Benza Ukuthanda KukaYehova

UYesu Uzukiswa NjengoMesiya NoKumkani!

ISIHLWELE esixokozelayo esingena eYerusalem ngoNisan 9, 33 C.E., sothusa amaYuda amaninzi. Nangona yayingeyonto engaqhelekanga ukubona abantu bengumsinga ukuthontelana kweso sixeko ngaphambi kwePasika, ezo ndwendwe zazikhethekile. Oyena mntu wayebalasele phakathi kwazo yayiyindoda ekhwele inkonyana le-esile. Loo ndoda yayinguYesu Kristu, yaye abantu babesandlala izambatho namagqabi esundu phambi kwakhe njengoko babedanduluka besithi: “Sindisa, siyathandaza, uNyana kaDavide! Usikelelwe lowo uza egameni likaYehova! Msindise, siyathandaza, kwiindawo eziphakamileyo phezulu!” Ekuboneni kwabo isihlwele, abaninzi ababesele beseYerusalem bachukumiseka baza bangenelela loo mngcelele.—Mateyu 21:7-9; Yohane 12:12, 13.

Nangona ngoko wayesele ezukiswa, uYesu wayesazi ukuba ulindelwe zizilingo. Kaloku, kwiintsuku nje ezintlanu, wayeza kubulawelwa kwakwesi sixeko! Ewe, uYesu wayesazi ukuba iYerusalem yayingummandla onobutshaba, yaye wahamba ebonakala kweso sixeko enoko engqondweni.

Ukuzaliseka Kwesiprofeto Samandulo

Ngowama-518 B.C.E., uZekariya wawuxela kwangaphambili umngcelele woloyiso lukaYesu engena eYerusalem. Wabhala: “Duma, [ngoloyiso, NW] ntombi inguYerusalem; yabona, uKumkani wakho uza kuwe, elilungisa, enosindiso, enentobeko, ekhwele e-esileni. . . . Athethe uxolo kwiintlanga; ulawulo lwakhe luthabathele elwandle luse elwandle luthabathele kuwo uMlambo luse eziphelweni zehlabathi.”—Zekariya 9:9, 10.

Ngoko ukungena kukaYesu eYerusalem ngoNisan 9 kwazalisekisa isiprofeto seBhayibhile. Yayingesosiganeko esenzeka ngesiquphe kodwa sasicetywe kakuhle. Ngaphambilana, ngoxa wayengaphandle nje kweYerusalem, uYesu wayalela abafundi bakhe ababini oku: “Bekekani endleleni niye kwidolophana ephambi kwenu, yaye kwaoko niya kufumana iesile libotshelelwe, inkonyana le-esile likunye nalo; wakhululeni nize niwazise kum. Kwaye ukuba uthile uthetha nantoni na kuni, nimele nithi, ‘INkosi iyawafuna.’ Ngako oko uya kuwathumela ngoko nangoko.” (Mateyu 21:1-3) Kodwa kutheni uYesu wayefuna ukukhwela iesile ukuya eYerusalem, yaye yayiyintoni intsingiselo yoko kwakusenziwa sisihlwele?

Isigidimi EsingoBukumkani

Umfanekiso obonakalayo udla ngokuba namandla ngakumbi kunamazwi athethwayo. Ngenxa yoko, maxa wambi uYehova wayebenza abaprofeti bakhe benze oko kusisigidimi sabo ukuqinisekisa oko bakuprofetayo. (1 Kumkani 11:29-32; Yeremiya 27:1-6; Hezekile 4:1-17) Le ndlela ibalaseleyo yonxibelelwano ngokwenza umboniso yashiya umbono ongacimekiyo engqondweni yaso nesona sakhi-mkhanya esinentliziyo eqaqadekileyo. Ngendlela efanayo, uYesu wadlulisela isigidimi esinamandla ngokukhwela iesile engena kwisixeko saseYerusalem. Njani?

Ngamaxesha okubhalwa kweBhayibhile iesile lalisetyenziselwa iinjongo ezibalaseleyo. Ngokomzekelo, uSolomon wakhwela “kundlebende” kayise, inzala ye-esile eliliduna esiya kuthanjiswa njengokumkani. (1 Kumkani 1:33-40) Ngoko ukuya kukaYesu eYerusalem ekhwele iesile kwakuya kuthetha ukuba wayezazisa njengokumkani.a Oko kwenziwa sisihlwele kwakuqinisekisa esi sigidimi. Akuthandabuzeki ukuba, eli qela lalinabemi baseGalili, abandlala izambatho zabo phambi kukaYesu—senzo eso sasikhumbuza ukwaziswa esidlangalaleni kobukumkani bukaYehu. (2 Kumkani 9:13) Ukubazisa kwabo kuYesu ‘njengoNyana kaDavide’ kwakubethelela ilungelo lakhe elingokwasemthethweni lokulawula. (Luka 1:31-33) Yaye ukusebenzisa kwabo amasebe esundu kwakububungqina obubonisa ukuzithoba kwabo kwigunya lakhe lobukumkani.—Thelekisa ISityhilelo 7:9, 10.

Ngoko umngcelele owawusiya eYerusalem ngoNisan 9 wadlulisela isigidimi esicacileyo sokuba uYesu wayenguMesiya noKumkani omiselwe nguThixo. Kambe ke, asingabo bonke abavuyayo xa bebona uYesu ebekwa ngale ndlela. Ngokukodwa abaFarisi babecinga ukuba kwakungafanelekanga ukuba uYesu awongwe ngembeko elolo hlobo engokwasebukhosini. Ngokungathandabuzekiyo bathetha ngomsindo, bemnkqangisa besithi: “Mfundisi, khalimela abafundi bakho.” Ekuphenduleni uYesu wathi: “Ndiyanixelela ukuba, Ukuba aba bangahlala bethe cwaka, amatye ebeya kudanduluka ngamandla.” (Luka 19:39, 40) Ewe, uBukumkani bukaThixo babungumxholo wentshumayelo kaYesu. Ngenkalipho wayeya kuvakalisa esi sigidimi enoba abantu bayasamkela okanye abasamkeli.

Oko Sikufundayo Koku

Kwakufuna isibindi ukuba uYesu angene eYerusalem ngendlela eyaxelwa kwangaphambili ngumprofeti uZekariya. Wayesazi ukuba ngokwenza njalo wayeziqhwayela ukhwembekhwembe kwiintshaba zakhe. Ngaphambi kokuba anyukele ezulwini, uYesu wathuma abafundi bakhe ukuba bashumayele iindaba ezilungileyo zoBukumkani bukaThixo nokuba ‘benze abafundi abantu beentlanga zonke.’ (Mateyu 24:14; 28:19, 20) Ukuphumeza lo msebenzi kukwafuna isibindi. Asingabo bonke abakuthandayo ukuphulaphula esi sigidimi. Bambi abanamdla kuso, ngoxa abanye besichasa. Bambi oorhulumente baye bamisela imiqathango kumsebenzi wokushumayela okanye bawuvala ngokupheleleyo.

Sekunjalo, amaNgqina kaYehova ayaqonda ukuba iindaba ezilungileyo zoBukumkani bukaThixo obamiselwayo zimele zishunyayelwe, enoba abantu bayaphulaphula okanye akunjalo. (Hezekile 2:7) Njengoko eqhubeka esenza lo msebenzi osindisa ubomi, kwakhona aqinisekiswa ngedinga likaYesu elithi: “Khangelani! ndikunye nani yonke imihla de kube sekuqoshelisweni kwenkqubo yezinto.”—Mateyu 28:20.

[Imibhalo esemazantsi]