Ithetha Ntoni Inkululeko Yonqulo Kuwe?
Nangona inkululeko yonqulo igqalwa ililungelo elisisiseko eUnited States, umoya wogonyamelo wamahlokondiba anxamnye namaNgqina kaYehova wagquba kwelo lizwe ngeminyaka yee-1940
IZIGIDI ziye zayilwela. Bambi bade bafa ngenxa yayo. Ngokwenene yenye yezinto ezixabisekileyo eluntwini. Yintoni leyo? Yinkululeko! IThe World Book Encyclopedia ichaza inkululeko “njengamandla okwenza ukhetho nokuluphumeza.” Ihlabela mgama isithi: “Ngokwembono yomthetho, abantu bakhululekile ukuba ibutho labantu alithwaliswa okungekho sikweni, izinto ezingeyomfuneko okanye imiqathango engenalwazelelelo kubo. Ibutho labantu likwamele likhusele amalungelo alo—oko kukuthi, inkululeko yalo esisiseko, amagunya namalungelo.”
Le ngcamango ivakala ilula. Noko ke, xa kufuneka yenziwe, phantse kubonakala kungenakwenzeka ngabantu ukuba bavumelane ngokuthe ngqo nalapho ifanele iphelele khona imida yenkululeko. Ngokomzekelo, bambi bakholelwa ukuba oorhulumente bafanele bamisele imithetho ekhusela inkululeko yabemi babo. Kodwa abanye baya kuphikisa ngelithi le mithetho ingqongqo ngokugqith’ emgceni ngenxa yoko abemi kufuneka bekhululwe kuyo! Licacile elokuba, inkululeko ithetha izinto ezahlukeneyo kubantu abahlukahlukeneyo.
Kuthekani Ngenkululeko Yonqulo?
Mhlawumbi eyona nkululeko ingundaba-mlonyeni yinkululeko yonqulo, ecaciswa “njengelungelo lokukholelwa kwinto ethile nokuphila kukabani ngokokholo alukhethileyo.” Ngokutsho kweUnited Nations Universal Declaration of Human Rights, “wonk’ umntu unelungelo lokucinga, lokusebenzisa isazela nokunqula ngendlela athanda ngayo.” Oku kuquka ilungelo likabani “lokutshintsha unqulo lwakhe okanye into ayikholelwayo,” kunye nenkululeko “yokubonakalisa unqulo okanye ukholo ngokulufundisa, ngokuluqhelisela, ngokunqula nokuluthobela.”—Inqaku 18.
Ngokuqinisekileyo, besiya kulindela ukuba naliphi na ilizwe elibanyamekela ngokwenene abantu balo libanike inkululeko elolo hlobo. Okubuhlungu kukuba, oku akusoloko kusenzeka. IThe World Book Encyclopedia ithi: “Unqulo luchaphazela ezona mvakalelo zinzulu zabantu abaninzi, bambi oorhulumente baye benza amaqhina aqinileyo nolunye unqulo baze balujonga olunye lusisisongelo kwigunya lezobupolitika. Kwakhona urhulumente usenokulujonga unqulo njengoluyingozi kwezobupolitika ngenxa yokuba lusenokubeka phambili ukukhonza uThixo ngaphezu kokuthobela urhulumente.”
Ngenxa yezi zizathu bambi oorhulumente babeka imiqathango ngoko kumele kwenziwe lunqulo. Abambalwa abalufuni ngokupheleleyo naluphi na unqulo. Noko ke, abathile nangona bezibanga bexhasa inkululeko yonqulo, bayilawula ngokungqongqo yonke imisebenzi yonqulo.
Ngokomzekelo, khawuqwalasele imeko eyesameleyo kangangeminyaka emininzi eMexico. Nangona uMgaqo-siseko wawuqinisekisa inkululeko yonqulo, wagxininisa wathi: “Iicawa ezisetyenziselwa unqulo lukawonke-wonke ziyindawo yeSizwe, zimelwa nguRhulumente Womanyano, oya kumisela ezo zinokuqhubeka zisetyenziswa.” Ngowe-1991 loo Mgaqo-siseko walungiswa ukuphelisa lo mqathango. Sekunjalo, lo mzekelo ubonisa ukuba inkululeko yonqulo isenokucaciswa ngenye indlela kwimimandla eyahlukeneyo.
Olunye Uhlobo Lwenkululeko Yonqulo
Ngaba ikho inkululeko yonqulo kwilizwe ohlala kulo? Ukuba ikho, icaciswa njani? Ngaba unokumnqula uThixo ngendlela othanda ngayo, okanye ngaba unyanzelelwa ukuba ube lilungu lonqulo lukaRhulumente? Ngaba uyavunyelwa ukuba ufunde uze usasaze uncwadi lonqulo, okanye ngaba uncwadi olulolo hlobo olushicilelweyo alukho mthethweni kurhulumente? Ngaba unako ukuthetha nabanye ngonqulo lwakho, okanye oko kujongwa njengokuvukela amalungelo eenkonzo zabanye?
Iimpendulo zale mibuzo zixhomekeke kwindawo ohlala kuyo. Noko ke, okubangel’ umdla kukuba, kukho uhlobo lwenkululeko yonqulo olungaxhomekekanga ngokupheleleyo kwindawo ohlala kuyo. Ngoxa uYesu wayeseYerusalem ngonyaka wama-32 C.E., wathi kubalandeli bakhe: “Ukuba nithe nahlala kulo izwi lam, ngokwenene ningabafundi bam, yaye niya kuyazi inyaniso, ibe inyaniso iya kunikhulula.”—Yohane 8:31, 32.
Wayethetha ukuthini uYesu ngala mazwi? AmaYuda awayemphulaphule ayelangazelela ukukhululwa kulawulo lwamaRoma. Kodwa uYesu wayengathethi ngokukhululeka kwingcinezelo yezobupolitika. Kunoko, wayethembisa abafundi bakhe into elunge ngakumbi, njengoko siza kubona kwinqaku elilandelayo.