Abavakalisi BoBukumkani Bayabalisa
Ingotya Ithetha Ngokuphandle
KUYAKHUTHAZA ukwazi ukuba kweli hlabathi basekho abantu abakwizikhundla eziphezulu abakuthandayo ukunyaniseka nokusesikweni nabathetha ngokuphandle ukuze bazibalaselise ezi mpawu. Umzekelo woku yingotya ekwilizwe laseAfrika apho umsebenzi wamaNgqina kaYehova umiselw’ imiqathango khona. Makhe siphulaphule eli bali:
“Kutshanje amaqela awahlukahlukeneyo onqulo aqhuba indibano equka zonke iimvaba kwidolophu yakowethu, yaye kule ndibano kwakukho amaKatolika, amaRhabe, amaPentekoste, njalo njalo. Kucwangciso lokuqukumbela kwamenywa iNgotya ukuba ize kuthetha kule ndibano. Okwabangela ukuba bonke ababehlanganisene kuyo babamb’ ongezantsi kukuba, phakathi kwezinye izinto, yabaxelela ukuba babemele banyaniseke yaye babe nemilinganiselo ephakamileyo yokuziphatha yamaNgqina kaYehova, yatsho isalek’ umsundulo ngelokuba ukuba bonke bebenjengamaNgqina kaYehova, bekungakho uxolo kwelo lizwe.
“Ngosuku olulandelayo amalungu aphambili eecawa awayenabameli endibanweni agaleleka kwibhotwe leNgotya aza enomsindo agwayimbela oko yakuthethayo incoma amaNgqina aza ayibuza enoba yayiyiqonda na into yokuba amaNgqina ayebhangisiwe kwelo lizwe. INgotya yaphendula ngokuthi ewe yayiyiqonda loo nto kodwa yawaxelela ukuba ayizange ifumane siphoso kumaNgqina kaYehova. Yahlabela mgama yathi: ‘Kuyo yonke iminyaka ebendiyiNgotya ngayo, akukho nokuba sibe sinye isihlandlo ekwathi ngaso nawuphi na wamaNgqina kaYehova weziswa kule nkundla yam ngenxa yesenzo esiphosakeleyo. Kwelinye icala, ukuba efama kubiwe icassava kudla ngokuba ngumKatolika oyibileyo. Ukuba kubiwe iyam, sukuba ibiwe ngumRhabe. Abantu becawa yenu balingcolise ngokuqhomfa ilizwe lam, ukanti akukho namnye wakumaNgqina kaYehova oye weziswa kule nkundla yam ngenxa yamatyala anjalo. Ngaba imithetho kaThixo ayibaleli na ububi obunjalo, okanye ngaba iicawa azisabotshelelwanga na ngumthetho kaThixo?’ Abefundisi abazange batsho nelimdaka.
“Kamva iNgotya yabiza abameli bamaNgqina kaYehova yaza yababongoza ukuba bazinyamekele ukuze lingangcikivwa igama loThixo wabo negama layo njengeNgotya eye yathetha ngokuphandle ngamaNgqina kaYehova.”
Ingxelo ithi ngoku abaninzi abasebatsha bamela inyaniso. Elinye iNgqina lichaza ukuba kutshanje liye lakwazi ukuqalisa izifundo zeBhayibhile neenkosi ezintathu ezikummandla elikuwo, enye yazo iyiNgotya ekuthethwa ngayo apha, yaye zontathu ziyaya kwiintlanganiso zamaNgqina kaYehova!
UYehova uThixo uyabazi abo bayithandayo nabathetha ngokuphandle ngenyaniso nobulungisa ngenxa yabakhonzi bakhe.—Mateyu 10:42.