Abathunywa Boxolo LobuThixo Bayahlanganisana
UMDALA othile ongumKristu waseUnited States uthi: “Siye sakhiwa kwindibano nganye esiya kuyo. Noko ke, eyalo nyaka ayichazeki. Suku ngalunye sasihamba sizibuza enoba usuku olulandelayo lwaluya kulugqwesa ulindelo lwethu kusini na, ibe asizange siphoxeke!”
Ukuba ubukho kwenye yeeNdibano zeSithili “Zabathunywa Boxolo Lobuthixo,” alithandabuzeki elokuba uyavumelana nolu ndwendwe lunehlombe. Kusuku ngalunye lwendibano kwakunikelwa ingqalelo kwinkalo eyahlukileyo yothumo amaNgqina kaYehova aluphumezayo njengabathunywa bakaThixo. Makhe senze impinda yolo cwangciso lweentsuku ezintathu.
“Hayi Indlela Abukeka Ngayo . . . Lowo Uvakalisa Uxolo”
Lo yayingumxholo wosuku lokuqala lwendibano. Wawusekelwe kuIsaya 52:7. Kula maxesha anobunzima, abaninzi bakhonza uYehova phantsi kweemeko ezilucelo-mngeni. Intetho ethi “Ukuphulaphula Abavakalisi Boxolo Abanenzondelelo” yayiquka udliwano-ndlebe nabathile kwaba bathembekileyo. Ukuphulaphula oko babekuthetha ngokwenene kwakulukhuthazo, kwaye ngaloo ndlela abo babeze endibanweni baqinisekiswa ukuba uYehova unokubomeleza nabo, ade abanike “amandla angaphaya koko kuqhelekileyo” ukuze abancede banyamezele.—2 Korinte 4:7.
Oko kufunwa nguYehova akuloxanduva. (1 Yohane 5:3) Oku kwenziwa kwacaca kwintetho yokugqibela yocwangciso lwakusasa, eyafikelela kuvutho-ndaba lwayo ngokukhutshwa kwencwadana enemifanekiso enamaphepha angama-32 enomxholo othi Yintoni UThixo Ayifunayo Kuthi? Le ncwadi intsha inemifanekiso emihle eluncedo ekufundisiseni ngokuqinisekileyo iza kuba nendima ebalulekileyo ekuncedeni abaninzi ngakumbi bafunde ngeenjongo zikaThixo. Amagqabaza aphathelele ukusetyenziswa kwale mpapasho intsha afumaneka kwinqaku lokugqibela elifundwayo leli phephancwadi nakwiphepha 16 nele-17.
Intetho ethi “Ukunyamezela Emsebenzini Olungileyo” yabethelela ukuba uYehova uzazi kakuhle iimvavanyo zethu. Ukunyamezela kuthetha ukuba sima siqinile yaye asilahlekelwa lithemba. UYehova usinike iLizwi lakhe, umoya wakhe nentlangano yakhe ukuze zisincede. Ukuze sishumayele kufuneka sinyamezele, ukanti ukushumayela kuyasinceda sinyamezele, kuba kugcina ukholo lwethu luphilile. Ekubeni sesisondele kangaka esiphelweni, asifanele sivumele iingxaki zethu zisenze sibe dikidiki, kuba ngabanyamezela kude kuse esiphelweni kuphela abaya kusindiswa.—Mateyu 24:13.
Intetho engumxholo ethi, “Indima Yethu Njengabathunywa Boxolo Lobuthixo,” yatsalel’ ingqalelo ekukhululweni kwabathinjwa abangamaYuda eBhabhiloni nokubuyiselwa konqulo olunyulu eYerusalem ngowama-537 B.C.E. Isithethi sathi esi siganeko, sasikukungcamla nje oko uBukumkani bukaThixo buya kukuphumeza kungekudala ehlabathini lonke. (INdumiso 72:7; Isaya 9:7) Isabelo sethu ngoku kukushumayela iindaba ezilungileyo zobu Bukumkani nokuphila ngokuvisisana neso sigidimi. Ukuthanda uThixo nommelwane kufanele kusishukumisele ekubeni siqhubeke nalo msebenzi singayekeleli.—IZenzo 5:42.
Imbalasane yocwangciso lwangoLwesihlanu yayilungcelele lweentetho oluthi “Yilumkele Imigibe Efihlakeleyo Yokuzonwabisa.” Umculo wanamhlanje, imifanekiso bhanyabhanya, iividiyo, iinkqubo zikamabonwakude, imidlalo yevidiyo, iincwadi, amaphephancwadi neencwadi ezihlekisayo ngokufuthi zibonakalisa iingcamango zobudemon. Ngoko ke, kufuneka ‘sikwenyanye oko kungendawo’ size ‘sinamathele koko kulungileyo.’ (Roma 12:9) Ewe, ukuzonwabisa okonakeleyo simele sikuthiye size sikuphephe, ngoxa sicinga ngezinto ezinyulu, ezinesidima nezifanelwe yindumiso. (Filipi 4:8) Iimpapasho nezixhobo zokwenza uphando ezilungiselelwa yintlangano kaYehova zivuselela iingqondo zethu ngeengcamango ezakhayo zize zisiqeqeshe ukuze sahlule okulungileyo kokubi. (Hebhere 5:14) Sifanele sinamathele kula malungiselelo njengoko besinokubambelela enqanaweni xa ulwandle lungazolanga.
Kwalandela intetho ethi “Mchase UMtyholi—Yiba Nekhwele.” Ngaphambi nje kokuba angene kwiLizwe Ledinga, amawaka amaSirayeli angena emgibeni wokuziphatha okubi. UPinehasi waba nekhwele ngonqulo lokwenyaniso. Wathabatha inyathelo eliqatha nxamnye nabenzi bobubi, kwaye ukuzinikela kwakhe ngokukhethekileyo kwamkholisa uYehova. (Numeri 25:1-13) Usukelo lukaSathana kukwenza ngamnye wethu angakufanelekeli ukungena kwihlabathi elitsha likaThixo. Ngoko ke njengoPinehasi, sifanele siyichase imigudu kaMtyholi yokusingcolisa. Enoba sitshatile okanye asitshatanga, simele ‘sisabe kulo uhenyuzo.’—1 Korinte 6:18.
Intetho eyayiqukumbela usuku lokuqala lwendibano yayisithi “Ukubambelela Ngokunyaniseka Kwingqibelelo YeLizwi LikaThixo.” Abaguquleli abaninzi baguqula okanye bashenxise iindinyana ezithile zeZibhalo. Ngokomzekelo, ukuze baxolise abameli bamalungelo abafazi, abaguquleli beThe New Testament and Psalms: An Inclusive Version ababhekiseli kuThixo njengoBawo, kodwa bathi nguBawo-Mama yaye kuYesu bathi “Lowo unguMntu” kunokuba bathi “uNyana womntu.” Ngokungafaniyo noko, iNew World Translation inamathela ngokuthembekileyo kumbhalo wolwimi lwamandulo kangangokuba iye yacacisa indlela esicinga ngayo kwimibandela eliqela engokweZibhalo. Ngokomzekelo, isithethi sathi: “Yayiziinguqulelo ezichanileyo ezikwiNew World Translation ezabangela ukuba kuhlengahlengiswe amabandla ngokumisela amaqumrhu abadala, kulandelwa ngokusondeleyo kumzekelo webandla lamaKristu lenkulungwane yokuqala.” Sibonakalisa ukunyaniseka kwethu kwiLizwi likaThixo ngokulifunda imihla ngemihla nangokusebenzisa isiluleko salo. Kwakhona isithethi sathi: “Sibonakalisa ukuba singabameli abanyanisekileyo beLizwi likaThixo ngokulishumayela ngenkuthalo kwabanye nangokulisebenzisa ngenyameko xa sifundisa abanye, singalenzi livisisane neengcamango zethu ngokugqwetha okanye songezelele koko likuthethayo.”
‘Uxolo LukaThixo Lugqwesa Yonke Ingcamango’
Lo mxholo, osekelwe kweyabaseFilipi 4:7, wahlahl’ indlela yosuku lwesibini lwendibano. Inkcazelo eninzi eyadluliselwayo yayiphathelele imbono efanelekileyo kabani ngobulungiseleli bakhe, intsapho, ukuzahlulela nezinye iinkalo zobomi bemihla ngemihla.
Emva kwengxubusho yetekisi yosuku, ungcelele lweentetho olwanikelwayo lwalunomxholo othi “Abathunywa Abashumayela Iindaba Ezilungileyo Zoxolo.” Isigidimi sethu sesoxolo, kwaye sifanele sidluliswe ngoxolo. (Efese 6:15) Injongo yethu kukufikelela iintliziyo, kungekhona ukuxambulisana. Uqeqesho kunye neempapasho esizifumana kwintlangano kaYehova ziyasinceda ukuze senjenjalo kanye. Asifanele sivumele ukungabi namdla kwabantu kusityhafise. Kunoko, sifanele siqhubeke ‘sisenza unako-nako,’ senze ufundisiso lobuqu, ukuya ezintlanganisweni kunye nokuba nenxaxheba kumsebenzi wokushumayela zibe yimisebenzi yesiqhelo. (2 Timoti 2:15) Into engafanele kulityalwa kukwenzela abanye izinto ezilungileyo, ngokukodwa abo bahlobene nathi elukholweni. (Galati 6:10) Kakade ke, ukwenza unako-nako akuthethi kuthi sisebenze ngokugqith’ emgceni. Oko ngamnye wethu akwaziyo ukukwenza ngokwamandla neemeko zakhe kwamkelekile kuYehova.
Abantu bakaThixo banikela ngexesha, ngamandla nangezinto zabo ukuze bahambisele phambili izilangazelelo zoBukumkani. Intetho ethi “Ukunikela Ngokuchwayita Kwintlangano KaYehova” yavelisa ingongoma yokuba njengoko abantu abaninzi ababumvu besabela kwisigidimi soBukumkani, kufuneka izixhobo, iindawo zokuhlanganisana nezakhiwo zamasebe ezingakumbi. Iminikelo yethu yenza intlangano ikwazi ukufumana nantoni na efunekayo ukuze kwenziwe umsebenzi wokushumayela wehlabathi lonke. Kwakhona ukupha ngesisa kukubonakalisa imbeko kuYehova kwaye kuzisa uvuyo kulowo uphayo. Ngoko ke, njengamaKristu, asimele siyityeshele le nkalo ibalulekileyo yonqulo lwethu.—2 Korinte 8:1-7.
Ukuqukumbela ucwangciso lwakusasa kwabakho intetho yobhaptizo—esoloko iyimbalasane kwiintlanganiso ezinkulu zamaNgqina kaYehova. Hayi indlela ekwakuvuyisa ngayo ukubona ababesandul’ ukuzahlulela belandela emanyathelweni kaYesu ngokuvuma ukubhaptizwa emanzini! (Mateyu 3:13-17) Bonke abathabatha eli nyathelo baye bafundiswa ngowona mthombo wobulumko ubalaseleyo—iBhayibhile. Ngaphezu koko, baye bafumana injongo yokwenene yobomi, yaye basikelelwe ngokuba noxolo olubangelwa kukwazi ukuba benza okulungileyo.—INtshumayeli 12:13.
Kwanikelwa isiluleko esingqalileyo kwintetho ethi “Vumela Ukuqonda Kukulondoloze.” Ukuqonda kubaluleke gqitha ngokuphathelele iinkqubano zoshishino. Asifanele senze imisebenzi yeshishini lobuqu kwiHolo yoBukumkani, singafanele sicinezele amaKristu esikhonza nawo ukuze sifumane imali. (Thelekisa uYohane 2:15, 16.) Ukuqonda kukwafuneka nasekutyaleni imali kwishishini elithile okanye ekubolekeni okanye ekubolekiseni ngemali. Isithethi sathi: “Ukutshona kwamashishini phakathi kwamaKristu kuye kwakhokelela kudano nokuphulukana nobumoya kwabo basukela phezulu ekungeneleni amacebo ayingozi okwenza imali.” Nangona kungaphosakalanga ukuba amaKristu aqhube ishishini kunye, ngokuqinisekileyo kufuneka alumke. Yaye xa esenza isivumelwano seshishini, kufuneka ngalo lonke ixesha sibhalwe phantsi.
Imilinganiselo kaThixo ngamadoda namabhinqa yaxutyushwa kwintetho ethi “Wabadala Bayindoda Nebhinqa.” Indima yezi zini iye yaguqulwa ukutyhubela imbali. Isithethi sathi: “Ngempazamo abaninzi bacinga ukuba ezi mpawu zobudoda zithetha ukulawula ngegqudu, ubungqwabalala, okanye ukusebenzisa izigalo. Kwezinye iindawo bekuya kuba yinto enqabileyo, okanye ide ibe lihlazo, ukuba indoda ilile phambi kwabantu okanye nangasese. Ukanti, uYohane 11:35 ubalisa ukuba xa wayephakathi kwesihlwele kufuphi nengcwaba likaLazaro, ‘zasuka zathi waxa iinyembezi kuYesu.’” Kuthekani ngamabhinqa? Ngokufuthi iimpawu zobubhinqa zinxulunyaniswa nobuhle. Kodwa isithethi sabuza: “Ukuba ibhinqa lihle kodwa alinabulumko kwaye lithanda ukuxambulisana, liyakwekwa xa lithetha, okanye linekratshi, ngaba ngokwenene lingalihle ngokwentsingiselo yelo gama, iimpawu zokwenene zobubhinqa?” (Thelekisa IMizikeliso 11:22; 31:26.) Amadoda namabhinqa angamaKristu azabalazela ukulandela imilinganiselo yeBhayibhile ngentetho, ngehambo nangokuzilungisa kwawo. Isithethi sathi: “Indoda ebonakalisa isiqhamo somoya kulula ukuyihlonela, yaye ibhinqa elenjenjalo kulula ukulithanda.”—Galati 5:22, 23.
Kwalandela ungcelele lweentetho oluthi “UThixo Woxolo Ukukhathalele.” AmaKristu amaninzi axhalatyiswe kukunqongophala kwemali. Noko ke, uYehova uyathembisa: “Andiyi kuze nangayiphi na indlela ndikushiye, ndingayi kuze nangayiphi na indlela ndikutyeshele.” (Hebhere 13:5) Phezu kwabo nje ubunzima bezoqoqosho, bambi baye babonakalisa intembelo kwesi sithembiso ngokuthabatha inkonzo yobuvulindlela bobuncedani okanye yobuthe ngxi. Abanye abangenako ukuba ngoovulindlela ngoku baye babeka tanci izilangazelelo zoBukumkani ngokusebenzisa onke amathuba ukuze banikele ubungqina. (Mateyu 6:33) Yonke imigudu enjalo imele inconywe! Intlangano kaYehova iye yalungiselela iimpapasho ezininzi zokusinceda kubulungiseleli bethu nokuze sikwazi ukumelana neengxaki zethu. Ukuba sibonakalisa uxabiso ngamalungiselelo kaYehova okomoya, uya kusisikelela ngoxolo kula maxesha anamanzithinzithi ezoqoqosho.—INdumiso 29:11.
Ekuqukunjelweni kwentetho yokugqibela yolo suku ethi “Sebenzela Uxolo Lobuthixo Kubomi Bentsapho,” ababeze endibanweni bavuyiswa kukufumana incwadi entsha ethi, Imfihlelo Yolonwabo Lwentsapho. Isithethi sathi: “Yifundisise ngenkuthalo le ncwadi uwedwa nanjengamaqela eentsapho. Ngokunyaniseka zabalazela ukusebenzisa isiluleko sayo esisekelwe eBhayibhileni, yaye ngokuqinisekileyo uya kulwandisa uxolo nolonwabo lwentsapho yakho.”
“Ukugcina Ubunye . . . Kumxokelelwane Omanyanisayo Woxolo”
Lo yayingumxholo ofanelekayo wosuku lokugqibela lwendibano, owawusekelwe kweyabase-Efese 4:3. AmaNgqina kaYehova, ahlanganiswe kuzo zonke iintlanga zehlabathi, afundiswe nguThixo. Ngenxa yoko, ayaluthanda uxolo. Alandela umzekelo kaYesu yaye azabalazela “ukugcina ubunye bomoya kumxokelelwane omanyanisayo woxolo.”
Uxolo olungaphakathi kwentlangano kaThixo lwabalaseliswa kungcelele lweentetho oluthi “Ukufanisa Abathunywa Bokwenyaniso.” Abaprofeti bobuxoki babekho kuSirayeli wamandulo. Noko ke, abathunywa bokwenyaniso bakaThixo—abaprofeti abanjengoIsaya, uHezekile noYeremiya—ngokuchanileyo baxela kusengaphambili ngokuwa kweYerusalem, ixesha lokuthinjwa, nokukhululwa ekugqibeleni kwabantu bakaThixo. Kunjalo nanamhlanje. Abathunywa bobuxoki bangangoboya benja kunqulo lobuxoki nakwezobupolitika. Sekunjalo, uYehova uye wavelisa amaNgqina akhe ukuze avakalise iinjongo zakhe ngokuphathelele le nkqubo yezinto. Ngokukodwa ukususela ngowe-1919, abakhonzi bakaYehova baye basetyenziswa ukuvakalisa isigidimi sikaThixo. Hayi indlela abahluke ngayo kubathunywa bobuxoki beNgqobhoko! Ngamana singakhuthala ekufezeni indima yethu kulo msebenzi de uYehova athi kwanele.
Intetho ethi “Liphulaphule Uze Ulithobele ILizwi LikaThixo” yabethelela into yokuba iZibhalo zingowona mthombo ubalaseleyo wolwalathiso, intuthuzelo nethemba. (Isaya 30:20, 21; Roma 15:4) Ihlabathi lanamhlanje liya lisiba nguvula-zibhuqe. Ngoko ke, kufuneka siphulaphule isiluleko esivela kwiLizwi likaThixo nakwintlangano ngakumbi kunanini na ngaphambili. UYehova uyabazi ubuthathaka bethu, yaye kwiLizwi lakhe ulichaze ngokucacileyo ikhondo eliya kuba yingenelo kuthi. Ukwazi ukuba uYehova uyasixhasa kusinika intembelo yokuqhubela phambili kuyo nantoni na ayifunayo kuthi.
Oku kwaba yingabula-zigcawu yomdlalo owalandelayo owawunabadlali ababenxibe isinxibo samandulo nesale mihla. Wawunomxholo othi “Kutheni Sifanele Siwahlonele Amalungiselelo Obuthixo?” Usekelwe kwingxelo yeBhayibhile kaGidiyon, lo mdlalo wadlulisela isifundo esibalulekileyo—simele silandele imiyalelo kaThixo size singafakeleli iingcamango zethu okanye sizame ukutyeshela isiluleko esingokobuthixo.
Intetho yesidlangalala yayinomxholo othi “Uxolo Lokwenyaniso Ekugqibeleni!—Luvela Kuwuphi Umthombo?” Uxolo oluthenjiswa nguThixo lungaphaya kwayo nayiphi na into eli hlabathi elinokuyicinga. Isithethi sathi: “Uxolo lokwenyaniso luthetha ukuba seluxolweni imihla ngemihla. Uxolo lukaThixo luthetha ihlabathi elingenazigulo, iintlungu, usizi nokufa.” IBhayibhile isixelela ukuba uYehova ‘uphelisa iimfazwe kude kuse eziphelweni zehlabathi.’ (INdumiso 46:9) Uza kukwenza njani oku? Ngokushenxisa umphembeleli weemfazwe, uSathana uMtyholi. (ISityhilelo 20:1-3) Oku kuya kuvula indlela ukuze abalulamileyo ‘balidle ilifa ilizwe, baziyolise ngobuninzi boxolo.’—INdumiso 37:11.
Emva kokushwankathelwa kwenqaku lesifundo seMboniselo saloo veki, kwanikelwa intetho yokuqukumbela indibano. Le ntetho ihlab’ umxhelo inomxholo othi “Ukutyhalela Phambili Njengabathunywa Boxolo Lobuthixo,” yabethelela ukuba umsebenzi wethu wokushumayela wahlukile yaye ungxamisekile. Ngoku asiloxesha lokuthi zava, lokunqena okanye lokubuyela kwiingcamango eziphosakeleyo. Sixhotyiswe ngoko sikufunayo—isigidimi sikaThixo, umoya wakhe oyingcwele namalungiselelo amaninzi avela kwintlangano yakhe engokwasezulwini. Ngoko njengabakhonzi bakaYehova, ngamana singaqhubeka sisiya phambili njengabathunywa boxolo lobuthixo!
[Ibhokisi/Imifanekiso ekwiphepha 9]
Ilungiselelo Lothando Leentsapho
Abo babezile kusuku lwesibini lweNdibano YeSithili “Yabathunywa Boxolo Lobuthixo” bachulumanciswa kukufumana impapasho entsha ethi Imfihlelo Yolonwabo Lwentsapho. Le ncwadi iqulethe inkcazelo engokweZibhalo eya kuba yingenelo kuzo zonke iintsapho ezithanda uThixo.
Umdala othile waseConnecticut, eUnited States, ugqabaza athi: “NgoJuni 15, siye safumana incwadi yethu ethi Ulonwabo Lwentsapho. NgoJuni 16, ndandisele ndifunde isiqingatha sayo. Ngosuku lwe-17, saqalisa isifundo sentsapho kuyo, ibe sakhuthazeka gqitha! Kwangolo suku, ndagqiba ukuyifunda le ncwadi. Alithandabuzeki elokuba le mpapasho intle iza kuthandwa ngabo bazinika ithuba layo. Ukuthetha phandle nenkcazelo esexesheni yale ncwadi zinikela ubungqina obungakumbi bokuba ‘ikhoboka elithembekileyo neliyingqondi’ linikela ‘ukutya ngexesha elifanelekileyo’ yaye lizazi kakuhle iintswelo zethu kule mihla izaliswe ziimvavanyo.”—Mateyu 24:45-47.
[Umfanekiso okwiphepha 7]
Abaselula nabakhulileyo bakufuna ngokufanayo ukwazi oko kufunwa nguThixo