “olungendawo”—olubizwa ngokuba “nguMtyholi” eBhayibhileni.—ISityhilelo 12:9, 12.

Olu tshaba lukaThixo luzingcayo lubajonga abantu njengento onokuyisebenzisa uze uyilahle xa ugqibile ngayo. Ekubeni inguye olawula ihlabathi, uye wakhuthaza kwalo moya ufanayo ebantwini. Phofu ke, neBhayibhile yalatha koku ngokuxela kwangaphambili ukuba “ngemihla yokugqibela,” abantu babeya kuba “ngabazithandayo, abathandi bemali, abazidlayo, abanekratshi.” (2 Timoti 3:1, 2) Ngoko ke, ayimangalisi into yokuba uMtyholi enze inkqubo yehlabathi enezi mpawu nezinye ezingezozabuthixo. Ukhuthaza ukuzingca nokubawa okusoloko kubabeka engozini abantu.

Le nkqubo yezinto ibawayo izikhuthaza njani iintlekele? Ingxelo yeZizwe Ezimanyeneyo ngeentlekele ezenzeka ehlabathini ngokubanzi ithi: “Abantu badla ngokuxinaniswa kwiindawo ekuyingozi ukuhlala kuzo njengeendawo eziye zibe neempuphuma. Ukongeza koko, ukutshatyalaliswa kwamahlathi nemigxobhozo kwenza indalo ingakwazi ukumelana neengozi. Phezu kwezi ngxaki kuphinda kubekho isisongelo esibangelwa kwangabantu sokutshintsha kwemozulu nokwanda kwamazi olwandle ngenxa yomoya ongcolileyo ophuma kwimizimveliso nakwizithuthi.” Nangona inkoliso yezi zinto “zenziwa ngabantu” kusithiwa zenzelwa ukukhulisa uqoqosho, enyanisweni zibangelwa ngumoya wokubawa ogqugqisileyo ehlabathini.

Ngoku, iingcali ezininzi ziyaqonda ukuba izinto eziye zenziwa ngabantu ziye zanegalelo nangakumbi kwimiphumo eyintlekele. Eneneni, abantu baye badlalela ezandleni zikaMtyholi ngokwenza izinto ezixhasa inkqubo kaSathana ebangela iintlekele.

Ngoku, siyabona ukuba, iintlekele ezininzi zibangelwe kukungakhathali kwabantu. Ezinye iintlekele bezingenakuba yingozi kangako ukuba bezingenzekanga kwindawo ezenzeke kuyo. Kwiindawo ezininzi zehlabathi, ifuthe leentlekele zemvelo libangelwe zizenzo zabantu abangendawo okanye inyambalala yabantu iye yanyanzelwa ukuba ihlale kummandla oyingozi ngenxa yokungalingani ngokwezoqoqosho okanye ngokwezentlalo okukhoyo ehlabathini namhlanje. Kakade, abanye abantu behlelwa ziintlekele zemvelo, kungekhona ngenxa yokungakhathali kwabantu kodwa ngenxa ‘yexesha nesihlo esingenakubonwa kwangaphambili.’—INtshumayeli 9:11.

Enoba sisiphi na isizathu, ngaba ufanele ube lixhoba lentlekele yemvelo, ungazikhusela njani? Ngoku siza kukhe sibone oko sinokukwenza ukunciphisa umonakalo xa kunokubakho iintlekele.