Yintoni Eza Kuqala Ebomini Bakho?
“Ndazise indlela endiya kuhamba ngayo.”—INDUMISO 143:8.
1. UKumkani uSolomon waphetha ngelithini ngokuphathelele usukelo nezinto abazixakekisa ngazo abantu?
MHLAWUMBI nawe uyazi ukuba kukho iingxaki nezinto ezininzi ezixakekisayo ebomini. Xa ucingisisa nzulu, unokufumanisa ukuba ezinye zazo ziyimfuneko. Kambe ezinye iingxaki nezinto ezixakekisayo azibalulekanga kangako okanye zililize. Ukusiqonda eso sibakala kuthetha ukuma nenye yawona madoda azizilumko kwawakha aphila, uKumkani uSolomon. Emva kokuzihlolisisa ngenyameko izinto zobomi, waqukumbela ngelithi: “Yoyika uThixo, ugcine imithetho yakhe; ngokuba indawo leyo yimfanelo yoluntu lonke.” (INtshumayeli 2:4-9, 11; 12:13) Kunayiphi intsingiselo oku kuthi namhlanje?
2. Nguwuphi umbuzo osisiseko abafanele bazibuze wona abantu aboyik’ uThixo, nto leyo ekhokelela kweyiphi imibuzo?
2 Ukuba ufuna ‘ukoyika uThixo uze ugcine imithetho yakhe,’ zibuze lo mbuzo ulucelomngeni, ‘Yintoni eza kuqala ebomini bam?’ Liyinyaniso elokuba usenokuba akuzibuzi umbuzo onjalo imihla ngemihla, kodwa kutheni ungacingi ngawo ngoku? Eneneni, loo mbuzo uphakamisa eminye imibuzo efana nawo, enjengale, ‘Ngaba ndinikela ingqalelo egqithiseleyo emsebenzini wam wokuziphilisa okanye kwizinto eziphathekayo? Kuthekani ngekhaya, intsapho nabantu endibathandayo?’ Oselula usenokuzibuza oku, ‘Ndinikela ingqalelo nexesha elingakanani kwimfundo yam? Eneneni, ngaba umsetyenzana wokuzonwabisa, imidlalo, okanye uhlobo oluthile lokuzonwabisa okanye ubugcisa obuthile zizinto eziphambili kum?’ Yaye enoba sibadala kangakanani okanye sikwiyiphi na imeko, sifanele sizibuze oku, ‘Ukukhonza uThixo kubaluleke kangakanani ebomini bam?’ Mhlawumbi uya kuvuma ukuba kubalulekile ukubeka izinto ezibalulekileyo kwindawo yokuqala. Kodwa sinokulufumana phi yaye njani uncedo lokuzibeka kwindawo yokuqala?
3. Ukubeka izinto ezibalulekileyo kwindawo yokuqala kubandakanya ntoni kumaKristu?
3 Ngokusisiseko “ukuza kuqala” kubhekisela kwinto ephambili kunezinye okanye efuna ukubekwa kwindawo yokuqala. Enoba ungomnye wamaNgqina kaYehova okanye uphakathi kwezigidi zabafundi abanyanisekileyo beLizwi likaThixo abanxulumana nawo, cinga ngale nyaniso: “Into yonke inexesha elimisiweyo, nomcimbi wonke unexesha lawo phantsi kwezulu.” (INtshumayeli 3:1) Eneneni, oko kuquka ukubonakalisa inkxalabo yothando ngolwalamano lwentsapho. (Kolose 3:18-21) Oko kubandakanya ukuyixhasa kakuhle indlu yakho ngokuyisebenzala. (2 Tesalonika 3:10-12; 1 Timoti 5:8) Yaye ukuphumz’ ingqondo, usenokubeka ixesha lokwenza umsebenzi othile wokuzonwabisa okanye ixesha lokuzonwabisa okanye lokuzihlaziya. (Thelekisa uMarko 6:31.) Noko ke, xa uzikisa ukucinga, ngaba akuboni ukuba akukho nanye kwezi zinto efanele ize kuqala ebomini? Ikho into ebaluleke ngakumbi.
4. EyabaseFilipi 1:9, 10 ithini ngokuphathelele ukubeka izinto ezibalulekileyo kwindawo yokuqala?
4 Mhlawumbi uyaqonda ukuba imigaqo yeBhayibhile ekhokelayo iluncedo ekubekeni izinto ezibalulekileyo kwindawo yokuqala nasekwenzeni izigqibo zobulumko. Ngokomzekelo, kweyabaseFilipi 1:9, 10, amaKristu abongozwa ukuba ‘aphuphume ngakumbi nangakumbi lulwazi oluchanileyo nokuqonda okuzeleyo.’ Ngayiphi injongo? Umpostile uPawulos wongezelela esithi: “Ukuze niqiniseke ngezinto ezibaluleke ngakumbi.” Ngaba oko akuvakali kusengqiqweni? Ngokusekelwe kulwazi oluchanileyo, umKristu olumkileyo uyayazi into efanele ibe phambili—ize kuqala—ebomini bakhe.
Umzekelo Woko Kufanele Kuze Kuqala
5. Xa zichaza umzekelo owashiyelwa amaKristu, iZibhalo zikubonisa njani oko kwakukwindawo yokuqala kubomi bukaYesu?
5 Kumazwi ompostile uPetros sifumana ulwazi oluxabisekileyo: “Nabizelwa kulo eli khondo, ngenxa yokuba kwanoKristu wabandezeleka ngenxa yenu, enishiya nomzekelo ukuze nilandele amanyathelo akhe ngokusondeleyo.” (1 Petros 2:21) Ewe, ukuze sikwazi oko kuza kuqala ebomini, sinokuhlolisisa oko uYesu Kristu wayekukholelwa ngalo mbandela. Iprofeta ngaye INdumiso 40:8 yathi: “Ukwenza okulikholo kuwe, Thixo wam, ndikunanzile; nomyalelo wakho usezibilinini zam ngaphakathi.” Echaza kwaumnqweno ofanayo wathetha la mazwi: “Okwam ukutya kukuba ndenze ukuthanda kondithumileyo nokuba ndiwugqibe umsebenzi wakhe.”—Yohane 4:34; Hebhere 12:2.
6. Sinokuyifumana njani imiphumo efana nekaYesu ekubekeni ukuthanda kukaThixo kwindawo yokuqala?
6 Phawula ingongoma eyintloko—ukwenza ukuthanda kukaThixo. Umzekelo kaYesu ubalaselisa oko kufanele kuze kuqala ebomini babafundi bakhe, kuba wathi “wonk’ ubani oyalelwa ngokugqibeleleyo uya kuba njengomfundisi wakhe.” (Luka 6:40) Yaye njengoko uYesu wayehamba ezindleleni zikaYise, wabonisa ukuba ‘imivuyo yayizaliseka’ ngokubeka ukuthanda kukaThixo kwindawo yokuqala. (INdumiso 16:11; IZenzo 2:28) Ngaba uyaqonda ukuba kuthetha ukuthini oko? Njengoko abalandeli bakaYesu bekhetha ukwenza ukuthanda kukaThixo njengento eza kuqala ebomini babo, baya kufumana “inzaliseko yemivuyo” nobomi benene. (1 Timoti 6:19) Ngoko ziliqela izizathu zokubeka ukuthanda kukaThixo kwindawo yokuqala ebomini bethu.
7, 8. Ziziphi izilingo awajamelana nazo uYesu, yaye sinokufunda ntoni koku?
7 Emva nje kokuba uYesu efuzisele ukuzinikela kwakhe ekwenzeni ukuthanda kukaThixo, uMtyholi wazama ukumkhupha endleleni. Njani? Ngokumlinga kwiinkalo ezintathu. Sihlandlo ngasinye uYesu wayemphendula ngokweZibhalo, esebenzisa intetho engqalileyo. (Mateyu 4:1-10) Kodwa wayelindelwe zizilingo ezingakumbi—intshutshiso, ukugculelwa, ukungcatshwa nguYudas, ukumangalelwa ngobuxoki nokufa kwisibonda sentuthumbo. Sekunjalo, akukho nasinye kwezi zilingo ezamenza wahlehla kwikhondo lakhe uNyana onyanisekileyo kaThixo. Ngexesha elalinzima kakhulu kuye, uYesu wathandaza: “Kungekhona ngokuthanda kwam, kodwa ngokuthanda kwakho. . . . Makwenzeke ukuthanda kwakho.” (Mateyu 26:39, 42) Ngaba ngamnye kuthi akafanele achukumiseke ngokunzulu ngenxa yalo mzekelo awasishiyela wona, usenze ‘sizingise emthandazweni’?—Roma 12:12.
8 Ewe, ukhokelo lobuthixo lunokusinceda kakhulu xa sibeka izinto ezibalulekileyo kwindawo yokuqala, ngokukodwa ukuba sijamelene neentshaba zenyaniso nabo bakuchasayo ukuthanda kukaThixo. Khumbula isicelo sikaKumkani uDavide othembekileyo sokukhokelwa ngoxa wayejamelene nenkcaso yeentshaba. Siza kukuqonda oku njengoko sihlolisisa inxalenye yeNdumiso 143. Oku kufanele kusenze siyiqonde indlela esinokulomeleza ngayo ulwalamano lwethu noYehova size sikulungele ukugcina ukwenza ukuthanda kukaThixo kwindawo yokuqala ebomini bethu.
UYehova Uyayiva Yaye Uyayiphendula Imithandazo Yethu
9. (a) Nangona uDavide wayengumoni, atyhila ntoni amazwi nezenzo zakhe? (b) Kutheni singafanele siyeke ukwenza okulungileyo?
9 Nangona wayengumntu onesono, uDavide wayenokholo lokuba uYehova wayeyiphulaphula imithandazo yakhe. Ngokuthobeka wambongoza: “Yehova, yiva umthandazo wam, kubekele indlebe ukutarhuzisa kwam; ndiphendule ngokunyaniseka kwakho, ngobulungisa bakho. Musa ukumsa ematyaleni umkhonzi wakho: Ngokuba phambi kwakho akukho namnye uhleliyo olilungisa.” (INdumiso 143:1, 2) UDavide wayeziqonda ukuba akafezekanga, sekunjalo intliziyo yakhe yayiphelelisele kuThixo. Ngaloo ndlela, wayenentembelo yokuphendulwa ngokukholekileyo. Ngaba oku akusosikhuthazo kuthi? Nangona sisilela kubulungisa bukaThixo, sinokuba nentembelo yokuba uyasiva ukuba sineentliziyo ezipheleliseleyo kuye. (INtshumayeli 7:20; 1 Yohane 5:14) Ngoxa sithandaza ngokuzingisileyo, simele sizimisele ‘ukoyisa ububi ngokulungileyo’ kule mihla ingendawo.—Roma 12:20, 21; Yakobi 4:7.
10. Yintoni eyayixhalabisa uDavide ngamathub’ athile?
10 UDavide wayeneentshaba, kanye njengathi. Ngoxa wayeyimbacu ngenxa kaSawule, ezimela kwiindawo ezikwanti nasezingontsini, okanye ngoxa wayengukumkani ezingelwa ziintshaba, uDavide wayejamelana namaxesha anzima. Wayichaza indlela okwakumchaphazela ngayo oku: “Utshaba luwusukele umphefumlo wam . . . Lundihlalise ezindaweni ezimnyama . . . Utyhafile phakathi kwam umoya wam; imangalisiwe phakathi kwam intliziyo yam.” (INdumiso 143:3, 4) Ngaba wakha wanesizathu sokuvakalelwa ngendlela efanayo?
11. Abakhonzi bakaThixo banamhlanje baye bajamelana nawaphi amathuba okuxhalaba?
11 Ingcinezelo yeentshaba, izilingo ezibangelwa bubunzima bezoqoqosho, izigulo eziqatha, okanye ezinye iingxaki ezinzima ziye zakhokelela abanye abantu bakaThixo ekubeni baphelelwe lithemba. Ngamathuba athile neentliziyo zabo ziye zibe ngathi zindindisholo. Ngokungathi ngamnye kubo uye atarhuzise esithi: “Wena, usibonisileyo iimbandezelo ezininzi ezinobubi, uya kubuya usiphilise . . . Ubuye wena undithuthuzele.” (INdumiso 71:20, 21) Baye bancedwa njani?
Indlela Yokujamelana Nokuhlasela Kotshaba
12. UKumkani uDavide wahlangabezana njani neengozi nezilingo?
12 INdumiso 143:5 ichaza oko uDavide wayekwenza xa ejamelene nengozi nezilingo eziqatha: “Ndikhumbula imihla yamandulo; ndicamngca ngemisebenzi yakho yonke, ndicamngca ngesenzo sezandla zakho.” UDavide wayedla ngokukhumbula indlela uThixo awayeqhubana ngayo nabakhonzi Bakhe nangendlela awayesindiswe ngayo yena siqu. Wayecamngca ngezinto ezenziwa nguYehova ngenxa yegama Lakhe elikhulu. Ewe, uDavide wayesoloko ecinga ngezenzo zikaThixo.
13. Xa sijamelene nezilingo, ukucinga ngemizekelo yamandulo neyanamhlanje yabakhonzi abathembekileyo kuya kusinceda njani sinyamezele?
13 Ngaba asikhe siyikhumbule indlela uThixo awayeqhubana ngayo nabantu bakhe? Ngokuqinisekileyo kunjalo! Oku kuquka ingxelo eyenziwa ‘lilifu elikhulu lamangqina’ amaxesha angaphambi kwexesha lobuKristu. (Hebhere 11:32-38; 12:1) NamaKristu athanjisiweyo enkulungwane yokuqala akhuthazwa ukuba ‘ahlale eyikhumbula imihla yangaphambili’ nezinto awayezinyamezele. (Hebhere 10:32-34) Kuthekani ngamava abakhonzi bakaThixo banamhlanje, njengalawo akhankanywe kwincwadi ethi AmaNgqina KaYehova—Abavakalisi BoBukumkani BukaThixo?a Iingxelo ezibhalwe apho nakwezinye iimpapasho zisenza sikhumbule indlela uYehova abancede ngayo abantu bakhe ukuba banyamezele ngoxa umsebenzi wabo uvaliwe, bevalelwa ezintolongweni, behlaselwa ngamahlokondiba, yaye bekwiikampu zoxinaniso nakwezomsebenzi onzima. Bebelingwa kumazwe adlavulwe ziimfazwe, anjengeBurundi, iLiberia, iRwanda nakwelalisakuba yiYugoslavia. Xa kuvela inkcaso, abakhonzi bakaThixo babenyamezela ngenxa yokuba benolwalamano olomeleleyo noYehova. Isandla sakhe besibomeleza abo bebekubeka kwindawo yokuqala ebomini babo ukwenza ukuthanda kwakhe.
14. (a) Nguwuphi umzekelo womntu owomelezwa nguThixo ekwimeko esenokufana neyethu? (b) Ufunda ntoni kuloo mzekelo?
14 Noko ke, usenokusabela ngelithi akuzange waphathwa kakubi ngolo hlobo, yaye usenokuvakalelwa kukuba akuqondi ukuba kungaze kwenzeke oko. Noko ke, uThixo ebengasoloko ebaxhasa kwiimeko ezimaxongo kuphela abantu bakhe. Uye waxhasa abantu abaninzi “abaqhelekileyo” ngaphantsi kweemeko “eziqhelekileyo.” Nanku omnye wemizekelo emininzi: Ngaba uyawunakana umfanekiso ongasentla, yaye ngaba ukwenza uyikhumbule indlela uThixo aqhubana ngayo nabantu bakhe? WawukwiMboniselo kaDisemba 1, 1996. Ngaba walifunda ibali elalibaliswa nguPenelope Makris? Onjani wona ukuba mhle umzekelo womKristu ongumgcini wengqibelelo! Ngaba uyabukhumbula ubunzima awabunyamezela kubamelwane bakhe, indlela awayegula ngokungaginyisi mathe ngayo, nemigudu awayenzayo ukuze ahlale kubulungiseleli bexesha elizeleyo? Kuthekani ngamava akhe akhuthazayo aseMytilene? Ingongoma kukuba, Ngaba imizekelo enjalo uyigqala njengesinceda sibeke izinto ezibalulekileyo kwindawo yokuqala, sibeke ukwenza ukuthanda kukaThixo kwindawo yokuqala ebomini bethu?
15. Ziziphi ezinye zezenzo zikaYehova esifanele sicamngce ngazo?
15 Kuyasomeleza ukucamngca ngezenzo zikaYehova, njengoko uDavide wenzayo. Ephumeza iinjongo zakhe, uYehova wenza ilungiselelo losindiso ngokufa, ngokuvuka nangokuzukiswa koNyana wakhe. (1 Timoti 3:16) Uye wabuzinzisa uBukumkani bakhe basezulwini, wakhupha uSathana needemon zakhe emazulwini, waza wabuyisela unqulo lokwenyaniso apha emhlabeni. (ISityhilelo 12:7-12) Uye wakha iparadesi yokomoya waza wasikelela abantu bakhe ngolwando. (Isaya 35:1-10; 60:22) Abantu bakhe ngoku banikela ubungqina bokugqibela ngaphambi kokuqhambuka kwembandezelo enkulu. (ISityhilelo 14:6, 7) Ewe, sinezinto ezininzi esinokucamngca ngazo.
16. Yintoni esikhuthazwa ukuba sizixhalabise ngayo, yaye oku kuya kuthetha ntoni kuthi?
16 Ukuhlala sicinga ngemisebenzi yezandla zikaThixo kunokuzikhathaza ngamatile-tile abantu kusenza siqonde ukuba amandla kaYehova akanakuxhathiswa mntu. Noko ke, loo misebenzi ayiphelelanga nje kwindalo emangalisayo yasemazulwini neyalapha emhlabeni. (Yobhi 37:14; INdumiso 19:1; 104:24) Imisebenzi yakhe emangalisayo iquka oko wakwenzayo ekuhlanguleni abantu bakhe kwingcinezelo yeentshaba, njengoko amava abantu bakhe bamandulo ebonisa.—Eksodus 14:31; 15:6.
Ukwazi Indlela Esifanele Sihambe Ngayo
17. UYehova wayengumntu wokwenene ukusa kuwuphi umkhamo kuDavide, yaye oku kunokusikhuthaza njani?
17 UDavide wathandazela uncedo ukuze angaphelelwa ngamandla okuphila: “Ndizolulela kuwe izandla zam, umphefumlo wam ukungxamele njengelizwe elibharhileyo. Khawuleza undiphendule, Yehova; uyaphela umoya wam. Musa ukubusithelisa kum ubuso bakho, ndifane nabahla baye emhadini.” (INdumiso 143:6, 7) UDavide, owayengumoni, wayesazi ukuba uThixo uyayiqonda imeko yakhe. (INdumiso 31:7) Maxa wambi nathi sisenokuvakalelwa kukuba impilo yethu yokomoya isemngciphekweni. Kodwa loo nto ayifanele isenze siphelelwe lithemba. UYehova, oyivayo imithandazo yethu, usenokusihlaziya ngokukhawuleza ngokusivuselela ngabadala abanothando, ngamanqaku eMboniselo, okanye ngeentetho ezibonakala ngathi bezilungiselelwe thina.—Isaya 32:1, 2.
18, 19. (a) Yintoni esifanele siyithandazele ngokunyanisekileyo kuYehova? (b) Yintoni esinokuqiniseka ngayo?
18 Ukukholosa kwethu ngoYehova kusishukumisela ekubeni simbongoze ngala mazwi: “Ndivise . . . inceba yakho, ngokuba ndikholose ngawe. Ndazise indlela endiya kuhamba ngayo.” (INdumiso 143:8) Ngaba wamyekela uDade Makris, owayeyedwa kwisiqithi saseGrisi? Ngoko ngaba uya kukuyekela wena njengoko ubeka ukuthanda kwakhe kwindawo yokuqala ebomini bakho? UMtyholi namahlakani akhe bangakuvuyela ukusithintela okanye bawunqumamise ngokupheleleyo umsebenzi wethu wokuvakalisa uBukumkani bukaThixo. Enoba luvunyelwe unqulo lokwenyaniso kumazwe esikhonza kuwo okanye aluvunyelwanga ngokwasemthethweni, imithandazo yethu emanyeneyo ivisisana nesicelo sikaDavide esithi: “Ndihlangule ezintshabeni zam, Yehova. Ndizimela ngawe.” (INdumiso 143:9) Ukukhuseleka kwethu kwintlekele yokomoya kuxhomekeke ekuhlaleni kwindawo enqabisekileyo yOsenyangweni.—INdumiso 91:1.
19 Ulweyiseko lwethu ngoko kufanele kube kwindawo yokuqala lunesiseko esiqinileyo ngokwenene. (Roma 12:1, 2) Ngoko, yixhathise imigudu yehlabathi yokukwasusela ngoko licinga ukuba kubalulekile ebomini bomntu. Qhubeka usenza zonke iinkalo zobomi bakho zibonakalise oko waziyo ukuba kufanele kube kwindawo yokuqala—ukwenza ukuthanda kukaThixo.—Mateyu 6:10; 7:21.
20. (a) Sifunde ntoni ngoDavide kwiNdumiso 143:1-9? (b) AmaKristu anamhlanje awubonakalisa njani umoya kaDavide?
20 Iindinyana zokuqala ezisithoba zeNdumiso 143 zibalaselisa ulwalamano olusenyongweni lukaDavide noYehova. Xa wayexinwe ziintshaba, engagogotye lutho wayethandazela ukhokelo lukaThixo. Wayeyiphalaza kuye intliziyo yakhe, ecela ukwalathiswa indlela efanelekileyo afanele ahambe ngayo. Kukwanjalo nanamhlanje ngentsalela esemhlabeni yabathanjiswe ngomoya namaqabane ayo. Ulwalamano lwabo noYehova balugqala njengoluxabisekileyo njengoko bethandazela ukhokelo lwakhe. Ukwenza ukuthanda kukaThixo bakubeka kwindawo yokuqala, phezu kwazo nje iingcinezelo ezivela kuMtyholi nehlabathi.
21. Kutheni kubalulekile ukuba simisele umzekelo omhle xa siza kufundisa abanye ngoko kufanele kube kwindawo yokuqala ebomini babo?
21 Izigidi ezifundisisa iBhayibhile namaNgqina kaYehova kufuneka ziqonde ukuba ukwenza ukuthanda kukaThixo kufanele kube kwindawo yokuqala. Sinokuzinceda zikuqonde oku xa sixubusha isahluko 13 sencwadi ethi Ulwazi Olukhokelela Kubomi Obungunaphakade, esibalaselisa imigaqo ebandakanyekileyo ekuthobeleni iLizwi.b Kakade ke, zifanele ziwubone kuthi umzekelo woko sizifundisa kona. Emva kwethuba elingephi, nazo ziya kuyazi indlela ezifanele zihambe ngayo. Njengoko ezi zigidi zikuqonda oko kufanele kube yeyona nto iphambili ebomini bazo, ezininzi ziya kushukunyiselwa ekubeni zithabathe amanyathelo akhokelela kuzahlulelo nobhaptizo. Emva koko, ibandla linokuzinceda zihlale zihamba kwindlela esa ebomini.
22. Yiyiphi imibuzo eza kuxutyushwa kwinqaku elilandelayo?
22 Abaninzi bakuvuma ngoko nangoko ukuba ukuthanda kukaThixo kufanele kube yeyona nto ibalulekileyo ebomini babo. Noko ke, uYehova ubafundisa njani ngokuthe ngcembe abakhonzi bakhe ukwenza ukuthanda kwakhe? Ziziphi iingenelo abazifumanayo koko? Le mibuzo iza kuxutyushwa kwinqaku elilandelayo, ndawonye nengxubusho yendinyana eyintloko, INdumiso 143:10.
[Imibhalo esemazantsi]
a Ipapashwe ngowe-1993 yiWatchtower Bible and Tract Society of New York, Inc.
b Ipapashwe ngowe-1995 yiWatchtower Bible and Tract Society of New York, Inc.
Ithini Impendulo Yakho?
◻ Ngokusebenzisa eyabaseFilipi 1:9, 10, sinokuzibeka njani izinto ezibalulekileyo kwindawo yokuqala?
◻ UYesu wakubonakalisa njani oko kwakusiza kuqala ebomini bakhe?
◻ Sinokufunda ntoni kwizenzo zikaDavide xa wayejamelene nezilingo?
◻ Isinceda njani INdumiso 143:1-9 namhlanje?
◻ Yintoni efanele ize kuqala ebomini bethu?
[Umfanekiso okwiphepha 10]
Izenzo zikaDavide zangqina ukuba wayekholose ngoYehova
[Inkcazelo]
Reproduced from Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s